Sɛɛsaramɔi ni Hiɛ Yiŋtoo
1 Kɛ oofee sɛɛsaramɔ lɛ, esa akɛ obɔ mɔdɛŋ ni okɛ ŋmalɛ ko ni baaha nilee ni mɔ lɛ yɔɔ yɛ Biblia mli sane ni okɛ lɛ wie he nyɛsɛɛ ko lɛ aya hiɛ lɛ atsu nii.
2 Otii lɛ ekome ni haa afeɔ sɛɛsaramɔi yɛ woji tɛtrɛbii ni akɛha lɛ anɔ ji ni nine ashɛ mɛi ni baahe woji tɛtrɛbii lɛ daa nɔ. Wiemɔ kuku ni mli ka shi ni tamɔ nɛkɛ baanyɛ amɔ shi:
◼ “Miheɔ miyeɔ akɛ onya Buu-Mɔɔ ni mishi miha bo lɛ mli sane ni tsɔɔ nɔ̃ hewɔ ni esa akɛ wɔshe Nyɔŋmɔ gbeyei lɛ he. Ŋmɛnɛ, mikɛ Awake! wolo tɛtrɛɛ lɛ mli sane ko ni biɔ akɛ, ‘Mɛni Hewɔ Wala Sɛɛ Ekɛɛɛ Kwraa Nɛkɛ?’ eba. Sanebimɔ kpakpa nɛ, aloo jeee nakai?” Obaanyɛ otsa owiemɔ lɛ nɔ akɛ: “Yesu wiemɔi ni ale jogbaŋŋ yɛ Yohane 3:16 lɛ kɛ naanɔ wala he shiwoo haa. Ofainɛ hemɔ wolo tɛtrɛɛ nɛɛ, koni hiɛnɔkamɔ ni ma shi shiŋŋ ni akɛha yɛ Nyɔŋmɔ Wiemɔ lɛ mli lɛ awo bo hewalɛ.” Kɛkɛ lɛ otsɔɔ mli akɛ obaaku osɛɛ oba ni okɛ nɔ ni baanyiɛ sɛɛ aba lɛ abaha lɛ, koni ekolɛ nyɛsusu nɔ ni Nyɔŋmɔ ewo shi kɛha adesai toibolɔi lɛ ahe ekoŋŋ. Kaimɔ akɛ be fɛɛ be ni okɛ woji tɛtrɛbii lɛ aaayaha lɛ, obaanyɛ obu he akɔntaa akɛ sɛɛsaramɔ.
3 Kɛ okɛ “Jeŋ ni Ta Bɛ Mli—Mɛɛ Be?” lɛ tsu nii lɛ, obaanyɛ okɛɛ akɛ:
◼ “Te wala yɛ shikpɔŋ nɛɛ nɔ baatamɔ aha tɛŋŋ kɛ tawuu bɛ dɔŋŋ? [Ŋmɛɛ gbɛ ni ewie.] Ha matsɔɔ bo nɔ ni Nyɔŋmɔ ewo shi akɛ ebaafee.” Kanemɔ Lala 37:10, 11, ni otsɔɔ bɔ ni nibii baatamɔ aha beni afeɔ Nyɔŋmɔ suɔmɔnaa nii yɛ shikpɔŋ nɛɛ nɔ lɛ. Kaimɔ mɔ lɛ nɔ ni Yesu tsɔɔ ekaselɔi lɛ akɛ amɛsɔle yɛ he taakɛ aŋma yɛ Mateo 6:9, 10 lɛ. Ye obua lɛ ni ejwɛŋ nɔ ni Yesu wiemɔi lɛ shishinumɔ ji lɛ he. Okɛ Buu-Mɔɔ lɛ loo Awake! lɛ shɛɛ atsɔɔ lɛ, ni oto gbɛjianɔ ni oku osɛɛ oba kɛha sanegbaa lolo.
4 Kɛ oku osɛɛ oba kɛha saji ni baa ni yɔɔ wolo lɛ hiɛ lɛ eko ni ji ‘Mɛni Hewɔ Wala Sɛɛ Ekɛɛɛ Kwraa Nɛkɛ?’ lɛ hesusumɔ lolo lɛ, obaanyɛ oje shishi nɛkɛ:
◼ “Beni miba biɛ be ko lɛ, wɔwie adesa wala sɛɛkɛlɛ he. Taakɛ ŋwanejee ko bɛ he akɛ okadi yɛ Awake! lɛ mli saji ahe lɛ, hiɛnɔkamɔ fioo ko pɛ jeŋ nilelɔi kɛhaa ni baaye abua ni wɔhi shi fe afii 70 loo 80. Shi mɛni osusuɔ yɛ shiwoo ni Biblia lɛ kɛhaa lɛ he? [Ŋmɛɛ gbɛ ni ewie.] Biblia lɛ tsɔɔ akɛ Nyɔŋmɔ yɛ nɔ ko ni hi babaoo yɛ ejwɛŋmɔ mli kɛha adesa.” No sɛɛ lɛ kanemɔ Yohane 17:3, ni otsɔɔ bɔ ni nilee ni aaana lɛ baanyɛ ekɛ mɔ aya naanɔ wala mli. Kɛbashi biɛ nɛɛ lɛ, obaanyɛ obi ni ofee shia Biblia mli nikasemɔ loo oto gbɛjianɔ kɛha Biblia mli sanegbaa kroko.
5 Biblia kasemɔ shishijee ji oti ko ni he hiaa yɛ wɔsɔɔmɔ lɛ mli. Ekolɛ otee mɔ ni he woji tɛtrɛbii lɛ ŋɔɔ shii abɔ. Mɛni hewɔ okaaa gbɛ ni tamɔ nɛkɛ okwɛɛɛ kɛ otee eŋɔɔ be kroko?:
◼ “Gbɔmɛi hiɛ jwɛŋmɔi sɔrɔtoi babaoo yɛ jamɔ kɛ sɛɛnamɔ ni yɔɔ he yɛ ŋmɛnɛŋmɛnɛ shihilɛ mli lɛ he. Hemɔkɛyelii ni kɛ ehe kpaaa gbee yɛ nɔ hewɔ ni Nyɔŋmɔ eŋmɛ efɔŋ feemɔ gbɛ loo nɔ hewɔ ni wɔgbɔlɔɔ ni wɔgboiɔ lɛ yɛ. Mɛi komɛi yɛ ni baasumɔ ni amɛle bɔ ni amɛaafee amɛsɔle ni Nyɔŋmɔ abo toi.” Gbelemɔ wɔ Biblia kasemɔ he woji lɛ ekome mli kɛya sane ni osusuɔ akɛ shiatsɛ lɛ baanya he lɛ nɔ, ni ofee bɔ ni afeɔ nikasemɔ lɛ ahaa lɛ he nɔkwɛmɔ nɔ kuku.
6 Yehowa ji Nyɔŋmɔ yiŋtolɔ. Nyɛhaa wɔkasea lɛ yɛ October mli kɛtsɔ sɛɛsaramɔi ni wɔkɛ yiŋtoo aaafee nɔ.