Ani Obaanyɛ Okɛ Oshia Aha?

¹ Yɛ klɛŋklɛŋ afii 100 lɛ mli lɛ, Kristofoi babaoo kɛ amɛshiai ha koni akɛfee asafoŋ kpeei. (1 Kor. 16:19; Kol. 4:15; File. 1, 2) Yɛ asafoi komɛi amli ŋmɛnɛ lɛ, abɛ hei ni fa bɔ ni sa kɛha Asafo Woloŋ Nikasemɔ kui kɛ hei ni akpeɔ yɛ kɛha shiɛmɔyaa. Nɔ ni baanyɛ ajɛ enɛ mli aba ji akɛ, mɛi 30 loo nɔ ni fa fe nakai baahi woloŋ nikasemɔ kui lɛ ekomɛi amli, nɔ ni fa kwraa fe yibɔ ni ajie yi ni ji mɛi aaafee 15 lɛ.

² Hegbɛ Fɛfɛo Ko: Ani osusu oshia ni okɛaaha koni akɛfee Asafo Woloŋ Nikasemɔ lɛ he? Tsũ ni da bɔ ni sa ni mli tse, ni emli kane kpɛ́ɔ jogbaŋŋ, ni kɔɔyɔɔ yaa mli bɔ ni sa lɛ ji nɔ ni hi kɛha yiŋtoo nɛɛ. Akɛni woloŋ nikasemɔ lɛ ji asafoŋ kpee kɛ gbɛjianɔ ni Yehowa eto lɛ fã ko ni ekɛtsɔseɔ ewebii lɛ hewɔ lɛ, woloŋ nikasemɔhe ni aaafee yɛ oshia lɛ ji hegbɛ fɛfɛo. Mɛi babaoo ebɔ amaniɛ akɛ amɛná mumɔŋ sɛɛnamɔi babaoo kɛtsɔ amɛshia ni amɛkɛha yɛ nɛkɛ gbɛ nɔ lɛ nɔ.

³ Kɛ́ osusuɔ akɛ oshia lɛ sa lɛ, bɔ fɛɛ bɔ ni fee lɛ, ha onukpai lɛ ale. Ekolɛ amɛmiitao hei krokomɛi amɛfata he. Kɛji anyɛɛɛ afee woloŋ nikasemɔ yɛ oshia lɛ, ani abaanyɛ afee kpeei kɛha shiɛmɔyaa yɛ jɛmɛ? Kɛji ehe ehiaaa amrɔ nɛɛ po lɛ, onukpai lɛ baaná he miishɛɛ akɛ amɛaale akɛ hegbɛ yɛ oshia lɛ he. Ekolɛ obaaná hegbɛ lɛ mli ŋɔɔmɔ wɔsɛɛ ko.

⁴ Sui Kpakpai Akpo ni Aaajie: Kɛ́ aakpe yɛ mɔ ko shia lɛ, esa akɛ mɛi fɛɛ ni eba lɛ ajie bulɛ kpo amɛtsɔɔ shiatsɛ lɛ nibii lɛ. Esa akɛ fɔlɔi akwɛ koni amɛbii lɛ ahi he ni akɛha akɛ akɛfee nikasemɔ lɛ yɛ lɛ pɛ, ni amɛkaya shia lɛ mli hei ni esaaa akɛ mɛi krokomɛi yaa jɛmɛ lɛ. Esa akɛ asusu akutsoŋbii lɛ hu ahe, ni akwɛ ni akafee nɔ ko ni baagba amɛnaa.—2 Kor. 6:3, 4; 1 Pet. 2:12.

⁵ Hebribii 13:16 lɛ woɔ wɔ hewalɛ koni wɔhiɛ akakpa “ejurɔfeemɔ kɛ nikee” nɔ, “ejaakɛ nakai afɔlei saa Nyɔŋmɔ hiɛ jogbaŋŋ.” Oshia lɛ ni okɛaaha koni akɛfee asafoŋ kpee lɛ ji gbɛ ni hi jogbaŋŋ ni oootsɔ nɔ okɛfee mɛi krokomɛi ejurɔ ní okɛ “onii ni oyɔɔ . . . awo Yehowa hiɛnyam.”—Abɛi 3:9.