Já Nyɔŋmɔ Wolo lɛ Kasemɔ

Ato Já Anɔkwa Nyɔŋmɔ Kome Lɛ he gbɛjianɔ koni akɛ mɛi heei akase beni amɛgbe Nilee wolo lɛ kasemɔ naa lɛ sɛɛ. Wolo nɛɛ hesusumɔ yɛ Asafo Woloŋ Nikasemɔ lɛ shishi lɛ baasaa wɔ koni wɔkɛ dɛŋdade nɛɛ atsu nii yɛ sɔɔmɔ nitsumɔ lɛ mli, ni ebaaye ebua wɔ ni wɔha suɔmɔ kɛ hiɛsɔɔ ni wɔyɔɔ kɛha Yehowa kɛ egbɛjianɔtoo lɛ mli akwɔ. Mɛɛ gbɛ nɔ wɔbaanyɛ wɔná Já Nyɔŋmɔ wolo lɛ kasemɔ he sɛɛ jogbaŋŋ yɛ?

Nikasemɔ lɛ Nɔkwɛmɔ: Akɛni wɔbaasusu yitso kome he daa otsi hewɔ lɛ, ehe baahia ni nikasemɔ nɔkwɛlɔi kɛ nilee ato be lɛ he gbɛjianɔ. Amɛbaasumɔ ni amɛha nikasemɔ lɛ aya nɔ be mli ni asusuɔ ehiɛkpamɔ baafai lɛ ahe lɛ koni anyɛ aná be kɛha saji ni he hiaa titri lɛ, nɔ ni bei pii lɛ ejeɔ kpo sɛɛ mli yɛ yitso lɛ mli lɛ. Akrabatsa ni akɛtĩɔ mli lɛ he ni aaasusu kuku yɛ nikasemɔ fɛɛ nikasemɔ naagbee mli lɛ baaye abua mɛi ni yɔɔ jɛmɛ lɛ koni amɛkai saji otii lɛ.

Sanebimɔi kɛha nii anɔjwɛŋmɔ kɛ sanegbaa ni ashi gbɛ fioo yɛ afãgbɛ lɛ jeɔ kpo yɛ nɔ ni miihe ashɛ Já Nyɔŋmɔ wolo lɛ yitsei lɛ fɛɛ amlijaa fã mli. Abaanyɛ ana enɛ he nɔkwɛmɔnɔ yɛ baafa 48 kɛyashi 49. Ehe ehiaaa ni akane nakai sanebimɔi lɛ afata kukuji lɛ ahe. Beni nɔkwɛlɔ lɛ kɛ kuu lɛ susuɔ he lɛ, esa akɛ eha akane ŋmalɛi ni aŋmalako mli wiemɔi lɛ ni asusu he kɛ́ be yɛ.

Hesaamɔ ni Tsɔɔ Hiɛ: Babaoo fata he ni abaasaa jogbaŋŋ kɛha nikasemɔ lɛ he fe hetooi lɛ ashishi kɛkɛ ní aaafolɔ. Jeee akɛ sɔlemɔ ni wɔkɛaajwɛŋ ŋmalɛi ni aŋmalako mli wiemɔi lɛ ahe lɛ baaye abua wɔ kɛsaa wɔwiemɔi lɛ pɛ kɛkɛ, shi nɔ ni he hiaa titri ji akɛ ebaasaa wɔtsuii. (Ezra 7:10) Wɔ fɛɛ wɔbaanyɛ wɔye wɔbua kɛwowoo wɔhe ekãa kɛtsɔ saji ahetooi babaoo ni wɔbaaha nɔ, yɛ be mli ni wɔkwɛɔ akɛ wɔyeee sanegbaa lɛ nɔ lɛ.—Rom. 1:11, 12.

Já Nyɔŋmɔ wolo lɛ ní wɔɔkase lɛ baaye abua wɔ ni wɔtsi wɔbɛŋkɛ Yehowa, ni ebaawula wɔ koni wɔye wɔbua mɛi ni yɔɔ tsuijurɔ lɛ ni amɛbafata wɔhe kɛjá lɛ. (Lala 95:6; Yak. 4:8) Eba akɛ wɔ fɛɛ wɔbaaná nɛkɛ mumɔŋ gbɛjianɔtoo fɛfɛo nɛɛ he sɛɛ jogbaŋŋ.