Mɛni Ji Helatsamɔ Gbɛ ni Hi Fe Fɛɛ?

Michael Rose ni ji helatsamɔhe nɔkwɛlɔ kɛ datrɛfonyo ni gbuɔ mɔ tsofa ni akɛgbeɔ niiahenumɔ dani afeɔ mɔ opireshɛn lɛ kɛɛ akɛ: “Helatsɛ fɛɛ helatsɛ ni afeɔ lɛ opireshɛn ni ahaaa lɛ lá lɛ ji mɔ ni kɛ́ wɔɔkɛɛ lɛ enine eshɛ helatsamɔ gbɛ ni hi fe fɛɛ nɔ.” Mɛɛ nifeemɔi kɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ abaanyɛ abu amɛ akɛ amɛji “helatsamɔ ni akɛ lá tsuuu nii yɛ mli”? Ehe miihia ni ole enɛ bɔni afee ni onyɛ okɛ nilee akpɛ oyiŋ yɛ saji ni kɔɔ tsofafeemɔ kɛ opireshɛnfeemɔ he lɛ he. Kwɛmɔ vidio ni ji No Blood—Medicine Meets the Challenge lɛ. No sɛɛ lɛ, okɛ sanebimɔi ni nyiɛ sɛɛ nɛɛ aka bɔ ni onu shishi oha lɛ okwɛ.—Kadimɔ: Akɛni opireshɛnfeemɔ he mfonirii fioo ko yɛ vidio nɛɛ mli hewɔ lɛ, esa akɛ fɔlɔi kɛ hiɛshikamɔ atsu nii, beni amɛkɛ amɛbii bibii lɛ kwɛɔ vidio nɛɛ.

(1) Mɛni ji yiŋtoo titri hewɔ ni Yehowa Odasefoi kpooɔ lá ni agbalaa awoɔ mɔ mli lɛ? (2) Yɛ tsofafeemɔ gbɛfaŋ lɛ, mɛni Yehowa Odasefoi shweɔ? (3) Mɛɛ hegbɛ titri helatsɛmɛi yɔɔ yɛ helatsamɔ mli? (4) Mɛni hewɔ nilee yɔɔ mli ni eji mɔ gbɛnaa nii akɛ ehala nibii ni akɛyeɔ lá ni agbalaa awoɔ mɔ mli lɛ najiaŋ lɛ yɛ helatsamɔ mli lɛ? (5) Kɛji lá ho mɔ ko babaoo lɛ, mɛɛ nibii titri enyɔ ni he hiaa waa datrɛfoi feɔ? (6) Mɛɛ otii ejwɛ akɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ tsuɔ he nii? (7) Mɛɛ gbɛ nɔ datrɛfoi baanyɛ atsɔ ni (a) amɛkaha lá pii miiho mɔ ko, (b) amɛbaa walayibii tsuji ni yɔɔ mɔ ko mli lɛ yi (d) amɛha gbɔmɔtso lɛ afee lá pii, kɛ (e) amɛbaa lá ni hoɔ mɔ lɛ yi? (8) Tsɔɔmɔ nifeemɔi enyɔ ni nyiɛ sɛɛ nɛɛ amli (a) hemodilution kɛ (b) cell salvage. (9) Mɛni esa akɛ ole yɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ eko ni ooohala lɛ he? (10) Ani abaanyɛ afee opireshɛn ni mli wa ni yɔɔ hwanyaŋŋ ni ahaaa lá? (11) Mɛɛ nifeemɔ ni sɛɛnamɔ yɔɔ he miihe shi yɛ helatsamɔ nitsulɔi ateŋ?

Mɔ fɛɛ mɔ baadamɔ ehenilee ni Biblia lɛ etsɔse lɛ lɛ nɔ ekpɛ eyiŋ yɛ tsofafeemɔ gbɛ̀i komɛi ni je kpo yɛ vidio lɛ mli lɛ ateŋ nɔ ni ebaakpɛlɛ nɔ lɛ he. Ani okpɛ oyiŋ yɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ mli nɔ ni obaasumɔ ni akɛtsu nii aha bo diɛŋtsɛ kɛ obii lɛ he? Esa akɛ oha owekumɛi ni jeee Odasefoi lɛ hu ale oyiŋ ni okpɛ lɛ kɛ yiŋtoi ahewɔ ni okpɛ oyiŋ nakai lɛ hu he sane fitsofitso.—Kwɛmɔ “Sanebimɔi ni Jɛ Kanelɔi Adɛŋ” ni yɔɔ June 15 afi 2004, kɛ October 15 afi 2000 Buu-Mɔɔ srɔtoi lɛ amli lɛ.