‘Nyɛbaa Nyɛjeŋ Fɛfɛo yɛ Jeŋmajiaŋbii lɛ Ateŋ’

¹ Ale anɔkwa Kristofoi jogbaŋŋ yɛ jeŋba kpakpa ni amɛkɛtsuɔ nii yɛ shihilɛ mli saji fɛɛ mli lɛ hewɔ. Amɛhe tse yɛ gbɔmɔtsoŋ, jeŋba mli, kɛ mumɔŋ, ni fɛɛ jɛ Yehowa Nyɔŋmɔ kɛ e-Bi, Yesu Kristo ni amɛkaseɔ hewɔ. (Efe. 5:1, 2) Yɛ nakai feemɔ mli lɛ amɛtooo mɔ ko mɔ ko pãmpi, shi kɛtsɔ amɛshihilɛ gbɛ lɛ nɔ lɛ, amɛwoɔ mɛi krokomɛi hewalɛ koni amɛkase amɛ.—1 Kor. 11:1; 2 Kor. 6:3, 4.

² Nɔ ni tamɔɔɔ nakai lɛ, jeŋ ni ebɔle wɔ ŋmɛnɛ lɛ ekpɔtɔ yɛ gbɛ fɛɛ gbɛ nɔ, ni ebote jeŋba shara mli vii kɛ tsuifãa. No hewɔ lɛ akɛ Kristofoi lɛ, “akɛ wɔ efee nikwɛmɔnii aha je lɛ.” Yɛ nakai beaŋ nɔŋŋ lɛ esa akɛ wɔya nɔ wɔtso “tamɔ kanei yɛ je nɛŋ.”—1 Kor. 4:9; Fil. 2:15.

³ Gbalashihilɛ, ni ji adesa weku lɛ shishitoonii lɛ efee nibii ni Satan tutuaa waa fe fɛɛ lɛ ateŋ ekome. Éfee bɔ fɛɛ bɔ ni eeenyɛ koni ekɛfite lɛ. No hewɔ lɛ Yehowa kɛ fãmɔ haa akɛ: “Áwo gbala hiɛ nyam yɛ nyɛ fɛɛ nyɛteŋ.” (Heb. 13:4) Yehowa etsɔ emɔbɔnalɛ lɛ nɔ eye ebua ewebii koni amɛfee nakai pɛpɛɛpɛ yɛ nibii agbɛjianɔtoo fɔŋ nɛɛ naagbee gbii nɛɛ amli, ni wɔhiɛ esɔ enɛ jogbaŋŋ.

⁴ Yehowa webii ateŋ gbalashihilɛ ebafee nɔ ko ni awieɔ he ekpakpa yɛ maŋ nɛɛ mli. Enɛ bɛ naakpɛɛ akɛni Nyɔŋmɔ kɛ ŋaawoo kpakpa kɛ gbɛtsɔɔmɔi ni kɔɔ enɛ he lɛ eha wɔ lɛ hewɔ. Wɔyɛ Biblia lɛ diɛŋtsɛ. Wɔyɛ Awake! kɛ Buu-Mɔɔ mli saji ni kɔɔ gbalashihilɛ he, Oweku Shihilɛ Ni Oooha Efee Miishɛɛ wolo lɛ kɛ nyɛsɛɛ nɛɛ Nɔ Diɛŋtsɛ ni Kɛ Weku Miishɛɛ Baa wolo hee lɛ. Yɛ nyɔji ni eho nyɛsɛɛ nɛɛ lɛ amli lɛ, atee nɔ aŋmala saji hu ni kɔɔ nuu kɛ yoo teŋ jeŋba he lɛ awo Wɔ Maŋtsɛyeli Sɔɔmɔ lɛ mli. Akɛ enɛɛmɛi fɛɛ haa kɛtsɔɔ “tsulɔ anɔkwafo kɛ nilelɔ” lɛ nɔ.—Mat. 24:45-47.

