NIKASEMƆ 40
LALA 30 Mi-Tsɛ, Mi-Nyɔŋmɔ, Kɛ Mi-Naanyo
Yehowa ‘Tsaa Mɛi Ni Tsuii Ekumɔ Lɛ’
“Etsaa mɛi ni tsuii ekumɔ lɛ; ni efimɔɔ amɛfaji lɛ anɔ.”—LALA 147:3.
NƆ NI WƆBAAKASE
Yehowa susuɔ mɛi ni ehao lɛ ahe waa. Nikasemɔ nɛɛ baaye abua wɔ ni wɔna bɔ ni Yehowa shɛjeɔ wɔmii kɛ́ wɔ hao kɛ bɔ ni wɔbaafee wɔshɛje mɛi krokomɛi amii.
1. Kɛ́ Yehowa na nɔ ni etsuji tsɔɔ mli lɛ, te enuɔ he ehãa tɛŋŋ?
YEHOWA naa nibii fɛɛ ni etsuji tsɔɔ mli lɛ. Kɛ́ wɔyɛ miishɛɛ lɛ enaa, ni kɛ́ wɔwerɛ ho wɔhe hu enaa. (Lala 37:18) Kɛ́ ena akɛ wɔhao, shi fɛɛ sɛɛ lɛ, wɔkɛ wɔnyɛmɔ fɛɛ miisɔmɔ lɛ lɛ, enáa wɔhe miishɛɛ waa! Shi jeee no pɛ; enuɔ he waa akɛ eye ebua wɔ ni eshɛje wɔmii.
2. Mɛni Yehowa feɔ ehãa mɛi ni tsuii ekumɔ lɛ? Ni mɛni esa akɛ wɔfee koni Yehowa ashɛje wɔmii?
2 Lala 147:3 lɛ kɛɛ Yehowa ‘fimɔɔ mɛi ni tsuii ekumɔ lɛ afaji lɛ anɔ.’ Ŋmalɛ nɛɛ hãa wɔnaa bɔ ni Yehowa jɛɔ suɔmɔ mli eyeɔ ebuaa mɛi ni ehao lɛ. Shi mɛɛ gbɛ nɔ wɔbaanyɛ wɔhã Yehowa ashɛje wɔmii kɛ́ wɔhao? Hã wɔkɛ nɔkwɛmɔnɔ ko ahã sanebimɔ nɛɛ hetoo. Kɛ́ mɔ ko pila lɛ, datrɛfonyo ko ni he esa waa lɛ baanyɛ atsa lɛ. Shi kɛ́ mɔ lɛ he baawa lɛ lɛ, ja efee nibii ni datrɛfonyo lɛ baatsɔɔ lɛ lɛ. No hewɔ lɛ, yɛ nikasemɔ nɛɛ mli lɛ, wɔbaakwɛ nɔ ni Yehowa kɛɔ mɛi ni ehao waa lɛ akɛ amɛfee, ni wɔbaakwɛ bɔ ni wɔbaafee wɔkɛ nɔ ni wɔkase lɛ atsu nii.
YEHOWA HÃA WƆNAA AKƐ WƆHE YƐ SƐƐNAMƆ WAA
3. Mɛni hewɔ mɛi komɛi nuɔ he akɛ amɛhe bɛ sɛɛnamɔ lɛ?
3 Dɔlɛ sane ji, suɔmɔ etã yɛ jeŋ ni wɔyɔɔ mli ŋmɛnɛ lɛ mli. Enɛ hewɔ lɛ, akɛ mɛi pii yeee jogbaŋŋ, ni no hãa amɛnuɔ he akɛ amɛhe bɛ sɛɛnamɔ. Nyɛmi yoo ko ni atsɛɔ lɛ Helena lɛ wie akɛ: “Suɔmɔ kome nɛkɛ folo po bɛ weku ni mida yɛ mli lɛ mli. Mipapa kɛ wɔ yeee jogbaŋŋ, ni daa gbi lɛ, ekpãa ewoɔ wɔtoiŋ akɛ wɔhe bɛ sɛɛnamɔ.” Ekolɛ bo hu osane lɛ tamɔ Helen nɔ lɛ nɔŋŋ. Daa nɛɛ akɛ bo yeee jogbaŋŋ, ajɛɔ bo, loo ahãa onuɔ he po akɛ ohe bɛ sɛɛnamɔ. Kɛ́ nakai lɛ, ekolɛ obaanu he akɛ mɔ ko mɔ ko susuuu ohe.
