Eba akɛ Yehowa Hiɛ Aaasɔ Okɔntaabuu Lɛ

“Mi-Nyɔŋmɔ . . . kaimɔ mi yɛ enɛ hu hewɔ . . . Mi-Nyɔŋmɔ, kaimɔ mi, ni ahi aha mi!”—NEHEMIA 13:22, 31.

1. Mɛni yeɔ buaa mɛi ni ámɛjɔɔ amɛhe nɔ amɛha Nyɔŋmɔ lɛ, koni amɛbu akɔntaa kpakpa amɛha Yehowa?

YEHOWA tsuji yɛ yelikɛbuamɔ fɛɛ ni he hiaa ni baaha amɛbu amɛhe akɔntaa kpakpa amɛha lɛ. Mɛni hewɔ? Ejaakɛ amɛkɛ Nyɔŋmɔ yɛ wekukpaa ni bɛŋkɛ kpaakpa mli ákɛ eshikpɔŋ nɔ gbɛjianɔtoo lɛ fã. Ejie eyiŋ too kpo etsɔɔ amɛ, ni étsɔ emumɔ krɔŋkrɔŋ lɛ nɔ ekɛ yelikɛbuamɔ kɛ mumɔŋ shishinumɔ eha amɛ. (Lala 51:13; 119:105; 1 Korintobii 2:10-13) Yɛ shihilɛi krɛdɛɛi nɛɛ ahesusumɔ hewɔ lɛ, Yehowa jɛɔ suɔmɔ mli etsɛɔ eshikpɔŋ nɔ tsuji lɛ ni amɛbu amɛhe akɔntaa amɛha lɛ, yɛ nɔ̃ gbɔmɛi ni amɛji, kɛ nɔ ni amɛtsuɔ yɛ ehewalɛ mli, yɛ emumɔ krɔŋkrɔŋ lɛ yelikɛbuamɔ naa lɛ he.

2. (a) Mɛɛ gbɛi anɔ Nehemia bu ehe akɔntaa kpakpa eha Nyɔŋmɔ yɛ? (b) Mɛɛ faikpamɔ Nehemia kɛgbe Biblia mli wolo ni egbɛi kã nɔ lɛ naa?

² Nuu ko ni bu ehe akɔntaa kpakpa eha Nyɔŋmɔ ji Nehemia, Persia Maŋtsɛ Artashasta (Longimano) dãawolɔ lɛ. (Nehemia 2:1) Nehemia batsɔ amralo kɛha Yudafoi lɛ, ni ekũ sɛɛ etswa Yerusalem gbogboi lɛ yɛ henyɛlɔi kɛ osharai lɛ fɛɛ sɛɛ. Akɛni eyɔɔ ekãa kɛha anɔkwa jamɔ hewɔ lɛ, eha aye Nyɔŋmɔ Mla nɔ, ni esusuɔ mɛi ni awaa amɛyi lɛ ahe. (Nehemia 5:14-19) Nehemia wo Levibii lɛ hewalɛ ni amɛtsuu amɛhe be fɛɛ be, amɛbu agbói lɛ anaa, ni amɛfee Hejɔɔmɔ gbi lɛ krɔŋkrɔŋ. No hewɔ lɛ, enyɛ esɔle akɛ: “Mi-Nyɔŋmɔ, kaimɔ mi yɛ enɛ hu hewɔ, ni obaa miyi yɛ omɔbɔnalɛ falɛ lɛ naa!” No hewɔ lɛ, Nehemia kɛ ewolo ni jɛ mumɔŋ lɛ ba naagbee yɛ gbɛ ni sa nɔ kɛ faikpamɔ nɛɛ: “Mi-Nyɔŋmɔ, kaimɔ mi, ni ahi aha mi!”—Nehemia 13:22, 31.

3. (a) Te obaatsɔɔ bɔ ni mɔ ni feɔ ejurɔ lɛ ji lɛ mli oha tɛŋŋ? (b) Mɛɛ saji Nehemia nifeemɔ gbɛ lɛ hesusumɔ baanyɛ aha wɔbi wɔ diɛŋtsɛ wɔhe?

