Weku Nikasemɔ ni Kɛ Miishɛɛ Baa

Biblia kɛɔ akɛ: “Nilee akɛhãa piaiaŋ yimɔɔ kɛ nii ni jara wa ni yɔɔ fɛo fɛɛ.” (Abɛi 24:4) Nɛkɛ nii ni jara wa nɛɛ jeee heloonaa jwetrii kɛkɛ, shi moŋ nɔ ni fata he ji anɔkwa suɔmɔ, Nyɔŋmɔ gbeyeishemɔ, kɛ hemɔkɛyeli ni mli wa. Sui ni tamɔ nɛkɛ haa weku shihilɛ yaa hiɛ jogbaŋŋ diɛŋtsɛ. (Abɛi 15:16, 17; 1 Petro 1:7) Shi kɛ wɔɔná enɛɛmɛi lɛ, ehe miihia ni wɔkɛ Nyɔŋmɔ he nilee aba wɔ shiai amli.

SƆ̃ KÃ weku yitso lɛ nɔ akɛ edũ nɛkɛ nilee nɛɛ ewo weku lɛ mli bii amli. (5 Mose 6:6, 7; Efesobii 5:25, 26; 6:4) Gbɛ̀i ni hi fe fɛɛ ni aaatsɔ nɔ afee enɛ lɛ ateŋ ekome ji kɛtsɔ daa gbi weku nikasemɔ nɔ. Kwɛ miishɛɛ ni enɛ baanyɛ afee kɛha mɛi ni kɛ amɛhe woɔ mli lɛ nɛkɛ, kɛ akwɛ nikasemɔ lɛ nɔ yɛ gbɛ ni tsɔɔ mɔ nii ni miishɛɛ yɔɔ mli lɛ! Agbɛnɛ, nyɛhaa wɔsusua nibii komɛi ni he hiaa yɛ weku nikasemɔ nɔkwɛmɔ ni mɔɔ shi lɛ mli lɛ he wɔkwɛa.a

Weku nikasemɔ mɔɔ shi jogbaŋŋ kɛ afeɔ daa. Kɛ ashi koni edamɔ gbɛjianɔtoo ko kɛkɛ nɔ loo afeɔ yɛ be mli ni atsɔɔɔ hiɛ akpɛ yiŋ yɛ he lɛ, no lɛ ekolɛ kɛ etee nɔ aahu po lɛ efeŋ nɔ ni baaya nɔ daa. No hewɔ lɛ, esa akɛ ‘ohe be lɛ’ kɛha nikasemɔ lɛ. (Efesobii 5:15-17) Ni aaahala be ni baatsa nɔ daa ni sa kɛha mɔ fɛɛ mɔ lɛ baanyɛ afee kaa. Weku yitso ko kpɛlɛ nɔ akɛ: “Wɔná weku nikasemɔ ni wɔɔfee daa lɛ he naagba. Wɔka bei sɔrɔtoi wɔkwɛ kɛyashi beni yɛ naagbee lɛ wɔná be kɛmiiya gbɛkɛnaashi fioo ni hi kɛha wɔ. Amrɔ nɛɛ wɔfeɔ wɔweku nikasemɔ lɛ daa.”

Kɛ oná be ni sa nɔŋŋ lɛ, kwɛmɔ jogbaŋŋ koni okaŋmɛ gbɛ ni nibii krokomɛi baye nikasemɔ lɛ najiaŋ. Maria,b ni amrɔ nɛɛ eye 33 lɛ kaiɔ akɛ: “Kɛ gbɔi ba be mli ni wɔmiifee nikasemɔ lɛ, Ataa haa amɛmɛɔ kɛyashiɔ beni wɔgbeɔ nikasemɔ lɛ naa. Ni yɛ tɛlifon tswaa gbɛfaŋ lɛ, ekɛɔ mɔ lɛ kuku akɛ ebaatswa lɛ yɛ sɛɛ mli.”

