Sanebimɔ He
● Mɛni hewɔ ni ehe hiaa ni akɛ kaselɔi heei lɛ akase woji enyɔ jogbaŋŋ kɛgbe naa kɛji abaptisi amɛ dani amɛgbe wolo ni ji enyɔ lɛ kasemɔ naa po lɛ?
Yehowa miijɔɔ egbɛjianɔtoo lɛ kɛ mɛi heei babaoo ni miike yuu kɛmiiba asafoi lɛ amli lɛ. Wɔnaa miishɛɛ waa akɛ wɔɔna nɛkɛ naabuamɔ nitsumɔ kpele nɛɛ. Shi kɛlɛ, wɔle akɛ yelikɛbuamɔ kɛ gbɛtsɔɔmɔ ni aaaya nɔ akɛha he miihia nɛkɛ gbɔmɛi ni tamɔ gwantɛŋi nɛɛ koni amɛkase bɔ ni amɛaafee amɛsɔmɔ Yehowa.
Yelikɛbuamɔ he miihia mɛi heei lɛ bɔni afee ni amɛshɛ anɔkwale lɛ he anɔkwa nilee mli. (Kol. 1:9. 10) Wɔha hegbɛ akɛ wɔɔye wɔbua amɛ ni amɛna Biblia lɛ shishijee tsɔɔmɔi lɛ ahe shishinumɔ ni ja ni amɛna nɔ ni Biblia lɛ tsɔɔ yɛ jeŋba kpakpa. Kristofoi ashihilɛ kɛ saji krokomɛi ni kɔɔ enɛɛmɛi ahe lɛ hu naa jogbaŋŋ. Enɛ baaye abuɔ amɛ ni amɛnaji amɔ shi shiŋŋ yɛ anɔkwale lɛ mli bɔni afee ni amɛnyɛ amɛyɛ kaai sɔrɔtoi ni ekolɛ ejwere amɛhiɛ lɛ fɛɛ nɔ.
Ehe miihia hu ni nikaselɔi lɛ atsɔmɔ mɛi ni edara yɛ amɛjwɛŋmɔi agbɛfaŋ (1 Kor. 14:20) Niiashikpamɔ tsɔɔ akɛ dani mɔ ko aaashɛ he ni agbɛnɛ etsɔ nuu ni eda kwraa yɛ mumɔŋ lɛ he lɛ. Biblia mli nikasemɔ ni tsɔɔlɔ ko kɛlɛ diɛŋtsɛ aaafee lɛ yeɔ ebuaa. No hewɔ lɛ, eyɛ mli akɛ abaanyɛ abaptisi mɔ ko dani egbe woji enyɔ lɛ fɛɛ kasemɔ naa moŋ, shi nilee tsɔɔ faŋŋ akɛ esa akɛ eshia Biblia mli nikasemɔ lɛ atsa nɔ kɛyashi ebaagbe woji enyɔ lɛ fɛɛ kasemɔ naa.
YƐ BAPTISIMƆ SƐƐ
Yesu kɛɛ esa akɛ wɔfee kaselɔi—ni wɔbaptisi amɛ ni wɔtsɔɔ amɛ nii. (Mat. 28:19, 20) Tsɔsemɔ ni ekɛha ekaselɔi lɛ mli babaoo ba yɛ baptisi sɛɛ. Yɛ bei babaoo mli lɛ, nilee ni mɔ ko baanyɛ ana kɛjɛ wolo kome mli lɛ faaa bɔ ni sa ni baaha egbe emumɔŋ tsɔsemɔ lɛ naa. Ni kɛfata he lɛ, gbɛtsɔɔmɔ he miihia bɔni afee ni eha ehe asa kɛha sɔɔmɔ nitsumɔ lɛ koni ewula lɛ ni enyɛ ete shi ewo nɔnyɛɛ ni baa mɛi ni sɔmɔɔ Yehowa yɛ nɛkɛ naagbee gbii nɛɛ amli lɛ anɔ lɛ hu. Kɛ akɛ tsɔsemɔ ni fa bɔ ni sa haaa nikaselɔ lɛ, eeeha efee mɔ ni esako ehe jogbaŋŋ yɛ mumɔŋ ni ekɛaadamɔ lɛ diɛŋtsɛ enaji anɔ. Kɛ abaptisi mɔ hee ko sɛɛ lɛ, wɔyaa nɔ wɔyeɔ wɔbuaa lɛ koni eya ehiɛ babaoo lolo, ni ekɔɔɔ he eko kɛji egbe woji enyɔ lɛ fɛɛ kasemɔ naa aloo egbeko naa. Klɛŋklɛŋ wolo ni ekaseɔ lɛ kɛ shishijee nibii ahe shishinumɔ haa. Wolo ni ji enyɔ lɛ tsuɔ Kristofoi asui ahe nii. Nɛkɛ woji nɛɛ baanyɛ afee Obaanyɛ Ohi Shi kɛya Naanɔ wolo lɛ, kɛ agbɛnɛ United by Worship (Ekome ni Afee Kɛmiija) aloo True Peace (Anɔkwa Toiŋjɔlɛ) wolo lɛ. Kɛji abɛ nɛkɛ woji nɛɛ eko lɛ, abaanyɛ akɛ ekrokomɛi ni amɛmli saji lɛ tamɔ enɛɛmɛi nɔŋŋ lɛ atsu nii. Kɛ atsa Biblia mli nikasemɔ lɛ nɔ kɛyashi beni aaagbe wolo ni ji enyɔ lɛ naa lɛ, ehaa enaa Yehowa yiŋtoi kɛ agbɛnɛ Kristofoi ashishitoo tɛi kɛ taomɔ nii ni nɔ kwɔlɔ lɛ ahe tsɔsemɔ ni shishinumɔ yɔɔ faŋŋ. Enɛ yeɔ ebuaa mɔ hee lɛ koni enu Kristofoi ashishitoo tɛi lɛ ashishi jogbaŋŋ ni enane amɔ shi shiŋŋ yɛ hemɔkɛyeli lɛ mli hu. (Kol. 2:7) Kɛji aatao niiamlitsɔɔmɔ babaoo kɛ bɔ ni abuɔ nɛkɛ nikasemɔi nɛɛ ahe akɔntaa ahaa lɛ, kwɛmɔ Sanebimɔ He yɛ December 1987 Wɔ Maŋtsɛyeli Sɔɔmɔ lɛ mli.
Eji anɔkwale akɛ, yɛ baptisimɔ sɛɛ lɛ, aakpa mɛi heei lɛ agbɛ ni amɛya amɛhiɛ yɛ mumɔŋ. (Heb. 6:1-3) Yɛ shihilɛi pii amli lɛ, etsɛɛɛ ni agbeɔ wolo ni ji enyɔ lɛ kasemɔ naa. No hewɔ lɛ atsɔɔ enɛ nɔ ahaa mɔ hee lɛ naa Shishitoo ni ma shi shiŋŋ.