Kaaha Onyɛmɔ Batsɔ Ogbɔjɔmɔ
Ahe aye akɛTitanic lɛlɛ fɛfɛo lɛ nyɛŋ ashiu yɛ hei 16 ni yɔɔ mli ni nu nyɛɛɛ aya mli lɛ hewɔ. Yɛ eklɛŋklɛŋ gbɛfaa yɛ afi 1912 lɛ mli lɛ, ehole yiwalaheremɔ lɛji ayibɔ ni he baahia lɛ aaafee fã pɛ. Lɛlɛ lɛ yashi ais kpɔ ko ni eshiu, ni mɛi ni fa fe 1,500 awala ŋmɛɛ amɛ.
MAŊTSƐ Uzia ni sheɔ Nyɔŋmɔ gbeyei ni hi blema Yerusalem lɛ ji asraafonyo nukpa ni le nii waa. Kɛtsɔ Yehowa yelikɛbuamɔ nɔ lɛ, eye ehenyɛlɔi lɛ anɔ kunim kɛtsara nɔ. “Ni [Uzia] gbɛi jije kɛtee shɔŋŋ diɛŋtsɛ; ejaakɛ eyɛ naakpɛɛ bɔ ni aye abua lɛ ní ená nyɛmɔ lɛ.” Shi kɛlɛ “etsui wó ehe nɔ . . . ni etɔ̃ Yehowa, e-Nyɔŋmɔ lɛ, nɔ.” Yɛ Uzia henɔwomɔ hewɔ lɛ, aha kpiti shwie lɛ.—2 Kronika 26:15-21; Abɛi 16:18.
Nɛkɛ saji enyɔ nɛɛ tsɔɔ wɔ akɛ kɛ́ ahaaa nyɛmɔi kɛ nilee, humifeemɔ kɛ heshibaa aŋmɛ pɛpɛɛpɛ lɛ, ebaanyɛ ebafee gbɔjɔmɔi loo nɔ ni sɛɛnamɔ bɛ he. Susumɔ ni hiɛdɔɔ yɔɔ mli nɛ, ejaakɛ yɛ gbɛ kome loo gbɛ kroko nɔ lɛ, wɔteŋ mɔ fɛɛ mɔ yɛ nyɛmɔi pɔtɛɛ, aloo nikeenii komɛi, ni wɔmiisumɔ ni enɛɛmɛi afee nɔ ni he yɔɔ sɛɛnamɔ kɛ miishɛɛ jɛɛhe kɛha wɔ diɛŋtsɛ kɛ mɛi krokomɛi, titri lɛ kɛha wɔ-Bɔlɔ lɛ. Yɛ anɔkwale mli lɛ, esa akɛ wɔkɛ nikeenii fɛɛ nikeenii ni jɛ Nyɔŋmɔ ŋɔɔ ni wɔyɔɔ lɛ atsu nii jogbaŋŋ, shi yɛ nakai beaŋ nɔŋŋ lɛ ebiɔ ni wɔkudɔ lɛ koni ekã he efee nɔ ko ni jara wa.
Ákɛ nɔkwɛmɔnɔ lɛ, mɔ ko ni náa miishɛɛ yɛ enitsumɔ mli lɛ baanyɛ aha nɛkɛ nikeenii nɛɛ abatsɔ gbɔjɔmɔ kɛtsɔ nii ni eeetsu daa ni ejɔɔɔ ehe lɛ nɔ. Anyɛŋ afee mɔ ko ni kwɛɔ ehe nɔ jogbaŋŋ lɛ buuluu aloo alaka lɛ, shi ekolɛ ebaakwɛ ehe nɔ aahu kɛyashɛ he ni enyɛɛɛ efee yiŋkpɛi kɔkɔɔkɔ. Nitsumɔ ni aaatsu lɛ jogbaŋŋ lɛ hu ji su ko ni hi jogbaŋŋ, shi kɛji afee kɛteke nɔ, aahu akɛ asusuuu adesai ahenumɔi ahe lɛ, nɔ ni baajɛ mli aba ji shihilɛ ko ni anuuu nii ahe ahaaa mɔ, ni yɔɔ kpɛŋŋ ni kɛ miishɛɛ baaa. No hewɔ lɛ ŋɔɔ be fioo ni okɛsusu bo diɛŋtsɛ onyɛmɔi ahe okwɛ. Ani okɛtsuɔ nii jogbaŋŋ? Ani amɛji jɔɔmɔ kɛha mɛi krokomɛi? Nɔ ni fe fɛɛ lɛ, ani okɛtsuɔ nii ni okɛjieɔ Yehowa, mɔ ni ji “nikeenii kpakpai fɛɛ” Ajɛɛhe lɛ yi? (Yakobo 1:17) Kɛha enɛ feemɔ lɛ, nyɛhaa wɔkwɛa nɔkwɛmɔnii fioo krokomɛi ni tsɔɔ nyɛmɔi ni baanyɛ abatsɔ gbɔjɔmɔi lɛ jogbaŋŋ, kɛ ekolɛ nibii ni he bɛ sɛɛnamɔ po, kɛ ashi ni akudɔɔɔ lɛ lɛ ahe.
