Jɔɔmɔi ni Jɛɔ Mɛi Krokomɛi Kɛ Nitsumɔ Mli Baa
1 Ani onuɔ he akɛ sɛɛnamɔi yɛ ni abaana mli ŋɔɔmɔ be mli ni akɛ mɛi krokomɛi tsuɔ nii yɛ sɔɔmɔ nitsumɔ lɛ mli lɛ? Yesu nu he nakai. Eyɛ mli akɛ nikpamɔ lɛ fa babaoo ni nitsulɔi lɛ faaa moŋ, shi etsu kaselɔi 70 kɛtee abɔɔ lɛ mli “enyɔnyɔ.” Mɛɛ be ni kɛ sɛɛnamɔ baa eji kɛha amɛ fɛɛ nɛkɛ, be mli ni amɛshiɛɔ yɛ “maŋ fɛɛ maŋ kɛ he fɛɛ he ni lɛ diɛŋtsɛ ebaaya lɛ”!—Luka 10:1, 17; Mat. 9:37.
2 Mɛi krokomɛi ni akɛ amɛ aaatsu nii lɛ kanyaa mɔ. Wɔteŋ mɛi komɛi hiɛ gboɔ ni ewaa kɛhaa amɛ akɛ amɛaabɛŋkɛ gbɔi. Kɛ mɔ kroko hu fata wɔhe lɛ eeeha wɔna nɔmimaa ni wɔkɛ ekaa awie Nyɔŋmɔ Wiemɔ lɛ he. Kɛ mɔ ko fata wɔhe lɛ, eeefee mlɛo kɛha wɔ akɛ wɔɔtsu nii lɛ yɛ gbɛ ni atsɔse wɔ lɛ naa. (Abɛi 27:17) Nilelɔ lɛ kɛɛ: “Mɛi enyɔ hi fe mɔ kome.”—Jaj. 4:9.
3 Ehi akɛ okɛ shiɛlɔi kɛ gbɛgbalɔi sɔrɔtoi aaatsu nii. Mɛi ni fata bɔfo Paulo he yɛ sɔɔmɔ lɛ mli ji Barnaba, Sila, Timoteo, kɛ Yohane Marko, ni amɛna jɔɔmɔi babaoo mli ŋɔɔmɔ be mli ni amɛshiɛɔ kutuu lɛ. Nakai nɔŋŋ ji bɔ ni ebaanyɛ eba lɛ ŋmɛnɛ. Ani okɛ mɔ ko ni etsɛ waa yɛ anɔkwale lɛ mli lɛ etsu nii pɛŋ? Be mli ni okwɛɔ bɔ ni ehe esa yɛ odase ni eyeɔ lɛ mli lɛ, ekolɛ oná saji kpakpai komɛi ni eye ebua bo koni oya hiɛ. Ani ófata mɛi ni ji shiɛlɔi heei kwraa lɛ ahe pɛŋ? No lɛ onyɛ ogba amɛ nɔ ni okase ni yɛ no hewɔ lɛ eye ebua amɛ koni amɛhe asa koni amɛmii ashɛ amɛhe yɛ amɛsɔɔmɔ nitsumɔ lɛ mli.
4 Ani oofee Biblia mli nikasemɔ amrɔ nɛɛ? Kɛ nakai ni lɛ, mɛni hewɔ ofɔɔɔ nine otsɛɛɛ onukpai lɛ ateŋ mɔ kome loo kpokpaa nɔkwɛlɔ lɛ ni efata ohe? Sɛɛnamɔ yɛ he akɛ wɔ Biblia kaselɔi lɛ aaale nɔkwɛlɔi lɛ. Kɛ ooshashao shi akɛ oookwɛ nikasemɔ lɛ nɔ beni onukpa ko yɔɔ jɛmɛ lɛ, no lɛ ekolɛ ebaasumɔ ni efee koni eha okwɛ. No sɛɛ lɛ, kaashe gbeyei akɛ ooobi lɛ ŋaawoi yɛ bɔ ni ooonyɛ ofee oye obua nikaselɔ lɛ ni eya hiɛ oyayaayai.
5 Feemɔ mɔ ni woɔ mɔ hewalɛ kɛ ofata mɛi krokomɛi ahe kɛmiitsu nii. Wiemɔ shikpɔŋkuku lɛ he ekpakpa. Kaawie mɛi krokomɛi ahe loo ni ooofee yeyeeye yɛ asafo lɛ gbɛjianɔtoo he. Ha ojwɛŋmɔ ama sɔɔmɔ nitsumɔ lɛ nɔ kɛ jɔɔmɔi ni jɛɔ Yehowa ŋɔɔ kɛbaa lɛ nɔ. Kɛ ofee nakai lɛ, bo kɛ mɛi ni fata ohe lɛ baaku sɛɛ aba shia daa ni nyɛtɔrɔ yɛ mumɔŋ.
6 Ekolɛ oshihilɛi amli saji baaha ewa ehao akɛ okɛ nyɛmimɛi hii kɛ yei krokomɛi aaatsu nii daa. Shi, kɛ ebaahi lɛ, mɛni hewɔ otooo gbɛjianɔ ni ona be koni okɛ shiɛlɔ kroko atsu nii? Abaajɔɔ nyɛyi enyɔ lɛ fɛɛ!—Rom. 1:11, 12.