“Nyɛhalaa Mɔ Ni Nyɛbaasɔmɔ”

1. Mɛni kɛ́ wɔfee lɛ ebaahã wɔná miishɛɛ diɛŋtsɛ? Ni mɛni hewɔ? (Yesaia 48:​17, 18)

YEHOWA, wɔ-Tsɛ ni yɔɔ ŋwɛi lɛ sumɔɔ wɔ waa, ni eesumɔ ni wɔná miishɛɛ bianɛ kɛ wɔsɛɛ hu. (Jaj. 3:​12, 13) Ebɔ wɔ kɛ hesai krɛdɛi komɛi, shi ebɔɔɔ wɔ bɔ ni kɛ́ wɔhala akɛ wɔbaafee nɔ ni wɔ diɛŋtsɛ wɔsumɔɔ lɛ, wɔbaaye omanye, loo bɔ ni wɔ diɛŋtsɛ wɔbaanyɛ wɔtsɔɔ nɔ ni ja kɛ nɔ ni ejaaa. (Jaj. 8:9; Yer. 10:23) Ele akɛ nɔ ni baahã wɔná miishɛɛ diɛŋtsɛ ji ni wɔbaasɔmɔ lɛ ni wɔbaabo lɛ toi.—Kanemɔ Yesaia 48:​17, 18.

2. Mɛni Satan miisumɔ ni wɔhe wɔye? Ni mɛni Yehowa fee yɛ enɛ hewɔ?

² Satan miisumɔ ni adesai ahe aye akɛ, kɛ́ amɛtsi amɛhe kɛje Yehowa he lɛ, amɛbaaná miishɛɛ, ni amɛ diɛŋtsɛ amɛbaanyɛ amɛfee nɔ ni amɛsumɔɔ ni nɔ ko fɔŋ ko baaa. (1 Mo. 3:​4, 5) Enɛ hewɔ lɛ, Yehowa eŋmɛ adesai gbɛ be fioo koni amɛfee nɔ ni amɛ diɛŋtsɛ amɛsumɔɔ koni akwɛ kɛji nɔ ni Satan wie lɛ ji anɔkwale aloo amale. Wɔ diɛŋtsɛ wɔmiina nɔ ni ejɛ enɛ mli kɛba. Shi Biblia lɛ tsĩ hii kɛ yei babaoo ni hala akɛ amɛbaasɔmɔ Yehowa ni no hã amɛná miishɛɛ lɛ atã. Mɛi nɛɛ ateŋ mɔ kome ni ná miishɛɛ waa ji Yesu. No hewɔ lɛ, klɛŋklɛŋ lɛ, nyɛhãa wɔkwɛa yiŋtoi ahewɔ ni ehala akɛ ebaasɔmɔ Yehowa. Kɛkɛ lɛ, no sɛɛ lɛ, wɔbaasusu nɔ hewɔ ni esa akɛ wɔjá Yehowa, wɔ-Tsɛ ni yɔɔ ŋwɛi lɛ he. Naagbee kwraa lɛ, wɔbaasusu yiŋtoi komɛi ahewɔ ni wɔhala akɛ wɔbaasɔmɔ Yehowa lɛ ahe.

MƐNI HEWƆ YESU HALA AKƐ EBAASƆMƆ YEHOWA?

3. Mɛni Satan kɛɛ ekɛbaahã Yesu? Ni mɛni Yesu hala akɛ ebaafee?

³ Be ni Yesu yɔɔ shikpɔŋ lɛ nɔ lɛ, ehe bahia ni ehala mɔ ni ebaasumɔ ni esɔmɔ. Akɛ nɔkwɛmɔnɔ lɛ, yɛ ebaptisimɔ lɛ sɛɛ be fioo lɛ, Satan kɛ je nɛŋ maŋtsɛyelii lɛ fɛɛ tsɔɔ lɛ ni ekɛɛ lɛ akɛ, kɛ́ ekula shi ejá lɛ shi kome pɛ lɛ, ekɛ fɛɛ baahã lɛ. Yesu kɛɛ lɛ akɛ: “Jee mihiɛ, Satan! Ejaakɛ aŋma akɛ: ‘Yehowa, o-Nyɔŋmɔ lɛ, esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.’” (Mat. 4:​8-10) Mɛni hewɔ Yesu hala akɛ ebaasɔmɔ Yehowa lɛ? Hã wɔkwɛ yiŋtoi komɛi ahewɔ ni efee nakai.