Okɛ Jwɛŋmɔŋ Nyɛmɔi Atsu Nii yɛ Nilee Mli
Jwɛŋmɔ kpakpa ji nɔ fɛfɛo ni sɛɛnamɔ yɔɔ he waa. Ni kɛlɛ, ebaanyɛ ebatsɔ gbɔjɔmɔ kɛji eha wɔná hekɛnɔfɔɔ ni fe nine loo eha wɔsusu akɛ wɔhe hiaa tsɔ, titri lɛ kɛ mɛi krokomɛi jie wɔyi fe nine aloo awo wɔyiteŋ mulu. Aloo ekolɛ wɔbaanyɛ wɔná woloŋlee mli shishinumɔ ko yɛ Nyɔŋmɔ Wiemɔ lɛ kɛ Biblia kasemɔ woji lɛ ahe.
Hekɛnɔfɔɔ ni fe nine baanyɛ aje kpo yɛ gbɛ̀i srɔtoi anɔ. Ákɛ nɔkwɛmɔnɔ lɛ, beni mɔ ko ni hiɛ jwɛŋmɔ ni ja jogbaŋŋ lɛ nine eshɛ wiemɔ nifeemɔ ko nɔ yɛ Kristofoi asafo lɛ mli, ekolɛ maŋ shiɛmɔ ko loo wiemɔ ko yɛ Teokrase Sɔɔmɔ Skul lɛ mli lɛ, ebaatsi hesaamɔ eto sɛɛ kwraa, ekolɛ esɔleee po kɛha Yehowa jɔɔmɔ. Yɛ no najiaŋ lɛ, eheɔ ehe eyeɔ yɛ nilee ni eyɔɔ kɛ bɔ ni enyɛɔ esusuɔ saji ahe ehaa oya nɔŋŋ lɛ hewɔ. Nyɛmɔ ni akɛfɔ lɛ lɛ baanyɛ atsĩ enyagbafeemɔ lɛ naa yɛ be ko mli, shi kɛji Yehowa jɔɔmɔ babaoo fataaa he lɛ, emumɔŋ hiɛyaa baaba shi, ekolɛ esɛɛ baafo po. Mɛɛ nikeenii fɛfɛo po afite lɛ nɛkɛ!—Abɛi 3:5, 6; Yakobo 3:1.
Mɔ ko ni jwɛŋmɔ yɔɔ oya lɛ hu baanyɛ ekɛ woloŋlee mli shishinumɔ asusu Biblia lɛ kɛ Biblia kasemɔ woji lɛ ahe. Shi kɛlɛ, nakai nilee lɛ “jeɔ kpo,” aloo ewóɔ yaka anunyam taomɔ nɔ tamɔ afu-afu; ‘etswaaa’ Kristofoi awekukpaa ni suɔmɔ yɔɔ mli emaaa shi. (1 Korintobii 8:1; Galatabii 5:26) Yɛ gbɛ kroko nɔ lɛ, mumɔŋ gbɔmɔ lɛ sɔleɔ daa ni eyɛ hekɛnɔfɔɔ yɛ Nyɔŋmɔ mumɔ lɛ mli, ekɔɔɔ he eko bɔ ni ejwɛŋmɔŋ hewalɛ yɔɔ ha. Enyɛmɔ lɛ bafeɔ nɔ ni sɛɛnamɔ yɔɔ he babaoo be mli ni edaa yɛ suɔmɔ, heshibaa, nilee, kɛ jwɛŋmɔ mli lɛ—ni fɛɛ baa yɛ gbɛ fɛfɛo ni ŋmɛɔ pɛpɛɛpɛ nɔ.—Kolosebii 1:9, 10.
Nyɛmɔ hu baanyɛ abatsɔ gbɔjɔmɔ kɛji kɛtsɔ no nɔ lɛ wɔha wɔsusumɔi bafee nɔ ni henɔwomɔ yɔɔ mli, ni miitsɔɔ heshibaa ni wɔbɛ lɛ.
