Yehowa ni Wɔɔbo lɛ Toi Yɛ Be mli ni Naagbee lɛ Bɛŋkɛɔ

“Miishɛɛ ji gbɔmɔ ni boɔ mi toi . . . Ejaakɛ mɔ ni aaana mi lɛ ena wala.”​—ABƐI 8:​34, 35.

1, 2. (a) Yɛ toiŋjɔlɛ ni bɛ gbɔmɔ yinɔsane be mli lɛ fɛɛ sɛɛ lɛ, mɛni mɛi komɛi kɛɔ agbɛnɛ? (b) Mɛni hewɔ anɔkwa toiŋjɔlɛ kɛtsɔ adesa mɔdɛŋbɔi anɔ lɛ nyɛŋ aba lɛ?

YƐ toiŋjɔlɛ ni bɛ yɛ yinɔsane be fɛɛ mli, titri lɛ yɛ wɔ afii ohai 20 nɛɛ mli lɛ, mɛi komɛi kɛɔ akɛ jeŋmaji lɛ miito gbɛjianɔ koni amɛsaa bei kɛ naagbai ni ka amɛteŋ lɛ. Amɛtsɔɔ akɛ je lɛŋ hiɛnyiɛlɔi lɛ kpeɔ koni amɛwie toiŋjɔlɛ he ni amɛkɛ amɛwao naa gbɛi woɔ gbeekpamɔi sɔrɔtoi ashishi. Kwɛmɔ, Jeŋmaji Ekomefeemɔ lɛ po jaje yɛ nyɛsɛɛ afi ni ho lɛ mli akɛ eji “Jeŋmaji Ateŋ Toiŋjɔlɛ Afi”! Nɔ ni ana ji akɛ abaatsɔ enɛ nɔ ni ana mɔdɛŋ kroko ni jeŋmaji lɛ baabɔ afata he koni akɛha toiŋjɔlɛ ashwere, koni atsɔ nɔ aye omanye yɛ wɔsɛɛ be ni bɛŋkɛ lɛ mli.

² Shi, ani mɔdɛŋ ni abɔɔ nakai yɛ yinɔsane be fɛɛ mli lɛ kɛ naanɔ toiŋjɔlɛ eba? Eji adesa baanyɛ afee nakai kulɛ toiŋjɔlɛ eba jeeŋmɔ​—jeeŋmɔ dani amɛyifalɛ bashɛ akpekpei toi akpei enumɔ ni amɛgbala amɛmli amɛfee jeŋmaji sɔrɔtoi fe 160, kɛ maŋkwramɔŋ, shika helɛtemɔŋ kɛ jamɔŋ jwɛŋmɔi sɔrɔtoi. Shi toiŋjɔlɛ bako da; ni nakai nɔŋŋ hu toiŋjɔlɛ nyɛŋ aba kɛtsɔ je nɛɛ hiɛnyiɛlɔi lɛ anɔ. Mɛni hewɔ ebaŋ lɛ nakai? Hetoo kome ji akɛ bɔ ni adesai naagba lɛ ji hiɛdɔɔ sane sɔŋŋ hewɔ lɛ adesai amɔdɛŋbɔɔ po nyɛŋ atsu he nɔ ko. Taakɛ Yeremia 10:23 jaje yɛ gbɛ ni ja nɔ lɛ: “Adesa ni nyiɛ nɛɛ, bɔ ni eeetsɔ ejaje enaji famɔi eha lɛ, ebɛ edɛŋ.”

