Na Hiɛsɔɔ Oha Nyɔŋmɔ We Lɛ

¹ Yehowa wo ewebii lɛ kita yɛ Biblia beaŋ akɛ amɛbua amɛhe naa daa yɛ ewe lɛ. (3 Mose 23:⁠2) Nɛkɛ henaabuamɔi nɛɛ ye ebua amɛ ni amɛjwɛŋmɔ hi Nyɔŋmɔ wiemɔ lɛ nɔ, ni eha amɛna be kɛha saji anɔ­jwɛŋ­mɔ, naanyobɔɔ, kɛ Yehowa Mla lɛ he susumɔ. Nyɔŋmɔ susumɔi yimɔ amɛjwɛŋmɔi obɔbɔ, ni ekɛ mumɔŋ jɔɔmɔi babaoo baha amɛ. Be nɛɛ bafee miishɛɛ be lɛlɛŋ. Gbɛjianɔtoo nɛɛ ha amɛna ekomefeemɔ kɛ jamɔ ni he tse. Ŋmɛnɛ hu, henaabuamɔi yɛ Nyɔŋmɔ we lɛ he miihia nakai nɔŋŋ.

² Mɛɛ Gbɛ nɔ Wɔɔtsɔɔ yɛ akɛ Wɔhiɛ Sɔɔ Kpeei? Asafoi komɛi akpeeiyaa he akɔntaabuu baa shi kwraa, titri lɛ Asafo Woloŋ Nika­se­mɔ lɛ. Bei komɛi lɛ, ekolɛ mɔ ko shihilɛ baatsĩ enaa ni ehaŋ eya kpee. Shi ani oŋmɛ gbɛ ni naagbai bibii kwraa po etsĩ kpeei ni oooya daa lɛ naa? Ekolɛ mɛi komɛi baakpɛ amɛyiŋ akɛ amɛbaahi shia kɛji amɛnu yitso-gbamɔ he fioo, aloo amɛnu tɔlɛ he yɛ gbi lɛ mli ni­tsu­mɔ sɛɛ. Mɛi krokomɛi hu nuɔ he akɛ esa akɛ amɛha amɛwekumɛi ni heee yeee, ni taoɔ amɛbasara amɛ lɛ aba. Mɛi komɛi po efolɔ kpeei amli koni amɛkwɛ TV nɔ nifeemɔ loo shwɛmɔ ko ni amɛsumɔɔ waa. Eka shi faŋŋ akɛ hiɛsɔɔ ni gbɔmɛi nɛɛ jieɔ lɛ kpo yɛ nɛkɛ shihilɛi nɛɛ amli lɛ kɛ tsuiŋ henumɔ ni Korabii lɛ jie lɛ kpo lɛ yeee egbɔ kwraa, akɛ: “Misusuma hiɛ miitse Yehowa kpoi lɛ, etɔ biti po yɛ hewɔ.”​—⁠Lala 84:⁠3.

³ Eyɛ mli akɛ ahaa wɔ mumɔŋ niyenii babaoo yɛ kpeei ashishi moŋ, shi ewa kɛha mɛi ni baa kpeei lɛ ateŋ mɛi komɛi akɛ amɛaabo toi. Ekolɛ amɛnaa akɛ amɛjwɛŋmɔ miikpa shi, amɛmiisusu gbi lɛ mli naagbai ahe, aloo ekolɛ amɛmiiwɔ po. Mɛi pii ena akɛ kɛ amɛmiiŋmala otii kukuji ni awieɔ he lɛ, eyeɔ ebuaa amɛ ni amɛjwɛŋmɔ nyiɛɔ nɔ ni awieɔ lɛ sɛɛ. Nibii aŋmalamɔ hu haa sane lɛ kaa jwɛŋmɔ lɛ mli. Kɛ­fata he lɛ, hesaamɔ ni tsɔɔ hiɛ hu yeɔ ebuaa ni wɔnaa kpee lɛ he sɛɛ kɛmɔɔ shi. Kɛ wɔsaa wɔhe jogbaŋŋ lɛ, no lɛ wɔbaanyɛ “wɔmɔ nii ni wɔnu lɛ mli ni awa.”​—⁠Heb. 2:⁠1.

⁴ Ehe miihia ni gbekɛbii kɛ onukpai fɛɛ akpɛlɛ gbɛtsɔɔmɔ ni akɛhaa yɛ kpeei ashishi lɛ nɔ. Kɛ fɔlɔi lɛ kɛ shwɛmɔ nii loo woji ni atɛŋ mfonirii yɛ mli, ni gbekɛbii kɛ pɛn­sil sui sɔrɔtoi dikiɔ mli lɛ ha amɛ ni amɛkɛshwɛ koni no aha amɛfee dioo lɛ, no lɛ nɔ ko bibioo pɛ gbekɛbii lɛ baakase. Anaa akɛ gbekɛbii lɛ naaa tsɔsemɔ kpakpa kɛji aŋmɛɔ amɛ gbɛ ni amɛshwɛɔ, amɛwieɔ, amɛfoɔ, aloo amɛfeɔ nibii kro­ko­mɛi kɛgbaa mɛi ni tara amɛmasɛi lɛ anaa. Ni kɛ gbekɛ lɛ le akɛ efɔlɔi lɛ ateŋ mɔ ko baafata ehe kɛya he ni etaoɔ eya lɛ, bei pii lɛ ehaa eshitee nɔtonɔto kɛha nu-shwiemɔ loo nu-numɔ ni he ehiaaa, beni kpee lɛ miiya nɔ lɛ nɔ gbɔɔ kwraa.

⁵ Be Nɔyeli He Miihia: Bei komɛi lɛ, shihilɛi komɛi ni wɔ­nyɛŋ nɔ ko wɔfee yɛ he baanyɛ atsĩ wɔ gbɛ ni wɔkashɛ kpee shishi yɛ be ni sa mli, shi kɛ wɔkpeɔ sɛɛ daa, ní lala kɛ sɔlemɔ ni akɛjeɔ shishi lɛ sɛɛ dani wɔbashɛɔ jɛmɛ lɛ, no tsɔɔ bulɛ ni wɔbɛ kɛha yiŋ­too krɔŋkrɔŋ ni yɔɔ kpee lɛ sɛɛ, kɛ sɔ̃ ni ka wɔnɔ hu akɛ wɔkagbá mɛi krokomɛi anaa lɛ. Kaimɔ akɛ wɔnyɛmimɛi ahe ni wɔɔfata yɛ lala kɛ sɔlemɔ mli yɛ asafoŋ kpeei ashishi lɛ ji wɔjamɔ lɛ fã. Bei pii lɛ, sɛɛ ni akpeɔ daa lɛ jɛɔ gbɛjianɔtoo kpakpa ni bɛ, loo gbɛjianɔ ni atooo kɛtsɔɔɔ hiɛ. Be nɔyeli tsɔɔ akɛ wɔbuɔ wɔ kpeei, ni wɔhiɛ sɔɔ hu.

⁶ Beni gbi lɛ yaa nɔ ebɛŋkɛɔ kpaakpa nɛɛ, belɛ bɔ ni ehe hiaa ni wɔbua wɔhe naa daa lɛ hu miiya hiɛ nakai nɔŋŋ. (Heb. 10:​24, 25) Nyɛhaa wɔjiea wɔ hiɛsɔɔ kpo kɛtsɔ kpeeibaa daa, hesaamɔ ni tsɔɔ hiɛ, be nɔyeli, sane toiboo jogbaŋŋ, kɛ nɔ ni wɔkaseɔ lɛ kɛ nitsumɔ hu nɔ.