Biblia Mli Nikasemɔi ni Feɔ Mɛi Kaselɔi
1 Yɛ be mli ni Filipo “ejaje Yesu he sane kpakpa lɛ etsɔɔ lɛ” sɛɛ lɛ, Etiopia piafonyo lɛ bi akɛ: “Mɛni tsiɔ mibaptisimɔ gbɛ?” (Bɔf. 8:27-39) Yɛ piafonyo lɛ gbɛfaŋ lɛ, ená suɔmɔ kɛha Nyɔŋmɔ mumɔ naa niŋmaai lɛ momo, ni yɛ be mli ni enine eshɛ mumɔŋ yelikɛbuamɔ nɔ kɛjɛ Filipo ŋɔɔ sɛɛ lɛ, efee klalo akɛ ebaatsɔ kaselɔ. Shi jeee mɛi fɛɛ ji mɛi ni ená nɔmimaa akɛ ehe miihia ni amɛpɛi Ŋmalɛi lɛ amli amɛ diɛŋtsɛ.
2 Shi duromɔ naa lɛ, Yehowa gbɛjianɔtoo lɛ kɛ Taoɔ wolo bibioo lɛ eha, koni ewo mɛi ni heɔ Nyɔŋmɔ nɔ amɛyeɔ lɛ hewalɛ koni amɛpɛi Biblia mli shɛɛ sane kɛha wɔgbi nɛɛ lɛ amli. Afee wolo bibioo lɛ akɛ Biblia mli nikasemɔ wolo. Akɛ emli saji lɛ eha yɛ gbɛ ni yɔɔ mlɛo ni yɔɔ miishɛɛ hu nɔ, ni mɔ fɛɛ mɔ ní kɛ anɔkwale taoɔ nibii amli lɛ baaná he sɛɛ, ni ewoloŋlee kɔɔɔ he eko, ni ebaatsirɛ lɛ koni esumɔ ni epɛi Biblia lɛ mli.
3 Kɛ ooje Biblia mli nikasemɔ shishi lɛ, ebaaye ebua akɛ oooti gbɛtsɔɔmɔi ni hi jogbaŋŋ ni aŋma awo July 1996 Wɔ Maŋtsɛyeli Sɔɔmɔ lɛ wolo ni aŋma ahɔ mli, yɛ bɔ ni abaanyɛ akɛ Nilee wolo lɛ afee nikasemɔ ni woɔ yibii lɛ mli. Beni nikasemɔ lɛ yaa nɔ lɛ, susumɔ hiɛyaa ni nikaselɔ lɛ náa lɛ he bɔni afee ni onyɛ ole hei ni ehe miihia ni ogbala ojwɛŋmɔ kɛya nɔ lolo. Wo nikaselɔ lɛ hewalɛ koni esaa ehe yɛ enikasemɔi lɛ amli kɛtsɔ hiɛ, ni ekane emli ŋmalɛi lɛ. Ekolɛ sane hetoo ni eeeha yɛ lɛ diɛŋtsɛ ewiemɔi amli lɛ baatsɔɔ etsuiŋ hiɛsɔɔ kɛha anɔkwale lɛ. Bei pii lɛ, mɛi ni kaneɔ Asafo lɛ woji krokomɛi amɛfataa he, ni amɛyaa asafoŋ kpeei daa lɛ yaa hiɛ oyayaayai. Wo lɛ hewalɛ koni eye trukaa odase etsɔɔ mɛi krokomɛi yɛ nɔ ni ekaseɔ lɛ he. Okɛ mlihilɛ atsɔɔ lɛ nɔ ni ehe hiaa ni efee koni eya hiɛ yɛ mumɔŋ. Esaaa akɛ wɔkãa he wɔkɛ mɛi ni yiŋ feɔ amɛ kɔshikɔshi lɛ feɔ nikasemɔi daa. Esa akɛ nikaselɔi lɛ klɛŋklɛŋ aŋɔ hegbɛ lɛ koni amɛkɛkase, ni amɛkɔ shidaamɔ ni yɔɔ shiŋŋ kɛha anɔkwale lɛ, ni amɛya amɛhiɛ kɛshɛ henɔjɔɔmɔ kɛ baptisimɔ he.
4 Yɛ shiai komɛi amli lɛ, afeɔ nikasemɔ fe ekome, akɛni akɛ weku lɛ mli bii sɔrɔtoi feɔ nikasemɔi sɔrɔtoi lɛ ahewɔ. Shi kɛlɛ, ní aaafee weku nikasemɔ kutuu lɛ baahi yɛ shihilɛi babaoo amli, akɛni ebaaye ebua kɛfee weku lɛ ekome yɛ mumɔŋ lɛ hewɔ.
5 Yesu famɔ lɛ ji akɛ, wɔyafee mɛi kaselɔi. (Mat. 28:19) Kɛ wɔɔfee enɛ lɛ, esa akɛ wɔfee Biblia mli nikasemɔi ni baaye abua nikaselɔi lɛ koni amɛya hiɛ kɛshɛ he ni ekolɛ, amɛbaabi akɛ, “Mɛni tsiɔ mibaptisimɔ gbɛ?”