Wo Hiɛyaa he Hewalɛ Kɛtsɔ Sɛɛsaramɔi ni Mɔɔ Shi Nɔ

¹ Ehe miihia ni wɔya nɔ wɔha mɛi ni naa wiemɔ lɛ he mii­shɛɛ lɛ mumɔŋ niyenii daa kɛtsɔ sɛɛsaramɔi ni wɔɔfee kɛtsara nɔ lɛ nɔ, koni wɔkɛye wɔbua amɛ. Wɔ saramɔi lɛ baaye abua fiofio ni wɔkɛ­ka­nya amɛ mumɔŋ dalɛ. (1 Kor. 3:​6-9) Shi, kɛ sɛɛnamɔ aaaba wɔ saramɔi lɛ ahe lɛ, no lɛ ehe miihia ni wɔtsɔ hiɛ wɔsaa wɔhe, beni nakai mɔ lɛ yɔɔ wɔjwɛŋmɔ mli lɛ.

² Mɛi ni Wɔha Amɛ Dɛhiɛmɔ Wolo lɛ Asaramɔ: Ekolɛ okɛ Toiŋ­jɔ­lɛ Jeŋ Hee dɛhiɛmɔ wolo lɛ eko ha beni otee jɛmɛ klɛŋklɛŋ lɛ.ɛ otĩ nɔ ni nyɛgba he sane lɛ mli kuku ogbe naa lɛ, obaanyɛ obi akɛ:

◼ “Mɛɛ nɔyeli baanyɛ ekɛ nɛkɛ tsakemɔi nɛɛ aba? [Ŋmɛɛ lɛ gbɛ ni ewie.] Ŋwanejee ko bɛ he akɛ bo hu obaana shihilɛi ni tamɔ nɛkɛ mli hilɛ he miishɛɛ. Mɛɛ gbɛ nɔ wɔɔtsɔ ni wɔ diɛŋtsɛ wɔna shihilɛi nɛɛ amli ŋɔɔmɔ?” No sɛɛ lɛ nyɛbaanyɛ nyɛsusu saji ni yɔɔ yitso bibioo ni ji “Bɔ ni Obaanyɛ Ona Mli Ŋɔɔmɔ” shishi lɛ ahe. Aloo yɛ no najiaŋ lɛ, obaanyɛ ogbala jwɛŋmɔ kɛya Obaanyɛ Ohi Shi Kɛya Naanɔ wolo lɛ yitso 15, ni ji “Nyɔŋmɔ Nɔyeli lɛ Shishinyo ni Oootsɔ” nɔ. Wɔbaanyɛ wɔkɛ lɛ asusu klɛŋklɛŋ kukuji enyɔ lɛ ahe, ni wɔbi akɛ: “Te esa akɛ Nyɔŋmɔ he nii ni wɔkaseɔ lɛ asa wɔhe eha tɛŋŋ?” Obaanyɛ oto gbɛjianɔ ni obasara lɛ be kroko ni oha sanebimɔ lɛ hetoo ni okɛ lɛ asusu nakai yitso lɛ he kɛtsa nɔ.

³ Kɛ wɔku wɔsɛɛ wɔtee mɛi ni wɔha amɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ eko lɛ aŋɔɔ lɛ, wɔbaanyɛ wɔkɛɛ akɛ:

◼ “Nyɛsɛɛ ni miba lɛ, wɔsusu naagbai babaoo ni adesai kɛkpeɔ lɛ kɛ nɔ ni Nyɔŋmɔ ewo shi akɛ ebaafee yɛ he lɛ he. Shi, mɛni hewɔ Nyɔŋmɔ eŋmɛ amanehulu gbɛ be kakadaŋŋ nɛkɛ? Wɔnaa hetoo ni yɔɔ miishɛɛ lɛ yɛ wolo bibioo ni wɔkwɛ lɛ fa 6.” Ha shiatsɛ lɛ ayakɔ enɔ lɛ kɛba kɛji enine baashɛ nɔ. Kɛ nyɛsusu kukuji fioo ko he nyɛgbe naa lɛ, obaanyɛ obi akɛ: “Mɛni ehe hiaa ni wɔfee ni wɔna Nyɔŋmɔ shiwooi lɛ ahe sɛɛ?” Abaanyɛ agbala jwɛŋmɔ kɛha saji ni yɔɔ fa 11 shishi, ni ji “Aato Jeŋ Hee lɛ Shishitoo he Gbɛjianɔ Bianɛ,” ni yɔɔ baafa 28-31 lɛ nɔ kɛha sanegbaa yɛ saramɔ be kroko mli.

⁴ Mɛi ni Wɔha Amɛ Woji Tɛtrɛbii lɛ Asaramɔ: Kɛji ohala sane pɔtɛɛ ko ni shiatsɛ lɛ na he miishɛɛ lɛ, no lɛ halamɔ otii krokomɛi kɛjɛ nakai sane lɛ nɔŋŋ mli ni owie he kɛ oku osɛɛ otee jɛmɛ, ni oha owiemɔi lɛ adamɔ ŋmalɛ oti kome kɛ sane ni wieɔ he lɛ nɔ. No sɛɛ lɛ nyɛbaanyɛ nyɛgba sɛɛnamɔi ni yɔɔ woji tɛtrɛbii lɛ ahe lɛ he sane. Agbɛnɛ hu, obaanyɛ ogbala jwɛŋmɔ kɛya wolo tɛtrɛɛ lɛ mli nɔ ni baanyiɛ sɛɛ lɛ nɔ kɛji sane ko yɛ mli ni wieɔ nakai saneyitso lɛ nɔŋŋ he. Aloo, wɔbaanyɛ wɔgbala jwɛŋmɔ kɛya Obaanyɛ Ohi Shi Kɛya Naanɔ wolo lɛ mli sane ni wieɔ nakai saneyitso lɛ he lɛ nɔ koni oto gbɛjianɔ ni okɛ lɛ abasusu he yɛ saramɔ be kroko mli..

⁵ Mɛi ahe miishɛɛ ni wɔɔjie lɛ kpo yɛ amɛsaramɔ mli kɛtsɔ sɛɛsaramɔi ni he baa sɛɛnamɔ nɔ lɛ baa­tsɔɔ suɔmɔ ni wɔyɔɔ kɛha gbɔmɛi lɛ kɛ Yehowa hu. (Yoh. 13:​34, 35) Eba akɛ wɔɔya nɔ wɔwo mɛi ni yɔɔ wɔshikpɔŋkuku lɛ mli lɛ amumɔŋ hiɛyaa he hewalɛ kɛtsɔ sɛɛsaramɔi ni wɔɔfee daa lɛ nɔ.