Okɛ Woji Tɛtrɛbii Aha Be Fɛɛ Be
1 Wɔyɛ yiŋtoo kpakpa ni wɔɔdamɔ nɔ wɔha wɔhiɛ asɔ Buu-Mɔɔ lɛ kɛ Awake! lɛ. Mɛɛ woji tɛtrɛbii po yɔɔ ni asumɔɔ yɛ majimaji fɛɛ mli fe enɛ? Wɔkɛ woji tɛtrɛbii lɛ ashɛɛ baatsu nii yɛ wɔ shiɛmɔ nitsumɔ lɛ mli yɛ nyɔŋ nɛɛ nɔ, ni mɛɛ saji ni he hiaa waa yɔɔ October nɔ̃ lɛ mli nɛkɛ! Wɔfɔɔ wɔ woji tɛtrɛbii lɛ kɛhamɔ titri yɛ shia kɛ shia nitsumɔ lɛ mli; shi wɔbaasumɔ ni wɔsaa wɔhe ni wɔkɛha yɛ be fɛɛ be ni sa mli.
2 Kɛ okɛ October 1 “Buu-Mɔɔ” lɛ miiha lɛ, obaanyɛ otee miishɛɛ shi yɛ sane, “Jeŋ ni Ta Bɛ Mli—Mɛɛ Be?” lɛ he kɛtsɔ wiemɔ nɛɛ nɔ:
◼ “Mɛi pii susuɔ nɔ hewɔ ni jeŋ ni tawuu bɛ mli tamɔ nɔ ni nine shɛɛɛ nɔ yɛ adesai amɔdɛŋbɔɔ fɛɛ sɛɛ lɛ he. Mɛni osusuɔ yɛ wiemɔi ni yɔɔ October 1 Buu-Mɔɔ nɛɛ baafa 5 lɛ he? [Kanemɔ klɛŋklɛŋ wiemɔ kuku ni yɔɔ klɛŋklɛŋ kukuji enyɔ lɛ mli yɛ yitso bibioo “Nyɔŋmɔ Jamɔ—Gbɛtsii Nii Kpele” shishi lɛ, ni oha etsɔɔ ejwɛŋmɔ.] Shi enɛ etsɔɔɔ akɛ tawuu baahi shi be fɛɛ be. Kadimɔ Nyɔŋmɔ shiwoo ni yɔɔ biɛ yɛ Yesaia 9:5, 6 lɛ.” Obaanyɛ okane ŋmalɛ nɛɛ kɛjɛ o-Biblia lɛ mli aloo kanemɔ taakɛ bɔ ni aŋma yɛ Buu-Mɔɔ lɛ mli sane lɛ mli lɛ. Tsɔɔmɔ mli kuku akɛ, Buu-Mɔɔ lɛ fãa Yehowa Maŋtsɛyeli lɛ he akɛ hiɛnɔkamɔ kome pɛ kɛha jeŋ toiŋjɔlɛ, ni owo mɔ lɛ hewalɛ ni ekane sane lɛ.
3 Kɛ okɛ October 22 “Awake!” lɛ miiha lɛ, obaanyɛ okɛɛ akɛ:
◼ “Te osusuɔ sanebimɔ ni yɔɔ wolo tɛtrɛɛ nɛɛ hiɛ lɛ he ohaa tɛŋŋ: ‘Mɛni Hewɔ Wala Sɛɛ Ekɛɛɛ Kwraa Nɛkɛ?’ [Ŋmɛɛ gbɛ ni etsɔɔ ejwɛŋmɔ.] Saji ni aŋmala atsara nɔ nɛɛ gbalaa jwɛŋmɔ kɛyaa nɔ ni ŋmɛnɛŋmɛnɛ beaŋ jeŋ nilelɔi kɛ mɛi krokomɛi yɔɔ kɛɛmɔ yɛ gbɔlɛ he lɛ nɔ, kɛkɛ lɛ egbala jwɛŋmɔ kɛba nɔ ni wɔ Bɔlɔ lɛ ewo shi yɛ naanɔ wala gbɛkpamɔi ahe lɛ nɔ. Ebaaŋɔɔ minaa akɛ mashi ekome nɛɛ maha bo ni mato gbɛjianɔ maha bo koni oshɛ eko.”