⁵ Beni Anyiɛɔ Kɛtsɔɔ Gbalashihilɛ Hiɛ: Jeŋba kpakpa ni aaahiɛ mli yɛ gbalashihilɛ mli lɛ jeɔ shishi kɛtsɔɔ hiɛ kwraa, yɛ nyiɛmɔ ni tsɔɔ gbalashihilɛ hiɛ lɛ mli. Kristofoi le akɛ Biblia lɛ buɔ bɔlɛnamɔ ni tsɔɔ gbalashihilɛ hiɛ lɛ fɔ. (1 Kor. 6:9, 10) Yɛ be mli ni Biblia lɛ kpɛlɛɔ hedɔɔ wiemɔi ni he tse ni sa jogbaŋŋ ni bɔlɛnamɔ he nifeemɔi loo akɔnɔ bɛ mli lɛ nɔ lɛ, ebuɔ nyaŋemɔ nitsumɔ loo jeŋba shara ni akɛ he woɔ mli lɛ fɔ yɛ faŋŋ mli.—Rom. 16:16; Efe. 5:5; Kpoj. 22:15.

⁶ Nyaŋemɔ nitsumɔ miitsɔ̃ɔ nɔ fɛɛ nɔ ni he tseee yɛ wiemɔ loo nifeemɔ mli. Nɔ ni fata enɛ he ji mɔ kroko lɛ fufɔi lɛ ahe ni ataraa fiofio loo gbɔmɔtso lɛ hei krokomɛi ni teeɔ henumɔi ashi lɛ ahe ni ataraa fiofio koni akɛtee bɔlɛnamɔ he akɔnɔ shi, tamɔ heshwɛmɔ ni yaa nɔ yɛ nuu kɛ yoo teŋ. Kɛ aje gbɛ afee enɛ lɛ, eji nyaŋemɔ nitsumɔ, ni ebiɔ ni akɛ ŋaawoo ni mli wa aha. Kɛ afee lɛ shii abɔ lɛ ebatsɔɔ jeŋba shara. (Gal. 5:19-21) Eyɛ mli akɛ je lɛ buɔ nifeemɔi ni tamɔ nɛkɛ lɛ akɛ eyeee awui ni nɔ ko bɛ he moŋ, shi ebaanyɛ eha ashwie mɔ kɛjɛ Yehowa gbɛjianɔtoo ni he tse lɛ mli.

⁷ Beni Áyashi Agbó akɛ Abaabote Gbalashihilɛ Mli: Mɛni hewɔ ebaafee tɔ̃mɔ akɛ mɛi enyɔ ni ekpaŋ akɛ amɛbaabote gbalashihilɛ mli lɛ kɛ bɔlɛnamɔ akɔnɔ he wiemɔi aaajie hedɔɔ kpo amɛtsɔɔ lɛ? Ŋmalɛi lɛ amli he ko kwraa bɛ ni ŋmɛɔ mɛi enyɔ ni ekpaŋ akɛ amɛbaabote gbalashihilɛ mli lɛ gbɛ akɛ amɛfee amɛnii tamɔ mɛi ni ebote gbalashihilɛ mli. (Okɛto Abɛi 7:18-21 he.) Yɛ nɔ ni je lɛŋ bii feɔ loo amɛkɛɔ lɛ fɛɛ sɛɛ lɛ, Kristofoi ni ekpaŋ akɛ amɛbaabote gbalashihilɛ mli lɛ yaa nɔ amɛkwɛɔ amɛhe nɔ jogbaŋŋ kɛtsɔ shihilɛi ni haa aŋmɛɔ saji ahe akɛsaa ni amɛtsiɔ amɛhe kɛjɛɔ he lɛ nɔ. Amɛjieee amɛhiɛ yɛ amɛhe nɔ ni amɛkwɛɔ jogbaŋŋ lɛ nɔ kɛtsɔ he ko banee ni amɛaahi yɛ kar ni ma shi loo tsũ ko mli loo tsũi amli lɛ nɔ. Ehi be fɛɛ be akɛ mɔ ni eda ni gbe yi feɔ etɛ baahi jɛmɛ kɛ́ esa akɛ mɛi enyɔ lɛ akpe yɛ he ko banee. Agbɛnɛ hu, akɛni dãa nyɛɔ ehaa henaatsĩi baa shi hewɔ lɛ, kɛ́ mɛi enyɔ lɛ pɛ yɔɔ he ko lɛ, ebafeɔ jwɛŋmɔ ni ja akɛ amɛaakwɛ amɛhe nɔ jogbaŋŋ yɛ ekɛ nitsumɔ mli, kɛ́ aanu kɛ hiɛshikamɔ po.—Hosh. 4:11.

