Ani Okɛ Taoɔ Wolo Bibioo lɛ Miitsu Nii Kɛmiije Nikasemɔi Ashishi?
1 Ani ole akɛ kɛ́ okɛ mɔ ko ni yɔɔ wiemɔ lɛ he miishɛɛ gbaa Biblia mli sane daa ni sanegbaa lɛ tsaraa nɔ, eyɛ mli akɛ yɛ be kuku mli, ni nyɛgba sane kɛjɛ woji ni ajie yi lɛ eko mli lɛ, belɛ oofee Biblia mli nikasemɔ? Hɛɛ, enɛ ji anɔkwale kɛji afee nikasemɔ lɛ po yɛ shia mli loo yɛ tɛlifoŋ nɔ. Mɛni hewɔ obɔɔɔ mɔdɛŋ krɛdɛɛ ko yɛ May kɛ June mli koni okɛ Taoɔ wolo bibioo lɛ atsu nii kɛje nakai nikasemɔ lɛ shishi lɛ?
2 Saamɔ Ohe Bɔni Afee ni Oye Omanye: Kɛ́ okɛ Taoɔ wolo bibioo lɛ miiha lɛ, ha nɔ ni otaoɔ ni ogba he sane lɛ afee faŋŋ yɛ ojwɛŋmɔ mli. Kɛ́ oofee sɛɛsaramɔ lɛ, susumɔ sane ni nyɛgba beni otee jɛmɛ klɛŋklɛŋ lɛ he. Bi ohe akɛ: ‘Wolo bibioo lɛ mli mɛɛ kukuji manyɛ magbala jwɛŋmɔ krɛdɛɛ kɛba nɔ koni mawie sane lɛ he jogbaŋŋ ni etsɔ Biblia mli nikasemɔ?’ Kɛ́ ooya shia kɛ shia lɛ, susumɔ saji ni mɔ ni eye afii nyɔŋma kɛ etɛ kɛyaa, mɔ ni eda, nuu, loo yoo baaná he miishɛɛ lɛ he. Tĩi saji titrii ni yɔɔ wolo bibioo lɛ mli lɛ mli, ni ohala saneyitsei ni amɛbaanya he. Yɛ be mli ni osusu gbɛ ni oootsɔ nɔ owie lɛ he sɛɛ lɛ, kasemɔ shii abɔ. Enɛ ji nibii ni kɛ omanyeyeli baa lɛ ateŋ ekome.
3 Nɔ ni aŋma ahɔ January 2002 Wɔ Maŋtsɛyeli Sɔɔmɔ lɛ mli lɛ kɛ “Gbɛtsɔɔmɔi ni Aaatsɔ nɔ akɛ Taoɔ Wolo Bibioo lɛ Aha” lɛ kpaanyɔ haa. Akrabatsa ni ji “Gbɛ ni Yɔɔ Tɛ̃ɛ Lɛ” tsɔɔ bɔ ni aaafee ni akɛ wolo bibioo lɛ atsu nii ni akɛje nikasemɔi ashishi. Ekolɛ obaasumɔ ni oka klɛŋklɛŋ ŋaawoo ni nyiɛ sɛɛ nɛɛ okwɛ:
◼ “Ani ole akɛ obaanyɛ oná hetoo oha Biblia mli sanebimɔ ko ni he hiaa waa yɛ minitii fioo komɛi amli? Ákɛ nɔkwɛmɔnɔ lɛ, mɛni hewɔ jamɔi babaoo ní kɛɔ akɛ Kristofoi ji amɛ lɛ yɔɔ lɛ? Ani osusu enɛ he pɛŋ?” Beni mɔ lɛ eha hetoo sɛɛ lɛ, gbelemɔ kɛya nikasemɔ 13 lɛ ni nyɛsusu klɛŋklɛŋ kukuji enyɔ lɛ he. Kɛ́ be yɛ lɛ, nyɛkanea ŋmalɛ kome loo enyɔ ni nyɛsusua he. No sɛɛ lɛ, kanemɔ naagbee sanebimɔ ni yɔɔ baafa lɛ ŋwɛigbɛ lɛ, ni okɛɛ akɛ: “Nikasemɔ ni eshwɛ lɛ maa anɔkwa jamɔ kadimɔ nii enumɔ nɔ mi. Maná he miishɛɛ akɛ maku misɛɛ maba ni mikɛ bo abasusu enɛɛmɛi ahe.”
4 Kã He: Okɛ hegbɛ fɛɛ hegbɛ ni obaaná lɛ atsu nii ni okɛfee bɔ ni afeɔ Biblia mli nikasemɔ yɛ Taoɔ wolo bibioo lɛ mli lɛ he nɔkwɛmɔnɔ. Bi Yehowa dɛŋ jɔɔmɔ. (Mat. 21:22) Kɛ́ okã he yɛ omɔdɛŋbɔi lɛ amli lɛ, obaaná miishɛɛ ni yɔɔ mɔ ko ni oooye obua lɛ koni ehere sanekpakpa lɛ nɔ lɛ mli ŋɔɔmɔ!