Ani Yehowa Baabo Misɔlemɔ Lɛ Toi?

1-2. Mɛni baanyɛ ahã wɔnu he akɛ Yehowa booo wɔsɔlemɔi toi?

“OMII ashɛ ohe waa yɛ Yehowa hewɔ, ni ebaahã bo nibii ni otsui taoɔ lɛ.” (Lala 37:4) Yehowa shiwoo nɛɛ nɔ bɛ kwraa! Shi ani no tsɔɔ akɛ Yehowa baahã wɔ nɔ fɛɛ nɔ ni wɔbiɔ lɛ lɛ amrɔ nɔŋŋ? Mɛni hewɔ wɔbiɔ sane nɛɛ? Naa shihilɛi ni nyɛmimɛi komɛi kɛkpe. Nyɛmi yoo oshijafo ko sɔleɔ daa ni Yehowa ahã eya Skul Kɛhã Maŋtsɛyeli Sane Kpakpa Jajelɔi lɛ eko. Shi afii pii eho ni atsɛko lɛ. Nyɛmi nuu oblanyo ko miiye hela ko ni naa wa waa, ni esɔleɔ daa ni Yehowa ahã ehe awa lɛ koni enyɛ etsu babaoo yɛ asafo lɛ mli, shi hela lɛ eyaaa. Nyɛmi nuu ko kɛ eŋa sɔle ni Yehowa ahã amɛbi ahi anɔkwale lɛ mli, shi amɛbi lɛ ekpa Yehowa sɔɔmɔ.

² Ekolɛ bo hu osɔle obi Yehowa nɔ ko, shi Yehowa tsuko nɔ ni obi lɛ he nii. Enɛ hewɔ lɛ, ekolɛ onuɔ he akɛ kɛ́ mɛi krokomɛi sɔle lɛ, eboɔ toi, shi kɛ́ bo osɔle lɛ, ebooo toi. Aloo ekolɛ onuɔ he akɛ ofee nɔ ko ni ejaaa. Nyɛmi yoo ko ni atsɛɔ Janiceb lɛ nu he nakai. No mli lɛ, ekɛ ewu miishwe waa ni amɛyasɔmɔ yɛ Betel, no hewɔ lɛ, amɛsɔle amɛhã Yehowa ni ehã amɛná nakai hegbɛ lɛ. Ewie akɛ: “Minu he akɛ etsɛŋ kwraa ni abaatsɛ wɔ Betel.” Shi afii pii ho ni atsɛɛɛ amɛ. Janice wie akɛ: “Mimiishɛɛ fɛɛ tã, ni minuuu nɔ ni yaa nɔ lɛ shishi kwraa. Mibi mihe akɛ, ‘Ani mifee nɔ ko ni Yehowa sumɔɔɔ? Misɔle waa ni ehã wɔyasɔmɔ yɛ Betel, mɛni hewɔ eboko misɔlemɔ lɛ toi?’”

3. Mɛni he wɔbaasusu yɛ nikasemɔ nɛɛ mli?

³ Bei komɛi lɛ, wɔnuɔ he akɛ Yehowa booo wɔsɔlemɔi toi. Yehowa tsuji anɔkwafoi ni hi shi yɛ blema lɛ ateŋ mɛi komɛi hu nu he nakai. (Hiob 30:20; Lala 22:2; Hab. 1:2) Mɛni baaye abua bo ni ohe oye waa akɛ kɛ́ osɔle lɛ, Yehowa boɔ toi? (Lala 65:2) Yɛ nikasemɔ nɛɛ mli lɛ, wɔbaasusu sanebimɔi etɛ komɛi ahe ni no baaye abua wɔ ni wɔhã sanebimɔ nɛɛ hetoo. Nomɛi ji: (1) Kɛ́ wɔsɔle lɛ, mɛni Yehowa baafee? (2) Mɛni Yehowa kpaa gbɛ akɛ wɔ hu wɔbaafee? (3) Mɛni hewɔ bei komɛi lɛ, esa akɛ wɔtsake nɔ ni wɔsɔleɔ wɔbiɔ Yehowa lɛ?

KƐ́ WƆSƆLE LƐ, MƐNI YEHOWA BAAFEE?

