Gbɛgbamɔ—Eji Suɔmɔ Kpojiemɔ
1 Suɔmɔ ni wɔyɔɔ kɛha Yehowa kɛ wɔnanemɛi gbɔmɛi lɛ ji nɔ ni tsirɛɔ wɔ ni wɔkɛ wɔhe woɔ shiɛmɔ nitsumɔ lɛ mli waa kɛmɔɔ shi lɛ. Beni suɔmɔ ni wɔyɔɔ kɛha Yehowa kɛ gbɔmɛi lɛ daa lɛ, ekanyaa wɔ ni wɔbo gbɛjianɔ kɛha gbɛfaŋnɔ babaoo namɔ yɛ sɔɔmɔ nitsumɔ lɛ mli. Wɔsuɔmɔ lɛ mli lɛɛɔ beni wɔyaa hiɛ yɛ Nyɔŋmɔ Wiemɔ lɛ mli ‘anɔkwa nilee’ hu mli lɛ. (Fil 1:9, 10) Babaoo ni wɔkaseɔ Yehowa yiŋtoo he nii lɛ, babaoo ni wɔyooɔ bɔ ni be ni wɔyɔɔ mli nɛɛ he jara waa ha ji no. Enɛ haa bɔ ni wɔsusuɔ mɛi krokomɛi ahe wɔhaa lɛ mli waa. Ni mɛi pii miitsɔɔ suɔmɔ ni amɛkɛsusuɔ mɛi ahe lɛ kɛtsɔ gbɛgbamɔ sɔɔmɔ ni amɛkɛ amɛhe woɔ mli lɛ nɔ.
2 Ani obaanyɛ ofee tsakemɔi ni he hiaa lɛ koni obatsɔ gbɛgbalɔi awalɔ loo daa gbɛgbalɔ? Kɛji wɔɔkɛɛ lɛ, jeee wɔ fɛɛ wɔnyɛɔ wɔfeɔ gbɛgbalɔi. Shi esa akɛ wɔteŋ mɔ fɛɛ mɔ kɛ sɔlemɔ asusu eshihilɛ he ekwɛ.
3 Kristofoi fioo pɛ naa akɛ amɛyɛ be babaoo ni amɛkɛaafee gbɛgbalɔi; no hewɔ lɛ, ehe hiaa ni ‘wɔhe be ni sa jogbaŋŋ’ kɛjɛ nakai nibii ni he ehiaaa ni heɔ wɔbe amrɔ nɛɛ lɛ amli. (Efes. 5:15-17) Esa akɛ suɔmɔ ni wɔyɔɔ kɛha Nyɔŋmɔ kɛ gbɔmɛi lɛ aha wɔsumɔ akɛ wɔkɛ nibii ni wɔ diɛŋtsɛ wɔsumɔɔ kɛ wɔ miishɛɛnamɔi lɛ ekomɛi baasha afɔle koni wɔkɛjie wɔsuɔmɔ lɛ kpo jogbaŋŋ kɛmɔ shi. (Mar. 12:33) Ekolɛ abuɔ nibii ni wɔbɔɔ mɔdɛŋ wɔnaa, ni ekolɛ wɔnuɔ he akɛ amɛji nibii ni mɛi fɛɛ yɔɔ eko lɛ, akɛ fɛo nibii yɛ je lɛŋ hei krokomɛi.
4 Mɛni fɔlɔi baanyɛ afee ni amɛkɛye amɛbua amɛbii ni amɛsusu nii ahe yɛ nɛkɛ gbɛ ni Nyɔŋmɔ kudɔɔ nɛɛ nɔ? Esa akɛ fɔlɔi kɛ teokrase otii amamɔ amɛbii ahiɛ kɛjɛ amɛgbekɛbiiashi tɔŋŋ. Beni amɛbɛŋkɛɔ skul naagbee he lɛ, ani heloonaa otii ahe amɛsusuɔ aloo mumɔŋ nɔ? Wɔmiisumɔ ni wɔye wɔbua wɔbii lɛ ni amɛna naanɔ jɔɔmɔi ni jɛɔ gbɛgbamɔ sɔɔmɔ lɛ ni aboteɔ mli mra lɛ mli baa. Enɛ feɔ jwetribɔɔ yɛ ŋwɛi. (Mat. 6:19-21) Esaa Nyɔŋmɔ hiɛ, ni eyeɔ wɔnɔkwayeli kɛ henɔjɔɔmɔ kɛha lɛ lɛ he odase. Ni ehereɔ mɛi krokomɛi ayiwala hu.
5 Eji Nyɔŋmɔ suɔmɔnaa nii akɛ ‘ahere gbɔmɛi fɛɛ ayiwala.’ (1 Tim. 2:4) Ani wɔbaanyɛ wɔtsɔɔ akɛ wɔ hu nakai ji wɔsuɔmɔnaa nii? Wɔbaanyɛ, kɛji wɔmiisumɔ ni wɔkɛ Maŋtsɛyeli nibii aye klɛŋklɛŋ gbɛhe. Wɔbaanyɛ wɔfee enɛ kɛtsɔ hiɛnɔkamɔ ni wɔɔna akɛ Yehowa baaha wɔ wɔshihilɛ mli hiamɔ nibii fɛɛ lɛ hu nɔ. (Mat. 6:31-33) Shika gbɛfaŋ shihilɛ lɛ mli baanyɛ awa, shi Yehowa shiwoo akɛ ebaaha wɔ wɔhiamɔ nii lɛ tsakeee kɔkɔɔkɔ.—Lala 37:25.
6 Wɔhiɛ ni wɔɔmia waa ni wɔkɛ wɔhe awo shiɛmɔ nitsumɔ lɛ mli bɔ ni wɔshihilɛ baaŋmɛ gbɛ lɛ ji suɔmɔ kpojiemɔ. Yɛ mɛi komɛi agbɛfaŋ lɛ, enɛ baatsɔɔ daa gbɛgbalɔi ni amɛaafee. Mɛni hewɔ ofeee nɔ fɛɛ nɔ ni ooonyɛ koni onyɛ oje shishi yɛ September 1, 1992 mli?