Nɔ Hewɔ Ni Adesai Amɔdɛŋbɔɔ Nyɛŋ Aye Omanye

3. Mɛɛ yiŋtoi komɛi ahewɔ ni gbɔmɛi kɛ jeŋmaji nyɛŋ amɛkɛ anɔkwale toiŋjɔlɛ aba kɔkɔɔkɔ lɛ?

³ Yiŋtoo kroko hu yɛ ni no hewɔ ni mɔdɛŋ ni gbɔmɛi kɛ jeŋmaji bɔɔ lɛ nyɛŋ ekɛ anɔkwale toiŋjɔlɛ aba kɔkɔɔkɔ lɛ. Biblia lɛ wieɔ enɛ he yɛ 1 Yohane 5:19 akɛ: “Jeŋ muu lɛ fɛɛ ka mɔ fɔŋ lɛ hewalɛ mli.” Kpojiemɔ 12:9 tsɔɔ akɛ: mɔ fɔŋ lɛ ji mɔ ni “atsɛɔ lɛ Abonsam kɛ Satan, ni shishiuɔ jeŋ muu lɛ fɛɛ lɛ.” 2 Korintobii 4:4 (NW) tsɛɔ lɛ “nibii agbɛjianɔtoo nɛɛ Nyɔŋmɔ.” No hewɔ lɛ, ŋmɛnɛŋmɛnɛ gbɛjianɔtoo ni ji maŋkwramɔ, shika helɛtemɔ kɛ jamɔŋ nɔyeli ni kɛ awuyeli babaoo eba lɛ jɛ Satan nɔyeli, jeee Nyɔŋmɔ nɔyeli. No hewɔ ni yɛ be mli ni ewieɔ nilee ni jɛ Nyɔŋmɔ ŋɔɔ lɛ he lɛ, 1 Korintobii 2:8 kɛɔ akɛ: “Nɛkɛ nilee nɛɛ nibii agbɛjianɔtoo nɛɛ mli nɔyelɔi lɛ ateŋ mɔ ko leee.”​—Luka 4:​3, 6.

4. Mɛni ba yɛ be mli ni wɔ klɛŋklɛŋ fɔlɔi kpa toiboo ni amɛfeɔ amɛhaa Yehowa lɛ.

⁴ Beni Satan tse atua eshi Nyɔŋmɔ lɛ, elaka wɔ klɛŋklɛŋ fɔlɔi lɛ koni amɛbo lɛ toi moŋ fe ni amɛaabo Nyɔŋmɔ toi. Nɔ ni ejɛ mli eba ji akɛ amɛtse amɛhe kɛjɛ toiboo ni amɛaafee amɛha Nyɔŋmɔ lɛ he ni amɛkɛ piŋmɔ eba adesa weku lɛ nɔ afii 6,000 nɛ. Biblia lɛ kɛɔ faŋŋ akɛ Satan laka adesai koni amɛhe amɛye akɛ eeehi kɛha amɛ moŋ, fe ni amɛaabo amɛ-Bɔlɔ lɛ toi.(1 Mose 3:​1-5) No hewɔ lɛ yɛ enilee naa lɛ, Yehowa eŋmɛ adesai aje lɛ fɛɛ gbɛ koni amɛtsɔ amɛ diɛŋtsɛ amɛgbɛ nɔ, ni egbɛtsɔɔmɔ bɛ mli, kɛbashi ŋmɛnɛŋmɛnɛ be nɛɛ mli? Yɛ anɔkwale mli lɛ, yɛ nɛkɛ afii ohai abɔ nɛɛ fɛɛ mli lɛ, ejie lɛ kpo atsɔɔ faŋŋ akɛ adesa nɔyeli efee yaka.​—5 Mose 32:5; Jajelɔ 8:⁠9.

5. Kɛji akɛ toiŋjɔlɛ baanyɛ aba kɛtsɔ adesai amɔdɛŋbɔɔ nɔ po lɛ, mɛni kɛwɔ baahi shi lolo?

⁵ Agbɛnɛ hu, beni Adam kɛ Hawa kpa toiboo ni amɛaafee amɛha Yehowa, wala ni yeɔ emuu Jɛɛhe lɛ, amɛbatsɔmɔ mɛi ni yeee emuu ni yɛ naagbee lɛ amɛgboi. No hewɔ lɛ amɛfɔ amɛseshibii fɛɛ yɛ emuu ni ayeee mli. Hela, gbɔlɛ kɛ gbele bafee adesai agbɛfaŋ nii. (Romabii 5:12) No hewɔ lɛ kɛji akɛ adesai aaanyɛ ni amɛkɛ toiŋjɔlɛ aba po lɛ, amɛnyɛŋ amɛtsa emuu ni ayeee. Wɔhe baaye lolo, wɔgbɔlɔ ni wɔgboi. Akɛni enɛɛmɛi fɛɛ jɛ Satan hewɔ lɛ, Yesu wie ehe akɛ: “Lɛ lɛ gbɔmɔgbelɔ ji lɛ kɛjɛ teteete, ni edamɔɔɔ anɔkwale lɛ mli.” (Yohane 8:44) Yɛ anɔkwale mli lɛ, kɛ osusu gbɔmɛi akpekpei abɔ ni amɛhi shi ni amɛgboi yɛ blema lɛ ahe lɛ, etamɔ nɔ ni Satan gbe amɛ fɛɛ.

