Kuu Osɛɛ Oya Mɛi Fɛɛ ni Ná Wiemɔ lɛ He Miishɛɛ ko lɛ Aŋɔɔ
1 Wɔteŋ mɛi pii yɛ anɔkwale lɛ mli ŋmɛnɛ ejaakɛ mɔ ko kadi miishɛɛ ni wɔjie lɛ kpo yɛ Maŋtsɛyeli shɛɛ sane lɛ he lɛ, ni eto etsui shi kɛsara wɔ—ekolɛ efee enɛ shii abɔ—koni eha nakai miishɛɛ ni wɔná lɛ ada. Wɔ hu esa akɛ wɔhiɛ ahi wɔhe nɔ jogbaŋŋ ni wɔku wɔsɛɛ kɛya mɛi ni ná wiemɔ lɛ he miishɛɛ ko lɛ aŋɔɔ. Yɛ anɔkwale mli lɛ, sɛɛkuu-kɛsaramɔi afeemɔ fata nitsumɔ ni akɛwo wɔdɛŋ akɛ ‘wɔfee mɛi kaselɔi’ lɛ he.—Mat. 28:19, 20.
2 Kadimɔ Mɛi ni Ná Wiemɔ lɛ He Miishɛɛ Lɛ: Kɛ́ mɔ ko ekpɛlɛɛɛ ni wɔha lɛ wɔwoji lɛ eko po lɛ, ehiɛ su, egbee, loo ewiemɔi baanyɛ atsɔɔ akɛ eyɛ Maŋtsɛyeli shɛɛ sane lɛ he miishɛɛ ko. Wɔbaanyɛ wɔdamɔ enɛ nɔ wɔyasara lɛ ekoŋŋ. Nyɛmi nuu ko tee nuu ko ŋɔɔ shii enumɔ yɛ otsii enumɔ mli, shi nuu lɛ eŋɔɔɔ wɔwoji lɛ eko. Beni etee eŋɔɔ nɔ ni ji shii ekpaa nɔ lɛ, nuu lɛ ŋɔ wɔwoji lɛ eko, ni naagbee lɛ ekɛ lɛ je Biblia mli nikasemɔ shishi.
3 Kɛ́ oyɔse akɛ mɔ ni oshiɛɔ ohaa lɛ lɛ yɛ wiemɔ lɛ he miishɛɛ lɛ, kuu osɛɛ ni oyasara lɛ amrɔ nɔŋŋ, ekolɛ yɛ gbii fioo sɛɛ. Kaaha “mɔ fɔŋ lɛ” hegbɛ ní ebashá nɔ ni odũ yɛ mɔ lɛ tsui mli lɛ. (Mat. 13:19) Kɛ́ otsɔɔ mɔ lɛ be ni obaaku osɛɛ obasara lɛ lɛ, bɔɔ mɔdɛŋ ni oye oshiwoo lɛ nɔ.—Mat. 5:37.
4 Yɛ Gbɛjegbɛ nɔ Nitsumɔ Mli: Kɛ́ mɔ ko ná wiemɔ lɛ he miishɛɛ beni otsuɔ gbɛjegbɛ nɔ nitsumɔ loo oyeɔ trukaa odase lɛ, ani obɔɔ mɔdɛŋ oyasaraa lɛ? Yɛ nyɛsanegbaa lɛ naagbee lɛ, obaanyɛ okɛɛ akɛ: “Miná wɔsanegbaa nɛɛ he miishɛɛ waa. Nɛgbɛ manyɛ mana bo yɛ koni wɔtsa wɔsanegbaa lɛ nɔ?” Kɛ́ efeŋ nɔ ni kɛ naagba baaba lɛ, shiɛlɔi komɛi baanyɛ amɛkɛ amɛtɛlifoŋ nɔmba aha mɔ ni ná wiemɔ lɛ he miishɛɛ lɛ loo amɛkɛ amɛnɔmba aha mɔ lɛ ni lɛ hu ekɛ enɔ̃ aha amɛ. Kɛ́ mɛi fɔɔ bo namɔ akɛ ootsu gbɛjegbɛ nɔ nitsumɔ lɛ yɛ hekome too lɛ nɔŋŋ lɛ, ekolɛ ewaŋ kɛhaŋ amɛ akɛ amɛkɛ amɛtɛlifoŋ nɔmba loo adrɛs aaaha bo. Kɛ́ amɛkpoo po akɛ amɛkɛ amɛtɛlifoŋ nɔmba loo adrɛs aaaha bo lɛ, obaanyɛ oya nɔ oha amɛmiishɛɛ lɛ ada kɛ́ okɛ amɛ kpe ekoŋŋ yɛ gbɛjegbɛ lɛ nɔ.
5 Kɛ́ wɔna akɛ fɔfɔi ni wɔshwieɔ nɔ nu ni wɔhuɔ he lɛ efee fɛo lɛ, wɔnáa miishɛɛ waa. Nakai nɔŋŋ hu kɛ́ wɔfee sɛɛkuu-kɛsaramɔi ni wɔye wɔbua mɛi ni amɛná amɛkɛ Nyɔŋmɔ teŋ wekukpaa kpakpa lɛ, wɔnáa miishɛɛ waa. (1 Kor. 3:6) Ha efee oti ni ma ohiɛ akɛ obaaku osɛɛ oyasara mɛi fɛɛ ni náa wiemɔ lɛ he miishɛɛ ko lɛ.