Shi kɛlɛ, enɛ etsɔɔɔ akɛ anyɛŋ afee tsakemɔ. Saji ni baa trukaa loo nibii ni baa ni aleee kɛtsɔ hiɛ baanyɛ aba, ni ekolɛ ehe baahia koni afo nikasemɔ lɛ mli loo ni atsi ato yɛ be kɛ bei amli. (Jajelɔ 9:11) Shi kwɛmɔ jogbaŋŋ koni okaŋmɛ gbɛ ni enɛɛmɛi ateŋ eko miifolɔ gbɛ ni otsɔɔ nɔ ofeɔ onii daa lɛ mli.—Filipibii 3:16.

Be enyiɛ esa akɛ nikasemɔ ko aye? Robert, mɔ ni etsɔse biyoo kɛ binuu yɛ omanyeyeli mli lɛ kɛɛ: “Bei pii lɛ wɔ nikasemɔi lɛ yeɔ ŋmɛlɛtswaa kome. Beni gbekɛbii lɛ darako lɛ, wɔbɔ mɔdɛŋ koni wɔha amɛ miishɛɛ lɛ ahi shi yɛ ŋmɛlɛtswaa lɛ mli kɛtsɔ nibii sɔrɔtoi ahe susumɔ nɔ, tamɔ Buu-Mɔɔ lɛ mli nikasemɔ lɛ kukuji fioo komɛi, Biblia lɛ mli saji lɛ fãi komɛi ni wɔhala, kɛ woji krokomɛi lɛ mli fãi komɛi.” Maria kaiɔ akɛ: “Beni mi kɛ minyɛmimɛi yei enyɔ lɛ ji gbekɛbii kwraa lɛ, no mli lɛ wɔ nikasemɔ lɛ yeɔ aaafee minitii 20, shii enyɔ loo etɛ yɛ otsi mli. Beni wɔdaraa lɛ, wɔ daa otsi weku nikasemɔ lɛ yeɔ ŋmɛlɛtswaa kome loo nɔ̃.”

Mɛni Esa akɛ Wɔkase?

Nɛkɛ sane nɛɛ he susumɔ beni mɔ fɛɛ mɔ naa ebakpe shi kɛha nikasemɔ lɛ kɛ nijiaŋwujee kɛ nikasemɔ be kpakpa fitemɔ baaba. Kɛ nakai ji bɔni sane lɛ ji lɛ, no lɛ gbekɛbii lɛ naŋ nɔ ko pɔtɛɛ ni amɛaakpa gbɛ ni etsɛŋ ni amɛmiishɛɛ baalaaje. No hewɔ lɛ, tsɔ hiɛ ohala Asafo lɛ woji ni abaakase lɛ ateŋ ekome.

“Tsulɔ anɔkwafo kɛ nilelɔ” lɛ kɛ woji babaoo eha ni abaanyɛ ahala emli eko. (Mateo 24:45-47) Ekolɛ obaanyɛ okɛ wolo ko ni weku lɛ ekaseko lolo lɛ atsu nii. Ni kwɛ miishɛɛ ni eji nɛkɛ akɛ aaasusu Insight on the Scriptures lɛ fãi komɛi ni ahala lɛ he kɛji nɛkɛ wolo kpoi nɛɛ yɛ nyɛ maŋ wiemɔ mli! Akɛ nɔkwɛmɔ nɔ lɛ, nyɛbaanyɛ nyɛti nikasemɔ ni kɔɔ Nuntsɔ lɛ Gbɛkɛnaashi Niyenii lɛ mli he yɛ otsii ni tsɔɔ Kaimɔ lɛ hiɛ lɛ mli. Wekui pii náa Buu-Mɔɔ Nikasemɔ ni amɛaasaa amɛhe yɛ mli kɛha otsi lɛ mli lɛ he miishɛɛ. Shi nikasemɔi krokomɛi ni yɔɔ Buu-Mɔɔ lɛ mli lɛ hu kɛ nikasemɔ ni hi jogbaŋŋ ni aaakase haa. Weku yitso lɛ, ni le weku lɛ mumɔŋ hiamɔ nii lɛ, ji mɔ ni sa jogbaŋŋ akɛ etsɔɔ wolo ni sa akɛ akase.

