Feemɔ Nilelɔ​—Okɛ Nibii Ni Okaseɔ Lɛ Atsu Nii

¹ Oti ni ma adesai ateŋ mɛi babaoo ahiɛ ji ni amɛhi shi yɛ miishɛɛ kɛ toiŋjɔlɛ mli. Woji akpei abɔ kɛ saji ni aŋmala kɛ ŋaawoo haa yɛ gbɛ ni abaanyɛ atsɔ nɔ ni aye omanye yɛ gbalashihilɛ mli, atsɔse gbekɛbii, aye omanye yɛ shika gbɛfaŋ, bɔ ni aaafee ni ana gbɔmɔtsoŋ hewalɛnamɔ kpakpa ni ahiɛ mli, kɛ saji sɔrɔtoi babaoo ni kɔɔ yelikɛbuamɔ ni akɛhaa gbɔmɛi koni amɛna miishɛɛ he lɛ haa. Eyɛ mli akɛ abaanyɛ ana nilee ko ni anyɛɔ atsuɔ he nii yɛ gbɛ ko nɔ yɛ je lɛŋ woji amli moŋ, shi gbɔmɛi ni yɔɔ je lɛŋ lɛ ateŋ mɛi ni fa ji mɛi ni bɛ miishɛɛ kɛ toiŋjɔlɛ hu. Mɛni hewɔ eyɔɔ nakai?

² Abaanyɛ ana hetoo lɛ yɛ Biblia Iɛ mli yɛ Abɛi 1:​7, ni kɛɔ akɛ: “Yehowa gbeyeishemɔ ji nilee shishijee; shi kwashiai gbeɔ nilee kɛ tsɔsemɔ he guɔ.” Gbɔmɔ ko nyɛŋ akpa gbɛ akɛ ebaana toiŋjɔlɛ kɛ miishɛɛ kɛji akɛ ekpɛlɛɛɛ nɔ akɛ anɔkwa nilee kɛ jwɛŋmɔ jɛɛhe, ni ji Yehowa Nyɔŋmɔ yɛ, ni ekɛ bulɛ hu aha lɛ lɛ.

³ Mumɔŋ ohia miiye je lɛ​—hɔmɔ. Shi nɔ ni wa yɛ sane lɛ mli ji akɛ, nɛkɛ shihilɛ ni yɔɔ mɔbɔ nɛɛ ji nɔ ni gbɔmɔ diɛŋtsɛ kɛba enɔ, ejaakɛ mumɔŋ niyenii babaoo yɛ shikpɔŋ lɛ nɔ he fɛɛ he, ni anaa lɛ yaka ni aheee shika ko. (Abɛi 1:​20, 21; Kpoj. 22:17) Akɛni gbɔmɛi ni yɔɔ je lɛ mli lɛ kpooɔ nilee ni jɛ Yehowa ŋɔɔ lɛ hewɔ lɛ, amɛyaa nɔ amɛtɛrɛɔ yɛ mumɔŋ duŋ kpii mli. (Abɛi 1:​22-32) Shi yɛ gbɛ kroko nɔ lɛ, akɛ Yehowa webii ni kɛ bulɛ haa emlai ni amɛnyiɛɔ ekitai asɛɛ lɛ, wɔtɔrɔ jogbaŋŋ yɛ mumɔŋ ni wɔyɛ miishɛɛ. (Yes. 65:​13, 14) Agbɛnɛ hu, suɔmɔ ni fa babaoo yɛ Nyɔŋmɔ gbɛjianɔtoo lɛ mli lɛ haa ayooɔ wɔ akɛ Kristo anɔkwa kaselɔi. (Yoh. 13:35) Hɛɛ, Yehowa Odasefoi a-nyɛmifeemɔ ni yɔɔ jeŋ muu fɛɛ lɛ kɛ odaseyeli ni anaa faŋŋ haa akɛ he ni akɛkpɛtɛɔ Biblia tsɔɔmɔi ahe lɛ ji nilee gbɛ ni sa akɛ atsɔ nɔ.