⁸ Anɔkwa Kristofoi kɛ wiemɔi ni yɔɔ 1 Tesalonikabii 4:3-6 lɛ tsuɔ nii kɛ hiɛdɔɔ. Eyɛ mli akɛ je lɛ buɔ naashɔmɔ kɛ akɔnɔ, fuamɔ, hetaramɔ, heshwɛmɔ ni yaa nɔ yɛ mɛi enyɔ ni ekpaŋ akɛ amɛbaabote gbalashihilɛ mli lɛ ateŋ lɛ akɛ ehi moŋ, shi ‘esaaa akɛ wɔnyiɛɔ mɛi pii asɛɛ kɛyafeɔ efɔŋ.’—2 Mose 23:2.

⁹ Ani Esa akɛ Atswa Kusum Naa Gbalashihilɛi Ahe Adafi?: Yɛ sane ni aŋma ni ji “Kɛha Maŋtsɛyeli Shiɛlɔi Fɛɛ” lɛ mli, ní kɔɔ kusum naa gbala kɛ ehe woji ni afeɔ, ní aŋma ahɔ March 1978 Wɔ Maŋtsɛyeli Sɔɔmɔ lɛ mli lɛ he lɛ, afee lɛ faŋŋ akɛ nɔ ni tsɔɔ gbalashihilɛ ni yɔɔ nyam yɛ Ghanabii ateŋ kɛ Nyɔŋmɔ hiɛ ji kusum naa gbalashihilɛ lɛ ni agbeɔ ehe nɔ fɛɛ nɔ feemɔ naa kɛ mɛi ni baaye kpaŋmɔ ni afeɔ lɛ he odase. No sɛɛ lɛ mla biɔ ni akɛ gbalashihilɛ ni akpaŋ yɛ he nɛɛ ayawo woji amli yɛ district council nitsumɔhei lɛ. Kɛ afee enɛ lɛ, belɛ atsu nibii ni abiɔ ni afee yɛ kusum naa, mla naa kɛ Ŋmalɛ naa lɛ agbe naa.

¹⁰ Agbɛnɛ naa shihilɛ ko: Nyɛmi nuu ko wo yinii, ni ebote gbalashihilɛ mli yɛ kusum naa yɛ he ko. Kɛkɛ ni ekɛ ŋa lɛ ba eshia koni ebafata ehe kɛhi shi diŋŋ ní mɛi ni yɔɔ asafo lɛ kɛ akutso lɛ mli lɛ leee gbalashihilɛ mli ni ábote lɛ he nɔ ko kwraa. Aloo, yɛ be mli ni kɛtsɔ nɛkɛ gbɛ nɔ lɛ agbe kusum naa gbalashihilɛ lɛ naa lɛ, amɛteŋ mɔ kome yasaraa mɔ kroko lɛ koni amɛfee ekome kɛjie amɛhiɛtserɛ akɛ nuu kɛ ŋa, kɛkɛ lɛ eku esɛɛ etee he ni ejɛ kɛba. Ani tɔ̃mɔ ko yɛ shihilɛi nɛɛ amli?

¹¹ Eji anɔkwale akɛ mɛi enyɔ lɛ ebote gbalashihilɛ mli yɛ mla naa kɛ Ŋmalɛ naa. Shi kɛlɛ, te nyɛmimɛi kɛ mɛi krokomɛi ni yɔɔ akutso lɛ mli ni leee amɛ gbalashihilɛ lɛ he nɔ ko kwraa lɛ baabu saji nɛɛ amɛha tɛŋŋ? Ani yoo ko puemɔ trukaa yɛ shia lɛ loo amɛteŋ mɔ ko saramɔi kpitiokpitio koni amɛbafee ekome kɛye jenamɔi lɛ eteeŋ sanebimɔi ashi yɛ mɛi ni kwɛɔ enɛ lɛ ajwɛŋmɔi amli, ni taakɛ eji anɔkwale hu lɛ, akɛni ale akɛ Yehowa tsuji kɛ woo tsuɔ amɛ gbalashihilɛ he nii lɛ? Sanebimɔi nɛɛ eteeŋ shi kɛ́ atswa gbalashihilɛ lɛ he adafi atsɔɔ yɛ faŋŋ mli.