Maria kaiɔ akɛ: “Be fɛɛ be lɛ wɔkaseɔ wolo ko ni atsɔ hiɛ ahala. Shi kɛ sanebimɔ ko te shi loo shishilɛ ko te shi yɛ skul lɛ, no lɛ wɔtsɔɔ kɛyaa sane ni abaanyɛ akɛtsu he nii lɛ nɔ.” Naagbai krɛdɛɛ tamɔ naagbai ni gbekɛbii kɛkpeɔ yɛ skul, nyiɛmɔ ni tsɔɔ gbalashihilɛ hiɛ, skul sɛɛ nifeemɔi, kɛ ekrokomɛi ni tamɔ nakai teɔ shi. Kɛ enɛ ba lɛ, halamɔ nikasemɔi loo woji ni tsuɔ naagba ni yɔɔ lɛ he nii. Kɛ ona sane ko ni je kpo yɛ Buu-Mɔɔ loo Awake! hee ko mli ni ooosumɔ ni okɛ weku lɛ akase amrɔ nɔŋŋ lɛ, kaashashao shi akɛ oooto he gbɛjianɔ. Shi ekolɛ obaasumɔ ni, otsɔ hiɛ otswa weku lɛ mli bii lɛ adafi yɛ tsakemɔ nɛɛ he. Shi kwɛmɔ jogbaŋŋ koni oya wolo he gbɛjianɔ ni nyɛto lɛ nɔ oya nɔŋŋ kɛ otsu naagba lɛ he nii ogbe naa.

Ha Shihilɛ lɛ Afee Nɔ ni Toiŋjɔlɛ Yɔɔ Mli

Anyɛɔ akaseɔ nii jogbaŋŋ yɛ toiŋjɔlɛ shihilɛi amli. (Yakobo 3:18) No hewɔ lɛ, ha shihilɛ lɛ afee miishɛɛ, ni kɛlɛ, nɔ ni bulɛ yɔɔ mli. Weku yitso ko ni yɔɔ United States lɛ kɛɛ: “Kɛji wɔkase nii yɛ tsũ lɛ mli loo yɛ ablanaa lɛ nɔ lɛ, wɔbɔɔ mɔdɛŋ koni wɔtsi kɛbɛŋkɛ wɔhe bɔ ni sa yɛ wɔshitamɔ lɛ mli moŋ fe ni wɔɔgbɛlɛ wɔmli yɛ tsũ agbo ko mli. Enɛ teeɔ suɔmɔ henumɔi ashi kɛhaa wɔ.” Ni Maria kaiɔ enɛ kɛ miishɛɛ babaoo akɛ: “Aŋmɛɔ gbɛ koni mi kɛ minyɛmimɛi yei lɛ atsɔɔ shia lɛ mli he ni wɔbaafee otsi lɛ nikasemɔ lɛ yɛ. Enɛ haa wɔnaa miishɛɛ.” Ha ehi ojwɛŋmɔ mli akɛ kane kpakpa, shitaramɔhe he gbɛjianɔtoo kpakpa, kɛ shihilɛhei ni yɔɔ miishɛɛ ni jɛmɛ bɛ basabasa lɛ fɛɛ kɛ toiŋjɔlɛ baa. Ní oootao daaŋjiemɔ nii oha weku lɛ yɛ nikasemɔ lɛ sɛɛ lɛ hu yeɔ ebuaa ni ehaa gbɛkɛnaashi lɛ feɔ miishɛɛ nɔ.

Wekui komɛi po halaa akɛ amɛkɛ wekui krokomɛi aaafata amɛhe yɛ amɛ nikasemɔ lɛ mli yɛ bei komɛi amli, ni enɛ kɛ miishɛɛ ko kɛ saji ahetoi babaoo hu fataa he. Kɛ afɔ̃ nine atsɛ mɛi heei ni yɔɔ anɔkwale lɛ mli koni amɛbaná gbɛjianɔtoo nɛɛ mli gbɛfaŋnɔ lɛ, amɛbaaná he sɛɛ beni amɛnaa ni weku yitso ni yɔɔ niiashikpamɔ kwɛɔ weku nikasemɔ lɛ nɔ lɛ.