4. Yɛ nɔ ni awie yɛ Lala 34:18 lɛ naa lɛ, mɛni Yehowa ewo shi akɛ ebaafee ehã wɔ?
4 Kɛ́ bɔ ni mɛi kɛ bo eye ehã lɛ hewɔ lɛ, onuɔ he akɛ ohe bɛ sɛɛnamɔ po lɛ, ná nɔmimaa akɛ Yehowa sumɔɔ bo ni ohe yɛ sɛɛnamɔ kɛhã lɛ. ‘Eyɛ mɛi ni tsuii ekumɔ lɛ amasɛi.’ (Kanemɔ Lala 34:18.) Kɛ́ bei komɛi lɛ ‘owerɛ ho ohe lɛ,’ kaimɔ akɛ Yehowa na nibii kpakpai yɛ otsui mli, ni no hewɔ egbala bo kɛba emasɛi lɛ. (Yoh. 6:44) Eesumɔ ni eye ebua bo ejaakɛ esumɔɔ bo waa.
5. Mɛni wɔbaanyɛ wɔkase yɛ bɔ ni Yesu kɛ mɛi ni abuuu amɛ ahãaa nɔ ko lɛ ye ehã lɛ mli?
5 Kɛ́ wɔsusu bɔ ni Yesu hi shi ehã lɛ he lɛ, no baaye abua wɔ ni wɔnu bɔ ni Yehowa nuɔ he ehãa lɛ shishi jogbaŋŋ. Be ni Yesu yɔɔ shikpɔŋ lɛ nɔ lɛ, emusuŋ tsɔ lɛ yɛ mɛi ni abuuu amɛ ahãaa nɔ ko lɛ ahe, ni ekɛ amɛ ye jogbaŋŋ. (Mat. 9:9-12) Be ko be ni yoo ko ni miiye hela ko ni naa wa waa ni eetao ená hewalɛ lɛ yata Yesu atade lɛ he lɛ, Yesu ewieee ehiɛ, shi moŋ eshɛje emii ni ejie eyi yɛ ehemɔkɛyeli lɛ hewɔ. (Mar. 5:25-34) Yesu fee enii tamɔ e-Tsɛ lɛ pɛpɛɛpɛ. (Yoh. 14:9) No hewɔ lɛ, hemɔ oye akɛ Yehowa naa bo akɛ ohe yɛ sɛɛnamɔ ni enaa sui kpakpai tamɔ hemɔkɛyeli kɛ suɔmɔ ni oyɔɔ kɛhã lɛ lɛ.
6. Kɛ́ mɔ ko nuɔ he akɛ sɛɛnamɔ ko bɛ ehe lɛ, mɛni ebaanyɛ efee?
6 Kɛ́ daa nɛɛ, onuɔ he akɛ ohe bɛ sɛɛnamɔ, aloo onuɔ he nakai bei komɛi lɛ, mɛni obaanyɛ ofee? Kanemɔ ŋmalɛi ni baahã ona akɛ Yehowa naa bo akɛ ohe yɛ sɛɛnamɔ, ni ojwɛŋ nɔ.b (Lala 94:19) Kɛ́ okɛ oti ko ma ohiɛ shi oyanyɛɛɛ oshɛ he, loo onijiaŋ eje wui ejaakɛ onyɛɛɛ ofee babaoo tamɔ mɛi krokomɛi feɔ lɛ, kaanu he akɛ obɔɔɔ mɔdɛŋ. Yehowa miisumɔ ni ofee bɔ ni obaanyɛ. (Lala 103:13, 14) Kɛ́ afee bo niseniianii be ko ni eho lɛ, kaashwa ohe akɛ bo ni ofee ni afee bo nakai. Jeee bo ejɛ! Kaimɔ akɛ, mɛi ni feɔ efɔŋ lɛ, amɛ Yehowa kɛná, shi jeee mɛi ni afeɔ amɛ efɔŋ lɛ. (1 Pet. 3:12) Nyɛmi yoo ko ni atsɛɔ lɛ Sandra, ni awa lɛ yi be ni eji gbekɛ lɛ wie akɛ, “Daa nɛɛ misɔleɔ mibiɔ Yehowa ni eye ebua mi ni mana sui kpakpai ni enaa akɛ miyɔɔ lɛ.”