⁴ Ni kɛlɛ, mɛi komɛi ni kɛ amɛhe ebɔ Yehowa gbɛjianɔtoo lɛ he lɛ anine shɛɛɛ miishɛɛ ni sa akɛ efee amɛnɔ lɛ nɔ. Enɛ po baanyɛ asa miishɛɛ ni mɛi krokomɛi ni ebɔle amɛ lɛ yɔɔ lɛ he yɛ gbɛ fɔŋ nɔ kɛtsɔ nibii ni amɛkɛɔ ni amɛfeɔ lɛ nɔ. Te aaafee tɛŋŋ ni enɛ aaanyɛ aba lɛ nakai hu? Ekukufoo mli ji akɛ amɛkɛ Nyɔŋmɔ nilee tsuuu nii yɛ amɛshihilɛi amli. Amɛbaanyɛ amɛya asafoŋ kpeei, kpokpaa nɔ kpeei, kɛ kpokpaa wuji anɔ kpeei. Amɛbaanyɛ amɛle nɔ fɛɛ nɔ ni Asafo lɛ woji lɛ kɛɔ, shi amɛshihilɛ gbɛ kɛ gbɛ ni amɛtsɔɔ nɔ amɛkɛ mɛi krokomɛi yeɔ, ni amɛnanemɛi Kristofoi fata he lɛ etsɔɔɔ akɛ amɛkɛ anɔkwale ni amɛkase lɛ miitsu nii. Mɛni he hiaa ni afee? Ehe miihia ni nɛkɛ gbɔmɛi nɛɛ ‘adu nii yɛ mumɔŋ’ koni amɛkɛ anɔkwa miishɛɛ aba amɛ diɛŋtsɛ amɛshihilɛi amli ni amɛha mɛi krokomɛi ni ebɔle amɛhe kɛkpe lɛ hu ana miishɛɛ.​—Gal. 6:​7, 8.

Nɔ Ni Esa Akɛ Wɔkɛtsu Nii

⁵ Kɛ akɛ aŋkroaŋkroi lɛ wɔgbɔjɔ wɔshihilɛ mli, wɔŋmɛɛ wɔhe, ni wɔba wɔhe shi wɔha; Satan, je lɛ, kɛ wɔheloo ni yeee emuu lɛ, wɔbaalaje miishɛɛ ni ji wekukpaa ni bɛŋkɛ kpaakpa ni ka wɔkɛ Yehowa teŋ lɛ. Agbɛnɛ, enɛ ji be ni fe fɛɛ ni ehe hiaa ni wɔhiɛ ahi wɔhe nɔ ni wɔkɛ nibii ni wɔkaseɔ yɛ wɔ asafoŋ kpeei ashishi kɛ kpeei krokomɛi ashishi lɛ kɛ agbɛnɛ; gbɛjianɔtoi krokomɛi ni asafo lɛ kɛha lɛ atsu nii. Jeŋ ni wɔyɔɔ mli Iɛ yɛ oshara ni eetsake be fɛɛ be. No hewɔ lɛ ehe miihia ni wɔhiɛ ahi wɔhe nɔ ni wɔkɛ ŋaawoo ni ‘Yehowa jɛɔ esuɔmɔ mli ekɛhaa wɔ kɛtsɔɔ “tsulɔ anɔkwafo kɛ nilelɔ” lɛ nɔ lɛ atsu nii, ni wɔyoo enɛ akɛ eji niyenii yɛ be ni sa mli.​—Mateo 24:​45-47.

