Okɛ Wɔwoji lɛ Atsu Nii Jogbaŋŋ
1. Mɛɛ gbɛ nɔ wɔɔtsɔ wɔkase hiɛsɔɔ kpo ni Yesu jie yɛ Yehowa nibii lɛ ahe lɛ?
1 Beni Yesu lɛ̀ asafo babaoo yɛ naakpɛɛ gbɛ nɔ sɛɛ lɛ, eto gbɛjianɔ koni abaa niyenii ni shwɛ lɛ yi. (Mat. 14:19-21) Hiɛsɔɔ ni tamɔ nɛkɛ yɛ Yehowa nibii ahe lɛ feɔ nɔkwɛmɔnɔ kpakpa kɛhaa wɔ akɛ wɔ hu ‘wɔjie hiɛsɔɔ kpo’ kɛtsɔ nibii fɛɛ ni Yehowa kɛhaa kɛtsɔ “tsulɔ anɔkwafo lɛ” nɔ lɛ ni wɔkɛaatsu nii jogbaŋŋ lɛ nɔ.—Kol. 3:15; Luka 12:42; Mat. 24:45-47.
2. Mɛni kɛ̀ wɔfee lɛ, ehaŋ wɔtĩa woji tɛtrɛbii lɛ anaa wɔshwie shi?
2 Woji Tɛtrɛbii: Ewaaa kwraa akɛ abaatĩa woji tɛtrɛbii lɛ anaa ashwie shi. Kɛ̀ wolo tɛtrɛbii ni wɔnine shɛɔ nɔ lɛ eko shwɛɔ be fɛɛ be lɛ, esa akɛ wɔtse yibɔ ni wɔshɛɔ lɛ nɔ. Ni woji tɛtrɛbii ni etsɛ lɛ hu? Eyɛ mli akɛ amɛtsɛ moŋ, shi saji ni yɔɔ mli lɛ ahe yɛ sɛɛnamɔ lolo. Kɛ̀ wɔbua woji tɛtrɛbii ni etsɛ nɛɛ eko naa wɔshwie shi lɛ, ekolɛ sɔɔmɔ nitsumɔ nɔkwɛlɔ lɛ loo onukpa kroko baanyɛ aye abua wɔ koni wɔnyɛ wɔkɛha yɛ gbɛ ni mɔɔ shi nɔ.
3, 4. Mɛɛ otii esa akɛ wɔha ehi wɔjwɛŋmɔ mli kɛ̀ wɔŋɔ woji yɛ Maŋtsɛyeli Asa lɛ nɔ?
3 Woji Krokomɛi: Kɛ̀ atsake wolo ni akɛbaaha lɛ, klɛŋklɛŋ lɛ, kwɛmɔ akɛ oyɛ eko yɛ shĩa ni okɛbaaha yɛ shiɛmɔ nitsumɔ lɛ mli dani oyaŋɔ eko yɛ Maŋtsɛyeli Asa lɛ nɔ ofata he. Ŋɔɔ yibɔ ni okɛbaaha yɛ shiɛmɔ nitsumɔ lɛ mli yɛ otsi lɛ mli pɛ, koni no sɛɛ kɛ̀ okɛ fɛɛ ha lɛ, oku osɛɛ oyaŋɔ ekoŋŋ.
4 Yɛ woji ni bo diɛŋtsɛ okɛbaatsu nii lɛ gbɛfaŋ lɛ, ofainɛ ni oshɛ nɔ ni he baahia bo lɛ pɛ. Ŋmaa ogbɛi kɛ asafo mli ni oyɔɔ lɛ yɛ gbɛhe ni atsɔɔ lɛ. No baaye abua koni kɛ̀ elaaje lɛ, onine ashɛ nɔ ekoŋŋ. Kɛ̀ oyɛ Watchtower Library ni yɔɔ CD-ROM nɔ lɛ eko, ni obua woji tɛtrɛbii ni onine shɛɔ nɔ lɛ naa lɛ, no lɛ ehe ehiaaa ni oshɛ Watchtower kɛ Awake! wolo kpoi lɛ.
5. Mɛni esa akɛ wɔha ehi wɔjwɛŋmɔ mli beni wɔkɛ wɔwoji lɛ haa lɛ, ni mɛɛ gbɛ̀i anɔ wɔbaanyɛ wɔtsɔ wɔtsĩ oniatsumɔ he gbɛjianɔtoo lɛ tã?
5 Woji Kɛhamɔ: Wɔbɔɔ mɔdɛŋ akɛ wɔkɛ wɔwoji lɛ aaaha mɛi ni jieɔ hiɛsɔɔ kpo lɛ pɛ. Kaimɔ akɛ, wɔ titri ji mɛi ni esa akɛ wɔwo woji ni he yɔɔ sɛɛnamɔ niì wɔkɛtsuɔ nii yɛ shiɛmɔ nitsumɔ lɛ mli nɛɛ ahe nyɔmɔ. Shi kɛlɛ, kaashashao shi akɛ oooha shiatsɛmɛi lɛ alé hegbɛ ni amɛyɔɔ ákɛ amɛkɛ shika aaafi jeŋ muu fɛɛ nitsumɔ lɛ sɛɛ lɛ. Ákɛ nɔkwɛmɔnɔ lɛ, kɛ̀ okɛ wolo miiha mɛi ni yɔɔ wiemɔ lɛ he miishɛɛ lɛ, obaanyɛ okɛɛ akɛ: “Kɛ̀ oyɛ he miishɛɛ akɛ oookane wɔ woji lɛ, wɔbaanyã he akɛ wɔɔshi wɔha bo. Eyɛ mli akɛ wɔkɛ wɔwoji lɛ haa ní wɔheee nɔ ko moŋ, shi wɔkpɛlɛɔ onia fioo ni atsuɔ kɛfiɔ jeŋ muu fɛɛ nitsumɔ lɛ sɛɛ lɛ nɔ.”
6. Mɛni hewɔ wɔbuɔ wɔwoji lɛ akɛ amɛhe yɛ sɛɛnamɔ waa lɛ, ni mɛni enɛ baatsirɛ wɔ ni wɔkɛ wɔwoji lɛ afee?
6 Yesu tsɔ naakpɛɛ gbɛ nɔ ekɛ heloonaa niyenii ha mɛi, shi be babaoo lɛ, elɛɔ amɛ kɛ mumɔŋ niyenii. Yesu kɛɛ: ‘Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ Yehowa daaŋ lɛ.’ (Mat. 4:4) Wɔwoji lɛ tsɔɔ Biblia mli anɔkwalei ni he hiaa kɛha naanɔ wala namɔ. (Yoh. 17:3) Amɛhe yɛ sɛɛnamɔ waa fe bɔ ni esa akɛ afite amɛ!