Bei Etsake
1 Biblia lɛ kɛɔ wɔ akɛ “je nɛŋ shihilɛ lɛ miitsake.” (1 Kor. 7:31, NW) Kwɛ bɔ ni eji anɔkwale ŋmɛnɛ! Yɛ wɔshihilɛ mli po lɛ, wɔnaa ni tsakemɔi etee nɔ waa diɛŋtsɛ yɛ gbɔmɛi asusumɔ kɛ amɛ jeŋba mli yɛ adesa shihilɛ fɛɛ mli. Kɛ wɔbaaye omanye yɛ Maŋtsɛyeli shɛɛsane lɛ ni wɔkɛaaya amɛŋɔɔ lɛ mli lɛ, esa akɛ wɔha gbɛ ni wɔtsɔɔ nɔ wɔkɛhaa lɛ kɛ bei ni tsakeɔ lɛ anyiɛ pɛpɛɛpɛ. Wɔmiisumɔ ni wɔkɛ sanekpakpa lɛ aha yɛ gbɛ ni baaha amɛna he miishɛɛ lɛ nɔ ni eshɛ amɛtsuii amli.
2 Yɛ afii ni eho lɛ mli yɛ shikpɔji pii anɔ lɛ, no mli lɛ odaseyeli nitsumɔ lɛ yɛ sɔrɔto, ejaakɛ bei pii lɛ, gbɔmɛi hiɔ shi kpoo diɛŋtsɛ, ni amɛyɛ shweshweeshwe. Nyɔŋmɔ jamɔ tsu gbɛfaŋnɔ ni yɔɔ krɔŋkrɔŋ yɛ amɛshihilɛi amli. No mli lɛ abuɔ Biblia lɛ waa diɛŋtsɛ. Yɛ nakai gbii lɛ amli lɛ, bei pii lɛ, odaseyeli kɔɔ tsɔɔmɔi ahe saji ni akɛ naataamɔ kpaa he mama. Ŋmɛnɛ, gbɔmɛi ashihilɛi efee basabasa. Ayeɔ Nyɔŋmɔ jamɔ he fɛo. Mɛi fioo pɛ yɔɔ Biblia lɛ mli hemɔkɛyeli. Ni yɛ mɛi pii agbɛfaŋ lɛ, sutsakemɔ he tsɔɔmɔ lɛ efite hemɔkɛyeli ni amɛyɔɔ yɛ Nyɔŋmɔ mli.
3 Nɔkwɛlɔ gbɛfalɔ ko kɛɛ: “Amrɔ nɛɛ, etamɔ nɔ ni naagbai babaoo kɛ fimɔ ebaje gbɔmɛi ashihilɛ mli aahu akɛ esa akɛ wɔtsɔɔ amɛ gbɛ ni amɛaatsɔ nɔ amɛhi shi.” Yɛ adebɔɔ su naa lɛ nɔ ni gbaa mɛi anaa amrɔ nɛɛ titri ji saji ni kɔɔ amɛhe, amɛ wekui ahe, kɛ amɛ yeyeeye feemɔi ahe. Enɛɛmɛi ji nibii ni amɛgbaa he sane titri kɛ́ amɛbua amɛhe naa. Ehe miihia ni wɔha no ahi wɔjwɛŋmɔŋ yɛ wɔ odaseyeli nitsumɔ lɛ mli.
4 Nyɔŋmɔ Maŋtsɛyeli lɛ Pɛ Ji Hiɛnɔkamɔ ni Ma Shi Shiŋŋ Kɛha Wɔsɛɛ Be: Hekɛnɔfɔɔ fioo ko pɛ mɛi babaoo yɔɔ yɛ adesai anɔyeli mli. Amɛnuɔ he akɛ hiɛnɔkamɔ ko kwraa bɛ akɛ amɛaanà jeŋ kpakpa ko yɛ amɛshihilɛ mli. Apasa jamɔ nyɛɛɛ eha amɛna hiɛnɔkamɔ ko. No hewɔ ni nɔ ni he hiaa adesai fe fɛɛ ji ni amɛbo Nyɔŋmɔ Maŋtsɛyeli lɛ he sanekpakpa lɛ toi lɛ. Tsɔɔmɔ bɔ ni yɛ naagbee lɛ ekɛ naagbai fɛɛ ni adesai kɛkpeɔ lɛ anaa tsabaa baaba.
5 Biblia lɛ Ji Gbɛtsɔɔmɔ Jɛɛhe Kome Pɛ ni Anyɛɔ Akɛ He Fɔɔ Nɔ: Hiɛnyiɛlɔi ni kɛ amɛhe fɔɔ adesai anilee kɛ jeŋ nileei anɔ lɛ elaka ŋmɛnɛŋmɛnɛ bii. Gbɔmɛi nako ale lolo akɛ “adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ.” (Yer. 10:23) Nɔ ko ni sɛɛnamɔ yɔɔ he fe fɛɛ ni amɛbaanyɛ amɛkase ji akɛ esa akɛ ‘amɛkɛ amɛhiɛ afɔ Yehowa nɔ kɛ amɛtsui fɛɛ, ni amɛkɛ amɛhe akakpasa amɛ diɛŋtsɛ amɛjwɛŋmɔ.’ (Abɛi 3:5) Yɛ be mli ni bei lɛ etsake lɛ, Biblia lɛ tsakeko. No hewɔ lɛ, esa akɛ wɔwie Nyɔŋmɔ Wiemɔ lɛ he daa yɛ wɔ shiɛmɔ nitsumɔ lɛ mli, ni wɔtsɔɔ mɛi krokomɛi ni amɛle emli gbɛtsɔɔmɔ ni jɛ mumɔŋ ni ajɛ ŋwɛi akɛha lɛ. (2 Tim. 3:16, 17) Bɔni afee ni wɔtsu nakai yiŋtoo lɛ he nii lɛ, esa akɛ wɔha mɛi lɛ ale bɔ ni Biblia lɛ he hiaa ha kɛtsɔ jwɛŋmɔ ni wɔɔgbala kɛya nɔ yɛ wɔ shiɛmɔ wiemɔi amli, ni wɔkɛha amɛ sanebimɔi lɛ ahetoo, ni wɔkɛfi bɔ ni ehe hiaa ni akase ni akɛ emli ŋaalee kpakpa lɛ atsu nii lɛ sɛɛ.
6 Yɛ bei ni tsakeɔ ŋmɛnɛ lɛ fɛɛ sɛɛ po lɛ, yiŋtoi ni wɔhiɛ yɛ shiɛmɔ nitsumɔ lɛ he lɛ yɛ nakai lolo. Esa akɛ wɔshiɛ Maŋtsɛyeli lɛ he sanekpakpa lɛ, ni wɔtswa hekɛnɔfɔɔ ni aaana yɛ Nyɔŋmɔ Wiemɔ lɛ mli lɛ wɔma shi, ni wɔye wɔbua mɛi krokomɛi ni amɛna bɔ ni ehe hiaa ni amɛkɛ wɔ aaakase Biblia lɛ. Esa akɛ nɔ ni wɔkɛɔ lɛ akɔ mɛi ni wɔyeɔ amɛ odase lɛ aŋmɛnɛŋmɛnɛ hiamɔ nii ahe. Kɛtsɔ enɛ feemɔ nɔ lɛ, wɔbaafee mɛi ni gbaa sanekpakpa lɛ he sane wɔtsɔɔ mɛi krokomɛi koni wɔnine ashɛ gbɔmɛi babaoo nɔ.—1 Kor. 9:19, 23.