4. Yɛ Yeremia 29:12 lɛ, mɛni Yehowa ewo shi akɛ ebaafee?

⁴ Yehowa ewo shi akɛ, kɛ́ wɔsɔle lɛ, ebaabo toi. (Kanemɔ Yeremia 29:12.) Yehowa sumɔɔ wɔ ejaakɛ wɔyeɔ lɛ anɔkwa, no hewɔ lɛ, kɛ́ wɔsɔle lɛ ebaabo toi. (Lala 10:17; 37:28) Shi no etsɔɔɔ akɛ ebaahã wɔ nɔ fɛɛ nɔ ni wɔbiɔ lɛ lɛ. Nibii ni wɔbiɔ lɛ ekomɛi yɛ ni ja jeŋ hee lɛ mli dani wɔnine baashɛ nɔ.

5. Kɛ́ wɔbi Yehowa nɔ ko lɛ, mɛni he esusuɔ? Ni mɛni hewɔ?

⁵ Yehowa susuɔ bɔ ni nɔ ni wɔbiɔ lɛ lɛ baasa yiŋtoo hewɔ ni ebɔ shikpɔŋ lɛ kɛ adesai lɛ he ehã lɛ he. (Yes. 55:​8, 9) Yehowa yiŋtoo ji, ni adesai ni baa amɛhe shi amɛhãa lɛ koni eye amɛnɔ lɛ ayi shikpɔŋ lɛ nɔ obɔ ni amɛná miishɛɛ. Shi Satan kɛɛ kɛ́ adesai diɛŋtsɛ ye amɛhe nɔ lɛ, amɛbaaná miishɛɛ ni amɛhe baajɔ amɛ waa. (1 Mo. 3:​1-5) Yehowa eŋmɛ gbɛ ni adesai diɛŋtsɛ aye amɛhe nɔ koni no ahã ana akɛ nɔ ni Satan wie lɛ ji amale. Kɛjɛ be ni adesai hala akɛ amɛhãŋ Yehowa aye amɛnɔ lɛ, ekɛ naagbai pii eba. (Jaj. 8:9) Wɔle akɛ Yehowa ejieŋ naagbai nɛɛ fɛɛ kɛyaŋ bianɛ. Kɛ́ efee nakai lɛ, mɛi komɛi baasusu akɛ adesai diɛŋtsɛ baanyɛ atsu amɛnaagbai ahe nii ni Nyɔŋmɔ he bɛ mli.

6. Mɛni hewɔ esa akɛ wɔhe wɔye kɛ wɔtsui muu fɛɛ akɛ Yehowa sumɔɔ wɔ ni eyeɔ jalɛsane be fɛɛ be?

⁶ Kɛ́ nɔ ni wɔsɔleɔ wɔbiɔ lɛ tamɔ nɔ ni wɔnyɛmi ko sɔleɔ ebiɔ po lɛ, Yehowa baanyɛ etsu wɔsɔlemɔ lɛ he nii yɛ gbɛ kome nɔ, ni etsu wɔnyɛmi lɛ nɔ lɛ he nii yɛ gbɛ kroko nɔ. Akɛ nɔkwɛmɔnɔ lɛ, be ni Maŋtsɛ Hezekia bɛ hewalɛ kwraa lɛ, esɔle ebi Yehowa ni ehã ehe awa lɛ, ni Yehowa hã ehe wa lɛ. (2 Maŋ. 20:​1-6) Shi be ni bɔfo Paulo kpa Nyɔŋmɔ fai ni ejie “ŋmei ko yɛ heloo lɛ mli,” ni eeenyɛ efee akɛ eji hela ko ni miigba enaa waa lɛ, Yehowa ejieee. (2 Kor. 12:​7-9) Agbɛnɛ hu, susumɔ bɔfo Yakobo kɛ bɔfo Petro sane lɛ he okwɛ. No mli lɛ, Maŋtsɛ Herode miitao amɛyi enyɔ lɛ fɛɛ egbe. Nyɛmimɛi lɛ sɔle waa amɛhã Petro, ni ekã shi faŋŋ akɛ, amɛsɔle waa amɛhã Yakobo hu. Shi agbe Yakobo, ni Petro lɛ, atsɔ naakpɛɛ gbɛ nɔ ahere eyiwala. (Bɔf. 12:​1-11) Ekolɛ mɔ ko baabi akɛ, ‘Mɛni hewɔ Yehowa here Petro yiwala, shi ehereee Yakobo yiwala lɛ?’ Biblia lɛ etsɔɔɔ.c Shi wɔle akɛ, Yehowa “efeee nɔ ko ni ejaaa.” (5 Mo. 32:4) Ni wɔle hu akɛ, Petro kɛ Yakobo fɛɛ ye Yehowa anɔkwa. (Kpo. 21:14) Bei komɛi lɛ, gbɛ ni wɔkpaa gbɛ akɛ Yehowa baatsɔ nɔ etsu wɔsɔlemɔ ko he nii lɛ, jeee nakai gbɛ nɔ kwraa etsɔɔ etsuɔ he nii. Shi akɛni wɔheɔ wɔyeɔ kɛ wɔtsui muu fɛɛ akɛ Yehowa sumɔɔ wɔ ni eyeɔ jalɛsane be fɛɛ be hewɔ lɛ, wɔwieee wɔshiii gbɛ ni etsɔɔ nɔ ehãa wɔsɔlemɔi hetoo lɛ.—Hiob 33:13.