4-5. Mɛni ji yiŋtoi komɛi ahewɔ ni Yesu hala akɛ ebaasɔmɔ Yehowa?

⁴ Yiŋtoo titri hewɔ ni Yesu hala akɛ ebaasɔmɔ e-Tsɛ Yehowa ji, esumɔɔ Yehowa waa diɛŋtsɛ. (Yoh. 14:31) Yiŋtoo kroko hewɔ ni ehala akɛ ebaasɔmɔ Yehowa ji, ele akɛ eja akɛ ebaafee nakai. (Yoh. 8:​28, 29; Kpo. 4:11) Yesu le hu akɛ, Yehowa ŋɔɔ wala jɛɔ, ni akɛ, efeɔ ejurɔ waa ni ewieɔ anɔkwale be fɛɛ be. (Lala 33:4; 36:9; Yak. 1:17) Yehowa lakako Yesu dã, ni nɔ fɛɛ nɔ ni Yesu yɔɔ lɛ, Yehowa ŋɔɔ ejɛ. (Yoh. 1:14) Ni Satan hu? Yesu le akɛ, Satan lɛ, gbɔmɔgbelɔ, amalelɔ, kɛ amimyelɔ ji lɛ, ni esusuɔ lɛ pɛ ehe. (Yoh. 8:44) Enɛ hewɔ lɛ, Yesu tswa efai shi akɛ ekaseŋ Satan kɔkɔɔkɔ koni ekatse Yehowa hiɛ atua.—Fip. 2:​5-8.

⁵ Naa nɔ kroko hewɔ ni Yesu hala akɛ ebaasɔmɔ Yehowa: Yesu le akɛ, kɛ́ esɔmɔ Yehowa lɛ, nibii kpakpai pii baajɛ mli aba. (Heb. 12:2) Akɛ nɔkwɛmɔnɔ lɛ, ele akɛ, kɛ́ ehiɛ esɔɔmɔ lɛ mli kɛyashi naagbee lɛ, no baahã atse e-Tsɛ gbɛ́i lɛ he, ni ebaagbele gbɛ koni anyɛ ajie esha kɛ gbele kɛje je lɛ mli.

NƆ HEWƆ NI ESA AKƐ WƆJÁ YEHOWA

6-7. Mɛni hewɔ ŋmɛnɛ lɛ mɛi pii sɔmɔɔɔ Yehowa lɛ? Shi mɛni hewɔ esa akɛ wɔjá Yehowa?

⁶ Ŋmɛnɛ lɛ, mɛi pii sɔmɔɔɔ Yehowa, ejaakɛ amɛleee akɛ eyɛ sui kpakpai pii, ni amɛleee nɔ ni efee ehã amɛ. Nakai nɔŋŋ eji yɛ mɛi ni bɔfo Paulo shiɛ ehã yɛ Atene lɛ hu agbɛfaŋ. No mli lɛ, amɛleee Nyɔŋmɔ.—Bɔf. 17:​19, 20, 30, 34.

⁷ Paulo kɛɛ mɛi ni yɔɔ Atene lɛ akɛ, anɔkwa Nyɔŋmɔ lɛ ji mɔ ni hãa “mɛi fɛɛ wala kɛ mumɔ kɛ nibii fɛɛ.” Ewie hu akɛ: “Emli wɔyɔɔ wala ni wɔtsiɔ wɔhe ni wɔyɔɔ shihilɛ mli yɛ.” Nyɔŋmɔ ni bɔ nibii fɛɛ. Lɛ ji mɔ ni jɛ gbɔmɔ kome mli “efee gbɔmɛi ajeŋmaji fɛɛ.” No hewɔ lɛ, lɛ pɛ esa akɛ wɔjá.—Bɔf. 17:​25, 26, 28.