³ Mɔ ni feɔ ekpakpa lɛ yɛ jeŋba kpakpa, ni etsuɔ jalɛ nii ni he baa sɛɛnamɔ kɛhaa mɛi krokomɛi. Nehemia ji gbɔmɔ ni tamɔ nɛkɛ. Eyɛ gbeyeishemɔ kpakpa kɛha Nyɔŋmɔ, kɛ ekãa babaoo kɛha anɔkwa jamɔ. Agbɛnɛ hu, edaa shi yɛ hegbɛi ni ena yɛ Nyɔŋmɔ sɔɔmɔ mli lɛ hewɔ, ni ebu ehe akɔntaa kpakpa eha Yehowa. Eshihilɛ gbɛ lɛ hesusumɔ baanyɛ aha wɔbi wɔ diɛŋtsɛ wɔhe akɛ, ‘Te mibuɔ hegbɛi kɛ gbɛnaa nii ni Nyɔŋmɔ kɛha mi lɛ mihaa tɛŋŋ? Mɛni akɔntaa nɛkɛ mibuɔ yɛ mihe mihaa Yehowa Nyɔŋmɔ kɛ Yesu Kristo?’

Nilee Feɔ Wɔ Mɛi ni Baabu Amɛhe Akɔntaa

4. Mɛɛ nitsumɔ Yesu kɛha esɛɛnyiɛlɔi lɛ, ni mɛni mɛi ni ‘ajie amɛ ato naanɔ wala’ lɛ fee?

⁴ Yesu kɛ nitsumɔ nɛɛ wo esɛɛnyiɛlɔi lɛ adɛŋ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ . . . , ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Abaafee kaselɔi kɛtsɔ nii ni amɛaatsɔɔ amɛ lɛ nɔ. Abaabaptisi mɛi ni atsɔɔ amɛ nii nɛkɛ, ‘ni ajie amɛ ato naanɔ wala,’ taakɛ Yesu fee lɛ. (Bɔfoi lɛ Asaji 13:48; Marko 1:9-11) Bɔ ni amɛsumɔɔ ni amɛye nibii fɛɛ ni efã amɛ lɛ nɔ lɛ baaba kɛjɛ tsui mli. Amɛbaashɛ he ni amɛbaajɔɔ amɛhe nɔ yɛ, kɛtsɔ Nyɔŋmɔ Wiemɔ lɛ mli anɔkwa nilee ni amɛaaná ni amɛkɛtsu nii lɛ nɔ.—Yohane 17:3.

5, 6. Te esa akɛ wɔnu Yakobo 4:17 shishi wɔha tɛŋŋ? Feemɔ ekɛ nitsumɔ he nɔkwɛmɔ nɔ.

⁵ Kɛ wɔ Ŋmalɛ mli nilee lɛ mli kwɔ lɛ, ehaa wɔ hemɔkɛyeli shishitoo lɛ feɔ nɔ ni hi. Yɛ nakai beaŋ nɔŋŋ lɛ, akɔntaa ni wɔbaabu wɔha Nyɔŋmɔ lɛ bafeɔ nɔ ni da. Yakobo 4:17 kɛɔ akɛ: “Mɔ ni le ekpakpa-feemɔ ni efeee lɛ, esha ji no hã lɛ.” Eyɛ faŋŋ akɛ, nɛkɛ wiemɔ nɛɛ ji nɔ ni kaselɔ Yakobo wie bianɛ yɛ he ni apupuɔ moŋ, fe ni akɛ he aaafɔ Nyɔŋmɔ nɔ kwraa he lɛ naamuu. Kɛji akɛ mɔ ko le akɛ, enyɛŋ efee nɔ ko ni sɛɛ tsɛɔ kɛ́ Yehowa yelikɛbuamɔ bɛ mli, shi efeee enii yɛ enɛ kɛ gbeekpamɔ naa hu lɛ, eji esha. Shi Yakobo wiemɔi lɛ baanyɛ akɔ nibii ni akũɔ hiɛ ashwieɔ nɔ lɛ ahe eshai hu he. Akɛ nɔkwɛmɔ nɔ lɛ, yɛ Yesu abɛbua ni kɔɔ gwantɛŋi lɛ kɛ abotiai lɛ ahe lɛ mli lɛ, abu abotiai lɛ fɔ, jeee yɛ nibii gbohii ahewɔ, shi akɛni amɛyeee amɛbuaaa Kristo nyɛmimɛi lɛ hewɔ.—Mateo 25:41-46.

⁶ Mumɔŋ nɔyaa fioo ko pɛ nuu ko ni Yehowa Odasefoi kɛ lɛ feɔ Biblia mli nikasemɔ lɛ naa, ni eyɛ faŋŋ akɛ eŋmɛɛɛ zigaret shɛremɔ he, eyɛ mli akɛ ele akɛ esa akɛ efee nakai. Onukpa ko bi lɛ ni ekane Yakobo 4:17. Beni onukpa lɛ ewie nɔ ni ŋmalɛ nɛɛ tsɔɔ lɛ he lɛ, ekɛɛ: “Eyɛ mli akɛ abaptisiko bo moŋ, shi obaabu ohe akɔntaa, ni esa akɛ oyiŋkpɛɛ lɛ he gbɛnaa nii fɛɛ akã onɔ.” Yɛ miishɛɛ mli lɛ, nuu lɛ tsu he nii, ekpa zigaret shɛremɔ, ni etsɛɛɛ ni ehe basa kɛha baptisimɔ koni ekɛfee ehenɔjɔɔmɔ kɛha Yehowa Nyɔŋmɔ lɛ he okadi.