7. Mɛni esa akɛ wɔmia wɔhiɛ waa ni wɔkafee? Ni mɛni hewɔ?

⁷ Esa akɛ wɔmia wɔhiɛ waa ni wɔkɛ bɔ ni nibii yaa lɛ ehãa wɔ lɛ akato bɔ ni nibii yaa lɛ ehãa mɛi krokomɛi lɛ he. Akɛ nɔkwɛmɔnɔ lɛ, ekolɛ wɔsɔle yɛ nɔ ko pɔtɛɛ he, shi wɔnine shɛɛɛ nɔ. Shi sɛɛ mli lɛ, wɔnu akɛ wɔnyɛmi ko esɔle yɛ nakai nii lɛ nɔŋŋ he, shi lɛ lɛ enine eshɛ nɔ. Nyɛmi yoo ko ni atsɛɔ lɛ Anna lɛ kɛ shihilɛ ni tamɔ nakai kpe. No mli lɛ, ewu ni atsɛɔ lɛ Matthew lɛ miiye kansa. Nakai beiaŋ nɔŋŋ lɛ, nyɛmimɛi yei onukpai enyɔ komɛi hu miiye kansa. Anna sɔle waa ni Yehowa atsa Matthew kɛ nyɛmimɛi yei enyɔ lɛ. Nyɛmimɛi yei lɛ ná hewalɛ, shi Matthew gbo. Anna bi ehe akɛ: ‘Ani Yehowa ni ye ebua nyɛmimɛi yei enyɔ lɛ ni amɛhe wa amɛ lɛ? Kɛ́ nakai ni lɛ, mɛni hewɔ ebooo misɔlemɔ akɛ miwu lɛ hu he awa lɛ lɛ toi lɛ?’ Nɔ kome ji akɛ, wɔnyɛŋ wɔtsɔɔ bɔ ni fee ni nyɛmimɛi yei enyɔ lɛ ná hewalɛ. Shi wɔle akɛ wɔsɛɛ lɛ, Yehowa baajie wɔnaagbai lɛ fɛɛ kɛje jɛmɛ, ni eeshwe waa ni etee etsuji ni egboi lɛ ashi.—Hiob 14:15.

8. (a) Yɛ nɔ ni awie yɛ Yesaia 43:2 lɛ naa lɛ, mɛɛ gbɛ nɔ Yehowa yeɔ ebuaa wɔ? (b) Kɛ́ wɔkɛ shihilɛ ni mli wa ko kpe ni wɔsɔle lɛ, mɛɛ gbɛ nɔ eyeɔ ebuaa wɔ? (Kɛ́ ootao ole bɔ ni Yehowa yeɔ ebuaa wɔ ni wɔnyɛɔ wɔdamɔɔ shihilɛi ni mli wawai anaa lɛ he saji pii lɛ, kwɛmɔ vidio ni ji, Sɔlemɔ Hãa Wɔnyɛɔ Wɔdamɔɔ Naagbai Anaa ni yɔɔ jw.org lɛ nɔ lɛ.)