6. Namɛi ji toiŋjɔlɛ fitelɔi lɛ, ni mɛni esa akɛ aba amɛnɔ?

⁶ Satan laka mumɔŋ bɔɔnii krokomɛi hu ni amɛfata ehe yɛ atuatsemɔ lɛ mli, ni nɛkɛ yiwalɔi nɛɛ fɛɛ ekpoo akɛ amɛaafee toiboo amɛha Yehowa kɛ ewie. No hewɔ lɛ, Satan, edaimonioi lɛ kɛ adesa atuatselɔi ji mɛi ni kɛ nɛkɛ je nɛɛ eba shihilɛ ni eyɔɔ mli ŋmɛnɛ lɛ mli. Esa akɛ ajie amɛ fɛɛ kɛya, ni aha afii akpei ekpaa Nyɔŋmɔ he ni atse he kaa kɛ kwɛmɔ ni kɛ oshara eba nɛɛ aba naagbee. Romabii 16:20 maa nɔ mi kɛhaa wɔ akɛ, “Etsɛŋ ni toiŋjɔlɛ Nyɔŋmɔ lɛ aaanaanaa Satan nɔ kwraa yɛ nyɛnaji ashishi.” Kɛ edaimonioi lɛ kɛ adesai fɛɛ ni ekpoo akɛ amɛaabo Nyɔŋmɔ toi beni ewieɔ nɛɛ.​—Mateo 25:⁠41.

Ehe Miihia Ni Wɔbo Toi Babaoo Bianɛ

7. Mɛni hewɔ esa akɛ wɔha wɔ mɔdɛŋbɔɔ ni wɔkɛaasɔmɔ Yehowa lɛ mli awa bianɛ?

⁷ Wɔbote “naagbee gbii” lɛ anaagbee lɛ mli vii diɛŋtsɛ. (2 Timoteo 3:​1-5) Yɛ enɛ hewɔ lɛ, ehe miihia waa ni wɔbo nɔ ni Yehowa kɛɔ wɔ lɛ toi. Nakai nɔŋŋ hu esa akɛ wɔsumɔ akɛ wɔkɛ wɔhe aaasha afɔle wɔha lɛ yɛ esɔɔmɔ mli. Mɛni hewɔ esa akɛ wɔha nɛkɛ wɔmɔdɛŋbɔɔ nɛɛ aya hiɛ lɛ? Ejaakɛ Satan le akɛ “be fioo kɛkɛ eyɔɔ.” (Kpojiemɔ 12:12) No hewɔ lɛ lɛ hu ebaamia ehiɛ waa yɛ enifitemɔ kɛ enibii ahiɛkpatamɔ lɛ mli.

8. (a) Mɛni hewɔ shiɛmɔ nitsumɔ lɛ henyɛlɔi lɛ nyɛŋ atsi naa kɔkɔɔkɔ lɛ? (b) Mɛni esa akɛ wɔfee koni wɔya nɔ wɔna ŋwɛi sɛɛfimɔ?

⁸ Satan baasumɔ diɛŋtsɛ ni eha Yehowa Odasefoi akpa Maŋtsɛyeli lɛ he sanekpakpa lɛ shiɛmɔ. Shi enyɛŋ, ejaakɛ Yehowa ewo amɛ shi akɛ: “Tawuu nii ni ashɔɔ ashioo lɛ eko eko nyɛŋ nɔ ko afee.” (Yesaia 54:17) Abaana mɛi ni teɔ shi woɔ etsuji lɛ akɛ “mɛi ni wuɔ shiɔ Nyɔŋmɔ diɛŋtsɛ.” (Bɔfoi lɛ Asaji 5:​38, 39) No hewɔ lɛ, akɛni wɔyɔɔ Yehowa mumɔ krɔŋkrɔŋ lɛ, Kristo Yesu, ŋwɛibɔfoi atai akpekpei abɔ lɛ sɛɛfimɔ hewɔ lɛ Maŋtsɛyeli lɛ he sanekpakpa lɛ jajemɔ lɛ miida kɛmiiya hiɛ babaoo afi fɛɛ afi. Bɔni afee ni amɛna nɛkɛ ŋwɛi sɛɛfimɔ nɛɛ hewɔ lɛ, Yehowa tsuji kwɛɔ jogbaŋŋ koni amɛbo ŋaawoo ni yɔɔ Yakobo 4:​7, 8 lɛ toi: “Nyɛbaa nyɛhe shi nyɛhaa Nyɔŋmɔ; nyɛtea shi nyɛwoa Abonsam, ni eeejo nyɛnaa foi. Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.”