8. Mɛni Yehowa efeŋ kɔkɔɔkɔ? Ni mɛni efee ni tsɔɔ akɛ esumɔɔ wɔ waa?

⁸ Yehowa ni bɔ wɔ, ni lɛ ji jeŋ muu fɛɛ Nɔyelɔ. No hewɔ lɛ, kulɛ ebaanyɛ enyɛ wɔnɔ ni wɔsɔmɔ lɛ. Shi efeee nakai; ni efeŋ nakai kɔkɔɔkɔ. Moŋ lɛ, efee nibii pii ni yeɔ ebuaa wɔ ni wɔna akɛ, eyɛ ni esumɔɔ wɔteŋ mɔ fɛɛ mɔ waa. Eesumɔ ni kɛ́ ebaahi lɛ, mɛi fɛɛ abatsɔmɔ enanemɛi ni amɛhi shi kɛya naanɔ. (1 Tim. 2:​3, 4) Enɛ hewɔ lɛ, etsɔse wɔ koni wɔtsɔɔ mɛi nibii kpakpai ni ebaafee ehã adesai kɛ gbɛ ni ebaatsɔ nɔ efee nibii nɛɛ. (Mat. 10:​11-13; 28:​19, 20) Eto wɔhe gbɛjianɔ ewo asafoi amli, ni ehã wɔ nɔkwɛlɔi ni sumɔɔ wɔ waa.—Bɔf. 20:28.

9. Mɛni hãa wɔnaa akɛ Yehowa sumɔɔ adesai fɛɛ?

⁹ Bɔ ni Yehowa kɛ mɛi ni heee amɛyeee akɛ eyɛ lɛ yeɔ ehãa lɛ hãa wɔnaa akɛ, esumɔɔ adesai waa. Bo lɛ, susumɔ enɛ he okwɛ: Kɛjɛ blema aahu kɛbashi ŋmɛnɛ lɛ, mɛi pii ekpɛ amɛyiŋ akɛ amɛbaafee nɔ ni amɛ diɛŋtsɛ amɛsumɔɔ, moŋ fe ni amɛbaabo Yehowa toi. Fɛɛ sɛɛ lɛ, akɛni Yehowa mli hi hewɔ lɛ, ehãa amɛ nibii ni baahã amɛya nɔ amɛhi wala mli ni shihilɛ akaje amɛtsine. (Mat. 5:​44, 45; Bɔf. 14:​16, 17) Agbɛnɛ hu, amɛyɛ nanemɛi kɛ wekumɛi ni sumɔɔ amɛsane, amɛyɛ bii, ni amɛnyɛɔ amɛtsuɔ nii ni amɛnáa he sɛɛ. (Lala 127:3; Jaj. 2:24) Anɔkwa, bɔ ni wɔ-Tsɛ ni yɔɔ ŋwɛi lɛ kɛ amɛ yeɔ lɛ hãa wɔnaa faŋŋ akɛ, esumɔɔ adesai fɛɛ. (2 Mo. 34:6) Agbɛnɛ, nyɛhãa wɔkaia wɔhe nɔ hewɔ ni wɔhala akɛ wɔbaasɔmɔ Yehowa kɛ jɔɔmɔi ni wɔnáa yɛ no hewɔ.

