Dɛŋdade Hee ni Baaye Abua Gbɔmɛi ni Amɛkase Nyɔŋmɔ Taomɔ Nii

“BƆNI ekɛhamɔ waaa, eyɔɔ tɛ̃ɛ, ni mlihilɛ yɔɔ mli lɛ kɛ yibiiwoo ni akpaaa gbɛ baaba. Akɛ emli saji lɛ eha yɛ gbɛ ni bɛ hwanyaŋŋ ni ŋɔɔ nɔ akɛ, ebaatsirɛ mɔ fɛɛ mɔ ni yeɔ anɔkwa ni pɛiɔ saji amli lɛ koni ekɛɛ akɛ, ‘Nyɔŋmɔ yɛ nyɛteŋ lɛlɛŋ.’ ” (1 Korintobii 14:25) Nɛkɛ ji bɔ ni Yehowa Odasefoi ni jɛ Thailand lɛ ateŋ mɔ kome wie beni etsɔɔ bɔ ni wolo hee bibioo, Mɛni Nyɔŋmɔ Taoɔ yɛ Wɔdɛŋ? lɛ ji lɛ. Buu Mɔɔ Asafo lɛ jie lɛ kpo yɛ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei ni afee yɛ 1996/97 mli lɛ shishi.

Afee wolo bibioo ni hiɛ baafai 32 kɛ emli mfonirii ni yɔɔ sui sɔrɔtoi amli lɛ akɛ gbɛjianɔtoo kɛha Biblia kasemɔ. Etsuɔ Biblia mli shishijee tsɔɔmɔi lɛ ahe nii. Emli wiemɔi lɛ yɛ mlɛo, eyaa tɛ̃ɛ, ni etsɔɔ nɔ ni Nyɔŋmɔ taoɔ yɛ wɔdɛŋ lɛ mli faŋŋ. Ewaŋ kɛhaŋ kanelɔi akɛ amɛaanu shishi. Mɛɛ gbɛ nɔ oootsɔ ni okɛ wolo hee bibioo nɛɛ afee Biblia mli nikasemɔ?

Okɛ sanebimɔi lɛ atsu nii. Sanebimɔi yɛ nikasemɔ lɛ eko fɛɛ eko shishijee. Obaana kukuji ni anaa hetooi lɛ yɛ mli lɛ ayibɔ okadii yɛ nɔ ni afo he akrabatsa yɛ sanebimɔi lɛ eko fɛɛ eko sɛɛ lɛ mli. Abaanyɛ akɛ sanebimɔi nɛɛ atsu nii akɛ nɔ ni yeɔ buaa nitsɔɔmɔ ni akɛkpaa hiɛ loo akɛtiɔ mli. Akɛ nɔkwɛmɔ nɔ lɛ, yɛ shia Biblia mli nikasemɔ shishijee mli lɛ, obaanyɛ obi nikaselɔ lɛ saji lɛ koni ole nɔ ni eyɔɔ kɛɛmɔ. Yɛ nɔ najiaŋ ni ooojaje hetooi ni ejaaa amrɔ nɔŋŋ lɛ, obaanyɛ otsa nikasemɔ lɛ nɔ. Yɛ nikasemɔ lɛ naagbee lɛ, obaanyɛ oku osɛɛ oya sanebimɔi lɛ anɔ koni okwɛ akɛ nikaselɔ lɛ nyɛɔ ehaa sanebimɔi lɛ ahetoo agbɛnɛ yɛ Biblia lɛ kɛ gbeekpamɔ naa lo.

Nyɛkanea ŋmalɛi lɛ. Akɛ ŋmalɛi ni fiɔ Biblia mli anɔkwalei kukuji asɛɛ fataa nikasemɔ lɛ eko fɛɛ eko he. Akɛni atsiɔ ŋmalɛi lɛ titri tã, shi aŋmalaaa amɛmli wiemɔi lɛ hewɔ lɛ, ehe miihia ni owo nikaselɔ lɛ hewalɛ koni etao ni ekane ŋmalɛi nɛɛ kɛjɛ lɛ diɛŋtsɛ e-Biblia lɛ mli. Ehe miihia ni ekane ni ejwɛŋ Nyɔŋmɔ Wiemɔ lɛ nɔ dani enyɛ ekɛtsu nii yɛ eshihilɛ mli.—Yoshua 1:8.