Wɔbaabu Wɔ Sɔɔmɔ Nitsumɔ lɛ He Akɔntaa

7. Mɛni ji gbɛ kome ni wɔɔtsɔ nɔ wɔjie wɔ shidaa kɛha “Nyɔŋmɔ he nilee” lɛ kpo?

⁷ Nɔ ni esa akɛ wɔshwe yɛ wɔtsuiŋ ji ni wɔsa wɔ-Bɔlɔ lɛ hiɛ. Gbɛ kome ni wɔɔtsɔ nɔ wɔjie wɔ hiɛsɔɔ kpo yɛ “Nyɔŋmɔ he nilee” he ji ni wɔtsu nitsumɔ ni akɛfɔ wɔnɔ, ákɛ wɔfee e-Bi, Yesu Kristo he kaselɔi lɛ, he nii. Enɛ hu ji gbɛ ni wɔɔtsɔ nɔ wɔjie suɔmɔ ni wɔyɔɔ kɛha Nyɔŋmɔ kɛ wɔnaanyo lɛ kpo. (Abɛi 2:1-5; Mateo 22:35-40) Hɛɛ, Nyɔŋmɔ he nilee ni wɔyɔɔ lɛ haa wɔfeɔ mɛi ni baabu wɔhe akɔntaa wɔha lɛ, ni ehe miihia ni wɔsusu wɔnanemɛi gbɔmɛi ahe akɛ mɛi ni baanyɛ atsɔmɔ kaselɔi.

8. Mɛni hewɔ wɔbaanyɛ wɔkɛɛ akɛ Paulo nu he akɛ ebaabu esɔɔmɔ lɛ he akɔntaa eha Nyɔŋmɔ lɛ?

⁸ Bɔfo Paulo le akɛ, nɔ ni jɛɔ tsui muu fɛɛ mli ni ajɛɔ akpɛlɛɔ, ni afeɔ toiboo ahaa sanekpakpa lɛ mli baa ji yiwalaheremɔ, yɛ be mli ni ekpoomɔ baanyɛ ekɛ hiɛkpatamɔ aba. (2 Tesalonikabii 1:6-8) No hewɔ lɛ, enu akɔntaa ni ebaabu yɛ esɔɔmɔ lɛ he eha Yehowa lɛ he. Yɛ anɔkwale mli lɛ, Paulo kɛ ehefatalɔi lɛ ahiɛ sɔ amɛ sɔɔmɔ lɛ babaoo akɛ, amɛkwɛ jogbaŋŋ koni amɛkaha aana nɔ ko ni tsɔɔ akɛ amɛmiiná he sɛɛ yɛ shika gbɛfaŋ. Agbɛnɛ hu, Paulo tsui tsirɛ lɛ ni ekɛɛ: “Kɛji miijaje sanekpakpa lɛ po jiŋŋ, efeee mi shwãa; ejaakɛ aŋɔ-fi minɔ akɛ mijaje, ejaakɛ kɛji mijajeee sanekpakpa lɛ, kpoo ha mi!”—1 Korintobii 9:11-16.

9. Mɛɛ nyɔmɔ ni he hiaa esa akɛ Kristofoi fɛɛ awo?

⁹ Akɛ Yehowa tsuji ni wɔjɔɔ wɔhe nɔ lɛ, ‘aŋɔ-fi wɔnɔ akɛ wɔjaje sanekpakpa lɛ.’ Wɔ nitsumɔ ji ni wɔshiɛ Maŋtsɛyeli sane lɛ. Wɔkpɛlɛ nakai gbɛnaa nii lɛ nɔ beni wɔjɔɔ wɔhe nɔ wɔha Nyɔŋmɔ lɛ. (Okɛto Luka 9:23, 24 he.) Agbɛnɛ hu, wɔyɛ nyɔmɔ ko ni esa akɛ wɔwo. Paulo kɛɛ: “Mihiɛ Helabii kɛ jekɔ̃ji, nilelɔi kɛ mɛi ni leee nii fɛɛ nyɔmɔ. No hewɔ lɛ, kɛ ka mikome mihewɔ lɛ, miisumɔ akɛ, nyɛ mɛi ni nyɛyɔɔ Roma lɛ hu, mabajaje sanekpakpa lɛ matsɔɔ nyɛ.” (Romabii 1:14, 15) Paulo hiɛ nyɔmɔ, ejaakɛ ele akɛ eji nitsumɔ ni kã enɔ akɛ eshiɛ, koni gbɔmɛi anu sanekpakpa lɛ, ni ahere amɛyiwala. (1 Timoteo 1:12-16; 2:3, 4) No hewɔ lɛ, egbo deŋme koni ekɛtsu nitsumɔ ni kã enɔ lɛ he nii, ni ewo nyɔmɔ ni ehiɛ enanemɛi adesai lɛ. Akɛ Kristofoi lɛ, wɔ hu wɔyɛ nyɔmɔ ni tamɔ nɛkɛ ni esa akɛ wɔwo. Maŋtsɛyeli shiɛmɔ lɛ hu ji gbɛ titri ni wɔkɛaajie suɔmɔ ni wɔyɔɔ kɛha Nyɔŋmɔ, kɛha e-Bi lɛ, kɛ wɔnanemɛi lɛ kpo.—Luka 10:25-28.