NƆ HEWƆ NI WƆHALA AKƐ WƆBAASƆMƆ YEHOWA

10. (a) Mɛni ji yiŋtoo titri hewɔ ni wɔsɔmɔɔ Yehowa? (Mateo 22:37) (b) Mɛɛ gbɛ nɔ oná Yehowa tsuishitoo lɛ he sɛɛ? (Lala 103:​13, 14)

¹⁰ Tamɔ bɔ ni eji yɛ Yesu gbɛfaŋ lɛ, yiŋtoo titri hewɔ ni wɔsɔmɔɔ Yehowa ji, wɔsumɔɔ lɛ waa. (Kanemɔ Mateo 22:37.) Kɛ́ wɔkase Yehowa sui lɛ ahe nii lɛ, suɔmɔ ni wɔyɔɔ kɛhã lɛ lɛ mli waa. Akɛ nɔkwɛmɔnɔ lɛ, susumɔ bɔ ni Yehowa toɔ etsui shi ehãa etsuji lɛ he okwɛ. Be ni Israelbii lɛ gbo enɔ toi lɛ, ekɛɛ amɛ akɛ: “Nyɛfainɛ, nyɛkua nyɛsɛɛ kɛjea nyɛgbɛi fɔji lɛ anɔ.” (Yer. 18:11) Yehowa kaiɔ akɛ wɔyeee emuu; sũ kɛkɛ ji wɔ. (Kanemɔ Lala 103:​13, 14.) Kɛ́ osusu bɔ ni Yehowa eto etsui shi ehã bo kɛ shii abɔ ni ekɛ ohe eshai eke bo lɛ he lɛ, ani no tsirɛɛɛ bo ni osɔmɔ lɛ owala gbii fɛɛ?

11. Mɛni ji yiŋtoi krokomɛi ahewɔ ni wɔhala akɛ wɔbaasɔmɔ wɔ-Tsɛ ni yɔɔ ŋwɛi lɛ?

¹¹ Yiŋtoo kroko hewɔ ni wɔsɔmɔɔ Yehowa ji, wɔle akɛ no ji nɔ ni ja ni esa akɛ wɔfee. (Mat. 4:10) Kɛfata he lɛ, wɔle akɛ kɛ́ wɔsɔmɔ Yehowa ni wɔye lɛ anɔkwa lɛ, nibii kpakpai pii baajɛ mli aba. Nibii kpakpai nɛɛ ekomɛi ji, etseɔ Yehowa gbɛ́i lɛ he, ehãa anaa akɛ Abonsam ji amalelɔ, ni ehãa Yehowa náa miishɛɛ. Agbɛnɛ hu, kɛ́ ŋmɛnɛ lɛ, wɔhala akɛ wɔbaasɔmɔ Yehowa lɛ, wɔbaaná hegbɛ wɔhi shi kɛya naanɔ ni wɔsɔmɔ lɛ kɛya naanɔ!—Yoh. 17:3.

12-13. Mɛni wɔkaseɔ yɛ Jane kɛ Pam niiashikpamɔ lɛ mli?

¹² Gbekɛbii po baanyɛ akase Yehowa he nii ni amɛbasumɔ lɛ waa, ni suɔmɔ nɛɛ baanyɛ aya nɔ atso yɛ amɛmli aahu kɛyashi amɛbaadara. Naa nyɛmimɛi yei enyɔ komɛi ni ji mɔ kɛ enyɛmi ni atsɛɔ amɛ Jane kɛ Pam lɛ niiashikpamɔ ni kɔɔ enɛ he.a Be ni akɛ amɛ bɔi Biblia lɛ kasemɔ lɛ, Jane eye afii 11, ni Pam eye afii 10. Eyɛ mli akɛ amɛfɔlɔi eŋmɛɛɛ gbɛ ni akɛ amɛ hu akase Biblia lɛ moŋ, shi amɛhã amɛbiyei lɛ le akɛ, kɛ́ amɛkɛ amɛ baaya sɔlemɔ lɛ, no lɛ, amɛbaaŋmɛ gbɛ ni aya nɔ akɛ amɛ akase nii. Jane wie akɛ, “Nɔ ni Odasefoi lɛ tsɔɔ mi kɛjɛ Biblia lɛ mli lɛ ye ebua mi ni mikɛ tsofai fɔji tsuuu nii ni mibɔɔɔ ajwamaŋ, tamɔ mɛi ni mikɛyɔɔ skul lɛ feɔ lɛ.”

