Ye Obua Mɛi Koni Okɛye Shoofeemɔ Nɔ​—⁠Nɔ Ni Biblia Lɛ Kɛɔ Yɛ He

Yɛ je lɛŋ hei srɔtoi lɛ, mɛi ahe feɔ shoo ni amɛnuɔ he akɛ amɛnyɛŋ amɛkɛ mɛi abɔ naanyo kpaakpa. Mɛi ni ekase helatsamɔ he nii jogbaŋŋ lɛ ekomɛi heɔ amɛyeɔ akɛ, gbɛ kome ni abaanyɛ atsɔ nɔ aye shoofeemɔ nɔ ji, ni abaaye abua mɛi.

• “Kɛ́ wɔye wɔbua mɛi ni ehia amɛ lɛ, wɔmii baanyɛ ashɛ wɔhe ni wɔtsui baanyɔ wɔmli, ni wɔnuŋ he akɛ wɔhe efee shoo loo mɛi etse amɛhe kɛje wɔhe.”​—U.S. National Institutes of Health.

Biblia lɛ woɔ wɔ ŋaa kpakpai kɛtsɔɔ wɔ nibii ni wɔbaanyɛ wɔfee kɛye wɔbua mɛi. Kɛ́ wɔkɛ nɔ ni Biblia lɛ wieɔ lɛ tsu nii lɛ, ebaaye ebua wɔ ni wɔye shoofeemɔ nɔ.

Nɔ ni obaanyɛ ofee

Feemɔ ejurɔ. Too gbɛjianɔ ni oná be ni baahã okɛ mɛi krokomɛi ashãra, titri lɛ hiɛ kɛ hiɛ. Bɔɔ mɔdɛŋ ni ojɛ otsuiŋ okɛ mɛi aja nɔ ni oyɔɔ lɛ. Kɛ́ ofee nakai lɛ, ekã shi faŋŋ akɛ amɛhiɛ baasɔ, ni enɛ baahã nyɛtsɔmɔ nanemɛi.

• Biblia mli shishitoo mla: “Nyɛyaa nɔ nyɛhãa, ni mɛi baahã nyɛ.”​—Luka 6:38.

Okɛ obe kɛ ohewalɛ aye abua mɛi. Taomɔ nibii ni obaanyɛ ofee kɛye obua mɛi ni kɛ shihilɛi ni mli wawai miikpe. Nibii nɛɛ ekomɛi ji ni okɛ mlitsɔlɛ baabo amɛ toi jogbaŋŋ loo ni obaafee nibii ni baahã shihilɛ lɛ afee mlɛo ahã amɛ.

• Biblia mli shishitoo mla: “Naanyo efee klalo akɛ ebaaye ebua, yɛ shihilɛ fɛɛ shihilɛ mli.”​—Abɛi 17:17, Contemporary English Version.

Kɛ́ ootao ole bɔ ni obaafee okɛ mɛi ashãra jogbaŋŋ lɛ he saji krokomɛi lɛ, kanemɔ sane ni ji “Family Life and Friendships” lɛ.