7. Mɛɛ gbɛ nɔ shihilɛ mli ni otsɔ lɛ hewɔ lɛ, Yehowa baanyɛ atsɔ onɔ eye ebua mɛi krokomɛi?
7 Kaanu he kɔkɔɔkɔ akɛ Yehowa nyɛŋ etsɔ onɔ eye ebua mɛi krokomɛi. Amrɔ nɛɛ ehã bo hegbɛ ni okɛ lɛ miitsu shiɛmɔ nitsumɔ lɛ. (1 Kor. 3:9) Nibii ni otsɔ mli yɛ shihilɛ mli lɛ ahewɔ lɛ, ewaaa akɛ obaanu he ohã mɛi ni miina nɔ lɛ ni onu amɛ shishi. Enɛ hewɔ lɛ, obaanyɛ oye obua amɛ waa. Aye abua Helen ni wɔtsĩ etã kɛtsɔ hiɛ lɛ, ni bianɛ lɛ, lɛ hu eeye ebua mɛi krokomɛi. Ewie akɛ: “Tsutsu ko lɛ, minuɔ he akɛ mihe bɛ sɛɛnamɔ. Shi Yehowa ehã mina akɛ esumɔɔ mi, ni ekɛ mi miitsu nii kɛmiiye eebua mɛi krokomɛi.” Eŋɔɔ Helen naa waa akɛ eesɔmɔ akɛ daa gbɛgbalɔ.
YEHOWA MIISUMƆ NI WƆHE WƆYE WAA AKƐ EKƐ WƆHE ESHAI EKE WƆ
8. Mɛɛ shi Yehowa ewo yɛ Yesaia 1:18?
8 Yehowa tsuji komɛi yɛ ni eshai komɛi ni amɛfee be ni amɛleee anɔkwale lɛ loo yɛ amɛbaptisimɔ sɛɛ lɛ haoɔ amɛ waa. Shi esa akɛ wɔkai akɛ Yehowa sumɔɔ wɔ waa, ni no hewɔ ehã e-Bi ni esumɔɔ lɛ waa lɛ bagbo kɛkpɔ̃ wɔ lɛ. No hewɔ lɛ, eesumɔ ni wɔhe wɔye waa akɛ, kɛ́ wɔtɔ̃ lɛ, ekɛ wɔhe eshai baake wɔ. Yehowa ewo shi akɛ kɛ́ ‘wɔsaa wɔ kɛ lɛ teŋ’c lɛ, ekɛ wɔhe esha lɛ baake wɔ kwraa. (Kanemɔ Yesaia 1:18.) Eŋɔɔ wɔnaa waa akɛ Yehowa, wɔ-Tsɛ ni sumɔɔ wɔ lɛ, jieɔ esha ni wɔfee wɔshi lɛ lɛ kɛjeɔ ejwɛŋmɔ mli! Ni ehiɛ kpaaa nibii kpakpai ni wɔfeɔ lɛ hu anɔ kɔkɔɔkɔ.—Lala 103:9, 12; Heb. 6:10.
9. Kɛ́ esha ko ni wɔfee be ko ni eho lɛ miihao wɔ waa lɛ, mɛni wɔbaanyɛ wɔfee?
9 Kɛ́ esha ko ni ofee be ko ni eho lɛ miihao bo waa lɛ, bɔɔ mɔdɛŋ ni ojie ojwɛŋmɔ yɛ nɔ ni eho lɛ nɔ, ni okɛ ojwɛŋmɔ ama nɔ ni ofeɔ bianɛ kɛ nɔ ni obaanyɛ ofee wɔsɛɛ lɛ nɔ. Bɔfo Paulo fee nɔkwɛmɔnɔ kpakpa yɛ enɛ gbɛfaŋ. Edɔ lɛ waa akɛ be ko ni eho lɛ, ewa Kristofoi lɛ ayi, shi ehe eye akɛ Yehowa kɛke lɛ. (1 Tim. 1:12-15) Ani eye etsui yɛ eshai ni efee be ko ni eho lɛ ahe? Dabi. Bɔ ni ekɛ ejwɛŋmɔ emaaa nibii ni enyɛ etsu yɛ Yuda jamɔ lɛ mli lɛ anɔ lɛ, nakai nɔŋŋ ekɛ ejwɛŋmɔ emaaa eshai ni efee be ko ni eho lɛ hu anɔ. (Fip. 3:4-8, 13-15) Ekɛ ekãa tsu shiɛmɔ nitsumɔ lɛ, ni ekwɛ jɔɔmɔi ni kã ehiɛ wɔsɛɛ lɛ gbɛ. Bɔ ni Paulo nyɛɛɛ afee nɔ ko yɛ nɔ ni eho lɛ he lɛ, nakai nɔŋŋ bo hu onyɛŋ ofee nɔ ko yɛ he. Shi tamɔ efee lɛ, obaanyɛ otsɔ nibii ni ofeɔ amrɔ nɛɛ anɔ owo Yehowa hiɛnyam ni ojwɛŋ nibii kpakpai ni ewo shi akɛ ebaafee wɔsɛɛ lɛ ahe.
