Ná Hesai Pii yɛ Shiɛmɔ Nitsumɔ lɛ Mli​—Too Gbɛjianɔ Kɛhã Sɛɛkuukɛsaramɔ

NƆ HEWƆ NI EHE HIAA:

Wɔmiisumɔ ni wɔshwie anɔkwale dumɔwui ni wɔduɔ lɛ anɔ nu. (1Ko 3:6) No hewɔ lɛ, kɛ́ mɔ ko jie miishɛɛ kpo lɛ, ehi akɛ wɔbaashi sanebimɔ ko ní wɔbaanyɛ wɔkɛ lɛ asusu he kɛ́ wɔku wɔsɛɛ. Enɛ baahã ekpa wɔ gbɛ, ni ebaahã nibii ni wɔkɛbaasaa wɔhe kɛhã sɛɛkuukɛsaramɔ lɛ afee mlɛo. Kɛ́ wɔku wɔsɛɛ lɛ, wɔbaanyɛ wɔkɛɛ lɛ akɛ wɔba koni wɔbahã sanebimɔ ni wɔshi wɔhã lɛ lɛ hetoo.

BƆ NI OBAAFEE LƐ OHÃ:

• Kɛ́ okɛ shiɛmɔ wiemɔ ko miisaa ohe kɛhã shĩa fɛɛ shĩa shiɛmɔ nitsumɔ lɛ, too sanebimɔ ko ni obaashi ohã shĩatsɛ lɛ koni oyahã hetoo kɛ́ otee eŋɔɔ ekoŋŋ lɛ hu he gbɛjianɔ. Ebaanyɛ efee sanebimɔ ko ni damɔ saneyitso ko ni yɔɔ wolo ni okɛhãa lɛ mli lɛ nɔ. Aloo ebaanyɛ efee sanebimɔ ko ni ahã hetoo yɛ woji ni wɔkɛ mɛi kaseɔ lɛ ateŋ ekome ní obaasumɔ ni okɛhã lɛ kɛ́ oku osɛɛ otee jɛmɛ lɛ mli.

• Kɛ́ okɛ mɔ ko gba sane ni ona akɛ ená wiemɔ lɛ he miishɛɛ lɛ, hã ele akɛ obaasumɔ ni oku osɛɛ koni okɛ lɛ abatsa sanegbaa lɛ nɔ, ni oshi sanebimɔ ni okɛsaa ohe lɛ ohã lɛ. Kɛ́ ebaahi lɛ, bi lɛ egbɛ́i, etɛlifoŋ nɔmba, kɛ he ni eyɔɔ.

• Kɛ́ oto lɛ be pɔtɛɛ ko ni okɛbaaku osɛɛ lɛ, esa akɛ oye nɔ.​—Mat 5:37.