Biblia Lɛ Wolo ni Eko Kɛ lɛ Yeee Egbɔ

Átsɛ lɛ wolo ni aheɔ fe fɛɛ yɛ je lɛŋ, ni nakai pɛpɛɛpɛ eji. Akaneɔ Biblia lɛ ni asumɔɔ lɛ babaoo fe wolo fɛɛ wolo. Kɛbashi amrɔ nɛɛ, abuɔ yifalɛ ni aja (emuu lɛ fɛɛ loo efã) lɛ naa akɛ eshɛɔ ekomekomei akpekpei akpei ejwɛ yɛ wiemɔi fe 2,000 mli.

Shi, nɔ ni yɔɔ miishɛɛ kwraa fe Biblia lɛ falɛ ni aja lɛ ji ŋwɛi ni ajɛ aŋma lɛ. Kristofonyo bɔfo Paulo ŋma akɛ: “Ŋmalɛ fɛɛ ŋmalɛ . . . jɛ Nyɔŋmɔ mumɔ lɛŋ.” (2 Timoteo 3:16) Mɛni ji nɔ ni enɛ tsɔɔ? Wiemɔ kuku “jɛ Nyɔŋmɔ mumɔ lɛŋ” (Hela, the·oʹpneu·stos) lɛ shishi diɛŋtsɛ ji “Nyɔŋmɔ mu.” Hela wiemɔ ni tamɔ no, pneuʹma, shishi ji “mumɔ.” No hewɔ lɛ, nɔ ni no tsɔɔ ji akɛ, Nyɔŋmɔ mumɔ krɔŋkrɔŋ lɛ tsirɛ adesai niŋmalɔi, emu eshwie amɛnɔ, bɔni afee ni yɛ naagbee lɛ atsɛ nɔ ni baajɛ mli aba lɛ akɛ Nyɔŋmɔ Wiemɔ yɛ anɔkwale mli, shi jeee gbɔmɔ nɔ̃. Yɛ anɔkwale mli lɛ, mɛi babaoo ni amɛkane Biblia lɛ anaa ekpɛ amɛhe yɛ bɔ ni ekɛ ehe kpãa gbee, bɔ ni eja yɛ jeŋ nilee naa, bɔ ni mɛi ni ŋma lɛ yeɔ anɔkwa, ni amɛwieɔ kpookpoo, kɛ nɔ ni he hiaa fe fɛɛ lɛ, egbalɛi ni eba mli lɛ ahe—ni fɛɛ etsɔ̃ ekanelɔi akpekpei abɔ ni susuɔ nii ahe lɛ ayiŋ akɛ, wolo nɛɛ jɛ jɛɛhe ko ni nɔ kwɔ fe gbɔmɔ.a

Shi, te Nyɔŋmɔ kudɔ Biblia lɛ ŋmãa pɛpɛɛpɛ aahu kɛyashi naagbee eha tɛŋŋ? Mɛi komɛi kɛɔ akɛ etsɛ́ Biblia mli wiemɔi lɛ eha ni aŋmala. Mɛi krokomɛi kɛɔ akɛ, ekɛ emumɔ kanya susumɔi ni yɔɔ wiemɔi ni anaa yɛ Biblia lɛ mli lɛ, shi jeee wiemɔi komekomei lɛ. Shi, yɛ anɔkwale mli lɛ, mumɔ kanyamɔ lɛ nyɛŋ akɔ nifeemɔ kome he, ejaakɛ Nyɔŋmɔ “tsɔ gbɛi sɔrɔtoi anɔ ekɛ tsɛmɛi lɛ wie yɛ gbalɔi lɛ naa.” (Hebribii 1:1, NW; okɛto 1 Korintobii 12:6 he.) Wɔbaatao gbɛi ni Nyɔŋmɔ tsɔ̃ nɔ ekɛ adesai niŋmalɔi aaafee 40 ni ŋma Biblia lɛ wie lɛ mli yɛ sane ni nyiɛ enɛ sɛɛ lɛ mli.

[Shishigbɛ niŋmai]