10. Kɛ́ nibii gbohii ni ofee be ko ni eho lɛ esa mɛi krokomɛi ahe lɛ, mɛni obaanyɛ ofee?
10 Kɛ́ nibii gbohii ni ofee be ko ni eho lɛ esa mɛi krokomɛi ahe lɛ, ekolɛ no hu baahao bo waa. Kɛ́ eba lɛ nakai lɛ, mɛni esa akɛ ofee? Feemɔ bɔ fɛɛ bɔ ni obaanyɛ kɛsaa nibii, ni okpa mɛi ni onifeemɔ lɛ esa amɛhe lɛ fai. (2 Kor. 7:11) Agbɛnɛ hu, sɔlemɔ obi Yehowa ni eye ebua amɛ. Ebaanyɛ eye ebua bo kɛ amɛ fɛɛ ni nyɛya nɔ nyɛsɔmɔ lɛ kɛ miishɛɛ ni nyɛtsui anyɔ nyɛmli.
11. Mɛni wɔbaanyɛ wɔkase kɛjɛ gbalɔ Yona sane lɛ mli? (Kwɛmɔ mfoniri lɛ hu.)
11 Kasemɔ nii kɛjɛ otɔmɔi lɛ amli, ni oŋmɛ gbɛ ni Yehowa kɛ bo atsu nii yɛ gbɛ fɛɛ gbɛ ni esumɔɔ lɛ nɔ. Nakai pɛpɛɛpɛ gbalɔ Yona fee. Be ko be ni Nyɔŋmɔ tsu Yona ni eya Ninive lɛ, ewo he kroko moŋ gbɛ etere. Yehowa gbala Yona toi, ni Yona kase nii kɛjɛ etɔmɔ lɛ mli. (Yona 1:1-4, 15-17; 2:7-10) Yehowa kwaaa Yona. Esaa etsu lɛ ekoŋŋ akɛ eya Ninive, ni Yona tee amrɔ nɔŋŋ. Eyɛ mli akɛ nɔ ni efee be ko ni eho lɛ dɔ lɛ waa moŋ, shi ehãaa no aje enijiaŋ wui ni ekpoo nitsumɔ ni Yehowa kɛwoɔ edɛŋ lɛ.—Yona 3:1-3.
Be ni gbalɔ Yona je kpo kɛje ŋshɔŋ loo wulu lɛ musuŋ lɛ, Yehowa tsu lɛ ekoŋŋ kɛtee Ninive koni eyashiɛ etsɔɔ amɛ (Kwɛmɔ kuku 11)
YEHOWA TSƆƆ EMUMƆ KRƆŊKRƆŊ LƐ NƆ ESHƐJEƆ WƆMII
12. Kɛ́ wɔkɛ oshãra ko loo shihilɛ ko ni naa wa waa kpe lɛ, mɛni Yehowa feɔ koni wɔnyɛ wɔná toiŋjɔlɛ? (Filipibii 4:6, 7)
12 Kɛ́ wɔkɛ oshãra ko kpe loo nɔ ko ni naa wa waa nina wɔ lɛ, Yehowa tsɔɔ emumɔ krɔŋkrɔŋ lɛ nɔ eshɛjeɔ wɔmii. Nyɛmi nuu ko ni atsɛɔ lɛ Ron lɛ kɛ eŋa Carol kɛ shihilɛ ko ni tamɔ nɛkɛ kpe. Amɛbinuu diɛŋtsɛ gbe ehe, ni enɛ hã amɛtsui kumɔ waa. Amɛwie akɛ: “Wɔkɛ shihilɛi ni mli wawai ekpe pɛŋ, shi enɛ ji nɔ ni naa wa fe fɛɛ. Bei pii lɛ, wɔnyɛɛɛ wɔwɔ, ni kɛ́ eba lɛ nakai lɛ, wɔsɔleɔ ni Yehowa hãa wɔnáa etoiŋjɔlɛ lɛ ni awie he yɛ Filipibii 4:6, 7 lɛ eko.” (Kanemɔ.) Kɛ́ okɛ shihilɛ ko ni naa wa waa miikpe lɛ, obaanyɛ osɔle shii abɔ ohã Yehowa ni okɛɛ lɛ bɔ ni onuɔ he ohãa lɛ, ni obaanyɛ okɛ lɛ awie be abɔ ni osumɔɔ hu. (Lala 86:3; 88:1) Yaa nɔ obi Yehowa ni ehã bo emumɔ krɔŋkrɔŋ lɛ, ni ebaahã bo aahu.—Luka 11:9-13.