10. Mɛni mɛi komɛi efee ni amɛkɛlɛɛ amɛ sɔɔmɔ lɛ mli?

¹⁰ Gbɛ kome ni wɔɔtsɔ nɔ wɔbu wɔhe akɔntaa ni nɔkpɛlɛmɔ yɔɔ mli wɔha Nyɔŋmɔ ji, ni wɔkɛ wɔnyɛmɔi atsu nii ni wɔkɛlɛɛ wɔ sɔɔmɔ lɛ mli. Kɛ wɔɔfee he nɔkwɛmɔ nɔ lɛ: Gbɔmɛi babaoo ni jɛ majianɔ kui sɔrɔtoi amli eho kɛba Britania yɛ nyɛsɛɛ afii nɛɛ amli. Bɔni afee ni akɛ sanekpakpa lɛ ayaha gbɔmɛi ni tamɔ nɛkɛ lɛ, gbɛgbalɔi (be-fɛɛ Maŋtsɛyeli shiɛlɔi) 800 kɛ Odasefoi krokomɛi ohai abɔ miikase wiemɔi sɔrɔtoi. Enɛ kɛ kanyamɔ kpakpa eba sɔɔmɔ lɛ mli. Gbɛgbalɔ ko ni miitsɔɔ Chinese klas ko nii lɛ kɛɛ akɛ: “Misusuko he dã akɛ matsɔɔ Odasefoi krokomɛi mi diɛŋtsɛ mimaŋ wiemɔ, koni amɛkɛ mɛi krokomɛi aja anɔkwale lɛ yɛ nɛkɛ gbɛ nɔ. Ehaa mɔ tsui nyɔɔ emli waa!” Ani obaanyɛ olɛɛ osɔɔmɔ lɛ mli yɛ gbɛ ni tamɔ nɛkɛ nɔ?

11. Mɛni ba beni Kristofonyo ko ye odase trukaa lɛ?

¹¹ Ebaanyɛ eba akɛ wɔteŋ mɔ fɛɛ mɔ baafee nɔ ni eeenyɛ ni ekɛhere gbɔmɔ ni miishiu yɛ nu mli lɛ yiwala. Nakai nɔŋŋ Yehowa tsuji ahe tswaa shi akɛ amɛkɛ amɛnyɛmɔi aaatsu nii, ni amɛye odase yɛ hegbɛ fɛɛ hegbɛ ni amɛaaná mli. Odasefonyo ko ta yoo ko masɛi yɛ bɔs mli ni ekɛ lɛ wie Ŋmalɛi lɛ ahe. Akɛni yoo lɛ mii shɛ ehe yɛ nɔ ni enu lɛ he hewɔ lɛ, ebibii saji babaoo. Beni Odasefonyo lɛ miihe ayi shi kɛjɛ bɔs lɛ mli lɛ, yoo lɛ kpa lɛ fai ni eba eshia, ejaakɛ eyɛ sanebimɔi babaoo. Odasefonyo lɛ kpɛlɛ nɔ. Mɛni jɛ mli ba? Ato Biblia kasemɔ shishi, ni yɛ nyɔji ekpaa sɛɛ lɛ, yoo lɛ batsɔ Maŋtsɛyeli shiɛlɔ ni abaptisiko lɛ. Etsɛɛɛ ni lɛ diɛŋtsɛ ebɔi shia Biblia mli nikasemɔi ekpaa feemɔ. Mɛɛ nyɔmɔwoo ni miishɛɛ yɔɔ mli nɛ, kɛ mɔ ko kɛ enyɛmɔ tsu nii yɛ Maŋtsɛyeli sɔɔmɔ mli lɛ!