¹³ Nyɛmimɛi yei enyɔ nɛɛ tee amɛhiɛ, ni afii fioo sɛɛ lɛ, abaptisi amɛ. Sɛɛ mli lɛ, amɛyi enyɔ lɛ fɛɛ kɛ amɛhe wo gbɛgbamɔ nitsumɔ lɛ mli, ni yɛ nakai beiaŋ nɔŋŋ lɛ, amɛmiikwɛ amɛfɔlɔi ni edara yɛ afii amli lɛ. Jane hiɛ sɔɔ nɔ ni Yehowa efee ehã lɛ kɛ enyɛmi lɛ waa. Ewie akɛ: “Mibana akɛ, Yehowa kwɛɔ enanemɛi jogbaŋŋ be fɛɛ be, ni tamɔ bɔ ni awie yɛ 2 Timoteo 2:19 lɛ, ‘Yehowa le mɛi ni ji enii.’” Niiashikpamɔ nɛɛ hãa wɔnaa faŋŋ akɛ, Yehowa yeɔ ebuaa mɛi ni kpɛɔ amɛyiŋ akɛ amɛbaasumɔ lɛ ni amɛsɔmɔ lɛ lɛ.

14. Mɛɛ gbɛ nɔ wɔfãa Yehowa he? (Kwɛmɔ mfonirii lɛ hu.)

¹⁴ Wɔmiisumɔ ni wɔhã mɛi ale akɛ, nibii gbohii ni amɛnu yɛ Yehowa he lɛ ateŋ ekome folo po bɛ mli. Ŋɔɔ lɛ akɛ, oyɛ naanyo ko ni mli hi ni feɔ ejurɔ waa ni kɛ sane keɔ. Shi gbi ko lɛ, onu ni mɔ ko miiwie akɛ onaanyo lɛ yitsoŋ wa ni eyeee anɔkwa. Te obaafee onii ohã tɛŋŋ? Obaafã onaanyo lɛ he, aloo jeee nakai? Nakai nɔŋŋ kɛ́ mɛi male amɛwie nibii gbohii yɛ Yehowa he lɛ, wɔfãa ehe, ni tsɔɔ akɛ, wɔhãa amɛleɔ anɔkwale lɛ. (Lala 34:1; Yes. 43:10) Wɔtsɔɔ wɔwiemɔ kɛ wɔnifeemɔi anɔ wɔhãa anaa faŋŋ akɛ, wɔmiisumɔ ni wɔkɛ wɔtsui muu fɛɛ asɔmɔ Yehowa.

15. Mɛɛ jɔɔmɔi Paulo ná yɛ tsakemɔi wuji ni efee yɛ eshihilɛ mli lɛ ahewɔ? (Filipibii 3:​7, 8)

¹⁵ Wɔjɛɔ wɔsuɔmɔ mli wɔfeɔ tsakemɔi yɛ wɔshihilɛ mli koni wɔnyɛ wɔsa Yehowa hiɛ loo wɔtsu babaoo yɛ esɔɔmɔ lɛ mli. Akɛ nɔkwɛmɔnɔ lɛ, no mli lɛ, hegbɛ ni bɔfo Paulo yɔɔ yɛ Yudafoi lɛ ajamɔ lɛ mli hewɔ lɛ, mɛi buɔ lɛ waa. Shi ekɛ fɛɛ shã afɔle ni ebatsɔ Kristo kaselɔ ni esɔmɔ Yehowa. (Gal. 1:14) Enɛ ni efee lɛ hewɔ lɛ, ená miishɛɛ waa yɛ shihilɛ mli, ni ená hegbɛ hu akɛ ekɛ Kristo baaye nɔ yɛ ŋwɛi. Paulo shwaaa ehe kɔkɔɔkɔ akɛ ehala akɛ ebaasɔmɔ Yehowa, ni wɔ hu wɔshwaŋ wɔhe kɔkɔɔkɔ.—Kanemɔ Filipibii 3:​7, 8.