13. Mɛɛ gbɛ nɔ mumɔ krɔŋkrɔŋ lɛ baanyɛ aye abua wɔ ni wɔya nɔ wɔsɔmɔ Yehowa? (Efesobii 3:16)
13 Ani okɛ shihilɛ ko ni naa wa waa ekpe ni ehã ogbede? Yehowa mumɔ krɔŋkrɔŋ lɛ baanyɛ ahã oná hewalɛ ni oya nɔ osɔmɔ lɛ. (Kanemɔ Efesobii 3:16.) Nyɛmi yoo ko ni atsɛɔ lɛ Flora lɛ kɛ shihilɛ ko ni naa wa waa kpe. No mli lɛ, ekɛ ewu fɛɛ miisɔmɔ akɛ maŋsɛɛ sɔɔlɔi ni ewu lɛ je esɛɛ. Enɛ hã amɛtse gbãla. Ewie akɛ: “Nɔ ni efee lɛ hã miye awerɛho waa, ni minyɛɛɛ mafee nɔ ko nɔ ko. Misɔle mibi Yehowa emumɔ krɔŋkrɔŋ lɛ koni manyɛ madamɔ shihilɛ nɛɛ naa. Yehowa shɛje mimii, ni bɔ ni kulɛ misusu akɛ minyɛŋ madamɔ shihilɛ lɛ naa lɛ, eye ebua mi ni minyɛ midamɔ naa.” Flora nuɔ he akɛ Nyɔŋmɔ eye ebua lɛ, ni ehe Nyɔŋmɔ eye waa. Eheɔ eyeɔ waa akɛ, shihilɛ fɛɛ shihilɛ ni mli wa ni ekɛbaakpe wɔsɛɛ lɛ, Yehowa baaye ebua lɛ. Ewie kɛfata he akɛ: “Wiemɔi ni yɔɔ Lala 119:32 lɛ kɔɔ mihe diɛŋtsɛ. Jɛmɛ kɛɛ: ‘Matiu okitãi lɛ agbɛ lɛ sɛɛ kɛ foi, ejaakɛ ogbele mitsui mli kɛhã okitãi lɛ.’”
14. Mɛni esa akɛ wɔfee koni Yehowa mumɔ krɔŋkrɔŋ lɛ kɛ wɔ atsu nii?
14 Kɛ́ osɔle obi Yehowa ni ehã bo emumɔ krɔŋkrɔŋ lɛ, mɛni esa akɛ ofee koni oná? Feemɔ nibii ni baahã Yehowa mumɔ krɔŋkrɔŋ lɛ kɛ bo atsu nii. Nibii nɛɛ ekomɛi ji, asafoŋ kpeei kɛ shiɛmɔ ni obaaya. Kanemɔ Yehowa Wiemɔ lɛ daa gbi koni oná esusumɔi yɛ saji ahe. (Fip. 4:8, 9) Kɛ́ ookane lɛ, okɛ ojwɛŋmɔ ama Yehowa tsuji ni kɛ shihilɛi ni mli wawai kpe lɛ anɔ, ni ojwɛŋ bɔ ni Yehowa ye ebua amɛ ni amɛnyɛ amɛfi shi lɛ nɔ. Sandra ni wɔtsĩ etã kɛtsɔ hiɛ lɛ kɛ shihilɛi ni mli wawai srɔtoisrɔtoi kpe. Ewie akɛ: “Yosef sane lɛ ta mitsuiŋ waa. Ehãaa shihilɛi ni mli wawai ni ekɛkpe kɛ sane fɔŋ ni aye lɛ lɛ afite ekɛ Yehowa teŋ wekukpaa lɛ.”—1 Mo. 39:21-23.