9. Mɛni hewɔ esaaa akɛ wɔbuɔ Satan akɛ mɔ ni he waaa lɛ?

⁹ Kaabu hewalɛ ni Satan yɔɔ ni ekɛshishiuɔ ni ekɛyeɔ awui lɛ akɛ nɔ ko bibioo. Nyɔŋmɔ Wiemɔ lɛ bɔɔ kɔkɔ akɛ: “Nyɛhiɛ akaa shi, nyɛsaraa, ejaakɛ nyɛhenyɛlɔ Abonsam lɛ nyiɛ tamɔ jata ni huɔ eetao mɔ ni eeemi; nyɛdamɔa shi shiŋŋ yɛ hemɔkɛyeli lɛ mli nyɛtsia lɛ gbɛ.” (1 Petro 5:​8, 9) Kɛji akɛ ole akɛ jata ko ni eye sɛkɛ nyiɛ akutsoŋ he ni nyɛyɔɔ lɛ, obaakwɛ jogbaŋŋ ni obu ohe kɛ oweku lɛ he. Yɛ Satan gbɛfaŋ lɛ, esa akɛ wɔkwɛ wɔhe nɔ jogbaŋŋ, ejaakɛ ebaanyɛ eye wɔ awui kɛya naanɔ. Nɔ ni yɔɔ mɔbɔ ji akɛ, mɛi pii yɛ ni amɛnyɛɛɛ amɛfa amɛhe, ejaakɛ amɛleee po akɛ Satan yɛ. Mɛni hewɔ? Ejaakɛ amɛhala moŋ akɛ amɛboŋ Yehowa Wiemɔ lɛ toi. Mɛni baajɛ nakai nihalamɔ gbonyo Iɛ mli aba? “Nɔ fɛɛ nɔ ni gbɔmɔ duɔ lɛ, no nɔŋŋ ebaakpa.”​—Galatabii 6:⁠7.

Beni Amɛbolɔɔ “Toiŋjɔlɛ Kɛ Shweshweeshwe Lɛ!”

10, 11. (a) Mɛni esa akɛ wɔha ahi wɔjwɛŋmɔ mli yɛ omanye ni jeŋmaji lɛ aaaye yɛ toiŋjɔlɛ ni amɛkɛaaha lɛ mli? (b) Mɛɛ Biblia mli gbalɛi wieɔ toiŋjɔlɛ ni jeŋmaji lɛ aaatao yɛ wɔbe nɛɛ mli lɛ he. (d) Toiŋjɔlɛ ni tamɔ nɛkɛ sɛɛ baatsɛ kɛyashi mɛɛ be?

¹⁰ Kaaha omanye ni jeŋmaji lɛ aaaye yɛ toiŋjɔlɛ ni amɛkɛaaha lɛ mli lɛ miilaka bo. Ha ahi ojwɛŋmɔ mli yɛ be fɛɛ mli akɛ Yehowa kɛ je nɛɛ fa ko tsuuu nii yɛ enɛ mli. Yehowa yɛ lɛ diɛŋtsɛ egbɛ ni eeetsɔ nɔ ekɛ anɔkwale toiŋjɔlɛ aba ni no ji kɛtsɔ e-Maŋtsɛyeli ni yɔɔ Kristo shishi lɛ pɛ nɔ. No hewɔ lɛ, omanye ni jeŋmaji lɛ fɛɛ aaaye yɛ toiŋjɔlɛ ni amɛkɛaaba lɛ mli lɛ aaafee nɔ ko ni hiɔ shi be kukuoo kɛkɛ, tamɔ hiɛhaa nɔ ko kɛkɛ. Nɔ ko tsakeŋ. Awuiyeli, basabasafeemɔ, tawuu, hɔmɔ, ohia, weku mligbalamɔ, jeŋba shara, hela, gbele kɛ Satan daimonioi lɛ kɛwɔ baahi shi lolo kɛyashi be mli ni Yehowa aaajie amɛ fɛɛ kɛya. “Kɛjeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme.”​—Lala 127:⁠1.

