Daa Gbi Mumɔŋ Niyenii—Ehe Hiaa Kɛhaa Kristofoi Aweku Lɛ
1 “Jeee aboloo kɛkɛ baa gbɔmɔ yi naa wala, shi moŋ wiemɔ fɛɛ wiemɔ ni jɛɔ [Yehowa] Nyɔŋmɔ daaŋ lɛ.” (Mat. 4:4) Kwɛ bɔ ni nakai wiemɔi lɛ ji anɔkwale ha! Bɔ ni heloonaa niyenii be hiaa wɔ daa gbi lɛ, nakai nɔŋŋ ehe hiaa ni wɔye mumɔŋ niyenii hu daa gbi. Ni Asafo lɛ efee wolo bibioo ni ji Ŋmalɛi lɛ Amli ni Wɔɔkwɛ Daa, koni eye ebua wɔ ni wɔye Nyɔŋmɔ Wiemɔ lɛ daa. Akɛ Kristofoi aweku lɛ, ani nyɛto be daa gbi ni nyɛkɛsusuɔ gbi lɛ ŋmalɛ lɛ he?
2 Esa akɛ Fɔlɔi Afee Nɔkwɛmɔ nɔ Kpakpa: Akɛni deka bo tsɔ hewɔ lɛ, ewaaa kwraa akɛ aaatsi daa gbi ŋmala lɛ kwɛmɔ ato sɛɛ, kɛ jwɛŋmɔ akɛ abaanyɛ akwɛ be kroko. Shi kɛji fɔlɔi lɛ ahiɛ ye amɛweku lɛ mumɔŋ hiamɔ nii anɔ lɛ, amɛbaatao be, hɛɛ, amɛbaato be, daa gbi ni amɛkɛfee nakai beni weku muu lɛ tee yɔɔ shia. (Mat. 5:3) Amɛbaaŋɔ hegbɛ lɛ, jeee kɛtsɔ daa gbi ŋmala lɛ ni amɛkɛ amɛbii lɛ baakane lɛ pɛ nɔ, shi moŋ kɛtsɔ Buu-Mɔɔ naatsɔɔmɔ lɛ mli otii ni amɛaamamɔ nɔ mi, kɛ agbɛnɛ susumɔ ni amɛaasusu bɔ ni amɛaafee ni amɛkɛ emli sane kɛ ŋaawoo lɛ atsu nii he jogbaŋŋ lɛ hu nɔ. Eji anɔkwale, ekolɛ ebaabi mɔdɛŋbɔɔ kɛ efeemɔ daa dani enyɛ etsɔ nɔ ko ni weku lɛ feɔ daa gbi, shi sɛɛnamɔi ni jɛɔ mli baa lɛ fa babaoo. (Okɛto Bɔfoi lɛ Asaji 17:11, 12 he.) No hewɔ lɛ, fɔlɔi, nyɛboa mɔdɛŋ waa ni nyɛkafea nɔkwɛmɔ nɔ kpakpa
3 Nyɛtaoa Be ni Sa: Mɛɛ be hi jogbaŋŋ kɛba weku muu Iɛ fɛɛ akɛ amɛaakpe kutuu ni akɛsusu ŋmalɛ lɛ he, koni ekatsɔ nɔ ko ni atoko he gbɛjianɔ? Sɛɛnamɔ yɛ he waa akɛ aaaje gbi lɛ shishi kɛ Biblia mli ŋmalɛ ko hesusumɔ. Yɛ Betel kɛ maŋsɛɛ sanekpakpa shiɛlɔi ashiai krokomɛi ni yɔɔ je lɛŋ fɛɛ amli lɛ, gbi lɛ jeɔ shishi kɛ leebi jamɔ he gbɛjianɔtoo, ni gbi lɛ ŋmalɛ lɛ hesusumɔ kuku fata he. Enɛ yeɔ ebuaa nyɛmimɛi lɛ ni amɛjeɔ amɛgbi lɛ shishi yɛ gbɛ kpakpa nɔ, ni amɛsusuɔ Yehowa kaimɔi lɛ ahe hu daa—Lala 1: 1, 2; Fil. 4:8.
4 Kristofoi awekui hu baanyɛ amɛna leebi Biblia hesusumɔ lɛ he sɛɛ nakai nɔŋŋ. Ebaanyɛ eye ebua gbekɛbii lɛ ni amɛnyɛ amɛkpee shihilɛ ni amɛkɛkpeɔ yɛ skul, ni teɔ shi woɔ amɛmumɔŋ shihilɛ lɛ naa. Kɛji be saŋŋ nɛ ni weku muu lɛ fɛɛ nyɛko amɛkpe kutuu ni nyɛkɛsusu daa gbi ŋmalɛi lɛ ahe lɛ, no lɛ fɔlɔi lɛ baanyɛ amɛsusu gbɛjianɔtoo kroko he, bɔni afee ni mumɔŋ niyenii ni he hiaa, ni woɔ mɔ hewalɛ waa nɛɛ akaŋmɛɛ nyɛ. Akɛ nɔkwɛmɔ nɔ lɛ, kɛji tsɛ lɛ yaa nitsumɔ dani gbekɛbii lɛ teɔ shi leebi lɛ, no lɛ ekolɛ nyɛ lɛ baanyɛ ato be koni ekɛ gbekɛbii lɛ asusu ŋmalɛ lɛ he. Shi yɛ gbɛ kroko hu nɔ lɛ, wekui komɛi toɔ gbɛjianɔ ni amɛsusuɔ ŋmalɛ lɛ he gbɛkɛnaashi, ejaakɛ no mli lɛ, amɛ fɛɛ amɛyɛ shia. No hewɔ lɛ weku fɛɛ weku baanyɛ ato gbɛjianɔ bɔ ni baahi jogbaŋŋ kɛha shihilɛ ni amɛyɔɔ mli lɛ.
5 Daa gbi mumɔŋ niyenii mli hewalɛnamɔ he miihia kɛha Kristofoi aweku lɛ. Nyɛkɛ daa gbi ŋmalɛ lɛ hesusumɔ ayea klɛŋklɛŋ gbɛhe. (Fil. 1:10) Biblia ŋmalɛ ni wɔɔsusu he daa gbi lɛ baaye ebua wɔ ni wɔhiɛ Yehowa jalɛ shishitoo mlai amli. Ni kɛji weku lɛ mii bii fɛɛ fee ekome lɛ, ebaaha nɛkɛ gbɛjianɔtoo nɛɛ he aba sɛɛnamɔ waa kɛha amɛteŋ mɔ fɛɛ mɔ.