Mɛni Ofɔɔ Feemɔ?
1 Kristofoi akpeei ji wɔjamɔ ni wɔkɛhaa Yehowa lɛ fa ni he hiaa. Bɔfo Paulo woɔ wɔ hewalɛ yɛ gbɛ ni ja nɔ akɛ wɔkakwa wɔhe naa buamɔ, “taakɛ bɔ ni mɛi komɛi fɔɔ feemɔ lɛ.”—Heb. 10:25.
2 Ani onaa henumɔi ni tamɔ nɛkɛ yɛ onyɛmimɛi lɛ ni okɛ amɛ aaakpe yɛ Kristofoi akpeei ashishi lɛ he? Mɛni nɔ ni ofɔɔ feemɔ lɛ jieɔ lɛ kpo yɛ enɛ he? Ani oyaa kpeei fɛɛ be fɛɛ be, kɛ Asafo Woloŋ Nikasemɔ lɛ hu? Aloo onaa akɛ ofɔɔ kpeei amli folɔmɔ? Mɛɛ gbɛhe kpeeiyaa yɔɔ yɛ oshihilɛ mli? Ani oowo mɛi krokomɛi hewalɛ ni amɛ hu amɛya kpeei daa? Ani owoɔ mɛi ni baa Kaimɔ lɛ shishi lɛ hewalɛ ni amɛba kpeei daa?
3 Bɔ fɛɛ bɔ ni wɔ daa gbi shihilɛ mli nitsumɔ ji lɛ, wɔnyɛŋ wɔbu Paulo ŋaawoo lɛ akɛ nɔ ko bibioo. Eyɛ mli akɛ anuɔ shishi akɛ yɛ be kɛ bei amli lɛ, Kristofonyo lɛ baanyɛ afolɔ kpeei amli yɛ hela aloo nibii krokomɛi ni enyɛŋ he nɔ ko efee lɛ hewɔ moŋ, shi esaaa akɛ efeɔ nɔ ko ni efɔɔ feemɔ. (Rom. 2:21) Akɛni wɔyɛ nibii babaoo ni wɔbaatsu he nii, ni ekolɛ teokrase nibii babaoo fata he hewɔ lɛ, esa akɛ Kristofonyo lɛ ayoo nii ni he hiaa lɛ titri. (Filip. 1:10) Kpeei fata nibii ni he hiaa titri kɛha Kristofonyo lɛ ahe ni amɛhe hiaa kɛha wɔ mumɔŋ hewalɛnamɔ.
Wɔwowoo Wɔhe Hewalɛ
4 Beni Paulo ŋma wolo eyaha Romabii lɛ, ekɛɛ akɛ eeshwe ni ena amɛ. Mɛni hewɔ? Bɔni afee ni ekɛ mumɔŋ nikeenii abaha amɛ koni “aŋɔwaje” amɛ. (Rom. 1:11) Wolo ni ekɛaamaje amɛ, ni ji adafitswaa ni eeeŋma eha amɛ ni amɛkane lɛ kɛkɛ faaa haaa lɛ, shi moŋ enu he akɛ ehe ni ekɛaabɔ amɛhe lɛ he miihia, hɛɛ, ehe miihia, ejaakɛ etee nɔ ekɛɛ: “No ji akɛ, ashɛje mikɛ nyɛ fɛɛ mii yɛ nyɛteŋ.” Aloo taakɛ Reference Bible lɛ shishigbɛ niŋmaa lɛ tsɔɔ lɛ: “Koni wɔwowoo wɔhe hewalɛ kutuu.” (Rom. 1:12) Paulo, ni eji bɔfo lɛ tete po yɔse akɛ ehe miihia ni awo lɛ hewalɛ kɛtsɔ Kristofoi ahenaabuamɔ nɔ.
5 Yɛ nakai gbɛ nɔ nɔŋŋ lɛ, esa akɛ wɔwowoo wɔhe hewalɛ yɛ suɔmɔ kɛ nitsumɔi kpakpai ahe yɛ wɔkpeei ashishi. Naanyobɔɔ ŋmɔlɔ kɛ ŋamɔ ni henumɔ yɔɔ mli lɛ baanyɛ ana hewalɛ kpakpa yɛ mɛi krokomɛi anɔ. Saji ahetoohamɔ ni tswaa mɔ maa shi, bɔ ni asaa he jogbaŋŋ yɛ emli nifeemɔi ni anaa mli gbɛfaŋnɔ lɛ amli, mɛi krokomɛi ni anaa akɛ amɛmiiya hiɛ yɛ mumɔŋ, kɛ nyɛmimɛi lɛ ateŋ po ni wɔɔhi yɛ kpeei lɛ ashishi lɛ baanyɛ awo mɔ hewalɛ waa diɛŋtsɛ. Kɛji ekolɛ gbi lɛ mli nitsumɔ eha etɔ wɔ waa po lɛ, yɛ bei babaao mli lɛ wɔnaa akɛ wɔnaa miishɛɛ yɛ be mli ni wɔtee kpee lɛ sɛɛ. Kristofoi anaanyobɔɔ kɛ suɔmɔ ni wɔnyɛmimɛi lɛ jieɔ lɛ kpo amɛtsɔɔ wɔ lɛ baawo wɔ hewalɛ ni “wɔkɛ tsuishitoo ada foi ni ka wɔhiɛ lɛ.” (Heb. 12:1) Kɛ wɔbo Nyɔŋmɔ Wiemɔ lɛ toi jogbaŋŋ lɛ, ebaaha wɔfee klalo akɛ wɔɔhiɛ wɔhemɔkɛyeli jajemɔ yɛ faŋŋ mli lɛ mli ni wɔhosooo. Yɛ anɔkwale mli lɛ, jɔɔmɔi babaoo yɛ ni jɛɔ kpeei ashishi ni wɔhiɔ lɛ mli baa.
6 Amrɔ nɛɛ, esa akɛ wɔhiɛ wɔhemɔkɛyeli lɛ mli ni awa ni wɔwowoo wɔhe hewalɛ yɛ suɔmɔ kɛ nitsumɔi kpakpai ahe fe bei fɛɛ ni eho. Esa akɛ wɔkɛ ekaa babaoo awo mɔdɛŋ ni wɔbɔɔ akɛ wɔɔya asafoŋ kpeei fɛɛ lɛ mli. Wɔsumɔɔɔ ni kwamɔ ni akwaa henaabuamɔ kutuu lɛ afee nɔ ko ni wɔfɔɔ feemɔ. Ni enɛ he miihia babaoo po yɛ amrɔ nɛɛ ni wɔkpeɔ yɛ kui bibii amli lɛ hewɔ. Jɛmɛ ni mɔ fɛɛ mɔ aaahi lɛ he miihia bɔni afee ni eha kpeei lɛ afee nɔ ni tswaa mɔ emaa shi. Esa akɛ wɔbɔ mɔdɛŋ waa ni wɔwo mɛi krokomɛi ahewalɛ ni wɔye wɔbua amɛ, kɛ mɛi ni ba Kaimɔ lɛ hu, ni amɛba kpeei daa. Yɛ nɛkɛ gbɛ nɔ lɛ, wɔbaatsɔɔ suɔmɔ ni wɔyɔɔ kɛha mɛi krokomɛi kɛ hiɛsɔɔ ni wɔyɔɔ kɛha Kristofoi akpeei hu.