⁸ Yehowa baaye ebua wɔ be fɛɛ be. Yehowa wɔ-Tsɛ ni yɔɔ ŋwɛi lɛ sumɔɔ wɔ, ni kɛ́ ena ni wɔmiipiŋ lɛ, edɔɔ lɛ waa. (Yes. 63:9) Fɛɛ sɛɛ lɛ, eŋmɛɔ gbɛ ni wɔkɛ shihilɛi ni mli wawai ni tamɔ la loo fai kpeɔ. (Kanemɔ Yesaia 43:2.) Shi ewo wɔ shi akɛ, ebaaye ebua wɔ ni ‘wɔtsɔ’ fɛɛ mli. Ekɔɔɔ he eko naagbai ni wɔkɛbaakpe lɛ, ehãŋ shihilɛ lɛ mli awa kɛshɛ he ko ni wɔnyɛŋ wɔsɔmɔ lɛ. Agbɛnɛ hu, Yehowa kɛ emumɔ krɔŋkrɔŋ ni yɔɔ hewalɛ waa lɛ baaye ebua wɔ koni wɔfi shi. (Luka 11:13; Fip. 4:13) Enɛ hewɔ lɛ, wɔbaanyɛ wɔhe wɔye akɛ, be fɛɛ be ni wɔkɛ shihilɛ ni mli wa baakpe lɛ, Yehowa baaye ebua wɔ ni wɔnyɛ wɔfi shi ni wɔye lɛ anɔkwa.

MƐNI YEHOWA MIISUMƆ NI WƆ HU WƆFEE?

9. Yɛ nɔ ni aŋma yɛ Yakobo 1:​6, 7 lɛ naa lɛ, mɛni hewɔ esa akɛ wɔhe wɔye akɛ Yehowa baaye ebua wɔ?

⁹ Yehowa miisumɔ ni wɔkɛ wɔhiɛ afɔ̃ enɔ. (Heb. 11:6) Bei komɛi lɛ, wɔbaanyɛ wɔnu he akɛ wɔnaagbai lɛ tamɔ gbogbo ko ni kwɔ waa ni wɔnyɛŋ wɔtu. Ekolɛ wɔbaanu he po akɛ, Yehowa yeŋ ebuaŋ wɔ. Shi Biblia lɛ hãa wɔleɔ akɛ, Nyɔŋmɔ baanyɛ ehã wɔ hewalɛ ni ‘wɔkɛtu gbogbo.’ (Lala 18:29) No hewɔ lɛ, nɔ najiaŋ ni wɔyiŋ baafee wɔ kɔshikɔshi kɛji Yehowa baaye ebua wɔ lɛ, esa akɛ wɔsɔle wɔhã lɛ ni wɔhe wɔye kɛ wɔtsui fɛɛ akɛ ebaahã wɔsɔlemɔ lɛ hetoo.—Kanemɔ Yakobo 1:​6, 7.

10. Mɛni ji nɔ kome ni Yehowa miisumɔ ni wɔfee kɛ́ wɔsɔle? Okɛ nɔkwɛmɔnɔ ko atsɔɔ mli.

¹⁰ Yehowa miisumɔ ni wɔfee nɔ ko kɛtsɔɔ akɛ wɔmiisumɔ ni ehã wɔsɔlemɔ lɛ hetoo. Ŋɔɔ lɛ akɛ, nyɛmi nuu ko esɔle ebi Yehowa koni eye ebua lɛ ni enitsumɔtsɛ lɛ aŋmɛ lɛ gbɛ ni eya kpokpaa wulu nɔ kpee ko. Mɛni ekolɛ Yehowa baafee? Ekolɛ ebaahã nyɛmi nuu lɛ ekãa koni ekashe gbeyei akɛ ebaaya eyabi enitsumɔtsɛ lɛ gbɛ. Shi kɛ́ nyɛmi nuu lɛ eyaaa ni ebaayabi gbɛ lɛ, ani enine baashɛ nɔ ni etaoɔ lɛ nɔ? Dabi. Ekolɛ ehe baahia ni eyana enitsumɔtsɛ lɛ shii abɔ po. Agbɛnɛ hu, ebaanyɛ eto gbɛjianɔ akɛ, ekɛ nitsulɔ kroko baatsake koni ená gbɛ eya kpee lɛ. Ebaanyɛ ehã enitsumɔtsɛ lɛ po ale akɛ, ebaasumɔ ni eya kpee lɛ koni atse kɛjɛ enyɔmɔwoo mli.

