Feemɔ Ejurɔ ni Oke Nii
1 Dorka “eyi obɔ kɛ nitsumɔi kpakpai kɛ ejuji ni efeɔ.” (Bɔf. 9:36, 39) Akɛni ekeɔ nii hewɔ lɛ, Yehowa Nyɔŋmɔ kɛ mɛi ni le lɛ lɛ basumɔ esane waa. Hebribii 13:16 kɛɔ akɛ: “Ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.” Te wɔɔfee tɛŋŋ wɔfee ejurɔ ni wɔke nii ŋmɛnɛ?
2 Gbɛ kome ni wɔbaanyɛ wɔtsɔ nɔ wɔye wɔbua mɛi krokomɛi ji kɛtsɔ ‘nii ni wɔyɔɔ’ lɛ ni wɔɔha amɛnine ashɛ eko nɔ lɛ nɔ. (Abɛi 3:9) Onia ni wɔtsuɔ kɛha jeŋ muu fɛɛ nitsumɔ lɛ haa anyɛɔ amamɔɔ Maŋtsɛyeli Asai, Kpee Asai, kɛ nitsumɔhe niji yɛ je lɛŋ he fɛɛ he. Nii ni wɔkɛkeɔ lɛ eha mɛi akpekpei abɔ ená teokrase tsɔsemɔ kɛ mumɔŋ naanyobɔɔ ni tswaa mɔ emaa shi lɛ he sɛɛ.
3 Shɛjemɔ Mɛi Krokomɛi Amii: Kɛ oshara ko ba lɛ, Yehowa webii jɛɔ amɛsuɔmɔ mli ‘amɛfeɔ’ nanemɛi heyelilɔi kɛ mɛi ni kɛ wɔ ehiɛɛɛ hemɔkɛyeli kome lɛ hu “ejurɔ.” (Gal. 6:10) Beni tsofa ko ni akɛduɔ nii lɛ fɛ́ yɛ nitsumɔhe ko ni yɔɔ France lɛ, gbalashihilɛ mli hefatalɔi komɛi ni yɔɔ he ni bɛŋkɛ nitsumɔhe lɛ kɛɛ akɛ: “Wɔnyɛmimɛi Kristofoi lɛ ba amrɔ nɔŋŋ amɛbaye amɛbua kɛsaa wɔtsũi lɛ kɛ agbɛnɛ hu mɛi krokomɛi atsũi ni yɔɔ shia lɛ mli lɛ amli. Mɛi babaoo ni ba amɛbaye amɛbua lɛ ha wɔkutsoŋbii lɛ anaa kpɛ amɛhe waa diɛŋtsɛ.” Nyɛmi yoo kroko hu kɛɛ kɛfata he akɛ: “Onukpai lɛ ba amɛbaye amɛbua wɔ. Amɛbawo wɔ hewalɛ. Yɛ anɔkwale mli lɛ, nɔ ni he hiaa wɔ nɔŋŋ nɛ, ni enɛ ji nɔ ko ni hi kwraa fe heloonaa nibii.”
4 Eyɛ mli akɛ gbɛ̀i babaoo yɛ ni wɔbaanyɛ wɔtsɔ nɔ wɔfee wɔkutsoŋbii lɛ ejurɔ moŋ, shi gbɛ ni he yɔɔ sɛɛnamɔ fe fɛɛ ni wɔɔtsɔ nɔ wɔye wɔbua amɛ ji ni wɔha amɛná anɔkwale lɛ he nilee ni jara wa lɛ, ní nɔ ni fata he ji “naanɔ wala lɛ he nɔhiɛkamɔ” ni Yehowa diɛŋtsɛ wo he shi lɛ. (Tito 1:1, 2) Biblia mli shɛɛ sane lɛ shɛjeɔ mɛi fɛɛ ni yeɔ je lɛŋ shihilɛi kɛ eshafeemɔ shihilɛ ni amɛ diɛŋtsɛ amɛyɔɔ mli lɛ he ŋkɔmɔ lɛ amii jogbaŋŋ diɛŋtsɛ. (Mat. 5:4) Eba akɛ wɔɔfee ejurɔ ni wɔke nii kɛ́ eyɛ wɔdɛŋ hewalɛ mli akɛ wɔfee nakai lɛ.—Abɛi 3:27.