Yehowa Mli Hekɛnɔfɔɔ Ni Ajieɔ Lɛ Kpo Kɛtsɔɔ Gbɛgbamɔ Nɔ
1 Maŋtsɛyeli lɛ he nibii ni akɛyeɔ klɛŋklɛŋ gbɛhe lɛ biɔ Yehowa mli hekɛnɔfɔɔ. (Lala 56:11; Abɛi 3:5; Mat. 6:33) Esa akɛ wɔjie wɔjwɛŋmɔ kɛjɛ nɔ ni je lɛ susuɔ loo ebuɔ no akɛ ehe hiaa lɛ nɔ ni wɔjwɛŋ mumɔŋ nibii ahe. Yɛ be mli ni je lɛ sumɔɔ ni wɔkɛ wɔhe aha heloo gbɛfaŋ akɔnɔ nii lɛ. Yehowa kpaa wɔ fai ni wɔha wɔmii ashɛ nibii ni he hiaa titrii lɛ ahe.—1 Tim. 6:8; Fil. 1:10.
2 Enɛ ji kaa krɛdɛɛ ko kɛha obalaŋtai ni ji Kristofoi ni sumɔɔ ni amɛŋɔ Yehowa kitai akɛ hiɛdɔɔ sane lɛ. Amɛ tsɔɔlɔi kɛ tipɛŋfoi ni yɔɔ skul ni buɔ woloŋlee ni yaa hiɛ akɛ nɔ ni he hiaa kɛha omanyeyeli yɛ shihilɛ mli lɛ baanyɛ amɛnɔ. Yɛ be mli ni wɔle akɛ amɛyɛ heloo gbɛfaŋ nibii ni he hiaa amɛ lɛ, obalaŋtai ni ji Kristofoi pii kɛ nilee teɔ shi woɔ nɛkɛ nɔnyɛɛ nɛɛ ni amɛhalaa gbɛgbamɔ sɔɔmɔ lɛ akɛ amɛshihilɛ mli nitsumɔ. Akɛni amɛkɛ amɛhiɛ fɔɔ Yehowa shiwoi anɔ hewɔ lɛ, amɛkɛ amɛhiɛ fɔɔ enɔ akɛ mɔ ni baakwɛ amɛ hiamɔ nii anɔ.—Lala 62:2; 68:19; 1 Tim. 5:8; 6:9, 10.
SUSUMƆ SHIHILƐ Nl OYƆƆ MLI Lɛ HE
3 Buu-Mɔɔ ni je kpo July 1, 1983 lɛ woɔ wɔteŋ mɔ fɛɛ mɔ hewalɛ ni wɔbi wɔhe akɛ: “Ani gbɛgbalɔ ni mijeee lɛ baaha manyɛ maye bem yɛ Yehowa hiɛ?” Eka shi faŋŋ akɛ, no mli lɛ mɛi pii nyɛŋ afee gbɛgbalɔi. Shi enɛ ejeee amɛnijiaŋ wui, akɛni amɛle akɛ tsui muu fɛɛ mli sɔɔmɔ ji nɔ ni saa Yehowa hiɛ be fɛɛ be lɛ hewɔ. (Mika 6:8; 2 Kor. 8:12) Yɛ sɛɛ mli lɛ, yɛ be mli ni mɔ diɛŋtsɛ shihilɛ tsakeɔ lɛ, nakai Buu-Mɔɔ lɛ mli sane ni aŋma yɛ 1983 lɛ he susumɔ ekoŋŋ yɛ sɔlemɔ mli lɛ eye ebua ni eha mɛi komɛi ebafata aŋkroaŋkroi akpei abɔ ni amɛkɛ amɛhe ewo daa gbɛgbamɔ sɔɔmɔ mli nyɛsɛɛ nɛɛ yɛ jeŋ fɛɛ lɛ ahe.
4 Kɛji akɛ shihilɛ mli ni oyɔɔ lɛ haaa onyɛ okɛ ohe awo gbɛgbamɔ sɔɔmɔ mli yɛ be mli ni akala wiemɔ nɛɛ yɛ 1983 lɛ, ani shihilɛ mli ni oyɔɔ lɛ etsake? Ŋwanejee ko bɛ he akɛ akpei abɔ ni kɛ amɛhe wo daa gbɛgbamɔ sɔɔmɔ mli nyɛsɛɛ nɛɛ lɛ yasumɔ akɛ amɛtsɔmɔ gbɛgbalɔi yɛ be ko ni eho lɛ mli shi ehe bahia ni amɛmɛ kɛyashi be mli ni shihilɛ mli ni amɛyɔɔ lɛ aaatsake.
5 Yɛ shihilɛi lɛ ekomɛi amli lɛ, tsakemɔ ni he hiaa nɛɛ baanyɛ afee mɔ lɛ jwɛŋmɔ diɛŋtsɛ ni ehiɛ yɛ gbɛgbamɔ sɔɔmɔ lɛ he. Aloo ekolɛ ebaanyɛ efee kpee he gbɛjianɔtoo kpakpa kɛha sɔɔmɔ. Yɛ bei komɛi amli lɛ tsakemɔ yɛ shihilɛ mli ni mɔ ko yɔɔ kɛ gbɛnaa nii hu he miihia koni no agbele gbɛ koni ekɛ ehe awo gbɛgbamɔ sɔɔmɔ lɛ mli. No hewɔ lɛ, ehi akɛ okɛ enɛ aaafee odaa sɔlemɔ yɛ Yehowa hiɛ koni wɔŋmɛ wɔ diɛŋtsɛ wɔhe kɛ shihilɛ mli ni wɔyɔɔ lɛ wɔkwɛ jogbaŋŋ yɛ anɔkwayeli mli. Akpei abɔ efee nakai ni amɛmiina gbɛgbamɔ sɔɔmɔ mli jɔɔmɔi amli ŋɔɔmɔ.
6 Kɛji akɛ yɛ be mli ni osusu shihilɛ mli ni oyɔɔ lɛ he jogbaŋŋ yɛ faŋŋ mli lɛ ona akɛ oji mɔ ko ni baanyɛ aje shishi afee gbɛgbalɔ yɛ be ko ni bɛ shɔŋŋ mli lɛ, belɛ mɛni hewɔ okɛ gbɛgbalɔi awamɔ sɔɔmɔ lɛ ejeee shishi ni oya nɔ ofee enɛ daa bianɛ? Beni nyɔji fioo ko aaashɛ lɛ, no mli lɛ eka shi faŋŋ akɛ ona sɛɛsaramɔi kɛ Biblia mli nikasemɔi ni fa. Enɛ baanyɛ aye abua bo koni okɛ ohe awo daa gbɛgbamɔ sɔɔmɔ lɛ mli ni ewaaa kwraa, ekolɛ dani sɔɔmɔ afi hee lɛ aaaje shishi.
7 Yehowa miifee nibii wuji yɛ yiwalɛ nibii agbɛjianɔtoo momo nɛɛ naagbee gbii nɛɛ amli. Enɛ ji be ni sa akɛ wɔ fɛɛ wɔtsi wɔbɛŋkɛ lɛ ni wɔjɔɔ egbɛi lɛ “gbi fɛɛ gbi kɛaatee naanɔ.” (Lala 145:2; Yak. 4:8) Kɛ shihilɛ mli ni oyɔɔ lɛ ŋmɛɔ bo gbɛ ni ofee nakai ni oji mɔ ni sa lɛ, belɛ ha gbɛgbamɔ sɔɔmɔ lɛ afee odaseyeli kroko ni tsɔɔ akɛ oyɛ Yehowa mli hekɛnɔfɔɔ.—Lala 94:19.