Ha Biblia lɛ Afee Nɔ ni Hiɛ Kã

Ha nikasemɔ bei lɛ afee nɔ ni yɔɔ miishɛɛ kɛha gbekɛbii lɛ, ni amɛkɛ ekãa baakwɛ lɛ gbɛ. Obaanyɛ ofee enɛ kɛtsɔ gbekɛbii bibii lɛ ni ooowo amɛ hewalɛ koni amɛtɛŋ Biblia shihilɛ ko he mfonirii. Kɛ eeehi lɛ ha gbekɛbii lɛ afee Biblia shihilɛ mli nɔ ko he nɔkwɛmɔ nii kɛ dramai. Kɛha gbekɛbii bibii lɛ, ehe ehiaaa ni akpɛtɛ sanebimɔ-kɛ-hetoo tridii ko he. Biblia mli gbɔmɛi ahe saji ni aaakane loo ni aaagba amɛhe saji lɛ ji miishɛɛ gbɛ ni aaatsɔ nɔ adũ Nyɔŋmɔ shishitoo mlai awo amɛmli. Robert, ni atsĩ etã mra mli lɛ kaiɔ akɛ: “Bei komɛi lɛ wɔkaneɔ Biblia mli kukuji lɛ eko, atoɔ naa, wɔkɛ ‘gbee’ sɔrɔtoi lɛ tsuɔ nii akɛ nifeemɔ ni akɛha.” Abaanyɛ abi koni gbekɛbii lɛ ahala gbɔmɛi ni amɛbaasumɔ ni amɛtsɔmɔ yɛ nikanemɔ lɛ mli.

Shikpɔŋ he nibii ahe mfonirii kɛ mfonirii ni akɛaatsu nii lɛ baaye abua gbekɛbii ni edara lɛ koni amɛfee hei kɛ nibii ni yɔɔ shikpɔŋ ni nibii ni amɛsusuɔ he lɛ ba yɛ lɛ he mfoniri yɛ amɛjwɛŋmɔ mli. Eyɛ faŋŋ akɛ, kɛ afee nibii ahe mfoniri fioo yɛ jwɛŋmɔŋ lɛ, weku nikasemɔ baanyɛ afee nɔ ni ŋɔɔ kɛ nɔ ni akɛ gbɛ̀i sɔrɔtoi tsuɔ he nii. Ni gbekɛbii lɛ baana Nyɔŋmɔ Wiemɔ lɛ he miishɛɛ.—1 Petro 2:2, 3.

Ye Obua Mɔ Fɛɛ Mɔ ni Ekɛ Ehe Awo Mli

Kɛ gbekɛbii baanya nikasemɔ lɛ he lɛ, esa akɛ amɛnu he akɛ amɛfata he hu. Shi kɛlɛ, ni aaaha gbekɛbii ni amɛye afii sɔrɔtoi lɛ kɛ amɛhe awo mli lɛ baanyɛ afee kaa. Shi Biblia shishitoo mla ko kɛɛ: “Mɔ ni yeɔ onukpa lɛ, ha ni ekɛ mɔdɛŋbɔɔ diɛŋtsɛ afee.” (Romabii 12:8, NW) Ni aaafee ekãa lɛ yeɔ ebuaa ejaakɛ ekãafeemɔ tsɛŋeɔ mɔ.

Ronald kɛ ebiyoo Dina, ni eye afii enumɔ lɛ woɔ nikasemɔ lɛ mli, kɛtsɔ saneyitsei bibii ni ehaa ekaneɔ yɛ wolo ni akaseɔ lɛ mli lɛ kɛ mfonirii ni ehaa ewieɔ he lɛ nɔ. Yɛ be mli ni Kristo gbele lɛ Kaimɔ lɛ bɛŋkɛɔ yɛ nyɛsɛɛ afi lɛ, egbala jwɛŋmɔ kɛtee mfonirii ni akɛtsɔɔ sane lɛ naa yɛ Gbɔmɔ ni Fe Mɔ Fɛɛ Mɔ ni Ehi Shi Pɛŋc wolo lɛ mli lɛ nɔ. Ekɛɛ: “Enɛ ye ebua lɛ ni enu nɔ ni nifeemɔ lɛ tsɔɔ lɛ shishi.”

