Fã 5—Ní Wɔɔfee Biblia Mli Nikasemɔi ni Yaa Hiɛ
Ní Aaale Nii Abɔ ni Esa akɛ Akase
1 Kɛ́ Yesu miitsɔɔ nii lɛ, esusuɔ etoibolɔi lɛ anyɛmɔi ahe ni ekɛ amɛ wieɔ yɛ gbɛ ni “amɛaanyɛ amɛnu shishi” nɔ. (Mar. 4:33; Yoh. 16:12) Nakai nɔŋŋ ehe hiaa koni mɛi ni tsɔɔ Nyɔŋmɔ Wiemɔ lɛ ŋmɛnɛ lɛ ale nikasemɔ falɛ ni sa akɛ afee yɛ be pɔtɛɛ ko mli, be ni amɛfeɔ Biblia mli nikasemɔ lɛ. Nikasemɔ falɛ ni abaanyɛ afee lɛ baadamɔ shihilɛ mli ni tsɔɔlɔ lɛ kɛ nikaselɔ lɛ fɛɛ yɔɔ, kɛ amɛnyɛmɔi anɔ.
2 Tswaa Hemɔkɛyeli ni Mli Wa Oma Shi: Ekolɛ ebaabi koni akɛ nikaselɔi komɛi afee nikasemɔ shii enyɔ loo etɛ dani amɛnu nɔ ni akɛ nikaselɔi krokomɛi baafee yɛ be kome mli lɛ shishi. Ehe miihia ni wɔye wɔbua nikaselɔ lɛ koni enu nikasemɔ lɛ shishi jogbaŋŋ moŋ fe ni wɔkɛ lɛ aaakase nii babaoo yɛ be kukuoo ko mli. Ehe miihia ni nikaselɔ fɛɛ nikaselɔ aná shishitoo kpakpa ni ebaatswa hemɔkɛyeli hee ni ena yɛ Nyɔŋmɔ Wiemɔ lɛ mli lɛ ema nɔ.—Abɛi 4:7; Rom. 12:2.
3 Be ni ofeɔ nikasemɔ lɛ daa otsi lɛ, ehe miihia ni oye obua nikaselɔ lɛ koni enu nɔ ni ekaseɔ kɛjɛɔ Nyɔŋmɔ Wiemɔ lɛ mli lɛ shishi ni ekpɛlɛ nɔ, ni bei abɔ ni enɛ feemɔ baahe lɛ kɔɔɔ he eko. Kaawo nikasemɔ lɛ foi bɔ ni baaha nikaselɔ lɛ akaná anɔkwalei ni jara wa ni otsɔɔ lɛ lɛ he sɛɛ. Okɛ be ni fa bɔ ni sa agbala ejwɛŋmɔ kɛya otii lɛ anɔ, koni okɛ lɛ asusu ŋmalɛi titri ni nitsɔɔmɔi lɛ damɔ nɔ lɛ ahe.—2 Tim. 3:16, 17.
4 Okɛ Nibii ni Kɔɔɔ Nikasemɔ lɛ He Akafata He: Be mli ni wɔsumɔɔɔ akɛ wɔwoɔ nikasemɔ lɛ foi lɛ, wɔsumɔŋ hu akɛ wɔgba afã kɛjɛ nikasemɔ lɛ he. Kɛ nikaselɔ lɛ miitao koni ewie enaagbai ahe babaoo lɛ, ekolɛ ehe baahia ni wɔto gbɛjianɔ koni wɔkɛ lɛ asusu he be ni agbe nikasemɔ lɛ naa.—Jaj. 3:1.
5 Yɛ gbɛ kroko nɔ lɛ, anɔkwale lɛ he ekãa ni wɔyɔɔ lɛ baanyɛ aha wɔwie babaoo be ni wɔfeɔ nikasemɔ lɛ, ni enɛ baanyɛ afee kaa kɛha wɔ. (Lala 145:6, 7) Niiashikpamɔ loo oti ko ni akɛfoɔ nikasemɔ lɛ mli shikome lɛ he baanyɛ aba sɛɛnamɔ, shi esaaa akɛ wɔhaa enɛ feɔ babaoo loo wɔhaa amɛsɛɛ kɛlɛɔ tsɔ bɔ ni baaha nikaselɔ lɛ akaná Biblia mli shishijee anɔkwa nilee lɛ.
6 Kɛ́ wɔfee nikasemɔ ni fa bɔ ni sa yɛ nikasemɔ kome mli lɛ, wɔkɛyeɔ wɔbuaa Biblia kaselɔi lɛ koni ‘amɛnyiɛ Yehowa la lɛ mli.’—Yes. 2:5.