12. Mɛɛ gbɛ wɔɔnyɛ wɔtsɔ nɔ wɔtsu wɔ nyɛmɔi akɛ sɔɔlɔi lɛ he nii yɛ gbɛ kpakpa nɔ, yɛ sɔɔmɔ nitsumɔ lɛ mli?

¹² Wɔbaanyɛ wɔtsu wɔnyɛmɔi akɛ sɔɔlɔi lɛ ahe nii yɛ gbɛ ni mɔɔ shi nɔ yɛ sɔɔmɔ nitsumɔ lɛ mli, kɛtsɔ woji ni tamɔ Nilee Ni Kɛ Mɔ Yaa Naanɔ Wala Mli ni hiɛ baafai 192 lɛ kɛ nitsumɔ nɔ. Beni shɛɔ April 1996 mli lɛ, no mli lɛ Yehowa Odasefoi a-Nɔyeli Kuu lɛ Niŋmaa Ajinafoi lɛ ekpɛlɛ nɔ akɛ afee Nilee wolo lɛ yɛ wiemɔi fe 140 mli, ni yɛ no mli lɛ, akala wolo nɛɛ ekomekomei 30,500,000 momo yɛ wiemɔi 111 mli. Aŋma wolo nɛɛ kɛ yiŋtoo akɛ, eeeye ebua Biblia kaselɔi ni amɛkase Nyɔŋmɔ Wiemɔ lɛ kɛ eyiŋtoi ahe nii babaoo, koni amɛjɔɔ amɛhe nɔ amɛha Yehowa ni abaptisi amɛ. Akɛni Maŋtsɛyeli shiɛlɔi lɛ kɛ nikaselɔ lɛ nɔŋŋ efeŋ shia Biblia mli nikasemɔ afii pii hewɔ lɛ, amɛbaanyɛ amɛkɛ mɛi pii akase nii, loo ni amɛha gbɛfaŋnɔ ni amɛnaa yɛ shia kɛ shia nitsumɔ lɛ mli, kɛ sɔɔmɔ lɛ fãi krokomɛi amli lɛ afá. (Bɔfoi lɛ Asaji 5:42; 20:20, 21) Akɛni amɛle akɛ amɛbaabu amɛhe akɔntaa amɛha Nyɔŋmɔ hewɔ lɛ, amɛgbalaa jwɛŋmɔ kɛyaa ŋwɛi kɔkɔbɔi anɔ. (Ezekiel 33:7-9) Shi, nɔ ni amɛnyãa he titri ji ni amɛkɛ woo aha Yehowa, ni amɛye amɛbua gbɔmɛi babaoo bɔ ni amɛaanyɛ, koni amɛkase sanekpakpa lɛ he nii yɛ be kukuoo ni eshwɛ kɛha yiwalɛ nibii agbɛjianɔtoo nɛɛ lɛ mli.

Akɔntaa Kpakpa ni Wɔɔbu akɛ Wekui

13. Mɛni hewɔ esa akɛ wekui ni sheɔ Nyɔŋmɔ gbeyei lɛ afee weku Biblia mli nikasemɔ daa lɛ?

¹³ Aŋkroaŋkroi fɛɛ kɛ weku ni hiɛ anɔkwa Kristojamɔ mli lɛ baabu amɛhe akɔntaa amɛha Nyɔŋmɔ, no hewɔ lɛ, esa akɛ “amɛfoŋ kɛya dalɛ mli,” ni ‘amɛdamɔ shi shiŋŋ yɛ hemɔkɛyeli lɛ mli.’ (Hebribii 6:1-3; 1 Petro 5:8, 9) Akɛ nɔkwɛmɔ nɔ lɛ, ehe miihia ni mɛi ni amɛkase Nilee wolo lɛ, ni abaptisi amɛ lɛ, aha amɛ Ŋmalɛ mli nilee lɛ aye emuu kɛtsɔ kpeei ni amɛaaya daa, kɛ agbɛnɛ Biblia lɛ kɛ Kristofoi awoji krokomɛi akanemɔ nɔ. Esa akɛ wekui ni sheɔ Nyɔŋmɔ gbeyei lɛ hu ana weku nikasemɔ ni amɛfeɔ be fɛɛ be, ejaakɛ no ji gbɛ ni he hiaa ni aaatsɔ nɔ ‘abu, adamɔ shi shiŋŋ yɛ hemɔkɛyeli lɛ mli, afee hii, ni he awa.’ (1 Korintobii 16:13) Kɛ oji weku yitso lɛ, akɔntaa krɛdɛɛ ko ni obaabu oha Nyɔŋmɔ yɛ oweku lɛ ni oookwɛ ni amɛtɔrɔ jogbaŋŋ kɛ mumɔŋ niyenii lɛ kã onɔ. Bɔ ni niyenii kpakpa haa anaa gbɔmɔtsoŋ hewalɛ lɛ, nakai nɔŋŋ mumɔŋ niyenii ni fa, ni nine shɛɔ nɔ daa he hiaa, kɛ́ bo kɛ oweku lɛ aaanyɛ ahi shi akɛ mɛi ni “he wa yɛ hemɔkɛyeli lɛ mli.”—Tito 1:13, NW.