Yɛ ebiyoo Misha, ni eye afii nyɔŋma lɛ gbɛfaŋ lɛ, Ronald kɛ nɔ kroko fata he. Ronald kɛɛ: “Misha etee hiɛ kɛshɛ he ni jeee akɛ ebaanyɛ enu nɔ ni mfonirii lɛ ji lɛ ashishi kɛkɛ, shi moŋ shishinumɔ ni yɔɔ sɛɛ lɛ shishi. No hewɔ lɛ, kɛ wɔmiikase Kpojiemɔ—Enaagbee Kwraa lɛ Ebɛŋkɛ!,* wolo lɛ, wɔgbalaa wɔjwɛŋmɔ kɛyaa shishinumɔ ni yɔɔ mfonirii lɛ asɛɛ lɛ nɔ, ni enɛ eye ebua lɛ.”

Yɛ be mli ni gbekɛbii daraa kɛboteɔ amɛ afii nyɔŋma-kɛ-etɛ kɛyaa lɛ, ha amɛtsɔɔ bɔ ni amɛaafee ni amɛkɛ nɔ ni amɛkaseɔ lɛ baatsu nii. Kɛ sanebimɔi te shi yɛ nikasemɔ lɛ mli lɛ, okɛha koni ayatao mli. Robert fee nakai beni ebinuu Paul ni eye afii 12 lɛ bi, skul kuu hee ko ni atse ni nɔ ni fata he ji Dungeons kɛ Dragons shwɛmɔ lɛ he sane lɛ. Paul kɛ weku lɛ mli bii krokomɛi tao saji kɛjɛ Watchtower Publications Index lɛ mli, ni amɛti enɛ mli yɛ amɛ weku nikasemɔ lɛ mli. Robert kɛɛ: “Nɔ ni jɛ mli ba ji akɛ, Paul nu shishi oya nɔŋŋ akɛ shwɛmɔ lɛ ehiii kɛha Kristofoi.”

Robert kɛ nibii amli taomɔ haa yɛ bei krokomɛi amli hu. Eŋa Nancy kaiɔ akɛ: “Beni wɔtao nibii ni kɔɔ Yesu bɔfoi lɛ ahe lɛ mli lɛ, akɛ bɔfoi lɛ ekome he nitsumɔ mlitaomɔ woɔ wɔteŋ mɔ fɛɛ mɔ dɛŋ daa otsi. Kwɛ miishɛɛ ni eji nɛkɛ akɛ aaana ni gbekɛbii lɛ kɛ saji ni amɛna lɛ miiha kɛ ekãa yɛ weku nikasemɔ lɛ shishi!” Kɛ amɛ diɛŋtsɛ amɛfee nibii amli taomɔ lɛ, ni amɛgba emli sane lɛ amɛtsɔɔ weku lɛ, eyeɔ ebuaa gbekɛbii lɛ koni ‘amɛdara yɛ Yehowa hiɛ.’—1 Samuel 2:20, 21.

Ní aaabi saji—bɔ ni asusuɔ saji ahe ahaa kɛ agbɛnɛ sanebimɔi ni yeɔ ebuaa lɛ—ji gbɛ kpakpa ko ni aaatsɔ nɔ agbala gbekɛbii lɛ awo mli. Tsɔɔlɔ Kpele, Yesu, bi saji ni baaha asusu saji ahe, tamɔ, “Te osusuɔ tɛŋŋ?” (Mateo 17:25) Maria kaiɔ akɛ: “Kɛ wɔteŋ mɔ ko bi sane ko lɛ, wɔ fɔlɔi haaa wɔ hetoo tɛ̃ɛ. Be fɛɛ be lɛ amɛbiɔ saji ni yeɔ ebuaa, ni eyeɔ ebuaa wɔ koni wɔsusu sane lɛ he.”

Nyɛgbaa Sane—Kaawo Amɛ Mlifu!

