Kpokpaa nɔ Kpee he Gbɛjianɔtoo Hee
1 Yɛ Yesu wiemɔi ni yɔɔ Mateo 6:33, (NW) lɛ toiboo hewɔ lɛ, anɔkwa Kristofoi lɛ etee nɔ daa amɛkɛ Maŋtsɛyeli lɛ eye klɛŋklɛŋ gbɛhe yɛ amɛshihilɛi amli. No hewɔ lɛ, “Nyɛyaa nɔ Nyɛtaoa Maŋtsɛyeli lɛ Tsutsu” lɛ ji yitso ni sa kɛha kpokpaa nɔ kpee he gbɛjianɔ ni ato ni baaje shishi yɛ February 1994 lɛ.
2 Kɛjɛ shishijee lɛ gbɛjianɔ ni ato lɛ baama bɔ ni Maŋtsɛyeli lɛ yɔɔ diɛŋtsɛ ha lɛ nɔ mi, ni ebaama nɔ mi etsɔɔ akɛ eji nɔyeli ni miiye nɔ diɛŋtsɛ ni miiye mɛi anɔ, ni hiɛ nɔyelɔi, shishibii, kɛ mlai. Yɛ anɔkwale mli lɛ, mlai babaoo ni adesa nɔyelii kɛtsuɔ nii ni he baa sɛɛnamɔ kɛhaa adesai aweku lɛ ŋmɛnɛ lɛ damɔ Biblia mlai anɔ.
3 Abaasusu hebuu kɛ jɔɔmɔi ni wɔnaa kɛjɛɔ Maŋtsɛyeli lɛ ni wɔkɛyeɔ klɛŋklɛŋ gbɛhe yɛ wɔ shihilɛi sɔrɔtoi fɛɛ mli lɛ he. Akɛ ŋaawoo ni yeɔ buaa baaha ni akɛtsɔɔ bɔ ni wɔbaanyɛ wɔkwa yeyeeye-feemɔ ni esaaa. Wiemɔi, nɔkwɛmɔ nii, kɛ saji ahe susumɔ baatsɔɔ nɔ hewɔ ni ehe miihia waa ni wɔha wɔhiŋmɛi nɔ atse lɛ.
4 Yɛ kpee lɛ gbi ni ji Hɔɔ lɛ nɔ lɛ, mɛi ni amɛsa kɛha baptisimɔ lɛ baanyɛ ajaje amɛ henɔjɔɔmɔ kɛha Yehowa lɛ yɛ faŋŋ mli. Ni yɛ Hɔgbaa lɛ, wɔ fɛɛ wɔbaasumɔ ni wɔba ni wɔbabo maŋshiɛmɔ ni hiɛ yitso akɛ ‘Nɔ ni Nyɔŋmɔ Maŋtsɛyeli lɛ Baafee Aha Adesai’ lɛ toi.
5 Kwɛmɔ ni oto ogbɛjianɔ fɛɛ koni oba kpokpaa nɔ kpee lɛ gbii sɔrɔtoi enyɔ lɛ fɛɛ. Kpee lɛ he gbɛjianɔtoo, ni nyɛmimɛi anaanyobɔɔ kpakpa fata he lɛ kɛ kanyamɔ kɛ miishɛjemɔ hewalɛwoo ni wɔteŋ mɔ ko kwraa sumɔŋ akɛ eeeŋmɛɛ lɛ lɛ baaha.