11. Mɛni hewɔ esa akɛ wɔsɔle shii abɔ yɛ wɔnaagbai ahe lɛ?

¹¹ Yehowa miisumɔ ni wɔsɔle shii abɔ yɛ wɔnaagbai lɛ ahe. (1 Tes. 5:17) Nɔ ko ni Yesu wie lɛ hãa wɔnaa akɛ, jeee be fɛɛ be Yehowa baahã wɔsɔlemɔi hetoo amrɔ nɔŋŋ. (Luka 11:9) No hewɔ lɛ, kaahã onijiaŋ je wui! Jɛɛ otsuiŋ osɔle waa, ni osɔle shii abɔ hu. (Luka 18:​1-7) Kɛ́ wɔsɔle shii abɔ yɛ sane ko he lɛ, no hãa Yehowa naa akɛ, nɔ ni wɔbiɔ lɛ he miihia wɔ waa, shi jeee nɔ ko ni ba wɔyitsoŋ kɛkɛ. Agbɛnɛ hu, ehãa enaa akɛ, wɔheɔ wɔyeɔ waa akɛ ebaanyɛ eye ebua wɔ.

NƆ HEWƆ NI EKOLƐ EHE BAAHIA NI WƆTSAKE NƆ NI WƆBIƆ LƐ

12. (a) Mɛni ji nɔ kome ni esa akɛ wɔbi wɔhe yɛ wɔsɔlemɔi ahe? Ni mɛni hewɔ? (b) Mɛɛ gbɛ nɔ wɔbaanyɛ wɔtsɔɔ akɛ wɔbuɔ Yehowa kɛ́ wɔmiisɔle? (Kwɛmɔ akrabatsa ni ji, “Ani Misɔlemɔi Hãa Yehowa Naa Akɛ Mibuɔ Lɛ?”)

¹² Kɛ́ wɔsɔle wɔbi Yehowa nɔ ko shi wɔnine shɛɛɛ nɔ lɛ, wɔbaanyɛ wɔbi wɔhe saji etɛ komɛi. Klɛŋklɛŋ nɔ lɛ ji, ‘Ani nɔ ni misɔleɔ mibiɔ lɛ nɔŋŋ esa akɛ masɔle mabi?’ Bei pii lɛ, wɔsusuɔ akɛ wɔle nɔ ni hi hã wɔ. Shi ekolɛ nɔ ni wɔbiɔ lɛ yeŋ ebuaŋ wɔ. Kɛ́ ekolɛ wɔmiibi Yehowa ni etsu naagba ko he nii ehã wɔ yɛ gbɛ pɔtɛɛ ko nɔ lɛ, ekolɛ gbɛ kroko yɛ ni hi fe no. Bei komɛi hu lɛ, nɔ ni wɔbiɔ lɛ kɛ Yehowa suɔmɔnaa nii kpãaa gbee. (1 Yoh. 5:14) Akɛ nɔkwɛmɔnɔ lɛ, susumɔ fɔlɔi lɛ ni wɔwie amɛhe yɛ klɛŋklɛŋ kuku lɛ mli lɛ ahe okwɛ. Amɛsɔle ni Yehowa ahã amɛbi lɛ ahi anɔkwale lɛ mli, ni etamɔ nɔ ni tɔmɔ ko bɛ enɛ he. Shi nɔ kome ji akɛ, Yehowa enyɛɛɛ mɔ ko nɔ ni esɔmɔ lɛ. Eesumɔ ni wɔ fɛɛ, ni wɔbii hu fata he lɛ, ajɛ wɔsuɔmɔ mli wɔsɔmɔ lɛ. (5 Mo. 10:​12, 13; 30:​19, 20) No hewɔ lɛ, ekolɛ nɔ ni fɔlɔi lɛ baanyɛ abi moŋ ji, ni Yehowa aye ebua amɛ koni amɛnyɛ amɛshɛ amɛbi lɛ tsui he ni amɛye amɛbua lɛ ni ebasumɔ Yehowa ni ebatsɔ enaanyo.—Abɛi 22:6; Efe. 6:4.