¹² Nɔ kroko hu nɛ: Ni nyɛmi nuu ní miibote gbalashihilɛ mli yɛ kusum naa kɛ yiŋtoo akɛ ekɛbaawo maŋ mla shishi yɛ be kroko mli hu? Yɛ be mli ni enɛ jeee nɔ ko ni he hiaa akɛ akɛaagbe gbalashihilɛ lɛ he nitsumɔ naa lɛ, (akɛni kusum naa gbala lɛ diɛŋtsɛ egbe nɔ fɛɛ nɔ naa lɛ), mɛi komɛi tsuɔ enɛ he nii kɛfataa he. Ani tɔ̃mɔ ko yɛ he akɛ mɛi enyɔ nɛɛ aaahi hekome akɛ wu kɛ ŋa dani atsu maŋ mla nifeemɔ ni tamɔ nɛkɛ he nii? Yɛ anɔkwale mli lɛ, amɛbote gbalashihilɛ mli yɛ mla kɛ Ŋmalɛ naa. Shi sane ni abiɔ ekoŋŋ yɛ biɛ ji: Te mɛi ni kwɛɔ enɛ, ni le akɛ etsɛŋ ni abaatsu maŋ mla gbalashihilɛ lɛ he nii lɛ baabu ba ni amɛbaa koni amɛbafee ekome akɛ wu kɛ ŋa lɛ amɛha tɛŋŋ? Ani anáŋ jwɛŋmɔ ko ni tsɔɔ akɛ mɛi enyɔ lɛ kɛ amɛhe miiwo bɔlɛnamɔi amli dani amɛgbalashihilɛ lɛ ashɛ, eyɛ mli akɛ kusum naa gbala etsɔ hiɛ?

¹³ Gbalashihilɛ Hiɛ Nyam ni Awoɔ: Belɛ mɛni baafee gbɛ ni yɔɔ nyam ni aaatsɔ nɔ atsu shihilɛi ni awie he kɛtsɔ hiɛ lɛ ahe nii bɔni afee ni akatɔ̃tɔ mɔ ko nane? Bɔni afee ni ‘wɔba wɔjeŋ bɔ ni sa sanekpakpa lɛ,’ ehi akɛ wɔɔsusu nibii komɛi ahe. (Fil. 1:27) Akɛni jeŋ ni bɛ jeŋba ni buɔ bɔlɛnamɔ ni ejaaa gbɛ akɛ shihilɛ gbɛ ni nɔ ko bɛ he lɛ mli wɔyɔɔ hewɔ lɛ, wɔsumɔɔɔ ni wɔhaa mɛi susuɔ akɛ wɔkɛ nakai shishitoo nibii lɛ nɔŋŋ miitsu nii. Shi moŋ, wɔmiisumɔ ni wɔfee sɔrɔto. No hewɔ lɛ, bɔni afee ni wɔha gbalashihilɛ afee nɔ ni yɔɔ nyam yɛ Nyɔŋmɔ kɛ gbɔmɛi ahiɛ lɛ, dani gbɔmɛi ni ebote gbalashihilɛ mli yɛ kusum naa lɛ aaabafee ekome akɛ wu kɛ ŋa lɛ, ebaahi akɛ aaaha mɛi ale gbalashihilɛ lɛ yɛ gbɛ ko nɔ, kɛtsɔ adafi ni aaatswa asafo lɛ nɔ loo kɛtsɔ nanemɛi fioo ko ni aaafɔ̃ nine atsɛ amɛ kɛba koni amɛbafee ekome kɛnya nifeemɔ lɛ he lɛ nɔ, loo ni aaafee enyɔ lɛ fɛɛ. Gbalashihilɛ he maŋshiɛmɔ ni abaaha lɛ sa yɛ be ni tamɔ nɛkɛ mli.—Okɛto Mateo 25:1-10; Kpojiemɔ 19:9 he.

¹⁴ Kɛ yiŋtoo lɛ ji akɛ akɛ gbalashihilɛ lɛ baawo maŋ mla shishi yɛ kusum naa gbala lɛ sɛɛ nɔŋŋ, ni aha gbɔmɛi le yiŋtoo nɛɛ lɛ, no lɛ ani ebafeŋ nɔ ni yɔɔ nyam akɛ aaafee enɛ hu dani abafee ekome akɛ nuu kɛ ŋa bɔni afee ni akaha aná jwɛŋmɔ ni ejaaa?

