Feemɔ Toibolɔ Kpakpa
1 Ebiɔ he tsɔsemɔ dani anyɛ abo sane toi jogbaŋŋ. Ebiɔ shwelɛ yɛ toibolɔ lɛ hu gbɛfaŋ koni ekase nii kɛjɛ nɔ ni enuɔ lɛ mli ni ehe aba sɛɛnamɔ kɛha lɛ. No hewɔ lɛ, Yesu ma nɔ mi akɛ ehe miihia ni ‘wɔkwɛ ni ahi yɛ bɔ ni wɔfeɔ wɔnuɔ lɛ hewɔ.’—Luka 8:18.
2 Enɛ kɔɔ be mli ni wɔtee asafoŋ kpeei, kpeei bibii kɛ kpeei wuji ashishi lɛ ahe titri. Bei ni esa akɛ wɔbo sane toi jogbaŋŋ lɛ nɛ. (Heb. 2:1) Naa saji otii komɛi ni baaye abua koni ofee toibolɔ kpakpa yɛ Kristofoi ahenaabuamɔi nɛɛ ashishi.
◼ Ohiɛ asɔ sɛɛnamɔ ni yɔɔ kpeei lɛ ahe lɛ. Amɛji gbɛ̀i titrii ni “Yehowa” tsɔɔ “tsulɔ nukpa anɔkwafo” lɛ nɔ ‘etsɔɔ’ wɔ ‘nii.’—Yes. 54:13; Luka 12:42.
◼ Tsɔ hiɛ osaa ohe. Kanemɔ sane ni abaasusu he lɛ mli, ni obɔ mɔdɛŋ ni okɛ o-Biblia kɛ wolo ni akaseɔ ni oyɔɔ lɛ aba.
◼ Bɔɔ mɔdɛŋ jogbaŋŋ ni ojwɛŋ nɔ ni awieɔ lɛ nɔ yɛ kpeei lɛ ashishi. Esa akɛ okwa mɛi ni tara omasɛi lɛ kɛ wiemɔ kɛ agbɛnɛ nɔ ni mɛi krokomɛi ni tara shi lɛ feɔ lɛ akwɛmɔ. Bɔɔ mɔdɛŋ ni okaha nɔ ni obaafee yɛ kpee lɛ kpamɔ sɛɛ loo bo diɛŋtsɛ osaji krokomɛi miigbala ojwɛŋmɔ.
◼ Esa akɛ opɛi nɔ ni awieɔ lɛ mli. Bi ohe akɛ: ‘Te enɛ kɔɔ mihe ehaa tɛŋŋ? Mɛɛ be mikɛbaatsu nii?’
◼ Ŋmalamɔ saji otii kɛ ŋmalɛi lɛ yɛ wolo nɔ kuku. Enɛ yeɔ ebuaa bo ni ehaa ojwɛŋmɔ hiɔ nɔ ni asusuɔ he lɛ nɔ ni ehaa okaiɔ emli saji otii lɛ koni okɛtsu nii yɛ sɛɛ mli.
3 Tsɔɔmɔ Obii lɛ Koni Amɛbo Sane Toi: Mumɔŋ tsɔsemɔ he miihia gbekɛbii. (5 Mose 31:12) Yɛ blema bei amli lɛ, ehe hiaa ni “mɛi fɛɛ ni kɛ́ amɛnu ni amɛaanu shishi lɛ” ni yɔɔ Nyɔŋmɔ webii ateŋ lɛ afee toiboo yɛ be mli ni akaneɔ Mla lɛ atsɔɔ amɛ lɛ. (Neh. 8:1-3) Kɛji akɛ fɔlɔi kɛ amɛhe wo kpeei lɛ amli ni amɛbo sane toi jogbaŋŋ lɛ, amɛbii lɛ hu baanyɛ afee nakai nɔŋŋ. Nilee bɛ mli ákɛ akɛ shwɛmɔnii loo woji ni atɛŋɔ nibii yɛ mli aaaba ni gbekɛbii lɛ kɛbashwɛ. Shãmɔhe kɛ wamɔhe yaa kpitiokpitio lɛ hu gbaa sane toi ni amɛboɔ lɛ naa. Akɛni “buulufeemɔ kpɛtɛ gbekɛ tsui he” hewɔ lɛ, esa akɛ fɔlɔi abɔ mɔdɛŋ jogbaŋŋ koni amɛkwɛ ni amɛbii lɛ atara shi diŋŋ ni amɛbo sane toi yɛ kpeei ashishi.—Abɛi 22:15.
4 Kɛ wɔfee toibolɔi kpakpai lɛ, wɔtsɔɔ akɛ wɔle nii lɛɛlɛŋ ni wɔmiisumɔ ni ‘wɔshwere yɛ nikasemɔ gbɛfaŋ.’—Abɛi 1:5.