13. Yɛ nɔ ni awie yɛ Hebribii 4:16 lɛ naa lɛ, mɛɛ be Yehowa baaye ebua wɔ? Ni mɛni hewɔ okɛɔ nakai?

¹³ Sanebimɔ ni ji enyɔ lɛ ji, ‘Ani be ni Yehowa kɛbaahã misɔlemɔ lɛ hetoo lɛ eshɛ?’ Bei komɛi lɛ, wɔnuɔ he akɛ kɛ́ wɔsɔle nɔŋŋ lɛ, esa akɛ Yehowa ahã hetoo. Shi Yehowa le be ni hi fe fɛɛ ni kɛ́ ehã wɔsɔlemɔ lɛ hetoo lɛ, ebaaye ebua wɔ. (Kanemɔ Hebribii 4:16.) Kɛ́ wɔsɔle wɔbi Yehowa nɔ ko ni wɔnine shɛɛɛ nɔ amrɔ nɔŋŋ lɛ, ekolɛ wɔbaanu he akɛ Yehowa sumɔɔɔ ni ehãa wɔ. Shi ekolɛ yɛ anɔkwale mli lɛ, eesumɔ ni ehã wɔ, be lɛ kɛkɛ ni shɛko. Akɛ nɔkwɛmɔnɔ lɛ, susumɔ oblanyo lɛ ni wɔwie ehe kɛtsɔ hiɛ ni sɔle ni Yehowa atsa ehela lɛ ehã lɛ lɛ he okwɛ. Eji Yehowa tsɔ naakpɛɛ gbɛ nɔ etsa lɛ kulɛ, Satan baanyɛ akɛɛ akɛ no hewɔ nyɛmi nuu lɛ yaa nɔ esɔmɔɔ Yehowa lɛ. (Hiob 1:​9-11; 2:4) Kɛfata he lɛ, Yehowa eto be ni ebaatsa helai fɛɛ. (Yes. 33:24; Kpo. 21:​3, 4) No hewɔ lɛ, kɛyashi nakai be lɛ baashɛ lɛ, wɔkpaaa gbɛ akɛ Yehowa baatsɔ naakpɛɛ gbɛ nɔ etsa wɔ. Enɛ hewɔ lɛ, nyɛmi nuu lɛ baanyɛ esɔle ni Yehowa aye ebua lɛ ni ekahao fe nine yɛ ehela lɛ he, shi moŋ enyɛ edamɔ naa ni eya nɔ esɔmɔ lɛ.—Yes. 26:3.

14. Mɛni okaseɔ yɛ Janice niiashikpamɔ lɛ mli?

¹⁴ Ani okaiɔ Janice? Lɛ ji mɔ ni sɔle ni Yehowa aye ebua lɛ ni eyasɔmɔ yɛ Betel lɛ. Afii enumɔ sɔŋŋ ho dani eyɔse akɛ Yehowa ehã esɔlemɔ lɛ hetoo, shi jeee yɛ gbɛ ni ekpaa gbɛ lɛ nɔ. Ewie akɛ: “Yehowa tsɔɔ mi nibii pii yɛ nakai afii enumɔ lɛ amli, ni eye ebua mi ni miná sui kpakpai pii. No mli lɛ, Yehowa miina akɛ esa akɛ mikɛ mihiɛ afɔ̃ enɔ waa, esa akɛ male bɔ ni akaseɔ Biblia lɛ jogbaŋŋ, ni esa akɛ maná sui ni baaye abua mi ni maya nɔ masɔmɔ lɛ kɛ miishɛɛ ekɔɔɔ he eko he ni misɔmɔɔ yɛ.” Sɛɛ mli lɛ, ahã Janice kɛ ewu yasɔmɔ akɛ kpokpaa nɔkwɛlɔ kɛ eŋa. Be ni Janice jwɛŋ nɔ ni etee nɔ lɛ fɛɛ he lɛ, ewie akɛ: “Yehowa hã misɔlemɔi lɛ hetoo, shi jeee yɛ gbɛ ni misusu akɛ ebaahã hetoo lɛ nɔ. Ehe be fioo dani miyɔse akɛ ehã mi hetoo, ni ehetoo lɛ nɔ bɛ. Eŋɔɔ minaa waa akɛ, etsɔ nɛkɛ gbɛ nɔ ehã mina akɛ esumɔɔ mi ni emli hi.”