14. Mɛni jɛ odase ni Israel gbekɛ yoo ni átsɔɔ lɛ nii jogbaŋŋ lɛ ye lɛ mli ba?

¹⁴ Kɛ gbekɛbii yɛ owe lɛ, Nyɔŋmɔ hiɛ baasɔ okɔntaabuu lɛ, yɛ mumɔŋ tsɔsemɔ kpakpa ni okɛhaa amɛ lɛ hewɔ. Nitsɔɔmɔ ni tamɔ nɛkɛ he baaba sɛɛnamɔ aha amɛ, taakɛ efee kɛha Israel gbekɛ yoo fioo ni Siriabii lɛ mɔ̃ lɛ yɛ Nyɔŋmɔ gbalɔ Elisha gbii lɛ amli lɛ. Ebatsɔ Siria asafoiatsɛ Naeman ni yeɔ kpiti lɛ ŋa lɛ tsulɔ yoo. Eyɛ mli akɛ gbekɛ yoo lɛ edako moŋ, shi ekɛɛ ewula lɛ akɛ: “Mina ni mi-nuntsɔ yaje gbalɔ ni yɔɔ Samaria lɛ ŋɔɔ kulɛ, eeetsa ekpiti nɛɛ eha lɛ kwa!” Yɛ odase ni eye lɛ hewɔ lɛ, Naeman tee Israel, ni yɛ naagbee lɛ ekpɛlɛ gbɛtsɔɔmɔ ni Elisha kɛha akɛ eyaju ehe shii kpawo yɛ Yordan Faa lɛ mli lɛ nɔ, ni atsa ekpiti lɛ. Agbɛnɛ hu, Naeman batsɔ Yehowa jálɔ. Kwɛ bɔ ni enɛ baaha nakai gbekɛ yoo fioo lɛ mii ashɛ ehe aha!—2 Maŋtsɛmɛi 5:1-3, 13-19.

15. Mɛni hewɔ ehe hiaa ni fɔlɔi kɛ mumɔŋ tsɔsemɔ kpakpa aha amɛbii lɛ? Okɛ ehe nɔkwɛmɔ nɔ aha.

¹⁵ Ebɛ mlɛo akɛ aaatsɔse gbekɛbii ni sheɔ Nyɔŋmɔ gbeyei yɛ jeŋ ni efee shwɛm yɛ jeŋba kpakpa mli, ni kã Satan hewalɛ mli nɛɛ mli. (1 Yohane 5:19) Shi, Timoteo gbekɛbiiashi enaa Loise kɛ enyɛ, Eunike jɛ amɛtsɔɔ lɛ Ŋmalɛi lɛ yɛ omanyeyeli mli. (2 Timoteo 1:5; 3:14, 15) Biblia lɛ ni okɛ obii aaakase, Kristofoi akpeei ni okɛ amɛ baaya daa, ní yɛ naagbee lɛ oha amɛfata ohe yɛ sɔɔmɔ nitsumɔ lɛ mli lɛ fɛɛ ji tsɔsemɔ gbɛjianɔtoo lɛ fã ni esa akɛ obu he akɔntaa oha Nyɔŋmɔ. Kristofonyo ko ni yɔɔ Wales, ni amrɔ nɛɛ eye afii 80 kɛyaa lɛ kaiɔ akɛ, yɛ 1920 afii lɛ shishijee mli lɛ, etsɛ ŋɔɔ lɛ efataa ehe beni enyiɛɔ kilomitai 10 kɛyaa gɔŋ ko nɔ (yaa-kɛ-baa feɔ kilomitai 20) koni eyaja Biblia he dɛhiɛmɔ woji eha kosɛɛbii ni yɔɔ jɔɔ kroko lɛ fã lɛ mli lɛ. Ekɛ shidaa kɛɔ akɛ, “nakai nyiɛmɔi lɛ amli mi-tsɛ kɛ-dũ anɔkwale lɛ yɛ mitsui mli.”

Onukpai Buɔ Akɔntaa—Yɛ Mɛɛ Gbɛ Nɔ?