Maa mfonirii lɛ anɔ mi. Akɛ mfonirii kɛ nitɛŋmɔi efee nɔkwɛmɔ nii babaoo yɛ wolo bibioo lɛ mli—fɛɛ feɔ mfonirii kɛ nitɛŋmɔi fe 50. Jeee akɛ akɛ enɛɛmɛi wo mli koni efee hiŋmɛi lɛ fɛo kɛkɛ, shi moŋ ákɛ nɔ ni yeɔ buaa nitsɔɔmɔ hu. Akɛ nɔkwɛmɔ nɔ lɛ, naagbee nikasemɔi enyɔ (ni eko fɛɛ eko hiɛ baafa kome, ni kwɛɔ hiɛ kɛ hiɛ) lɛ yitsei ji “Mɛi Krokomɛi ni Ayeɔ Abuaa Amɛ ni Amɛfee Nyɔŋmɔ Suɔmɔnaa Nii” kɛ “Oyiŋkpɛɛ akɛ Ooosɔmɔ Nyɔŋmɔ.” Mfonirii ni yɔɔ baafai enyɔ lɛ fɛɛ tsɔɔ gbɔmɔ kome lɛ nɔŋŋ mumɔŋ nɔyaa, ni aana lɛ ni eeye odase trukaa, eená shia kɛ shia nitsumɔ lɛ mli gbɛfaŋnɔ, eejɔɔ ehe nɔ, ni yɛ naagbee lɛ aabaptisi lɛ. Kɛ ogbala nikaselɔ lɛ jwɛŋmɔ kɛtee mfonirii nɛɛ anɔ lɛ, oyeɔ obuaa lɛ koni ena nifeemɔi ni ataoɔ koni esɔmɔ Nyɔŋmɔ.

Shi kɛ mɔ ni yɔɔ wiemɔ lɛ he miishɛɛ lɛ nyɛɛɛ akane nii jogbaŋŋ loo enyɛɛɛ ekane kwraa hu? Asafo lɛ kɛ wolo hee bibioo nɛɛ miiwo audiokasɛt nɔ yɛ wiemɔi sɔrɔtoi amli. Amɔmɔ wolo hee bibioo lɛ mli wiemɔi awo kasɛt nɔ kɛ ŋmalɛi ni atsi tã lɛ babaoo. Bɔ ni eyɔɔ nɛ: Akaneɔ klɛŋklɛŋ sanebimɔ lɛ, ni nɔ ni nyiɛɔ sɛɛ ji kuku (loo kukuji) ni haa hetoo, kɛ ŋmalɛi ni atsi tã lɛ ekomɛi. Kɛkɛ lɛ akane sanebimɔ ni nyiɛ sɛɛ lɛ, kɛkɛ lɛ emli saji lɛ kɛ ŋmalɛi ni haa hetoo lɛ enyiɛ sɛɛ, yɛ nɛkɛ gbɛ nɔ kɛtee nɔ. Nikaselɔ lɛ baanyɛ abo nɔ ni amɔmɔ awo kpãa nɔ lɛ toi yɛ be mli ni esaa ehe kɛhaa nikasemɔ lɛ. Abaanyɛ akɛ kasɛt lɛ atsu nii hu yɛ be mli ni afeɔ nikasemɔ lɛ.

Mɛi ni ba kpee lɛ ahe tswa shi akɛ amɛkɛ nɛkɛ wolo hee bibioo nɛɛ aaatsu nii yɛ amɛ sɔɔmɔ nitsumɔ lɛ mli. Akɛ nɔkwɛmɔ nɔ lɛ, beni gbɛgbalɔi (be-fɛɛ sanekpakpa jajelɔi) enyɔ ko ni jɛ United States lɛ anine shɛ wolo bibioo nɛɛ nɔ yɛ gbii fioo ko sɛɛ lɛ, amɛkɛ eko ha obalanyo kɛ obalayoo ko ni hiɔ shi yɛ he kome ni amɛyaa amɛŋɔɔ lɛ. Beni hefatalɔi nɛɛ kwɛ wolo lɛ mli saji ni ato naa lɛ, nikasemɔ ni ji “Nifeemɔi ni Nyɔŋmɔ Nyɛ̃ɛɔ” lɛ gbala amɛ jwɛŋmɔ. Obalayoo lɛ kɛɛ akɛ: “Atsɔɔ mi yɛ bei fɛɛ mli akɛ Nyɔŋmɔ nyɛŋ anyɛ̃ nɔ ko—eji suɔmɔ sɔŋŋ. Enɛ ji nɔ ni makane klɛŋklɛŋ.” Beni gbɛgbalɔi enyɔ lɛ ku amɛsɛɛ otsi ni nyiɛ sɛɛ lɛ, obalayoo lɛ kɛɛ akɛ: “Miikane wolo hee bibioo lɛ. Nibii fɛɛ ni esa akɛ wɔfee lɛ wa waa. Yehowa nyaaa wɔhe—wɔboteko gbalashihilɛ mli. Shi wɔkpɛ wɔyiŋ. Wɔto gbɛjianɔ akɛ wɔbaabote gbalashihilɛ mli Sohaa ni baa lɛ.” Amɛfua gbɛgbalɔi enyɔ lɛ, ni amɛkɛfata he akɛ: “Wɔmiikpa fai akɛni wɔnyɛɛɛ wɔfee nikasemɔ lɛ be fɛɛ be lɛ hewɔ, shi jatsu ni tsii nɛɛ eje wɔnɔ.”

Bɔ fɛɛ bɔ ni fee lɛ, okɛ Taoɔ wolo hee bibioo lɛ atsu nii. Eji dɛŋdade kpakpa ni baaye abua mɛi krokomɛi ni amɛkase Nyɔŋmɔ taomɔ nii.

[Mfoniri ni yɔɔ baafa 17]

Mɛɛ gbɛ nɔ obaatsɔ ni okɛ wolo hee bibioo lɛ atsu nii?