Yehowa Miitsɔɔ Wɔ Nii
1 Gbalɔ Yesaia jaje akɛ: “Nuŋtsɔ Yehowa eha mi nikaselɔi alilɛi, koni male bɔ ni mikɛ mɔ ni etɔ lɛ lɛ aaawie yɛ be ni sa mli.” (Yes. 50:4) Gbɛ kome ni Yehowa tsɔɔ nɔ efeɔ enɛ ji kɛtsɔ tsɔsemɔ ni Teokrase Sɔɔmɔ Skul lɛ kɛhaa lɛ nɔ. Shi kɛlɛ, aŋkroaŋkro mɔdɛŋbɔɔ he miihia. Theocratic Ministry School Guidebook lɛ wie yɛ baafa 39 akɛ: ‘Shii abɔ ni otsu nifeemɔ pɔtɛɛ ko he nii oha lɛ kɔɔɔ he eko, hesaamɔ he yɛ sɛɛnamɔ be fɛɛ be.’ Enɛ kɔɔ wɔteŋ mɔ fɛɛ mɔ he, kɛji nyɔji fioo ko pɛ nɛ ni wɔkɛ Wɔhe wo skul lɛ mli aloo wɔkɛ wɔhe wo mli kɛjɛ be mli ni skul lɛ je shishi kɛjɛ 1943 lɛ tɔɔ.
2 Esa akɛ nikaselɔi lɛ fɛɛ asaa amɛhe jogbaŋŋ. Nɔ ni fata enɛ he ji hiɛ ni aaahi be ni aha lɛ nɔ. Gbɛtsɔɔmɔ ni yɔɔ Theocratic Ministry School Schedule wolo lɛ mli lɛ jajeɔ akɛ: ‘Esaaa ni wiemɔ ko tekeɔ be ni ato lɛ.’ Kɛji nyɛminuu ni tsuɔ Nifeemɔ 1 he nii lɛ yeɔ be kɛtekeɔ nɔ be fɛɛ be lɛ, no lɛ esa akɛ awo lɛ ŋaa yɛ teemɔŋ. Esa akɛ skul nɔkwɛlɔ lɛ hu aje kpee lɛ shishi yɛ ebe naa pɛpɛɛpɛ ni ekɛ gbɛtsɔɔmɔi ni akɛha yɛ be ni akɛha wielɔi lɛ kɛ be ni ekɛbaawo amɛ ŋaa kɛ saji krokomɛi lɛ atsu nii.
3 Mɛi fɛɛ baana fa ni kɔɔ Biblia mli otii ahe susumɔ he lɛ he sɛɛ babaoo diɛŋtsɛ. Aakai wɔ akɛ esaaa ni enɛ feɔ sane ni akɛha lɛ mlitii kɛkɛ. Esa akɛ wielɔ lɛ aye abua toibolɔi lɛ ni amɛle nɔ hewɔ kɛ gbɛ nɔ ni emli sane lɛ he hiaa ha wɔ lɛ jogbaŋŋ.
4 Yɛ Wiemɔ ni ji 3 he lɛ, akɛ gbɛi sɔrɔtoi etsu nii ni eye omanye hu. Shi kɛji wɔha ehi wɔjwɛŋmɔ mli akɛ yiŋtoi titrii ni yɔɔ skul lɛ he lɛ ekome ji ni eye ebua wɔ ni wɔnyɛ wɔkɛ anɔkwale lɛ aha jogbaŋŋ ni emli aka shi faŋŋ hu lɛ, no lɛ ebaahi akɛ akɛ shiɛmɔ nitsumɔ lɛ aloo trukaa odaseyeli mli gbɛi aaatsu nii.
5 Kɛji ahala wiemɔ ni ji 4 lɛ kɛjɛ Your Youth—Geting the Best Out Of It wolo lɛ mli lɛ, no lɛ akɛ nifeemɔ lɛ baaha mɛi heei aloo nikaselɔi ni ji obalaŋtai. Shi kɛlɛ, esa akɛ nikaselɔ ni akɛ nifeemɔ lɛ haa lɛ afee mɔ ni le nikanemɔ. Abaaha nɛkɛ wiemɔi nɛɛ daa otsii enyɔ ni akɛ nifeemɔ ni jɛ Bible Topics for Discussion wolo bibioo lɛ mli lɛ baafolɔ mli. Yɛ Wiemɔ ni ji 3 kɛ 4 lɛ gbɛfaŋ lɛ, esa akɛ nikaselɔ lɛ kɛ saneyitso ni atsɔɔ lɛ atsu nii.
6 Kɛji akɛ saji krokomɛi baafata he lɛ, no lɛ esa akɛ akwɛ jogbaŋŋ yɛ enɛ he. Sane ni akɛha ni akɛtsu nii lɛ fa bɔ ni sa. No hewɔ lɛ, ehe ehiaaa ni ajɛ sɛɛ akɛ nɔ kroko afata wiemɔ lɛ mli sane lɛ he. Shi moŋ, esa akɛ abɔ mɔdɛŋ ni atsu sane ni akɛha lɛ he nii jogbaŋŋ, ni akane emli ŋmalɛi otii lɛ ni atsɔɔ mli hu ni akɛ nɔkwɛmɔ nii atsɔɔ shishi ni aha emli sane lɛ akɔ asafo lɛ he. Esa akɛ toibolɔi lɛ ajwɛŋmɔi anyɛ anyiɛ wiemɔ lɛ sɛɛ yɛ wolo ni wiemɔ lɛ damɔ nɔ lɛ mli.
7 Nyɔŋmɔ ni wɔjaa lɛ lɛ eha wɔ ŋaa kɛ nilee jɛɛhe ko ni sɛɛ efooo kɔkɔɔkɔ. (Rom. 11:33) Yɛ afii akpei abɔ sɛɛ po lɛ, wɔbaana nibii babaoo ni wɔbaakase lolo. Nyɛmɔ ni wɔyɔɔ ni wɔkɛjieɔ wɔŋwɛi Tsɛ lɛ yi ni wɔkɛtsuɔ shihilɛ mli naagbai ahe nii kɛ agbɛnɛ wɔtsuii ni nyɔɔ wɔmli kɛ miishɛɛ ni wɔnaa lɛ baafa babaoo yɛ mɔdɛŋbɔɔ ni wɔkɛtsuɔ nii bɔni afee ni wɔna nilee ni jɛ Nyɔŋmɔ ŋɔɔ lɛ falɛ lɛ naa. Belɛ, ha ni efee ofaishitswaa akɛ ooona nibii ni wɔ.Tsɔɔlɔ Kpele lɛ kɛha wɔ lɛ he sɛɛ kwraa kɛmɔ shi kɛtsɔ Teokrase Sɔɔmɔ Skul lɛ ni oooya daa lɛ nɔ. Eba akɛ mɔdɛŋbɔɔ ni okɛsaa ohe ni okɛ ohe woɔ Teokrase Sɔɔmɔ Skul lɛ mli yɛ 1991 mli lɛ aaaye abuɔ bo ni onyɛ ofee enɛ.