⁶ Akɛ saji kpakpai haa wɔ yɛ wɔkpeei ashishi yɛ bɔ ni wɔɔfee wɔdamɔ shi shiŋŋ akɛ asafo kuu kome lɛ he. Akɛ ŋaawoi ni anyɛɔ atsuɔ he nii yɛ bɔ ni wɔɔfee ni wɔdamɔ nibii ni gbɔjɔɔ wɔ lɛ anaa haa, tamɔ shihilɛi ni baaje wɔnijiaŋ wui, je lɛ mumɔ ni ji heyeli, kɛ nibii ni gbalaa mɔ jwɛŋmɔ ni fiteɔ mɔ be nɛkɛ. Ani wɔkɛ ŋaawoo kpakpa akɛ wɔkɛ wɔhiɛ afɔ Yehowa kɛ egbɛi anɔ kwraa, ni wɔyoo ni wɔba wɔhe shi wɔha teokrase hegbɛ, wɔba wɔhe shi ni wɔhiɛ aka shi, ni wɔhe bei wɔha teokrase nibii asɛɛdii lɛ tsuɔ nii? (Mika 6:8; Efe. 5:​15, 16; Heb. 6:​10; 13:17) Ani weku lɛ mlibii miiye miibua amɛhe koni amɛhi shi akɛ Kristofoi? Esa akɛ ŋaawoo ni wɔnine shɛɔ nɔ kɛjɛɔ Ŋmalɛi lɛ amli lɛ asa bɔ ni wɔhalaa nibii ni wɔkɛjieɔ wɔ hiɛtserɛ, wɔsubaŋi, kɛ wɔ daa gbi shihilɛ he. Kɛji akɛ wɔbɔɔɔ mɔdɛŋ diɛŋtsɛ akɛ wɔkɛ nibii ni wɔkaseɔ lɛ aaatsu nii lɛ, wɔnyɛŋ wɔya wɔhiɛ yɛ mumɔŋ, ni enɛ baasa wɔjwɛŋmɔŋ toiŋjɔlɛ kɛ miishɛɛ he yɛ gbɛ fɔŋ nɔ.​—Filip. 4:​7-9; Yak. 1:​22-25.

⁷ Mɔdɛŋ diɛŋtsɛ ni abɔɔ yɛ teemɔŋ nikasemɔ kɛ weku nikasemɔ mli he miihia. Watch Tower Publications Index lɛ baanyɛ akudɔ wɔ kɛya saji ni ato naa ni kɔɔ Biblia mli shishitoo mlai ni wɔkɛaatsu nii lɛ ahe lɛ mli. Young People Ask wolo lɛ hu ji yelikɛbuamɔ nɔ kpele kɛha fɔlɔi koni amɛkɛtsu nii ni amɛkɛye amɛbua amɛbii ni amɛnyɛ amɛdamɔ ŋmɛnɛŋmɛnɛ beaŋ Satan jeŋ ni efee hwanyaŋŋ nɛɛ naa. Kɛ wɔgbala wɔjwɛŋmɔ kɛtee woji ni tamɔ nɛkɛ nɔ lɛ, wɔbaanyɛ wɔna Yehowa jwɛŋmɔ yɛ saji ahe ni shishitoo mlai ni ja baanyɛ akudɔ wɔ. Enɛ ni wɔfeŋ lɛ baatamɔ mɔ ko ni yɔɔ tsofa ni baanyɛ atsa hela ni yeɔ lɛ lɛ shi ekɔɔɔ tsofa lɛ loo enuuu, eyɛ mli akɛ wɔle akɛ enɛ ji nɔ ni baatsa hela ni yeɔ wɔ lɛ. Daa teemɔŋ kɛ weku nikasemɔ baaha wɔhemɔkɛyeli ada ni eha wɔ hewalɛ koni wɔto wɔtsui shi. Kɛ kaa be shɛ lɛ, wɔhemɔkɛyeli hosoŋ, koni eha wɔgbee shi.​—Mateo 13:6; Luka 8:​13; Heb. 2:⁠1.

⁸ Esa akɛ onukpai kɛ asafoŋ sɔɔlɔi ato okadi kpakpa yɛ amɛwe nɔ kwɛmɔ mli. Nɔ ni baafata enɛ he ji yelikɛbuamɔ ni amɛkɛaaha amɛŋamɛi kɛ amɛbii ni amɛkɛ nibii ni amɛkaseɔ kɛjɛɔ Nyɔŋmɔ Wiemɔ lɛ kɛ asafo lɛ mli lɛ atsu nii bɔni afee ni amɛhe awa yɛ mumɔŋ. Yɛ nɛkɛ gbɛ nɔ lɛ, weku muu lɛ fɛɛ baanyɛ afee weku ni toɔ okadi kpakpa yɛ Kristofoi ashihilɛ mli ni amɛkɛ hewalɛwoo baaha mɛi ni yɔɔ asafo lɛ mli lɛ kɛ esɛɛ fɛɛ.​—Efes. 6:4; 1 Tim. 3:​4, 12, 13.

