Hiɛkpamɔ Wiemɔi Baanyɛ Atsake Shihilɛ lɛ Kwraa
1 Ani oka hiɛkpamɔ wiemɔi ni atsɔɔ yɛ Reasoning wolo lɛ mli, loo nɔ ni baa nyɛ Wɔ Maŋtsɛyeli Sɔɔmɔ heei ni baa nɛɛ amli lɛ ekomɛi tsuɔ nii? Shiɛlɔi pii miibɔ amaniɛ akɛ amɛmiiye omanye waa yɛ amɛ shia-kɛ shia sɔɔmɔ lɛ mli kɛtsɔ nɛkɛ hiɛkpamɔ wiemɔi nɛɛ ni amɛkɛtsuɔ nii bɔ ni atsɔɔ yɛ woji nɛɛ amli pɛpɛɛpɛ lɛ nɔ. Mɛi krokomɛi hu ena akɛ, kɛji amɛŋɔ be fioo ni amɛkɛsaa amɛhe kɛha shiɛmɔyaa wiemɔi ni amɛkɛtsuɔ nii yɛ amɛ diɛŋtsɛ amɛwiemɔ mli, ni kɛlɛ edamɔ ŋaawooo ni akɛhaa yɛ he yɛ woji nɛɛ amli lɛ nɔ.
2 Nɔ kome ni ka shi faŋŋ ji akɛ, kɛji otsɔ hiɛ oha ohiɛkpamɔ wiemɔ lɛ hi ojwɛŋmɔ mli dani okɛ Maŋtsɛyeli lɛ he sane lɛ tee mɔ ko ŋɔɔ lɛ, ehaa onyɛɔ owieɔ jogbaŋŋ, ni owieɔ kɛ nɔmimaa hu. Owiemɔi jeɔ lɛ kpo tɛŋŋ ni oyɛ he miishɛɛ akɛ okɛ lɛ aaagba sanekpakpa lɛ he sane. Ni ku osaa ohe jogbaŋŋ lɛ, ehaa oshiɛmɔ nitsumɔ lɛ hu ŋɔɔ waa, ejaakɛ onaa yibiiwoo kpakpai kɛjɛɔ mli. Nɔ ni he hiaa fe fɛɛ ji akɛ, wɔhaa wɔ afɔleshaa ni ji wɔsɔɔmɔ lɛ feɔ nɔ ni hi fe fɛɛ ni wɔɔnyɛ wɔkɛha.—Heb. 13:15: 1 Pet. 2:5.
3 No hewɔ lɛ, taomɔ be ni okasaa ohe. Susumɔ gbɔmɛi ni ekolɛ okɛ amɔ baakpe yɛ oshikpɔŋkuku lɛ mli lɛ ahe. Mɛni ji amɛnaagbai loo nibii ni amɛsusuɔ he? Mɛɛ nibii ni baa amrɔ nɛɛ saa amɛshihilɛ he? Beni osusu nɛkɛ sanebimɔi nɛɛ ahetoo he sɛɛ lɛ, agbɛnɛ tii hiɛkpamɔ wiemɔi ni yɔɔ Reasoning wolo lɛ baafai 9-15 lɛ mli jogbaŋŋ aloo obaanyɛ ohala hiɛkpamɔ wiemɔ kome loo enyɔ kɛjɛ Wɔ Maŋtsɛyeli Sɔɔmɔ lɛ mli. Oyɛ hegbɛ akɛ otsake wiemɔi ni atsɔɔ lɛ amli fioo bɔni afee ni ekɛ nitsumɔ afee mlɛo eha bo. No sɛɛ lɛ, nɔ ni obaafee ji ni otao shiɛlɔ kroko koni okɛ lɛ ati hiɛkpamɔ wiemɔi ni ohala lɛ amli beni nyɛkaa ekɛ nitsumɔ nyɛkwɛɔ lɛ. Ekolɛ enɛ baawo mɛi krokomɛi hu hewalɛ ni amɛ hu amɛti amɛ hiɛkpamɔ wiemɔi lɛ amli. Ni bɔ fɛɛ bɔ ni fee lɛ, eka shi faŋŋ akɛ nyɛbaawowoo nyɛhe hewalɛ ni nyɛbaatswa nyɛhe nyɛma shi hu yɛ nitsumɔi kpakpai amli.
4 Be kɛ mɔdɛŋbɔɔ ni okɛtsuɔ nii kɛsaa ohiɛkpamɔ wiemɔi kɛhaa shiɛmɔyaa lɛ he baaba sɛɛnamɔ. Ni ekolɛ efee jɔɔmɔ kɛha bo akɛ ooona gbɛfaŋnɔ ni mɔɔ shi yɛ naabuamɔ nitsumɔ ni yɔɔ miishɛɛ ni atsuɔ bianɛ nɛɛ mli.