Kristo Ji Nɔkwɛmɔ Nɔ Kɛha Obalahii kɛ Obalayei Bibii
1 Beni akɛ be kakadaŋŋ egba Biblia mli sane sɛɛ lɛ, je lɛŋ obalanyo fioo ko kɛɛ: “Yesu Kristo sui ni nɔ kwɔlɔ lɛ na minɔ hewalɛ waa. Mɔ nɛ ji hiɛnyiɛlɔ ni manyɛ mahe lɛ maye.” Anyɛŋ awie nakai nɔŋŋ yɛ maŋkwralɔ ko loo mɛi ni bɔɔ mɔdɛŋ waa yɛ kpɔiaŋgbɔlemɔi kɛ mɛi ahiɛtsirɛjiemɔ mli lɛ ahe. Je lɛŋ jeŋba he tɛi ni afolɔ ashwie shi kɛ shihilɛ gbɛi ni jeee Kristofoi anifeemɔ ni amɛkpɛlɛɔ nɔ yɛ faŋŋ mli lɛ haaa amɛfee mɛi ni wɔbaanyɛ wɔkase.—Lala 146:3, 4.
2 Obalahii kɛ obalayei bibii baanyɛ ana nɔmimaa akɛ, kɛ́ amɛbana Yesu Kristo mli hemɔkɛyeli lɛ, no lɛ Nyɔŋmɔ tooi ji amɛ, ni Yesu le amɛ. Tookwɛlɔ Kpakpa lɛ susuɔ amɛhe. (Yoh. 10:14, 15, 27) Ajɔɔ obalahii kɛ obalayei bibii lɛ ni nyiɛɔ Kristo sɛɛ akɛ amɛ Nɔkwɛmɔ Nɔ lɛ.
3 Nyɛminuu ko ni miisɔmɔ yɛ Brooklyn Betel bianɛ lɛ kɛ sɔɔmɔ hegbɛ nɛɛ ma ehiɛ akɛ oti kɛjɛ beni eye afii kpaanyɔ lɛ. Awo lɛ hewalɛ ni ebu Betel sɔɔmɔ akɛ nitsumɔ ko ni kɛji ebada lɛ ebaatsɔ nɔ ekɛnyiɛ Kristo nɔkwɛmɔ nɔ lɛ sɛɛ. Efɔlɔi, kɛ nɔkwɛlɔ gbɛfalɔi lɛ hu kɛ oti nɛɛ ma ehiɛ daa. Bɔni afee ni aye abua koni ekɛsaa ehe lɛ, amɛwo lɛ hewalɛ koni ekɛ ekãa atsu nii waa tamɔ Betel nitsulɔ pɛpɛɛpɛ, ní efee nii yɛ shia, eye ebua kɛha Maŋtsɛyeli Asa lɛ nɔ saamɔ, koni ena hesaai kɛha sɔɔmɔ nitsumɔ lɛ. Akɛni kɛbashi amrɔ nɛɛ, ekɛ afii babaoo ena Betel sɔɔmɔ lɛ mli miishɛɛ hewɔ lɛ, enáa hiɛsɔɔ akɛ ebɔ mɔdɛŋ ekase Kristo nɔkwɛmɔ nɔ lɛ kɛjɛ egbekɛbiiashi.
4 Yesu ediii je lɛŋ nitsumɔ ko sɛɛ; ehala sɔɔmɔ nitsumɔ lɛ. Beni nyɛmiyoo fioo ko gbe skul naa lɛ, eesumɔ ni efee gbɛgbalɔ, shi akɛni enaaa nitsumɔ ni sa ni ekɛ ebe-fã baatsu hewɔ lɛ eshashao shi. Etee nɔ esusu sane he nɛkɛ akɛ: ‘Matao nitsumɔ dã, kɛkɛ lɛ mikɛ migbɛgbalɔ gbɛbimɔ he wolo lɛ eha.’ Onukpa ko tsɔɔ mli eha lɛ akɛ, kɛ etee nɔ emɛ aahu lɛ, ebaaná be-fɛɛ nitsumɔ ko ni eeetsu lɛ he miishɛɛ babaoo, ejaakɛ nɔ ko kwraa bɛ ni baatsi enaa ni ekakpɛlɛ nɔ. Ekɛɛ akɛ: “Misɔle miha Yehowa koni emumɔ lɛ akudɔ mi.” Ekɛ ehe wo gbɛgbalɔi awalɔ nitsumɔ lɛ mli amrɔ nɔŋŋ ni sɛɛ mli lɛ ebatsɔ daa gbɛgbalɔ. Etsɛɛɛ nɔŋŋ ni ena nitsumɔ ni sa ni ha enyɛ eto egbɛgbamɔ lɛ he gbɛjianɔ.
5 Yesu kɛ ekãa jaje Maŋtsɛyeli he shɛɛ sane lɛ etsɔɔ mɔ fɛɛ mɔ. (Mat. 4:23) Kristofoi ni hiɛ fãko lɛ hu baanyɛ afee ekãa yɛ shiɛmɔ mli, ni amɛhaaa mɛi krokomɛi awo amɛhe gbeyei. Odasefonyo ko ni eye afii 14 lɛ bɔ amaniɛ akɛ: “Mɔ fɛɛ mɔ le mishidaamɔ akɛ Kristofonyo lɛ yɛ skul. . . . Amɛle enɛ jogbaŋŋ aahu akɛ, kɛ mikɛ klas-nikaselɔ ko kpe yɛ shiɛmɔ mli lɛ, minuuu he akɛ mihao. Bei pii lɛ, nanemɛi nikaselɔi boɔ mi toi, ni bei babaoo mli lɛ amɛheɔ wolo.”
6 Kristo nɔkwɛmɔ nɔ lɛ baanyɛ aye abua obalahii kɛ obalayei bibii koni amɛkɛ nilee akpɛ amɛyiŋ yɛ amɛwɔsɛɛ be he. Yɛ nɔ najiaŋ ni amɛkɛ amɛhe aaawo je lɛŋ nibii asɛɛdii mli vii lɛ, ‘amɛkaiɔ amɛ Bɔlɔ Kpele’ lɛ kɛtsɔɔ ekãa ni amɛfeɔ yɛ Yehowa sɔɔmɔ mli lɛ nɔ. (Jaj. 12:1) Taakɛ Kristo Yesu ji lɛ, amɛmiitsu “Tsɛ lɛ suɔmɔ lɛ” ni kɛ jɔɔmɔi ni he hiaa baa, ni fe nɔ fɛɛ nɔ ni je lɛ kɛhaa lɛ he nii. Ni amɛkɛ jeŋ momo lɛ ‘aaaho aya’ moŋ lɛ, amɛbaanyɛ amɛkpa gbɛ akɛ ‘amɛaahi shi kɛya naanɔ.’—1 Yohane 2:15-17.