Mɛi Ni Esa Akɛ Aye Abua

⁹ Mɛi ni fata mɛi ni baa Kaimɔ lɛ shishi daa afi lɛ ahe ji mɛi pii ni hewalɛwoo he hiaa amɛ koni amɛkɛ nɔ ni amɛkaseɔ lɛ atsu nii ni amɛkɛ amɛhe abɔ asafo lɛ he be fɛɛ be. Wɔbaanyɛ wɔjie suɔmɔ diɛŋtsɛ kpo wɔtsɔɔ mɛi ni wɔkɛ amɛ kaseɔ Biblia lɛ kɛtsɔ tsɔɔmɔ ni wɔɔtsɔɔ amɛ bɔ ni amɛaafee ni amɛkɛ Biblia mli shishitoo mlai atsu nii yɛ amɛshihilɛ mli kɛ bɔ ni amɛaafee ni amɛkɛ Nyɔŋmɔ jalɛ kitai lɛ atsu nii lɛ nɔ. Esa akɛ wɔtsɔɔ akɛ wɔsusuɔ mɛi ni yaa amɛhiɛ ni amɛmiibɔ mɔdɛŋ ni amɛbatsɔmɔ wɔnyɛmimɛi hii kɛ yei yɛ hemɔkɛyeli lɛ mli lɛ ahe.

¹⁰ Esa akɛ aye abua mɛi ni amɛfɔɔɔ shiɛmɔyaa loo amɛkpa kwraa lɛ koni amɛna akɛ ehe miihia ni amɛkɛ amɛhe awo asafo lɛ nitsumɔi amli daa. Ehe miihia ni amɛnine ashɛ toiŋjɔlɛ kɛ miishɛɛ ni tsutsu lɛ amɛyɔɔ yɛ be mli ni amɛsɔmɔɔ Yehowa yɛ gbɛ ni mɔɔ shi nɔ lɛ nɔ ekoŋŋ. (Yoh. 13:17) Kɛ wɔkɛ mlihilɛ ye bua amɛ koni wɔtee amɛhiɛsɔɔ kɛha anɔkwale lɛ shi koni amɛkɛ “yijiemɔ afɔle” aha Nyɔŋmɔ lɛ, amɛbaanyɛ ni amɛkɛ nibii ni amɛkase lɛ atsu nii ni amɛhi wala gbɛ lɛ nɔ.​—Heb. 13:​15; kwɛmɔ Wɔ Maŋtsɛyeli Sɔɔmɔ, November 1979, baafa 3, kɛ June 1977, baafa 3.

¹¹ Ehe miihia ni Nyɔŋmɔ webii fɛɛ kɛ Yehowa asafo lɛ ni kɛ foi yaa ehiɛ lɛ anyiɛ. Wɔnyɛŋ ni wɔŋmɛ gbɛ ni alaka wɔ kɛbote shikpilikpiifeemɔ mli. Esa akɛ wɔmɔ wɔmumɔŋ shihilɛ lɛ mli daa, koni wɔle anɔkwalei kɛ saji heei ni eba ni akɛhaa wɔ kɛtsɔɔ Nyɔŋmɔ asafo lɛ nɔ lɛ ni wɔkɛtsu nii amrɔ nɔŋŋ. Enɛ biɔ mɔdɛŋbɔɔ diɛŋtsɛ kɛ agbɛnɛ yɛ bei komɛi amli lɛ he kɛ afɔleshaa. Shi Yehowa biii ni wɔfee nɔ ni wɔ diɛŋtsɛ lɛ wɔnyɛŋ wɔfee. Lɛ ji wɔ-Bɔlɔ, ni ele nɔ ni hi fe fɛɛ kɛha wɔ. No hewɔ lɛ nyɛhaa wɔjiea wɔhe kpo akɛ nilelɔi kɛtsɔ tsɔɔmɔ ni Yehowa aaaya nɔ atsɔɔ wɔ nii ni wɔkɛ nibii ni wɔkaseɔ lɛ atsu nii lɛ nɔ. Enɛ kɛ yijiemɔ baaha lɛ, ni nɔ ni baajɛ mli aba aha wɔ ji naanɔ sɛɛnamɔi.​—Yes. 48:​17; 54:⁠13.