Ná Hesai Pii Yɛ Shiɛmɔ Nitsumɔ Lɛ Mli​—Sɛɛkuukɛsaramɔ Feemɔ

NƆ HEWƆ NI EHE HIAA: Mɛi ni yɔɔ Maŋtsɛyeli sane lɛ he miishɛɛ lɛ ateŋ mɛi babaoo miitao amɛle anɔkwale ni kɔɔ Nyɔŋmɔ he. (Yes 55:6) Bɔ ni afee ni wɔnyɛ wɔtsɔɔ amɛ nii koni amɛya amɛhiɛ lɛ, esa akɛ wɔya amɛŋɔɔ shii abɔ. Mɛi kɛ naagbai srɔtoi kpeɔ, no hewɔ lɛ esoro gbɛ ni wɔbaanyɛ wɔtsɔ nɔ wɔye wɔbua amɛ. Shi kɛ́ wɔsaa wɔhe jogbaŋŋ, ni wɔkɛfee oti ni ma wɔhiɛ akɛ be fɛɛ be ni wɔbaayasara amɛ lɛ, wɔkɛ amɛ baaje Biblia mli nikasemɔ shishi lɛ, wɔsaramɔ lɛ baawo yibii.

BƆ NI OBAAFEE LƐ OHÃ:

• Bɔɔ mɔdɛŋ ni oku osɛɛ oya, ekolɛ yɛ gbii fioo komɛi asɛɛ.​—Mat 13:19

• Jiemɔ naanyobɔɔ kɛ bulɛ kpo. Kaafee kplakpla

• Okɛ miishɛɛ aŋa mɔ lɛ kɛje shishi. Okɛ egbɛ́i atsɛ lɛ. Kaimɔ lɛ nɔ hewɔ ni oku osɛɛ lɛ​—ekolɛ koni oyahã sane ko ni ebi lɛ hetoo, okɛ magazin hee ni eba lɛ ayahã lɛ, okɛ wɔwɛbsaiti lɛ atsɔɔ lɛ, ojie vidio ko ohã lɛ, loo otsɔɔ lɛ bɔ ni wɔkɛ mɛi kaseɔ Biblia lɛ. Tsakemɔ osane lɛ mli kɛ́ ewie nɔ kroko he.​—Fil 2:4

• Okɛ lɛ asusu ŋmalɛ ko he, ni kɛ́ ebaahi lɛ shi wolo ko ohã lɛ, ní okɛ nakai feemɔ ashwie anɔkwale wu ni oyadu yɛ etsui mli lɛ nɔ nu. (1Ko 3:6) Bɔɔ mɔdɛŋ ni onu lɛ shishi

• Okɛ lɛ ato gbɛjianɔ koni oya eŋɔɔ ekoŋŋ