¹¹ Biblia gbalɛ tsɔɔ akɛ jeŋmaji lɛ baabɔ toiŋjɔlɛ yɛ wɔbe nɛɛ mli lɛ he mɔdɛŋ. Ekɛɔ akɛ “Ejaakɛ nyɛ diɛŋtsɛ nyɛle krɛdɛɛ akɛ Nuŋtsɔ lɛ be lɛ baaba tamɔ julɔ baa nyɔŋ lɛ. Ejaakɛ be mli ni amɛaakɛɛ akɛ: ‘Toiŋjɔlɛ yɛ ni wɔyɛ shweshweeshwe!’ lɛ, no nɔŋŋ mli hiɛkpatamɔ aaabatutua amɛ trukaa tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.” (1 Tesalonikabii 5:​2, 3) Nakai “toiŋjɔlɛ yɛ ni wɔyɛ shweshweeshwe!” lɛ etsɔɔɔ akɛ je nɛɛ hiɛkpatamɔ lɛ etsake. 2 Timoteo 3:13 kɛɔ akɛ “gbɔmɛi fɔji kɛ shishiulɔi aaawo wu yɛ efɔŋ mli.” Bɔ ni shihilɛ lɛ yɔɔ lɛ baatamɔ bɔ ni gbɛjianɔtoo ko ni kwɛɔ nibii ni ebɔle adesai ahe kɛkpe lɛ anɔ lɛ wie lɛ: “Naagba kpele ni adesa weku lɛ kɛkpeɔ ji akɛ anyɛɛɛ nɔ aye dɔŋŋ.”

12. Mɛni ji nɔ ni Yehowa tsuji le yɛ nɔ ni “toiŋjɔlɛ kɛ shweshweeshwe” shihilɛ he bolɔmɔ ni baa lɛ tsuɔ diɛŋtsɛ lɛ he?

¹² Mɛi pii yɛ je lɛŋ ni akɛ yaka hiɛnɔkamɔ lɛ baalaka amɛ yɛ be mli ni amɛnuɔ bolɔmɔ akɛ “Toiŋjɔlɛ yɛ ni wɔyɛ shweshweeshwe!” lɛ. Shi alakaŋ Yehowa tsuji, ejaakɛ kɛ Nyɔŋmɔ wie lɛ, amɛboɔ toi. Ejaakɛ amɛle kɛjɛ e-Wiemɔ lɛ mli akɛ sanejajemɔ tamɔ nɛkɛ lɛ kɛ anɔkwale toiŋjɔlɛ kɛ shweshweeshwe shihilɛ baŋ. Shi moŋ, ebaafee naagbee Okadi diɛŋtsɛ akɛ “hiɛkpatamɔ aabatua amɛ trukaa.” Ebaafee “amanehulu kpeteŋkpele” ni Yesu gba fɔ shi kɛha wɔbe nɛɛ mli lɛ shishijee. Ekɛɛ: “Ejaakɛ no be lɛ mli lɛ amanehulu babaoo aaaba, ni anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ ni asaŋ anaŋ enɔ gbi ko gbi ko dɔŋŋ.”​—Mateo 24:⁠21.