16, 17. (a) Mɛɛ hegbɛi onukpai ni amɛdara yɛ mumɔŋ lɛ ná mli ŋɔɔmɔ yɛ blema Israel? (b) Kɛ akɛ shihilɛ ni yɔɔ blema Israel lɛ to he lɛ, mɛni hewɔ ataoɔ babaoo kɛjɛɔ Kristofoi onukpai adɛŋ ŋmɛnɛ lɛ?

¹⁶ Nuu nilelɔ Salomo kɛɛ akɛ: “Waŋ lɛ, anunyam akekre ni, kɛ ana lɛ yɛ jalɛ gbɛ nɔ lɛ.” (Abɛi 16:31) Shi jeee gbɔmɔtsoŋ afii kɛkɛ wulaa mɔ ko kɛhaa gbɛnaa nii yɛ Nyɔŋmɔ webii asafo lɛ mli. Hii onukpai ni amɛdara yɛ mumɔŋ yɛ blema Israel lɛ sɔmɔ akɛ kojolɔi kɛ nɔkwɛlɔi kɛha jalɛ saneyeli he nitsumɔ kɛ toiŋjɔlɛ, gbɛjianɔtoo kpakpa, kɛ mumɔŋ hewalɛnamɔ ni amɛaakwɛ ni ehi shi. (5 Mose 16:18-20) Eyɛ mli akɛ nakai nɔŋŋ eji anɔkwale yɛ Kristofoi asafo lɛ he moŋ, shi aatao babaoo kɛmiijɛ onukpai lɛ adɛŋ, yɛ be mli ni nibii agbɛjianɔtoo nɛɛ naagbee bɛŋkɛɔ lɛ. Mɛni hewɔ?

¹⁷ Israelbii lɛ ji ‘gbɔmɛi ni ahala amɛ’ ni Nyɔŋmɔ kpɔ̃ amɛ kɛjɛ blema Mizraim. Akɛni amɛnine shɛ Mla lɛ nɔ kɛtsɔ amɛ teŋdamɔlɔ ni ji Mose hewɔ lɛ, afɔ́ amɛ seshibii lɛ awo maŋ ni ejɔɔ ehe nɔ mli, ni amɛle Yehowa akpɔi. (5 Mose 7:6, 11) Shi, afɔɔɔ mɔ ko awooo maŋ ni ejɔɔ ehe nɔ tamɔ nɛkɛ mli ŋmɛnɛ, ni kɛ akɛaato he lɛ, gbɔmɛi fioo ko pɛ daraa yɛ wekui ni sheɔ Nyɔŋmɔ gbeyei, ni le Ŋmalɛ mli anɔkwale lɛ jogbaŋŋ lɛ amli. Mɛi ni kpaako amɛje shishi ‘amɛnyiɛɔ yɛ anɔkwale lɛ mli’ lɛ titri ji mɛi ni tsɔsemɔ yɛ bɔ ni amɛaafee amɛhi shi yɛ Ŋmalɛ naa shishitoo mlai amli lɛ he hiaa amɛ. (3 Yohane 4) Belɛ kwɛ gbɛnaa nii ni jwere onukpai anɔkwafoi lɛ akɔŋ nɔ, yɛ be mli ni ‘amɛhiɛɔ tsamɔ wiemɔi lɛ akadi lɛ mli,’ ni amɛyeɔ amɛbuaa Yehowa webii lɛ.—2 Timoteo 1:13, 14.

18. Mɛɛ yelikɛbuamɔ esa akɛ asafoŋ onukpai asaa amɛhe akɛ amɛkɛaaha, ni mɛni hewɔ?

¹⁸ Gbekɛ fioo ni miikase nyiɛmɔ baanyɛ atɛ ni egbee shi. Enuɔ he akɛ ebɛ shweshweeshwe, ni fɔlɔi ayelikɛbuamɔ kɛ nɔmimaa he miihia lɛ. Mɔ ni ejɔɔ ehe nɔ eha Yehowa lɛ hu baanyɛ atɛ loo egbee shi yɛ mumɔŋ. Bɔfo Paulo po na akɛ ehe miihia ni epele koni enyɛ efee nɔ ni ja loo ekpakpa yɛ Nyɔŋmɔ hiɛ. (Romabii 7:21-25) Ehe miihia ni Nyɔŋmɔ tooku lɛ nɔkwɛlɔi lɛ kɛ yelikɛbuamɔ ni suɔmɔ yɔɔ mli aha Kristofoi ni ámɛtɔ̃, shi amɛshwa amɛhe lɛlɛŋ lɛ. Beni onukpai yasara yoo ko ni ejɔɔ ehe nɔ, ni étɔ̃ tɔ̃mɔ ko ni hiɛdɔɔ yɔɔ mli lɛ, ewie yɛ ewu ni ejɔɔ ehe nɔ lɛ hiɛ akɛ: “Mile akɛ nyɛbaa shwie mi kɛjɛ asafo lɛ mli!” Shi ebɔ̃i yaafo beni akɛɛ lɛ akɛ, onukpai lɛ miisumɔ ni amɛle nɔ̃ yelikɛbuamɔ ni he hiaa koni amɛkɛtswa weku lɛ amɛma shi yɛ mumɔŋ lɛ. Akɛni amɛle akɛ esa akɛ amɛbu akɔntaa hewɔ lɛ, onukpai lɛ ná he miishɛɛ akɛ amɛaaye amɛbua naanyo heyelilɔ ni eshwa ehe lɛ.—Hebribii 13:17.