YEHOWA TSƆƆ WƆNYƐMIMƐI KRISTOFOI LƐ ANƆ ESHƐJEƆ WƆMII
15. Namɛi hu baanyɛ ashɛje wɔmii? Ni mɛɛ nibii nɛkɛ amɛfeɔ kɛyeɔ amɛbuaa wɔ ni amɛkɛshɛjeɔ wɔmii? (Kwɛmɔ mfoniri lɛ hu.)
15 Kɛ́ wɔkɛ shihilɛ ni mli wa ko kpe lɛ, wɔnyɛmimɛi Kristofoi lɛ baanyɛ ‘ashɛje wɔmii babaoo.’ (Kol. 4:11) Gbɛ kome ni Yehowa tsɔɔ nɔ ehãa wɔnaa akɛ esumɔɔ wɔ ji, kɛtsɔ nibii ni wɔnyɛmimɛi Kristofoi lɛ feɔ amɛhãa wɔ lɛ nɔ. Nibii ni wɔnyɛmimɛi Kristofoi lɛ feɔ kɛshɛjeɔ wɔmii lɛ eko ji, amɛbasaraa wɔ, ni amɛboɔ wɔ toi kɛ́ wɔmiikɛɛ amɛ bɔ ni wɔnuɔ he wɔhãa. Kɛfata he lɛ, amɛkaneɔ ŋmalɛi kɛwoɔ wɔ hewalɛ loo amɛkɛ wɔ sɔleɔ.d (Rom. 15:4) Bei komɛi lɛ, amɛyeɔ amɛbuaa wɔ ni wɔnaa Yehowa susumɔ yɛ saji ahe, ni no hãaa wɔye wɔtsui tsɔ. Wɔnyɛmimɛi Kristofoi lɛ feɔ nibii krokomɛi hu kɛyeɔ amɛbuaa wɔ. Akɛ nɔkwɛmɔnɔ lɛ, kɛ́ wɔhao lɛ, amɛnyɛɔ amɛhoɔ nii amɛbahãa wɔ.
Nanemɛi kpakpai ni sumɔɔ Yehowa lɛ baanyɛ ashɛje omii ni amɛye amɛbua bo (Kwɛmɔ kuku 15)
16. Bei komɛi lɛ, mɛni ehe baahia ni wɔfee koni wɔnyɛmimɛi lɛ anyɛ aye abua wɔ?
16 Bei komɛi lɛ, ehe baahia ni wɔbi wɔnyɛmimɛi Kristofoi lɛ ni amɛye amɛbua wɔ. Mɛni hewɔ? Nɔ hewɔ lɛ ji, wɔnyɛmimɛi lɛ sumɔɔ wɔ ni amɛmiisumɔ ni amɛye amɛbua wɔ. (Abɛi 17:17) Shi ekolɛ amɛleee bɔ ni wɔnuɔ he wɔhãa diɛŋtsɛ loo nɔ tuuntu ni he hiaa wɔ. (Abɛi 14:10) No hewɔ lɛ, kɛ́ ohao waa lɛ, bɔɔ mɔdɛŋ ni okɛ nyɛmimɛi ni edara yɛ mumɔŋ agba sane ni ohã amɛle bɔ ni onuɔ he ohãa. Hã amɛle nibii ni kɛ́ amɛfee kɛye amɛbua bo lɛ, obaanya he waa. Obaanyɛ okɛ asafoŋ onukpa kome loo enyɔ ni onyɛɔ obɛŋkɛɔ amɛ waa lɛ agba bɔ ni onuɔ he ohãa lɛ he sane. Nyɛmimɛi yei komɛi hu ena akɛ, kɛ́ amɛkɛ nyɛmimɛi yei ni edara yɛ mumɔŋ lɛ gba sane lɛ, no ji nɔ ni yeɔ ebuaa amɛ.
17. Mɛɛ nibii nɛkɛ baanyɛ ahã ewa kɛhã wɔ akɛ wɔbaabɛŋkɛ wɔnyɛmimɛi lɛ ni amɛwo wɔ hewalɛ? Ni mɛni baaye abua wɔ ni wɔye henumɔ nɛɛ nɔ?
