Mɛi ni Egbɔlɔ lɛ Shiɛɔ ni Amɛkpaaa
1 Yɛ be mli ni mɛi gbɔlɔɔ lɛ, amɛteŋ mɛi babaoo kɛ amɛjwɛŋmɔ maa daa heloonaa nitsumɔ ni amɛtsuɔ lɛ kpamɔ nɔ koni amɛná shihilɛ ni gbɛnaa nii ko kaaa amɛnɔ lɛ mli ŋɔɔmɔ yɛ amɛ afii ni eshwɛ lɛ amli. Ekolɛ amɛbaanu he akɛ amɛtsu nii waa bɔ ni sa, ni agbɛnɛ lɛ hejɔɔmɔ he miihia amɛ. Aloo ekolɛ amɛbaasumɔ ni amɛná shihilɛ mli ŋɔɔmɔ kɛkɛ, yɛ amɛ shihilɛ be ni eshwɛ lɛ mli.—Luka 12:19.
2 Akɛ Yehowa tsuji ni ejɔɔ amɛhe nɔ lɛ, wɔkɛ wɔjwɛŋmɔ ema shihilɛ mli nɔ kroko nɔ. Wɔle akɛ akpaaa nitsumɔ yɛ Nyɔŋmɔ sɔɔmɔ nitsumɔ lɛ mli. Nɔ ni wɔkɛ wɔjwɛŋmɔ ema nɔ lɛ ja, ejaakɛ wɔyaa nɔ wɔhaa “naanɔ wala he sane hiɔ wɔjwɛŋmɔ mli.” (Yuda 21, NW) Afii babaoo ni akɛbua nilee kɛ niiashikpamɔ naa lɛ baanyɛ aha mɔ ko sɛɛyoomɔ kɛ saneshishinumɔ aya hiɛ. Enɛ baanyɛ aha mɔ lɛ ale nii babaoo ni eŋmɛ pɛpɛɛpɛ waa koni ejie hiɛsɔɔ ni mli kwɔ kpo yɛ wala he. Nɛkɛ sui nɛɛ fɛɛ he baa sɛɛnamɔ jogbaŋŋ kɛhaa mɔ lɛ akɛ sanekpakpa lɛ he sɔɔlɔ.
3 Gbɔlɛ jeee gbɔmɔtsoŋ gbɔlɛ kɛkɛ; ekɔɔ mɔ lɛ jwɛŋmɔŋ nifeemɔ hu he. Kɛ ookpa gbɛ akɛ ooohi shi be kakadaŋŋ ni obɔ mɔdɛŋ koni ohi shi akɛ obalanyo loo obalayoo yɛ gbɔmɔtsoŋ lɛ, no lɛ nyɛmɔ ni oyɔɔ akɛ oootsu enyɔ lɛ fɛɛ he nii lɛ baanyɛ aya hiɛ. Mɛi ni egbɔlɔ lɛ baanyɛ aha amɛshihilɛ aya hiɛ kɛtsɔ amɛmumɔŋ nilee ni amɛaaha eya hiɛ lɛ nɔ, kɛ enɛ he sane ni amɛaagba mɛi krokomɛi.—1 Kor. 9:23.
4 Shihilɛ Mli Nɔkwɛmɔnii Diɛŋtsɛ: Nyɛmi yoo ko ni eye afii 86 kɛɛ: “Kɛ mijwɛŋ afii 60 ni eho etee kɛjɛ beni mikase anɔkwale lɛ he lɛ, Nyɔŋmɔ shiwoo ni nɔmimaa yɔɔ mli lɛ tsuɔ nii waa yɛ mitsui mli. Hɛɛ, Yehowa ni kɛ anɔkwafoi baaye yɛ anɔkwayeli mli lɛ miiha wɔmiikpa miishɛɛ yibii babaoo.” (Lala 18:25, NW) Nyɛmi nuu ko ni egbɔ lɛ kai bɔ ni eŋa gbele bafã etsui waa ni no sɛɛ lɛ egbɔmɔtsoŋ hewalɛnamɔ nɔ bagbɔ kwraa lɛ. Ekɛɛ: “Ni kɛlɛ, kɛtsɔ Yehowa mɔbɔnalɛ ni esaaa mi lɛ nɔ lɛ, miná hewalɛ saŋŋ bɔ ni yɛ afii enyɔ sɛɛ lɛ minyɛ mikɛ mihe wo gbɛgbamɔ sɔɔmɔ lɛ mli. Kwɛ bɔ ni midaa Yehowa shi akɛ mi-gbɔmɔtsoŋ hewalɛnamɔ etee hiɛ diɛŋtsɛ yɛ shiɛmɔ nitsumɔ ni mikɛ mihe wo mli babaoo lɛ hewɔ!”
5 Kwɛ bɔ ni esa yijiemɔ akɛ mɛi babaoo ni egbɔlɔ lɛ etswa amɛfai shi akɛ amɛaaya nɔ amɛshiɛ bɔ ni amɛ hewalɛnamɔ kɛ nyɛmɔ aaaŋmɛ gbɛ—ni amɛkpaaa! Amɛyɛ yiŋtoo kpakpa ni amɛaadamɔ nɔ amɛjaje akɛ: “Nyɔŋmɔ, otsɔɔ mi nii kɛjɛ mibalahiiaŋ, ni miijaje onaakpɛɛ nitsumɔi lɛ kɛbashi ŋmɛnɛ.”—Lala 71:17.