Ná Hesai Pii yɛ Shiɛmɔ Nitsumɔ lɛ Mli—Too Gbɛjianɔ Kɛhã Sɛɛkuukɛsaramɔ

Nɔ Hewɔ ni Ehe Hiaa: Kɛ́ wɔkɛ mɔ ko gba sane ni ená wiemɔ lɛ he miishɛɛ lɛ, wɔmiisumɔ ni wɔku wɔsɛɛ be ni eyɔɔ shĩa, koni wɔnyɛ wɔyashwie anɔkwale dumɔwu ni wɔtɛo lɛ nɔ nu. (1 Kor. 3:6) Bei pii lɛ, dani wɔbaashi mɔ lɛ, ebaabi ni wɔto gbɛjianɔ kɛhã sɛɛkuukɛsaramɔ, kɛtsɔ bi ni wɔɔbi lɛ be ni wɔbaanyɛ wɔba ekoŋŋ lɛ nɔ. Kɛfata he lɛ, ehi akɛ wɔɔshi sanebimɔ ko wɔhã lɛ, koni kɛ́ wɔku wɔsɛɛ lɛ, wɔkɛ lɛ ayasusu he. Enɛ baahã shĩatsɛ lɛ akpa wɔsaramɔ lɛ gbɛ, ni kɛ́ sanebimɔ lɛ hetoo lɛ yɛ wolo ni wɔshi wɔhã lɛ mli lɛ, ebaanya he akɛ ebaakane. Kɛ́ wɔto gbɛjianɔ kɛhã saramɔ ni baanyiɛ sɛɛ lɛ, ehãa efeɔ mlɛo akɛ wɔɔku wɔsɛɛ wɔya mɔ lɛ ŋɔɔ, ejaakɛ wɔhala sane ni wɔkɛ lɛ baayasusu he lɛ momo, ni ele sane ni wɔkɛ lɛ baagba lɛ. Kɛ́ wɔkɛ mɔ lɛ kpe ekoŋŋ lɛ, wɔbaanyɛ wɔhã ele akɛ wɔba koni wɔbahã sanebimɔ ni wɔshi wɔhã lɛ hetoo, kɛkɛ lɛ wɔtsa nɔ.

Bɔ ni Obaafee lɛ Ohã:

Be ni okɛ shiɛmɔ wiemɔ ko saa ohe kɛhã shĩa fɛɛ shĩa shiɛmɔ nitsumɔ lɛ, too sanebimɔ ko ni obaashi ohã shĩatsɛ lɛ koni oyahã hetoo sɛɛ mli lɛ hu he gbɛjianɔ. Ebaanyɛ efee sanebimɔ ko ni damɔ saneyitso ko ni yɔɔ wolo ni okɛhãa nakai gbi lɛ mli lɛ nɔ, loo sanebimɔ ko ni ahã hetoo yɛ woji ni wɔkɛ mɛi kaseɔ lɛ ateŋ ekome mli, ni obaanyɛ okɛhã lɛ kɛ́ oku osɛɛ otee jɛmɛ.
Kɛ́ okɛ mɔ ko gba sane ni ona akɛ ená wiemɔ lɛ he miishɛɛ lɛ, hã ele akɛ obaasumɔ ni oku osɛɛ koni okɛ lɛ abatsa sanegbaa lɛ nɔ, ni oshi sanebimɔ ni okɛsaa ohe lɛ ohã lɛ. Yɛ hei komɛi lɛ, mɛi bɛ dekã kwraa, ni no hewɔ lɛ, ekolɛ amɛbaashashao shi akɛ amɛaato bo be ni obasara amɛ ekoŋŋ. Kɛ́ okɛ shihilɛ ni tamɔ nakai kpe lɛ, obaanyɛ okɛɛ akɛ: “Ani ofɔɔ shĩa hilɛ nɛkɛ beaŋ? [Ŋmɛɛ gbɛ ni ehã hetoo.] Wɔsɛɛ otsi lɛ, masumɔ ni maba koni mikɛ be kukuoo ko abahã sanebimɔ nɛɛ hetoo . . . Ofainɛ kɛ́ miba ni obɛ dekã lɛ, obaanyɛ ohã male.”
Kɛ́ oto shĩatsɛ lɛ be pɔtɛɛ ko ni okɛbaaku osɛɛ lɛ, esa akɛ oye nɔ. (Mat. 5:37) Kɛ́ oomu sɛɛkuukɛsaramɔ lɛ naa lɛ, too gbɛjianɔ kɛhã saramɔ ni baanyiɛ sɛɛ lɛ.

Kaa Enɛ Okwɛ yɛ Nyɔɔŋ Nɛɛ Mli:

Be ni okɛ shiɛmɔ wiemɔ ko saa ohe lɛ, too sanebimɔ ko ni obaayahã hetoo sɛɛ mli lɛ hu he gbɛjianɔ. Okɛ shiɛlɔi krokomɛi ni okɛnyiɛ lɛ agba sanebimɔ ni okɛsaa ohe lɛ he sane.