17 Kaatse ohe kɛje onyɛmimɛi Kristofoi lɛ ahe. Bei komɛi lɛ, obaanyɛ ohao aahu akɛ osumɔɔɔ ni mɔ ko mɔ ko bɛŋkɛɔ bo. Bei komɛi hu lɛ, onyɛmimɛi Kristofoi lɛ nuŋ bɔ ni onuɔ he ohãa lɛ shishi jogbaŋŋ loo ekolɛ amɛbaawie nɔ ko ni baanyɛ agba onaa. (Yak. 3:2) Kaahã enɛɛmɛi hã otse ohe kɛje onyɛmimɛi lɛ ahe, ejaakɛ Yehowa baanyɛ etsɔ amɛnɔ ewo bo hewalɛ. Asafoŋ onukpa ko ni atsɛɔ lɛ Gavin, ni miiye hela ko ni hãa mɔ haoɔ waa lɛ wie akɛ: “Bei komɛi lɛ, misumɔɔɔ ni mikɛ mɔ ko mɔ ko gbaa sane.” Fɛɛ sɛɛ lɛ, Gavin bɔɔ mɔdɛŋ akɛ ekɛ nyɛmimɛi lɛ baagba sane, ni no yeɔ ebuaa lɛ ni ehaooo tsɔ. Nyɛmi yoo ko ni atsɛɔ lɛ Amy lɛ hu wie akɛ: “Shihilɛi ni mitsɔ mli be ko ni eho lɛ ahewɔ lɛ, ewa hã mi akɛ mahe mɛi maye. Shi bianɛ lɛ, miikase bɔ ni masumɔ minyɛmimɛi lɛ ni mahe amɛ maye, tamɔ Yehowa feɔ lɛ. Mile akɛ enɛ hãa Yehowa náa miishɛɛ, ni mi hu mináa miishɛɛ.”
NIBII NI YEHOWA EWO SHI AKƐ EBAAFEE EHÃ WƆ WƆSƐƐ LƐ BAANYƐ ASHƐJE OMII
18. Wɔsɛɛ lɛ, mɛni Yehowa baafee? Ni mɛni esa akɛ wɔfee bianɛ?
18 Wɔle akɛ etsɛŋ, Yehowa baajie nibii fɛɛ ni hãa wɔhaoɔ kɛ nibii fɛɛ ni hãa wɔpiŋɔ lɛ kɛya. (Kpo. 21:3, 4) Nakai beiaŋ lɛ, shihilɛi gbohii ni wɔtsɔ mli ni hãa wɔ haoɔ lɛ ‘baŋ wɔtsui mli dɔŋŋ.’ (Yes. 65:17) Shi tamɔ bɔ ni nikasemɔ nɛɛ ehã wɔna lɛ, Yehowa ‘miifimɔ wɔfaji lɛ anɔ’ bianɛ po. No hewɔ lɛ, feemɔ nibii ni baahã Yehowa aya nɔ ashɛje omii ni eye ebua bo. Be fɛɛ be lɛ, hemɔ oye akɛ ‘ejwɛŋɔ ohe.’—1 Pet. 5:7.
LALA 7 Yehowa Ji Wɔhewalɛ
a Atsake mɛi lɛ agbɛ́i.
b Kwɛmɔ akrabatsa ni ji “Yehowa Shwɛɛɛ Ohe Kwraa.”
c Kɛ́ akɛɛ ‘wɔsaa wɔ kɛ Yehowa teŋ’ lɛ, nɔ ni etsɔɔ ji, ni wɔbaafee nibii ni baahã Yehowa ana akɛ wɔtsake wɔtsui. Nibii nɛɛ ekomɛi ji, ni wɔbaakpa lɛ fai ni ekɛ wɔhe esha lɛ ake wɔ, ni agbɛnɛ hu, wɔtsake wɔjeŋba. Kɛ́ wɔfee esha ni yɔɔ hiɛdɔɔ lɛ, nɔ kroko ni esa akɛ wɔfee ji, ni wɔyana asafoŋ onukpai lɛ ni amɛye amɛbua wɔ.—Yak. 5:14, 15.
d Ŋmalɛi ni tamɔ nɛkɛ lɛ ekomɛi yɛ saneyitsei ni ji “Tsuiyeli” kɛ “Miishɛjemɔ” ni yɔɔ wolo ni ji, Ŋmalɛi Ni Waa Wɔ Ni Wɔhi Shi Akɛ Kristofoi lɛ mli lɛ shishi.