Nyɛyaa nɔ Nyɛbua Akɔntaa Kpakpa

19. Te wɔɔfee tɛŋŋ wɔya nɔ wɔbu wɔhe akɔntaa kpakpa wɔha Nyɔŋmɔ?

¹⁹ Ehe miihia ni asafoŋ onukpai kɛ Nyɔŋmɔ tsuji krokomɛi fɛɛ aya nɔ abu amɛhe akɔntaa kpakpa amɛha Yehowa. Wɔbaanyɛ wɔfee enɛ kɛ wɔkɛ wɔhe kpɛtɛ Nyɔŋmɔ Wiemɔ lɛ he ni wɔfee esuɔmɔnaa nii. (Abɛi 3:5, 6; Romabii 12:1, 2, 9) Wɔmiisumɔ ni wɔfee mɛi ni kɛ wɔ yɔɔ hemɔkɛyeli lɛ mli lɛ titri ejurɔ. (Galatabii 6:10) Shi kɛlɛ, nikpamɔ lɛ fa lolo, ni nitsulɔi lɛ ayi faaa lolo. (Mateo 9:37, 38) No hewɔ lɛ, nyɛhaa wɔfea mɛi krokomɛi ejurɔ, kɛtsɔ Maŋtsɛyeli shɛɛ sane lɛ ni wɔɔkã he wɔjaje lɛ nɔ. Yehowa hiɛ baasɔ wɔ akɔntaabuu lɛ akɛ eji ekpakpa, kɛ wɔtsũ wɔ henɔjɔɔmɔ akɛ wɔfee esuɔmɔnaa nii lɛ he nii, ni wɔkɛ anɔkwayeli jaje sanekpakpa lɛ.

20. Mɛni wɔkaseɔ kɛjɛɔ Nehemia shihilɛ gbɛ lɛ hesusumɔ mli?

²⁰ No hewɔ lɛ, nyɛhaa wɔyaa nɔ wɔfea babaoo yɛ Nuntsɔ lɛ nitsumɔ lɛ mli. (1 Korintobii 15:58) Ni, wɔɔfee jogbaŋŋ akɛ wɔɔsusu Nehemia, ni kũ sɛɛ etswa Yerusalem gbogboi lɛ ekoŋŋ, ni ekwɛ koni aye Nyɔŋmɔ Mla lɛ nɔ, ni ekɛ ekãa ha anɔkwa jamɔ shwere lɛ he. Esɔle akɛ Yehowa Nyɔŋmɔ akai lɛ yɛ ekpakpa ni efee lɛ hewɔ. Eba akɛ ooofee mɔ ni etu ehe eha Yehowa, ni eba akɛ ehiɛ aaasɔ okɔntaabuu lɛ.

Mɛni Ji Ohetooi?

◻ Mɛɛ nɔkwɛmɔ nɔ Nehemia fee efɔ shi?

◻ Mɛni hewɔ nilee feɔ wɔ mɛi ni baabu akɔntaa amɛha Nyɔŋmɔ lɛ?

◻ Te wɔɔfee tɛŋŋ wɔbu akɔntaa ni akpɛlɛɔ nɔ wɔha Yehowa yɛ wɔ sɔɔmɔ lɛ mli?

◻ Mɛni wekui baanyɛ afee ni amɛbu akɔntaa kpakpa amɛha Nyɔŋmɔ?

◻ Kristofoi onukpai buɔ akɔntaa yɛ mɛɛ gbɛ nɔ?

[Mfonirii ni yɔɔ baafa 18]

Taakɛ Paulo ji lɛ, wɔbaanyɛ wɔbu akɔntaa kpakpa wɔha Nyɔŋmɔ akɛ Maŋtsɛyeli jajelɔi

[Mfoniri ni yɔɔ baafa 19]

Ani obii lɛ ahemɔkɛyeli wa tamɔ Israel gbekɛ yoo fioo ni yɔɔ Naeman we lɛ nɔ̃ lɛ?