13. Te Biblia lɛ tsɔɔ adesai anɔyelii anaagbee lɛ mli eha tɛŋŋ?

¹³ Akɛ adesa nɔyeli baaba naagbee yɛ “amanehulu kpeteŋkpele” lɛ mli. Lala 2:​2-6 kɛɔ akɛ: “Shikpɔŋ nɔ maŋtsɛmɛi lɛ ete shi edamɔ shi ni lumɛi lɛ hu efee ekome amɛtse Yehowa kɛ mɔ ni efɔ lɛ mu lɛ yinɔ ajina: ‘Nyɛhaa wɔkumɔa amɛgbokɛlɛi lɛ, ni wɔtserɛ amɛkpai lɛ yɛ wɔhe wɔshwie!’ Mɔ ni ta ŋwɛi lɛ miiŋmɔ; Nuŋtsɔ lɛ miiye amɛhe fɛo. No dani ekɛ amɛ aaawie yɛ emlifu mli, ni eeewo amɛhe gbeyei yɛ emlila lɛ mli, shi miwo mimaŋtsɛ yɛ migɔŋ krɔŋkrɔŋ [ŋwɛi] lɛ nɔ!” Lala 110:​5, 6 kɛfata he akɛ: “Nuŋtsɔ lɛ aaatswia maŋtsɛmɛi anii yɛ emlifu gbi lɛ nɔ, eeekojo yɛ jeŋmaji lɛ ateŋ.” Maŋkwramɔŋ gbɛjianɔtoi fɛɛ baaba naagbee, ejaakɛ Yesaia 8:​9, 10 jaje akɛ: “Nyɛmiaa, ni aaakumɔnyɛ dukuduku kɛ̃, nyɛmiaa, ni aaakumɔnyɛ dukuduku kɛ̃! Nyɛtoa ajina, ni eeefee yaka kɛ̃! Nyɛwiea wiemɔ, ni edamɔŋ shi; ejaakɛ Nyɔŋmɔ kɛwɔ yɛ!”

Hekɛnɔfɔɔ Yɛ Yibaamɔ Mli

14. Mɛni hewɔ wɔyɔɔ hekɛnɔfɔɔ akɛ mɛi komɛi baaje je nɛɛ naagbee lɛ mli lɛ?

¹⁴ Wɔye hekɛnɔfɔɔ akɛ Yehowa baaha ewebii lɛ ale nɔ ni yaa nɔ bɔni afee ni amɛto gbɛjianɔ kɛha yibaamɔ yɛ “amanehulu kpeteŋkpele” ni baa lɛ mli. Mɛni hewɔ wɔyɔɔ hekɛnɔfɔɔ ni mli wa nakai lɛ? Ejaakɛ gbalɛ ni yɔɔ Kpojiemɔ 7:​9, 14 lɛ tsɔɔ akɛ “asafo babaoo” ko jeɔ mli. Mɛni hewɔ? Ejaakɛ kɛ Yehowa wie lɛ, amɛboɔ toi ni etsɔseɔ amɛ yɛ gbɛ ni ja nɔ. Ní yɛ enɛ hewɔ lɛ, “asafo babaoo” lɛ nyɛɔ amɛfeɔ nɔ ni Kpojiemɔ 7:16 kɛɔ lɛ: “Amɛjaa lɛ nyɔɔŋ kɛ shwane.” No hewɔ lɛ amɛfeɔ Nyɔŋmɔ suɔmɔnaa nii, ekpɛlɛɔ amɛ nɔ, ni abuɔ amɛhe koni amɛje je nɛŋ naagbee lɛ mli.​—1 Yohane 2:​15-17.

15. Te Yoel tsɔɔ gbɛjianɔtoo nɛɛ jwaramɔ lɛ mli eha tɛŋŋ, ni mɛni baajɛ mli aba aha Nyɔŋmɔ tsuji?

¹⁵ Yoel 3:​13-16 hu wieɔ Nyɔŋmɔ tsuji ni baaje mli yɛ be mli ni anaanaa gbɛjianɔtoo nɛɛ nɔ tamɔ anaanaa wein ŋaanɔ nɔ lɛ. Ekɛɔ akɛ: “Nyɛkɛ nikpamɔ kakla awoa mli, ejaakɛ nikpamɔ nii lɛ egbi; . . . weinbui lɛ hu miiho; ejaakɛ amɛ nɔ fɔŋ feemɔ lɛ fa! Asafoi, asafoi yɛ ateŋbuu jɔɔ lɛ mli; ejaakɛ Yehowa gbi lɛ eshɛ shi eta, yɛ ateŋbuu jɔɔ lɛ mli. Hulu kɛ nyɔŋtsere baawo duŋ, ni ŋulamii baafɔ̃ɔ kpɛmɔ. Ni Yehowa aaawu kɛaajɛ [ŋwɛi] Zion, . . . shi Yehowa aaatsɔ abobaa he eha emaŋ Iɛ”

