Kristofoi Ajeŋba yɛ Skul
1 Kɛ oji Kristofonyo ni miiya skul lolo lɛ, no lɛ esa akɛ ona hemɔkɛyeli ni mli wa koni onyɛ ohiɛ emuuyeli mli. Okɛ nanemɛi fɔji kɛ shihilɛi ni baanyɛ aka ohemɔkɛyeli kpeɔ. Ehe miihia ni okɛ Petro ŋaawoo nɛɛ atsu nii ni “[oba ojeŋ] jogbaŋŋ yɛ jeŋmajiaŋbii lɛ ateŋ, koni . . . [onitsumɔi] kpakpai lɛ ni amɛnaa lɛ amɛkɛwo Nyɔŋmɔ hiɛ nyam.” (1 Pet. 2:12) Ehe miihia ni ona ekaa kɛ faishitswaa ni okɛkpee nɛkɛ kaa nɛɛ naa.
2 Kɛ otee skul jio, oba shia jio, okɛ nibii ni woɔ mɔ he muji, ni naa mɔ nɔ hewalɛ, tamɔ bɔlɛnamɔ ni tsɔɔ gbalashihilɛ hiɛ, wiemɔ shara, tawa shɛremɔ, kɛ tsofai fɔji kɛ nitsumɔ kpeɔ. Daa gbi lɛ, okɛ kaai ni baanyɛ awo jeŋba kpakpa ni ohiɛ mli lɛ muji lɛ kpeɔ. Taakɛ eji yɛ onukpai agbɛfaŋ lɛ, esa akɛ bo hu ‘opele hemɔkɛyeli lɛ he waa’ kɛji ooonyɛ odamɔ kaai ni tamɔ nɛkɛ naa.—Yuda 3; kwɛmɔ July 15, 1991, Buu-Mɔɔ, (Vol. 112, No. 14) baafai 23-6.
3 Ayɛ maŋhedɔɔ nifeemɔi kɛ je lɛŋ gbijuji komɛi ni ayeɔ yɛ skul. Ani ole maŋ kɛ jamɔ mli gbijuji ni ayeɔ yɛ nyɛ skul lɛ? Kɛ shihilɛ ko ni kaa mɔ te shi lɛ, ani obaanyɛ “[ohiɛ] henilee kpakpa, koni . . . mɛi ni gbe nyɛ jeŋba kpakpa . . . lɛ he guɔ lɛ ahiɛ agboi”?—1 Pet. 3:16.
4 Ekolɛ skul kpɔiaŋgbɔlemɔ nifeemɔi kɛ hiɛtserɛjiemɔ henaabuamɔi ni lakaa mɔ lɛ baanyɛ aka bo. Esa akɛ ohiɛ akã shi jogbaŋŋ ni ona bɔ ni nɛkɛ nifeemɔi ni tamɔ nɔ ni yɔɔ miishɛɛ nɛɛ baanyɛ aha oŋmɛɛ ohemɔkɛyeli lɛ he. Ehe miihia ni ohala nanemɛi ni baaha ona ‘hewalɛwoo ni nyɛkɛaaha nyɛhe’ lɛ mli ŋɔɔmɔ, koni nyɛtswa nyɛhe nyɛma shi kɛtsɔ mɔ kroko lɛ hemɔkɛyeli nɔ.—Rom. 1:12.
5 Obaanyɛ Odamɔ Naa, kɛ Yehowa Yelikɛbuamɔ: Satan miika ohemɔkɛyeli be fɛɛ be. Kaai ni esa akɛ okpee naa lɛ amli baanyɛ awa, shi nyɔmɔwoo lɛ haa efeɔ nɔ ni sa. (1 Pet. 1:6, 7) Onyɛŋ odamɔ naa kɛ onyɛmɔ yɛ omanyeyeli mli; esa akɛ okwɛ Yehowa kɛha yelikɛbuamɔ. Yesu wo ekaselɔi lɛ hewalɛ akɛ: “Nyɛshĩa kpe ni nyɛsɔlea, koni nyɛkabote kaa mli.” (Mat. 26:41) Tsɔsemɔ kɛ henɔyeli he miihia waa.—1 Kor. 9:27.
6 Kaimɔ be fɛɛ be akɛ obaabu ojeŋba he akɔntaa oha Yehowa. (Jaj. 11:9) Eyɛ mli akɛ ekolɛ mɛi krokomɛi enaŋ nɔ ni ofeɔ moŋ, shi Yehowa le nɔ ni ofeɔ, ni lɛ ebaakojo. (Heb. 4:13) Esa akɛ anɔkwa suɔmɔ ni oyɔɔ akɛ ooosa ehiɛ lɛ atsirɛ bo ni ‘okɛ gbeyeishemɔ kɛ hekpokpomɔ atsu oyiwalaheremɔ he nii.’ (Fil. 2:12) Nyɔŋmɔ Wiemɔ lɛ ni oookane daa lɛ ji hewalɛ kpele. Eyi obɔ kɛ ŋaawoi kɛ nɔkwɛmɔ nii kpakpai ni obaanyɛ okase.—Heb. 12:1-3.
7 Fɔlɔi, nyɛyɛ gbɛfaŋnɔ ni he hiaa. Esa akɛ nyɛkwɛ nyɛbii lɛ anɔ, ni nyɛle naagbai ni amɛkɛkpeɔ, ni nyɛkɛ yelikɛbuamɔ aha amɛ kɛ ehe miihia. Ani ekomefeemɔ ni mli wa yɛ nyɛkɛ nyɛbii lɛ ateŋ? Ani nyɛdu Nyɔŋmɔ mlai kɛ shishitoo tɛi lɛ ashishinumɔ ni tsɔɔ hiɛsɔɔ nyɛwo amɛmli? Kɛ amɛkɛ nɔnyɛɛi loo kaai kpe lɛ, ani nyɛbii lɛ ahe wa, aloo ani amɛnijiaŋ jeɔ wui yɛ gbɛ ni waaa nɔ? Ani amɛnijiaŋ jeɔ wui yɛ sɔrɔto ni amɛaafee yɛ amɛtipɛŋfoi ateŋ lɛ hewɔ? Akɛ fɔlɔi lɛ, gbɛnaa nii kã nyɛnɔ akɛ nyɛye nyɛbua amɛ. (5 Mose 6:6, 7) Kɛ nyɛtsu nyɛ nitsumɔ jogbaŋŋ lɛ, nyɛbaanyɛ nyɛye nyɛbua amɛ ni amɛye hemɔkɛyeli lɛ he ta lɛ mli kunim.—Abɛi 22:6.