Yehowa Bu Yehoshafat He

Yuda maŋtsɛ Yehoshafat kumɔ Baal afɔleshaa latɛi lɛ, ni ejie amagai lɛ kɛje shikpɔŋ lɛ nɔ. Yehoshafat shwe ni etsɔɔ emaŋbii lɛ Yehowa mlai lɛ. No hewɔ lɛ, etsu maŋ lɛ mli onukpai lɛ ekomɛi kɛ Levibii kɛtee Yuda maji lɛ fɛɛ amli koni amɛyatsɔɔ mɛi lɛ Yehowa mlai lɛ.

Maji ni bɛŋkɛ Yuda lɛ she gbeyei akɛ amɛkɛ Yudabii lɛ baanɔ, ejaakɛ amɛna akɛ Yehowa kɛ ewebii lɛ yɛ. Mɛi komɛi po bake Maŋtsɛ Yehoshafat nii. Shi Moabbii lɛ, Amonbii lɛ, kɛ mɛi ni yɔɔ Seir kpokpaa lɛ nɔ lɛ ba ni amɛkɛ Yudabii lɛ abanɔ. Yehoshafat na akɛ esa akɛ ebi Yehowa dɛŋ yelikɛbuamɔ. Ehã hii, yei, kɛ gbekɛbii fɛɛ babua amɛhe naa yɛ Yerusalem. Kɛkɛ ni edamɔ amɛ fɛɛ amɛhiɛ ni esɔle ekɛɛ: ‘Yehowa, kɛ́ oyeee obuaaa wɔ lɛ, wɔnyɛŋ wɔye kunim. Ofainɛ, tsɔɔmɔ wɔ nɔ ni wɔfee.’

Yehowa hã amɛsɔlemɔ lɛ hetoo. Ekɛɛ amɛ akɛ: ‘Nyɛkashea gbeyei. Maye mabua nyɛ. Nyɛyabuaa nyɛhe naa, ni nyɛdamɔa shi, ni nyɛkwɛa bɔ ni mahere nyɛyiwala.’ Te Yehowa fee tɛŋŋ ehere amɛyiwala?

Enɔ jetsɛremɔ lɛ, Yehoshafat hala mɛi koni amɛnyiɛ asraafoi lɛ ahiɛ ni amɛlá. Amɛnyiɛ kɛjɛ Yerusalem kɛtee Tekoa, ni ji he ni amɛkɛ mɛi lɛ baanɔ yɛ lɛ.

Be ni lalɔi lɛ bɔi Yehowa yijiemɔ kɛ gbee ni wa lɛ, Yehowa ye ebua ewebii lɛ. Ehã Amonbii lɛ kɛ Moabbii lɛ ajwɛŋmɔ gbɛ ni amɛkɛ amɛhe bɔi nɔɔ. Amɛgbegbee amɛhe, ni eshwɛɛɛ amɛteŋ mɔ kome folo po. Shi Yehowa bu Yudabii lɛ, amɛsraafoi lɛ, kɛ osɔfoi lɛ ahe. Mɛi fɛɛ ni yɔɔ maji ni bɛŋkɛ Yuda lɛ nu nɔ ni Yehowa efee lɛ, ni amɛna akɛ Yehowa miibu ewebii lɛ ahe lolo. Mɛɛ gbɛ nɔ Yehowa tsɔɔ ehereɔ ewebii ayiwala? Etsɔɔ gbɛi srɔtoi babaoo anɔ efeɔ nakai. Ehe ehiaaa ni adesai aye abua lɛ dani enyɛ efee nakai.