15. Mɛni hewɔ bei komɛi lɛ, ehi akɛ wɔbaalɛɛ nɔ ni wɔsɔleɔ wɔbiɔ lɛ mli fioo lɛ? (Kwɛmɔ mfonirii lɛ hu.)

¹⁵ Sanebimɔ ni ji etɛ lɛ ji, ‘Ani esa akɛ malɛɛ nɔ ni misɔleɔ mibiɔ lɛ mli fioo?’ Kɛ́ wɔsɔle lɛ, ehi akɛ wɔbaabi nɔ ko pɔtɛɛ. Shi bei komɛi lɛ, ehe baahia ni wɔlɛɛ nɔ ni wɔbiɔ lɛ mli fioo koni no aye abua wɔ ni wɔna nɔ ni ji Yehowa suɔmɔnaa nii. Akɛ nɔkwɛmɔnɔ lɛ, susumɔ nyɛmi yoo oshijafo lɛ ni sɔle ebi ni Yehowa ahã eya Skul Kɛhã Maŋtsɛyeli Sane Kpakpa Jajelɔi lɛ eko lɛ he okwɛ. Eetao eya skul koni eyasɔmɔ yɛ he ni hiamɔ lɛ da yɛ. No hewɔ lɛ, be ni eyaa nɔ esɔleɔ koni Yehowa ahã atsɛ lɛ skul lɛ, ebaanyɛ ebi ni Yehowa aye ebua lɛ ni ena nibii krokomɛi ni ebaanyɛ efee kɛlɛɛ esɔɔmɔ lɛ mli. (Bɔf. 16:​9, 10) Be ni esɔle nɛkɛ lɛ, nɔ kome ni ebaanyɛ efee kɛtsɔɔ akɛ eesumɔ ni Yehowa ahã esɔlemɔ lɛ hetoo ji, ni ebaabi kpokpaa nɔkwɛlɔ lɛ kɛji asafoi ni bɛŋkɛ lɛ lɛ ateŋ eko yɛ ni gbɛgbalɔi ahe miihia waa yɛ jɛmɛ koni eyasɔmɔ yɛ jɛmɛ. Aloo ebaanyɛ eŋma wolo kɛya nitsumɔhe nine lɛ, ni ebi kɛji he ko yɛ ni hiamɔ lɛ da yɛ, ni efã ni eyasɔmɔ yɛ jɛmɛ.d

16. Mɛni wɔbaanyɛ wɔhe wɔye?

¹⁶ Tamɔ bɔ ni wɔna yɛ nikasemɔ nɛɛ mli lɛ, wɔbaanyɛ wɔhe wɔye akɛ Yehowa baahã wɔsɔlemɔi hetoo yɛ gbɛ ni tsɔɔ akɛ esumɔɔ wɔ ni eyeɔ jalɛsane lɛ nɔ. (Lala 4:3; Yes. 30:18) Bei komɛi lɛ, Yehowa hãa wɔsɔlemɔi lɛ hetoo, shi jeee yɛ gbɛ ni wɔ wɔsusuɔ akɛ ebaahã hetoo lɛ nɔ. Shi Yehowa tsimɔŋ etoi yɛ wɔsɔlemɔi lɛ ahe kɔkɔɔkɔ. Esumɔɔ wɔ waa, ni ekwaŋ wɔ kɔkɔɔkɔ. (Lala 9:10) No hewɔ lɛ, yaa nɔ ‘okɛ ohiɛ afɔ̃’ enɔ be fɛɛ be ni ofɔse otsuiŋ oshwie ehiɛ.—Lala 62:8.