16. Mɛni wɔkaseɔ yɛ Julia niiashikpamɔ lɛ mli? (Kwɛmɔ mfonirii lɛ hu.)

¹⁶ Kɛ́ wɔhã Yehowa sɔɔmɔ he hia wɔ fe nibii krokomɛi fɛɛ yɛ wɔshihilɛ mli lɛ, wɔbaaná miishɛɛ bianɛ, ni wɔsɛɛ hu lɛ, wɔbaaná jɔɔmɔi pii. Naa nyɛmi yoo ko ni atsɛɔ lɛ Julia lɛ niiashikpamɔ. Kɛjɛ Julia gbekɛbiiashi tɔ̃ɔ lɛ, efata mɛi ni láa yɛ esɔlemɔ lɛ mli lɛ ahe. Egbee ŋɔɔ aahu akɛ, lalɔ ko ni he esa lɛ yɔse ni ebɔi lɛ tsɔsemɔ. Etsɛɛɛ ni Julia he basa ni ehe gbɛ́i waa ni ená hegbɛ eyalá yɛ hei wujiwuji. Be ko lɛ, mɔ ko ni ekɛ lɛ fɛɛ yaa lala skul ko ni ehe gbɛ́i lɛ kɛ lɛ bɔi Nyɔŋmɔ he sanegbaa ni ehã ele akɛ Nyɔŋmɔ yɛ gbɛ́i, ni egbɛ́i ji Yehowa. Eyeee be ko ni Julia hã akɛ lɛ bɔi Biblia lɛ kasemɔ, ni akɛ lɛ kaseɔ nii shii enyɔ daa otsi. Naagbee lɛ, ekpɛ eyiŋ akɛ, nɔ najiaŋ ni ekɛ lamɔ baafee enitsumɔ lɛ, ekɛ ebe kɛ ehewalɛ fɛɛ baasɔmɔ Yehowa. Ani ená lɛ mlɛo akɛ ebaakpɛ yiŋ nɛɛ? Dabi kwraa. Ewie akɛ: “Mɛi pii kɛɛ mi akɛ yiŋ ni mikpɛ akɛ mikɛ minitsumɔ akɛ lalɔ lɛ baakpasa shi lɛ jeee yiŋkpɛɛ kpakpa kwraa, shi no mli lɛ mitswa mifai shi akɛ mikɛ mibe fɛɛ baasɔmɔ Yehowa.” Ani Julia eshwa ehe yɛ yiŋ ni ekpɛ lɛ he? Eyɛ mli akɛ nɔ ni fe afii 30 eho kɛjɛ be ni ekpɛ nakai yiŋ lɛ moŋ, shi ewie akɛ, “Eŋɔɔ minaa waa akɛ mikpɛ miyiŋ akɛ masɔmɔ Yehowa, ni mile akɛ wɔsɛɛ lɛ, ebaahã mi nibii fɛɛ ni mitsui shweɔ.”—Lala 145:16.

YAA NƆ OSƆMƆ YEHOWA

17. Te jeŋ fɔŋ nɛɛ naagbee lɛ ni ebɛŋkɛ lɛ kɔɔ mɛi ni bɔiko Yehowa sɔɔmɔ lɛ ahe ehãa tɛŋŋ? Ni te ekɔɔ mɛi ni miisɔmɔ lɛ lɛ hu ahe ehãa tɛŋŋ?

¹⁷ Jeŋ fɔŋ nɛɛ naagbee lɛ ebɛŋkɛ waa. Bɔfo Paulo wie akɛ: “‘Be fioo kɛkɛ eshwɛ’ ni ‘mɔ ni baa lɛ baaba, ni esɛɛ etsɛŋ.’” (Heb. 10:37) Mɛni enɛ tsɔɔ? Etsɔɔ akɛ kɛ́ mɔ ko bɔiko Yehowa sɔɔmɔ lɛ, belɛ be ni eyɔɔ ni ekɛbaahala akɛ ebaasɔmɔ Yehowa lɛ faaa dɔŋŋ. (1 Kor. 7:29) Shi kɛ́ wɔmiisɔmɔ Yehowa lɛ, enɛ hãa wɔnaa akɛ kɛ́ wɔkɛ naagbai miikpe lɛ, etsɛŋ fɛɛ sɛɛ baafo.

