Yesu Tsuu Sɔlemɔ Shĩa Lɛ He

Yɛ aaafee April mli yɛ afi 30 Ŋ.B. lɛ, Yesu tee Yerusalem. No mli lɛ, mɛi pii eba jɛmɛ kɛhã Hehoo lɛ. Kɛ́ aaye Hehoo lɛ, ashãa afɔlei yɛ sɔlemɔ shĩa lɛ. Mɛi komɛi kɛ kooloi ni amɛkɛbaashã afɔle lɛ jɛɔ shĩa kɛbaa, shi mɛi komɛi hu bahéɔ yɛ Yerusalem.

Be ni Yesu tee sɔlemɔ shĩa lɛ, ena ni mɛi miihɔ̃ɔ kooloi yɛ jɛmɛ. Amɛmiiye jara yɛ Yehowa shĩa lɛ, ni ji he ni ajáa lɛ yɛ lɛ! Mɛni Yesu fee yɛ sane nɛɛ he? Efee kpãi ni akɛgwaoɔ mɔ ni ekɛshwie gwantɛŋi kɛ tsinai lɛ ni mɛi lɛ hɔ̃ɔ lɛ kɛje sɔlemɔ shĩa lɛ. Etsɔ shikatsakelɔi lɛ ashika lɛ eshwie shi, ni etsirɛ amɛkpɔlɔi lɛ etswiatswiaa shi. Yesu kɛɛ mɛi ni hɔ̃ɔ okpoi lɛ akɛ: ‘Nyɛjiea nibii nɛɛ kɛjea biɛ! Nyɛkɛ mi-Tsɛ shĩa lɛ akafea jarayelihe!’

Mɛi ni yɔɔ sɔlemɔ shĩa lɛ anaa kpɛ amɛhe waa yɛ nɔ ni Yesu fee lɛ hewɔ. Ekaselɔi lɛ kai akɛ, gbalɛ ko yɛ ni kɔɔ Mesia lɛ he ni kɛɔ akɛ: ‘Mihiɛ baadɔ Yehowa shĩa lɛ he waa.’

Yesu tsuu sɔlemɔ shĩa lɛ he shi kome ekoŋŋ yɛ afi 33 Ŋ.B. Ehãaa mɔ ko mɔ ko abule e-Tsɛ shĩa lɛ.