16. Mɛɛ gbalɛi krokomɛi tsɔɔ akɛ Yehowa baabaa ewebii ayi kɛtsɔ jeŋ hiɛkpatamɔ lɛ mli?

¹⁶ Nakai nɔŋŋ hu Yehowa wieɔ nɛkɛ be ni baa nɛɛ he yɛ Yesaia 26:​20, 21 akɛ: “Yaa, mimaŋ, ni oyabote opia lɛ mli, ni oŋa oshinaa lɛ owo oyi; teemɔ ohe hiŋmɛitswaoo ko kɛyashi beyinɔ ni mlifu lɛ aaaho lɛ! Shi naa, Yehowa miije kpo kɛmiijɛ eshihilɛ he lɛ ni eyawo shikpɔŋ lɛ nɔ bii lɛ anyɔmɔ yɛ amɛnishaianii lɛ ahewɔ.” No hewɔ lɛ Zefania 2:​2, 3 woɔ hewalɛ akɛ: “Dani Yehowa mlifu gbi lɛ aba nyɛ nɔ! Nyɛtaoa Yehowa sɛɛgbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛgbɛ, nyɛtaoa heshibaa sɛɛgbɛ; ekolɛ aaaŋɔnyɛ atee yɛ Yehowa mlifu gbi lɛ nɔ!”

Yehowa Ŋɔɔ Ni Aaajo Foi Kɛaaya

17. (a) Mɛni esa akɛ afee koni ana Yehowa hebuu? (b) Mɛni ji nɔ ni gbɔmɛi ni tsɔ Nu Afuɔ lɛ hiɛ lɛ fee ni ejaaa?

¹⁷ Abɛi 18:10 jajeɔ akɛ: “Mɔɔ ni wa ji Yehowa gbɛi lɛ. No mli jalɔi shaa foi kɛyaa ni ehiɔ shi shweshweeshwe.” Ani ‘oojo foi’ kɛmiiya Yehowa ŋɔɔ? Kaimɔ nɔ ni Yesu wie yɛ gbɔmɛi ni yɔɔ Noa gbii lɛ amli lɛ he lɛ. “Mɛi lɛ hiɛ niyeli, ninumɔ kɛ yoowɛɛ kɛ gbalahamɔ mli aaahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee.” (Mateo 24:​38, 39) Nɔ ni ejaaa yɛ amɛhe ji nɔ fɛɛ nɔ mli ni amɛkɛ amɛhe wo ní yɛ no hewɔ lɛ amɛbooo Nyɔŋmɔ toi beni ewieɔ kɛtsɔɔ etsulɔ Noa, “jalɛ shiɛlɔ” lɛ nɔ lɛ. (2 Petro 2:⁠5) Akɛni amɛbooo toi hewɔ lɛ, beni Nu Afuɔ Iɛ ba lɛ “ebaloo amɛ fɛɛ kɛtee” hiɛkpatamɔ mli.

18. Mɛni hewɔ “gbɔmɛi kpakpai” ni amɛji lɛ hereee mɛi ni akpata amɛhiɛ yɛ Nu Afuɔ lɛ mli lɛ yiwala lɛ?

¹⁸ Ŋwanejee ko bɛ he akɛ mɛi ni gboi yɛ Nu Afua lɛ mli lɛ ateŋ mɛi pii buɔ amɛhe gbɔmɛi “kpakpai’ ejaakɛ amɛkɛ amɛhe wooo awuiyeli ni eyi nakai gbɔmɛi lɛ ateŋ yɛ nakai gbii lɛ amli lɛ mli. Shi gbɔmɛi “kpakpai” ni amɛji lɛ hereee amɛyiwala. Amɛtsɔ amɛshikplikpiifeemɔ lɛ nɔ amɛkpɛlɛ efɔŋ ni yaa nɔ yɛ amɛgbii lɛ amli lɛ nɔ. Nɔ ni hiɛdɔɔ yɔɔ mli lɛ ji akɛ ‘amɛjooo foi’ kɛyaaa Yehowa ŋɔɔ; beni Nyɔŋmɔ wie kɛtsɔ etsuji lɛ anɔ lɛ, amɛbooo toi. No hewɔ lɛ, amɛtooo gbɛjianɔ kpakpa amɛhaaa yiwalaheremɔ. Shi yɛ gbɛ kroko nɔ lɛ, mɛi ni bo toi lɛ je mli.