18. Mɛni Yehowa kɛ Yesu miisumɔ ni wɔfee?

¹⁸ Yesu wo mɛi hewalɛ ni amɛbatsɔmɔ ekaselɔi ni amɛya nɔ amɛnyiɛ esɛɛ. (Mat. 16:24) No hewɔ lɛ, kɛ́ wɔbɔi Yehowa sɔɔmɔ etsɛ lɛ, esa akɛ wɔtswa wɔfai shi akɛ wɔbaaya nɔ wɔsɔmɔ lɛ. Enɛ feemɔ bɛ mlɛo; ebiɔ hiɛmiamɔ waa. Shi kɛ́ wɔfee nakai lɛ, wɔbaaná jɔɔmɔi pii bianɛ po, ni wɔtsui baanyɔ wɔmli waa!—Lala 35:27.

19. Mɛni wɔkaseɔ yɛ Gene niiashikpamɔ lɛ mli?

¹⁹ Mɛi komɛi nuɔ he akɛ kɛ́ amɛkpɛ amɛyiŋ akɛ amɛbaasɔmɔ Yehowa lɛ, amɛnyɛŋ amɛye wala tamɔ mɛi krokomɛi feɔ lɛ. Oblahii kɛ oblayei, ani nyɛnuɔ he akɛ kɛ́ nyɛkpɛ nyɛyiŋ akɛ nyɛbaasɔmɔ Yehowa lɛ, nɔ ko wulu baaŋmɛɛ nyɛ? Oblanyo ko ni atsɛɔ lɛ Gene lɛ wie akɛ: “Minu he akɛ Yehowa Odasefonyo ni miji lɛ hewɔ lɛ, minyɛɛɛ maye wala. Oblahii ni mikɛje nɔ lɛ ateŋ mɛi pii yashwɛɔ amɛhiɛ, amɛkɛ yei jeɔ kpo, loo amɛtswaa vidio gemisii ni yiwalɛ yɔɔ mli, shi mi lɛ, ehiii mi nibii nɛɛ feemɔ, ejaakɛ asafoŋ kpeei kɛ shiɛmɔyaa ehe mibe fɛɛ.” Jwɛŋmɔ ni ejaaa ni Gene ná nɛɛ ye lɛ awui. Ewie akɛ: “Mibɔi nibii gbohii ni minanemɛi lɛ feɔ lɛ ekomɛi feemɔ, ni minu he tamɔ nɔ ni, agbɛnɛ lɛ, miná miishɛɛ. Shi etsɛɛɛ ni etse yɛ mihiɛ. Mibɔi nibii ni mikase yɛ Biblia lɛ mli ni miku mihiɛ mishwie nɔ lɛ ahe susumɔ ekoŋŋ, ni mikpɛ miyiŋ akɛ mikɛ mitsui muu fɛɛ baasɔmɔ Yehowa. Kɛjɛ be ni mikpɛ nakai yiŋ lɛ, etamɔ nɔ ni Yehowa boɔ misɔlemɔi fɛɛ toi.”

20. Mɛni esa akɛ wɔtswa wɔfai shi akɛ wɔbaafee?

²⁰ Mɔ ni fo Lala 65 lɛ wie akɛ, ‘mɔ ni Yehowa halaa ni ehãa ebɛŋkɛɔ lɛ koni ehi ekpoi lɛ anɔ lɛ yɛ miishɛɛ.’ (Lala 65:4) No hewɔ lɛ, nyɛhãa wɔtswaa wɔfai shi akɛ, wɔbaaya nɔ wɔsɔmɔ Yehowa, tamɔ Yoshua, mɔ ni wie akɛ: “Mi kɛ mishĩabii lɛ, wɔbaasɔmɔ Yehowa” lɛ.—Yos. 24:15.