Wɔbaafã Ta Krɛdɛɛ Kɛje Biblia Mli Nikasemɔ Shishi Yɛ September Mli

Yɛ September mli lɛ, wɔbaabɔ mɔdɛŋ waa wɔbi mɔ fɛɛ mɔ kɛji ebaasumɔ ni wɔkɛ lɛ akase Biblia lɛ yɛ Oyi Aná Wala Kɛya Naanɔ! broshuɔ lɛ mli. Shiɛlɔi ni baasɔmɔ akɛ gbɛgbalɔi awalɔi lɛ baanyɛ ahã ŋmɛlɛtswai 30. Te wɔbaafã ta krɛdɛɛ nɛɛ wɔhã tɛŋŋ?

• Klɛŋklɛŋ Sanegbaa: Okɛ broshuɔ lɛ sɛɛ kwraa lɛ atsu nii kɛtee mɔ lɛ miishɛɛ shi, ni obɔ mɔdɛŋ okɛ lɛ akase broshuɔ lɛ fã ko, koni ena bɔ ni wɔkɛ mɛi kaseɔ Biblia lɛ wɔhãa. Ohiɛ akakpa mɛi ni enya wiemɔ lɛ he pɛŋ lɛ anɔ, kɛ mɛi hu ni osaraa amɛ shi amɛbatsɔmɔko o-Biblia mli nikaselɔi lɛ. Kɛ́ be ko ni eho lɛ, amɛkpɛlɛɛɛ ni akɛ amɛ akase nii po lɛ, ekolɛ amɛbaanya broshuɔ lɛ kɛ gbɛ hee ni wɔtsɔɔ nɔ wɔkɛ mɛi kaseɔ nii lɛ he. Esaaa akɛ wɔshiɔ broshuɔ lɛ eko yɛ mɛi ni bɛ shĩa lɛ ashinai anaa, ni esaaa akɛ wɔkɛ eko woɔ lɛta mli kɛmajeɔ mɔ ko, ja mɔ lɛ enya wiemɔ lɛ he dã. Asafoŋ Sɔɔmɔ Ajinafoi Akuu lɛ baanyɛ ato kpeei kɛhã shiɛmɔyaa krokomɛi ahe gbɛjianɔ yɛ nyɔɔŋ lɛ mli.

• Shihilɛi Krokomɛi: Kɛ́ nyɛsafo lɛ kɛ maŋ odaseyeli shwiili tsuɔ nii lɛ, nyɛkɛ Oyi Aná Wala Kɛya Naanɔ! broshuɔ lɛ eko awoa mli. Kɛ́ mɔ ko nya broshuɔ lɛ he lɛ, hã ele akɛ wɔkɛ mɛi fɛɛ kaseɔ ni wɔheee shika. Okɛ lɛ akase broshuɔ lɛ fã ko, koni ena bɔ ni wɔkɛ mɛi kaseɔ Biblia lɛ wɔhãa, loo too gbɛjianɔ ni okɛ lɛ akase sɛɛ mli. Shiɛmɔ nitsumɔ lɛ nɔkwɛlɔ lɛ baanyɛ ato gbɛjianɔ koni shiɛlɔi ni sa aya hei ni nihɔɔlɔi kɛ nitsulɔi yɔɔ yɛ shikpɔŋkuku lɛ mli lɛ, koni amɛyabi mɛi kɛji amɛbaasumɔ ni akɛ amɛ akase Biblia lɛ. Obaanyɛ obi mɛi hu ni okɛtsuɔ nii loo mɛi ni okɛgbaa sane be ni onyiɛɛɛ shiɛmɔ nɔ kɛji amɛbaasumɔ ni okɛ amɛ akase Biblia lɛ.

Yesu fã wɔ ni ‘wɔfee mɛi kaselɔi,’ ni ‘wɔtsɔɔ amɛ nii.’ (Mat 28:19, 20) Tafãa krɛdɛɛ nɛɛ awa wɔ ni wɔkɛ Oyi Aná Wala Kɛya Naanɔ! broshuɔ lɛ loo wolo lɛ atsu nii kɛshɛ oti nɛɛ he.