19. Mɛɛ naakpɛɛ sɛɛnamɔi Yehowa tsuji anine shɛɔ nɔ ŋmɛnɛ po, ni mɛni hewɔ?

¹⁹ Ŋmɛnɛ, Nyɔŋmɔ miiwie toiŋjɔlɛ sane kɛmiitsɔɔ mɛi fɛɛ ni boɔ lɛ toi. Mɛni jɛɔ mli baa haa emɛi Yesaia 54:13 jajeɔ akɛ: “Ni obii lɛ fɛɛ aaafee okaselɔi, ni maha obii lɛ hejɔlɛ babaoo.” Hɛɛ, “Yehowa aaajɔo emaŋ lɛ kɛ hejɔlɛ.” (Lala 29:11) No hewɔ lɛ, Yehowa Odasefoi yɛ anɔkwale toiŋjɔlɛ ni fiteee yɛ amɛteŋ yɛ awuiyeli je nɛɛ mli. Amɛye majimaji ateŋ nyɛmimɛi asuɔmɔ ko ni jɛŋ hiɛnyiɛlɔi, amɛmaji kɛ amɛjamɔi sɔrɔtoi nyɛŋ akase kɔkɔɔkɔ. Mɛni hewɔ? Ejaakɛ kɛ́ Nyɔŋmɔ miiwie lɛ mɛnɛɛmɛi booo toi. No hewɔ lɛ, amɛtsuuu nɔ ni ekɛɔ lɛ he nii. Shi Yehowa Odasefoi boɔ Nyɔŋmɔ toi. Amɛkɛ hiɛdɔɔ tsuɔ wiemɔi ni yɔɔ Jajelɔ 12:13 lɛ he nii: “She Nyɔŋmɔ gbeyei ni oye ekitai lɛ anɔ! Shi enɛ ji gbɔmɛi fɛɛ agbɛnaa.”

20. Mɛni esa akɛ gbɔmɔ fɛɛ gbɔmɔ afee koni ejɛ mli kɛyabote Nyɔŋmɔ jeŋ hee lɛ mli?

²⁰ No ji nɔ ni esa akɛ gbɔmɔ fɛɛ gbɔmɔ​—hɛɛ mɛi fɛɛ ni sumɔɔ ni amɛhi shi yɛ Nyɔŋmɔ jeŋ hee lɛ mli lɛ​—afee.. Esa akɛ “amɛjo foi” kɛya Yehowa ŋɔɔ ni shishashaomɔ ko bɛ mli. Yɛ anɔkwale mli lɛ, esa akɛ nilee ni Nyɔŋmɔ kɛhaa ni anaa yɛ nɛkɛ wiemɔi nɛɛ amli lɛ akudɔ amɛ: “Nyɛboa mi toi! Ejaakɛ ajɔɔ mɛi ni nyiɛɔ migbɛi lɛ anɔ lɛ! Nyɛboa tsɔsemɔ toi ni nyɛle nii, ni nyɛkakwaa mi kwraa! Ajɔɔ gbɔmɔ ni boɔ mi toi . . . lɛ. Ejaakɛ mɔ ni aaana mi lɛ ena wala.”​—Abɛi 8:​32-35.a

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛni hewɔ adesa mɔdɛŋbɔɔ nyɛŋ ayɛ omanye yɛ toiŋjɔlɛ ni ekɛaaba lɛ mli lɛ?

◻ Mɛni hewɔ ehe hiaa waa bianɛ akɛ aaabo Yehowa toi lɛ?

◻ Mɛni ji nɔ ni “Wɔyɛ toiŋjɔlɛ kɛ shweshweeshwe” he bolɔmɔ ni baa lɛ baatsɔɔ diɛŋtsɛ?

◻ Mɛni esa akɛ wɔfee kɛ́ wɔmiisumɔ ni wɔje mli kɛyabote Nyɔŋmɔ gbɛjianɔtoo hee lɛ mli?

[Mfoniri ni yɔɔ baafa 25]

Satan miiha emɔdɛŋbɔɔ koni efite ni ekpata hiɛ lɛ mli awo wu tamɔ jata ni huɔ

[Mfoniri ni yɔɔ baafa 28]

Beni aaanaa gbɛjianɔtoo nɛɛ nɔ tamɔ wein ŋaa nɔ lɛ, “Yehowa baafee abobaa he aha ewebii”