Mɛni Obaakɛɛ Hindunyo?
1 Taakɛ ooole lɛ, Hindubii pii yɛ shikpɔji babaoo nɔ, ni maŋ nɛɛ hu fata he. Enɛ tsɔɔ akɛ etsɛŋ loo yɛ sɛɛ mli lɛ ekolɛ okɛ Hindunyo baakpe yɛ osɔɔmɔ nitsumɔ lɛ mli. Kɛ okɛ eko kpe lɛ, te obaatsu he nii oha tɛŋŋ?
2 Kaimɔ Saji Otii Nɛɛ: Maŋsɛɛ sanekpakpa shiɛlɔi ni eye omanye yɛ Hindubii ni ayeɔ amɛ odase lɛ mli lɛ kɛɔ akɛ, ehe ehiaaa ni okase Hindujamɔ he nii waa kɛya hiɛ dani oye amɛ odase ni mɔɔ shi. Bei pii lɛ, aboɔ anɔkwale lɛ shiɛmɔ wiemɔ kuku ní akɛ ŋaa tsuɔ he nii lɛ toi jogbaŋŋ. Bi koni okɛ weku yitso lɛ awie klɛŋklɛŋ. Kɛ ebo toi jogbaŋŋ lɛ, ebaafee mlɛo akɛ oooye weku mli bii krokomɛi lɛ odase. Kɛjɛ shishijee lɛ, kaatsɔɔ akɛ okɛ shɛɛ sane ko ni nɔ kwɔ fe nɔ ni shiatsɛ lɛ heɔ eyeɔ lɛ miiba loo oosumɔ ni okɛ lɛ agba anɔkwa Nyɔŋmɔ kome pɛ loo ŋmalɛi krɔŋkrɔŋi ni etsɛ fe fɛɛ lɛ he sane. Akɛni Hindubii pii buɔ Biblia lɛ akɛ Anaigbɛ wolo hewɔ lɛ, obaanyɛ oba hetsɛ̃ shi waa diɛŋtsɛ kɛtsɔ tsɔɔmɔ ni oootsɔɔ akɛ ejeee nɔ ko ni haa ayeɔ mɛi anɔ lɛ nɔ loo ejeee nɔ ko ni woɔ hewolonɔ su ko nɔ yɛ ekroko lɛ nɔ.
3 Okɛ Dɛŋdadei ni Sa lɛ Atsu Nii: Aje gbɛ afee woji bibii enyɔ aha Hindubii titri. Akala Our Problems—Who Will Help Us Solve Them? (Wɔnaagbai Lɛ—Namɔ Baaye Abua Wɔ Kɛná Amɛnaa Tsabaa?) lɛ yɛ Gujarati, Punjabi, kɛ India wiemɔi krokomɛi 11 mli. Eyɛ Blɔfo wiemɔ hu mli. Woji bibii ni ji “Naa! Miifee Nii Fɛɛ Ehee” kɛ Ani Nyɔŋmɔ Susuɔ Wɔhe Lɛlɛŋ? lɛ hu efee nɔ ni mɔɔ shi yɛ odase ni ayeɔ mɛi ni yɔɔ Hindujamɔ mli lɛ mli. Abaanyɛ akɛ Taoɔ wolo bibioo lɛ kɛ Nilee wolo lɛ afee Biblia mli nikasemɔi ni yeɔ omanye.
4 Okɛ Sane ni Kɛ Gbeekpãmɔ Baaba Atsu Nii: Ejeee nɔ ni wa akɛ akɛ sane ni kɛ gbeekpãmɔ baaba mɔ kɛ Hindubii ateŋ lɛ aaatsu nii. Amɛheɔ amɛyeɔ akɛ wɔyɛ be ko ni efɔŋ feemɔ etee hiɛ waa mli, ni ákɛ Nyɔŋmɔ baajie je lɛŋ naagbai kɛya kɛtsɔ hiɛkpatamɔ kpeteŋkpele ko ni anɔkwale be baanyiɛ sɛɛ lɛ nɔ. Obaanyɛ ona bɔ ni abaanyɛ afee koni akɛ hemɔkɛyelii nɛɛ atsá Biblia mli tsɔɔmɔi lɛ anɔ, nɔ ni kɔɔ naagbee gbii, amanehulu kpeteŋkpele lɛ, kɛ jeŋ hee ni baa lɛ he lɛ. Akɛni Hindubii pii buɔ wala shihilɛ akɛ naagbai ni nyiɛ eko sɛɛ ni anáaa amɛnaa tsabaa hewɔ lɛ, amɛyɛ weku shihilɛ, awuiyeli kɛ shweshweeshwe feemɔ, kɛ nɔ ni baa yɛ gbele mli lɛ sanegbaa he miishɛɛ waa. Naa shiɛmɔ wiemɔi ahe nɔkwɛmɔnii enyɔ ni obaanyɛ oka okwɛ.