¹⁵ Yɛ shikpɔji ni akɛ Maŋtsɛyeli Asai tsuuu nii yɛ nɔ akɛ hei ni akɛ gbalashihilɛi woɔ mla shishi yɛ lɛ, April 15, 1997 Buu-Mɔɔ lɛ kɛɛ yɛ baafa 24 akɛ: “Kɛ ato yookpeemɔ he wiemɔ he gbɛjianɔ yɛ maŋ mla nifeemɔ lɛ sɛɛ lɛ, ebaafee nɔ ni nilee yɔɔ mli akɛ akaha gbii pii miibakã nifeemɔi enyɔ lɛ teŋ.” Nakai nɔŋŋ yɛ bɔ ni wɔfeɔ nii wɔhaa lɛ naa lɛ, ebaafee nɔ ni nilee yɔɔ mli akɛ wɔhaŋ gbii pii akã kusum naa nifeemɔ lɛ kɛ wiemɔ ni abaaha yɛ Maŋtsɛyeli Asa lɛ nɔ lɛ teŋ. Enɛ haaa enyɛ eba lɛ akɛ aaatɔ̃tɔ mɔ ko nane yɛ mɛi enyɔ lɛ ni bafeɔ ekome akɛ wu kɛ ŋa dani ahaa mɛi baleɔ gbalashihilɛ lɛ he nɔ ko yɛ faŋŋ mli lɛ hewɔ. Shi, esa akɛ ayɔse akɛ yɛ bɔ ni wɔkɛ woo tsuɔ Maŋtsɛyeli Asa lɛ he nii hewɔ lɛ, dani onukpai lɛ baaŋmɛ gbɛ koni aha gbalashihilɛ he maŋshiɛmɔ lɛ yɛ Maŋtsɛyeli Asa lɛ nɔ yɛ kusum naa nifeemɔ lɛ sɛɛ lɛ, esa akɛ amɛkwɛ koni amɛna nɔmimaa akɛ akɛ kusum naa gbala lɛ ewo district council ni yɔɔ akutso lɛ mli lɛ mla shishi momo. Enɛ he ehiaaa, kɛ akɛ Maŋtsɛyeli Asa lɛ tsuɔ nii akɛ he ni akɛ gbalashihilɛi woɔ maŋ mla shishi yɛ, kɛ́ gbalashihilɛ he maŋshiɛmɔ lɛ ji gbalashihilɛ ni akɛwoɔ maŋ mla shishi lɛ fã.

¹⁶ Yɛ gbɛtsɔɔmɔ ni yɔɔ yiteŋgbɛ lɛ kɛ nitsumɔ naa lɛ, mɛi komɛi enyɛ amɛtsu kusum naa gbala lɛ he nii leebi ni amɛtsu maŋ mla gbala lɛ he nii kɛnyiɛ sɛɛ yɛ shwane mli yɛ Maŋtsɛyeli Asa lɛ nɔ nakai gbi lɛ nɔ nɔŋŋ. Mɛi krokomɛi enyɛ amɛtsu maŋ mla gbalashihilɛ lɛ he nii kɛnyiɛ kusum naa nifeemɔ lɛ sɛɛ yɛ Maŋtsɛyeli Asa lɛ nɔ yɛ otsi ni nyiɛɔ sɛɛ lɛ mli. Nilee yɛ mli akɛ ahaŋ be babaoo abakã nifeemɔi enyɔ lɛ teŋ.

¹⁷ Yɛ aŋkroaŋkroi ni ehi shi yɛ hekome akɛ wu kɛ ŋa yɛ kusum naa gbala lɛ sɛɛ lɛ agbɛfaŋ lɛ, kɛ́ yɛ sɛɛ mli ni amɛkpɛ amɛyiŋ akɛ amɛkɛ gbalashihilɛ lɛ baawo maŋ mla shishi lɛ, ebafeŋ nɔ ni hi akɛ amɛaafɔ gbɔi anine kɛba Maŋtsɛyeli Asa lɛ nɔ kɛha yookpeemɔ he wiemɔ tamɔ nɔ ni kpaako amɛboteɔ gbalashihilɛ mli. Amɛtsɔ hiɛ momo amɛtswa amɛ gbalashihilɛ lɛ he adafi yɛ faŋŋ mli ni amɛjie amɛhe kpo amɛtsɔɔ yɛ faŋŋ mli akɛ mɛi enyɔ ni ebote gbalashihilɛ mli. Ebaafee nɔ ni fa akɛ amɛaakãmɔ kitai lɛ ni amɛkɛ amɛwaonaa gbɛi awo mla wolo lɛ shishi.

¹⁸ Kɛ wɔtsu saji ahe nii yɛ nɛkɛ gbɛ nɔ lɛ, wɔyɛ nɔmimaa akɛ atɔ̃tɔŋ mɔ ko mɔ ko nane, ni wɔbaaya nɔ wɔhiɛ wɔjeŋba kpakpa mli yɛ jeŋmajiaŋbii lɛ ateŋ.—1 Pet. 2:12.