4 Kɛ ona gbɔmɛi ni sumɔɔ jamɔ lɛ, mɛni hewɔ okɛ sane ko ni yɔɔ October 15 “Buu-Mɔɔ” lɛ mli lɛ etsɔɔɔ amɛ? Enɛ kɛhamɔ baatee mɔ lɛ miishɛɛ shi:
◼ “Masumɔ ni male ojwɛŋmɔ yɛ sanebimɔ nɛɛ he: Ani abaanyɛ asumɔ Nyɔŋmɔ ni ashe lɛ gbeyei yɛ nakai beaŋ nɔŋŋ?” Ŋmɛɛ gbɛ ni eha hetoo, ni okane ŋmalɛ ni tere saneyitso, “Mɛni Hewɔ Esa akɛ Oshe Anɔkwa Nyɔŋmɔ lɛ Gbeyei Bianɛ?” lɛ. (Jaj. 12:13) Okɛ nɔkwɛmɔ nii ni yɔɔ Reasoning wolo lɛ baafa 199 lɛ ekome atsu nii, ni okɛ woji tɛtrɛbii lɛ aha kɛ hegbɛ hu kɛha eshɛɛ.
5 Kɛ ootsu nii yɛ shia kɛ shia lɛ, kaaku ohiɛ oshwie shwapoi bibii kɛ nihɔɔlɔi anɔ. Mɛi ni yaa shwapoi amli be fɛɛ be lɛ tsɔɔ akɛ nitsumɔ nɛɛ ŋɔɔ ni ewoɔ yibii. Obaanyɛ okɛ wiemɔ kuku ni waaa nɛɛ atsu nii beni okɛ October 8 “Awake!” lɛ haa:
◼ “Wɔle akɛ nitsumɔtsɛmɛi sumɔɔ ni amɛle sane fɛɛ sane ni yaa nɔ yɛ amɛ akutso mli. Mile akɛ saji nɛɛ baaŋɔɔ onaa.” Kɛkɛ lɛ otsɔɔ lɛ sane oti ko kɛjɛ sane, ‘Fɔlɔ Kome Wekui—Mɛɛ Omanye Amɛbaanyɛ Amɛye?’ lɛ mli.
6 Kɛ mɔ ni otee eŋɔɔ lɛ bɛ deka lɛlɛŋ lɛ, obaanyɛ ojie woji tɛtrɛbii lɛ kpo otsɔɔ lɛ ni okɛɛ akɛ:
◼ “Mile akɛ okpaaa gbɔ ko gbɛ ŋmɛnɛ, no hewɔ lɛ mafee misane lɛ kuku. Masumɔ ni maha ona hegbɛ ni okane sane ko ni he hiaa.” Okɛ sane ni ohala lɛ atsɔɔ lɛ, ni okɛ woji tɛtrɛbii lɛ aha lɛ.
7 Hiɛmɔ shia kɛ shia kadimɔ wolo ni aŋmala enɔ nibii jogbaŋŋ, ni oku osɛɛ oyasara mɛi fɛɛ ni he woji lɛ. Kɛ ona mɔ ni yɔɔ miishɛɛ waa yɛ osɛɛsaramɔ lɛ mli lɛ, tsɔɔmɔ lɛ shia Biblia mli nikasemɔ he gbɛjianɔtoo ni wɔyɔɔ lɛ. Nyɛhaa wɔsaa wɔhe ni wɔhiɛ ahia wɔhe nɔ ni wɔkɛ wɔ woji tɛtrɛbii lɛ aha, kɛ hegbɛ hu kɛha eshɛɛ yɛ be fɛɛ be ni sa mli.