5 Ekolɛ nuu ni yɔɔ weku lɛ baanyã enɛ he:
◼ “Miisara mɛi ni susuɔ bɔ ni weku shihilɛ yɔɔ ha yɛ shikpɔji babaoo nɔ lɛ ŋmɛnɛ. Mɛni osusuɔ akɛ ebaaye ebua koni weku lɛ ahi shi yɛ ekomefeemɔ mli? [Ŋmɛɛ gbɛ ni ewie.] Mɛi komɛi le nɔ ni Hindu ŋmalɛi lɛ kɛɔ yɛ weku shihilɛ he, shi amɛnáko hegbɛ akɛ amɛkɛ enɛ aaato nɔ ni Biblia lɛ yɔɔ kɛɛmɔ yɛ sane lɛ he lɛ he. Masumɔ ni mikɛ bo asusu sane nɛɛ ni yɔɔ Kolosebii 3:12-14 lɛ he.” Beni okane ŋmalɛ lɛ ogbe naa lɛ, okɛ Nilee wolo lɛ yitso 15 lɛ atsɔɔ shiatsɛ lɛ, ní okɛɛ akɛ: “Maná he miishɛɛ akɛ maye be fioo ko ní mikɛ bo akane saneyitso nɛɛ.”
6 Ekolɛ gbekɛ baabo enɛ toi:
◼ “Ŋwanejee ko bɛ he akɛ oheɔ Nyɔŋmɔ nɔ oyeɔ. Mɛni ji nɔ ni osusuɔ akɛ no ji yiŋtoo ni Nyɔŋmɔ yɔɔ kɛha wɔ?” Ŋmɛɛ gbɛ ni ewie. No sɛɛ lɛ, kanemɔ 1 Mose 1:28, ní okɛɛ akɛ: “Gbɔmɛi efá aahu kɛteke nɔ yɛ shikpɔŋ lɛ nɔ hei babaoo, ni naagbai sɔŋŋ yɔɔ shihilɛ mli. Ani osusuɔ akɛ Bɔlɔ lɛ baasumɔ koni eye ebua wɔ kɛná wɔnaagbai anaa tsabaa?” Beni óbo nɔ ni ekɛɔ toi ogbe naa lɛ, gbelemɔ wolo ko ni sa.
7 Ná Yibiiwoo Kpakpai Amli Miishɛɛ: Nuu Hindunyo ko ní eye afii 22 bɛŋkɛ nyɛmi yoo ko ni miiye odase yɛ jara nɔ, ni ebi koni akɛ lɛ afee Biblia mli nikasemɔ. Etsɔɔ lɛ mli akɛ yɛ afii kpaanyɔ ni eho lɛ mli lɛ, enu ni enyɛ kɛ nyɛmi yoo lɛ miigba Biblia mli sane. Eyɛ mli akɛ ená adesai anaagbai anaa tsabaai kpakpai ni atsɔɔ yɛ Biblia lɛ mli lɛ he miishɛɛ moŋ, shi enyɛ náaa sanegbaa lɛ he miishɛɛ ni no mli lɛ esusuɔ akɛ edako kwraa bɔ ni lɛ diɛŋtsɛ eeetiu anɔkwale lɛ sɛɛ. Akɛni éda amrɔ nɛɛ hewɔ lɛ, eesumɔ ni ekase babaoo. Oblanyo lɛ fiteee be kwraa. Yɛ gbii 23 pɛ mli lɛ, egbe Nilee wolo lɛ kasemɔ naa, ni beni ekɛ nyɛmi yoo lɛ kpe yɛ jara lɛ nɔ nyɔji ejwɛ pɛ sɛɛ lɛ ebi koni abaptisi lɛ!
8 Nyɛmi nuu ko kɛ nuu Hindunyo ni ekɛ lɛ kpe yɛ oketeke mli lɛ bɔi nikasemɔ. No mli lɛ nuu lɛ miiná naagbai yɛ egbalashihilɛ mli. Eyɛ dãatɔɔ hu he naagba. Nuu lɛ kpɛlɛ koni Odasefonyo lɛ aba eŋɔɔ ní ekɛ lɛ abagba ŋaawoo ni Biblia lɛ kɛhaa yɛ weku shihilɛ he lɛ he sane. Ená tsɔɔmɔi ni yɔɔ Biblia lɛ mli ni kɔɔ jeŋba he lɛ he miishɛɛ waa, ni ekpɛlɛ koni akɛ lɛ afee Biblia mli nikasemɔ. Lɛ kɛ eweku lɛ fɛɛ bɔi kpeeiyaa. Sɛɛ mli lɛ, amɛbɔi nanemɛi kɛ wekumɛi anɔkwale lɛ gbaa. Kɛbashi amrɔ nɛɛ, nɛkɛ mɛi nɛɛ ateŋ mɛi ekpaa ekpɛlɛ anɔkwale lɛ nɔ!
9 Nyɔŋmɔ suɔmɔnaa nii ji koni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) Hii kɛ yei ni kɛɔ akɛ amɛjeee Kristofoi ajamɔ mli bii, tamɔ Hindujamɔ lɛ fata he. Kɛ Hindubii yɛ nyɛshikpɔŋkuku lɛ mli lɛ, mɛni hewɔ nyɛyaaa amɛŋɔɔ amrɔ nɔŋŋ koni nyɛkɛ gbɛtsɔɔmɔi ni akɛha yɛ sane nɛɛ mli lɛ ekomɛi atsu nii?