Miishɛɛ ni yɔɔ weku nikasemɔ ko mli lɛ yaa hiɛ, kɛji akɛ mɛi fɛɛ ni eba shishi lɛ baanyɛ atsɔɔ amɛjwɛŋmɔi kɛ amɛhenumɔi ni gbeyeishemɔ ko bɛ akɛ aaaye amɛhe fɛo lɛ. Shi, tsɛ ko kɛɛ: “Sanegbaa kpakpa baanyɛ ahi weku nikasemɔ lɛ mli, kɛ agbele sanegbaa gbɛ̀i lɛ anaa yɛ bei krokomɛi amli pɛ. Onyɛŋ okwa ofee tamɔ nɔ ni ogbaa sane waa yɛ nikasemɔ be lɛ pɛ mli.” Bɔ fɛɛ bɔ ni ji lɛ, kwa wiemɔi ni asusuuu he ni gbuɔ mɔ, tamɔ, ‘Ani nɔ ni obaakɛɛ lɛ fɛɛ nɛ? Misusu akɛ oyɛ nɔ kpakpa ko ni obaawie’; ‘Kwashiai awiemɔ nɛ’; ‘Ojogbaŋŋ, no hewɔ lɛ bo lɛ akakpa nɔ ko kpakpa gbɛ kɛmiijɛ odɛŋ lo? Gbekɛ kɛkɛ ji bo ni no hewɔ lɛ anyɛŋ akpa nɔ kpakpa ko gbɛ kɛjɛ odɛŋ.’ (Abɛi 12:18) Jiemɔ musuŋtsɔlɛ kɛ mɔbɔnalɛ kpo otsɔɔ obii lɛ. (Lala 103:13; Maleaki 3:17) Na amɛhe miishɛɛ, ni ofi amɛsɛɛ beni amɛbɔɔ mɔdɛŋ koni amɛtsu nɔ ni amɛkaseɔ lɛ he nii.

Esa akɛ weku nikasemɔ shihilɛ lɛ afee bɔ ni gbekɛ lɛ jwɛŋmɔ baanyɛ amɔmɔ tsɔsemɔ ni akɛhaa lɛ. Fɔlɔ ko ni eye omanye ni ehiɛ bii ejwɛ tsɔɔ mli akɛ: “Kɛ obɔi gbekɛbii lɛ tsɔsemɔ lɛ, amɛmli fuɔ yɛ gbɛ ko nɔ.” Yɛ shihilɛ ni tamɔ nɛkɛ mli lɛ, ekolɛ saji lɛ boteŋ amɛmli. No hewɔ lɛ, kaaha nikasemɔ bei lɛ fee tsɔsemɔ kɛ toigbalamɔ bei. Kɛ amɛhe miihia lɛ, tsu he nii yɛ sɛɛ mli kɛ ákɛ aŋkroaŋkro hu.

Mɔdɛŋbɔɔ lɛ He Baaba Sɛɛnamɔ

Ni aaatswa mumɔŋ weku ni yɔɔ hewalɛ ama shi lɛ biɔ be kɛ mɔdɛŋbɔɔ. Shi lalatsɛ lɛ jaje akɛ: “Naa, Yehowa gboshinii ni ehaa ji bii, ni nikeenii ji musuŋbii.” (Lala 127:3) Ni atu sɔ̃ ni ji “nyɛlɛa amɛ [gbekɛbii] yɛ Nuntsɔ [Yehowa, NW] lɛ tsɔsemɔ kɛ ŋaawoo lɛ mli” ewo fɔlɔi adɛŋ. (Efesobii 6:4) No hewɔ lɛ, yaa ohiɛ yɛ hesaa ni akɛfeɔ weku nikasemɔ ni mɔɔ shi ni yɔɔ miishɛɛ lɛ mli. Bɔɔ mɔdɛŋ fɛɛ ni ooonyɛ koni okɛ “wiemɔ lɛ mli fufɔ krɔŋŋ lɛ” aha, bɔni afee ni obii lɛ anyɛ ‘adara yɛ mli kɛna yiwalaheremɔ.’—1 Petro 2:2; Yohane 17:3.

[Shishigbɛ niŋmai]