Mɛi Babaoo Ahe Efee Shoo​—⁠Mɛni Obaanyɛ Ofee Koni Ohe Akafee Shoo?

• “Mɛi ni yɔɔ U.S. ni edara lɛ ateŋ mɛi babaoo etsɔɔ akɛ amɛhe efee shoo, ni oblahii kɛ oblayei ni darako tsɔ lɛ babaoo hu fata he.”​—Aná kɛjɛ Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “[Jeŋ Hewalɛnamɔ Gbɛjianɔtoo] lɛ etswa adafi akɛ akɛni shoofeemɔ miigba mɛi babaoo agbɔmɔtsoŋ hewalɛnamɔ naa hewɔ lɛ, eto kuu hee ko he gbɛjianɔ ni amɛye amɛbua mɛi ni amɛkɛ amɛhe ashãra jogbaŋŋ, ni amɛtao gbɛ ni hi jogbaŋŋ ni abaanyɛ atsɔ nɔ atsu shoofeemɔ he nii yɛ maŋ fɛɛ maŋ nɔ, ekɔɔ he eko kɛ́ maji nɛɛ miiye ohia po.”​—World Health Organization, November 15, 2023.

Biblia lɛ kɛ ŋaawoi ni sa ni baaye abua wɔ koni wɔnyɛ wɔkɛ mɛi ashãra jogbaŋŋ ni wɔhe akafee shoo lɛ hãa wɔ.

Biblia mli shishitoo mlai ni baanyɛ aye abua bo

Tse nifeemɔi ni hãa otseɔ ohe kɛjeɔ mɛi ahe lɛ nɔ. Nifeemɔi nɛɛ ekomɛi ji soshia midia lɛ ni akɛtsuɔ nii fe nine. Yɛ no najiaŋ lɛ, taomɔ hegbɛi ni okɛ mɛi abɔ hiɛ kɛ hiɛ koni oná nanemɛi kpakpai.

• Biblia mli shishitoo mla: “Naanyo kpakpa sumɔɔ mɔ yɛ bei fɛɛ mli, ni ebatsɔɔ nyɛmi yɛ haomɔ beiaŋ.”​—Abɛi 17:17.

Taomɔ hegbɛi kɛye obua mɛi krokomɛi. Kɛ́ wɔfee nibii wɔhã mɛi lɛ, ehãa naanyobɔɔ ni yɔɔ wɔ kɛ amɛ teŋ lɛ mli waa ni wɔmii shɛɔ wɔhe; agbɛnɛ hu, ehãaa wɔnu shoofeemɔ he.

• Biblia mli shishitoo mla: “Nɔhãmɔ hãa mɔ náa miishɛɛ fe hemɔ.”​—Bɔfoi 20:35.

Yaa wɔwɛbsaiti lɛ nɔ koni ona Biblia mli saji srɔtoi ni baaye abua bo ni oná nanemɛi kpakpai.