Gbɔmɔ ni yɔɔ nikeenii ni tamɔ nɛkɛ—kɛ mɔ fɛɛ mɔ ni hiɛ sɔɔ lɛ fe nine lɛ—hiɛ kpaa nɔ akɛ Yehowa ‘ebuuu mɛi fɛɛ ni buɔ amɛhe nilelɔi lɛ,’ eyɛ mli akɛ ekolɛ amɛji mɛi ni yɔɔ duromɔ nikeenii ko. (Hiob 37:24) Nyɔŋmɔ Wiemɔ lɛ kɛɔ akɛ: “Heshibalɔi moŋ yɔɔ nilee.” (Abɛi 11:2) Eyɛ mli akɛ bɔfo Paulo nilee nɔ kwɔ waa ni ele woloŋ jogbaŋŋ moŋ, shi ekɛɛ Korintobii lɛ akɛ: “Mi, beni miba nyɛŋɔɔ lɛ, jeee wiemɔ fɛlɛmii loo nilee tuutu mikɛba . . . mikɛ nyɛ hi shi yɛ gbɔjɔmɔ kɛ gbeyeishemɔ kɛ hekpokpomɔ pii mli; ni miwiemɔ kɛ misane shiɛmɔ lɛ hu jɛɛɛ gbɔmɛi anilee wiemɔi ni kɔneɔ mɔ yiŋ mli, shi moŋ ejɛ mumɔ kɛ hewalɛ tsɔɔmɔ mli, beni afee ni nyɛhemɔkɛyeli lɛ akadamɔ gbɔmɛi anilee nɔ, shi moŋ edamɔ Nyɔŋmɔ hewalɛ nɔ.”—1 Korintobii 2:1-5.
Bɔ ni je lɛ susuɔ woloŋlee he ehaa, loo nɔ ni ebuɔ akɛ eji omanyeyeli lɛ lakaaa mɔ ni ji nilelɔ diɛŋtsɛ. No hewɔ lɛ yɛ nɔ najiaŋ ni ekɛ enikeenii lɛ aaatsu nii ni ekɛná gbɔmɛi anɔkpɛlɛmɔ aloo ekɛbua je lɛŋ ninamɔ naa lɛ, mɔ ni ji anɔkwa nilelɔ lɛ kɛ emɔdɛŋbɔɔ fɛɛ haa Mɔ ni ha lɛ ewala kɛ hewalɛ lɛ. (1 Yohane 2:15-17) Enɛ hewɔ lɛ ehaa Maŋtsɛyeli lɛ he nibii yeɔ klɛŋklɛŋ gbɛhe yɛ eshihilɛ mli, ni ebafeɔ tamɔ “tso ni atɛo yɛ faai atoi” ni woɔ yibii. Kɛtsɔ Yehowa jɔɔmɔ nɔ lɛ, “nɔ fɛɛ nɔ ni efeɔ lɛ shwereɔ” shi jeee kɛtsɔ lɛ diɛŋtsɛ edebɔɔ naa nilee nɔ.—Lala 1:1-3; Mateo 6:33.
Ha Kristojamɔ kɛ Eko Afata Onyɛmɔ He
Yɛ esu diɛŋtsɛ naa lɛ, Kristojamɔ yɛ nyɛmɔi babaoo ni kɛ akɛto jeŋ nileei ahe lɛ, nomɛi bajeɔ gbɛhe ni ji enyɔ. Ákɛ nɔkwɛmɔnɔ lɛ, Kristofonyo shihilɛ gbɛ lɛ, feɔ mɛi wumɛi kɛ ŋamɛi kpakpai, akutsoŋbii kpakpai, kɛ nitsulɔi kpakpai—gbɔmɛi ni yeɔ anɔkwa, ni buɔ mɔ, mɛi ni sumɔɔ toiŋjɔlɛ, ni amɛbɔɔ mɔdɛŋ. (Kolosebii 3:18-23) Kɛfata he lɛ, tsɔsemɔ ni Kristofonyo náa yɛ wiemɔ kɛ nitsɔɔmɔ mli lɛ tswaa sanegbaa gbɛ̀i kpakpa emaa shi. (1 Timoteo 4:13-15) No hewɔ lɛ, ebɛ naakpɛɛ mɔ akɛ nitsumɔtsɛmɛi taoɔ Kristofoi asɛɛ gbɛ koni amɛkɛ sɔ̃i kɛ hegbɛi krokomɛi afata he aha amɛ. Shi abaanyɛ akɛ nakai nyɛmɔi lɛ hu atsu nii yɛ gbɛ ni ejaaa nɔ kɛji abuuu he jogbaŋŋ. Gbɛhe ni nɔ kwɔ aloo nitsumɔ ko ni kaa mɔ, ní nine aaashɛ nɔ lɛ baanyɛ atsɔ hetuu-kɛhamɔ kwraa kɛha nitsumɔ lɛ, ni Kristofoi akpeei baaŋmɛɛ mɔ daa, loo ekɛ eweku lɛ be ni jara wa aaashã afɔle.
Yɛ Australia lɛ, Kristofonyo ko ni ji onukpa ni yɔɔ weku, ni eji nitsumɔtsɛ ni yɔɔ nii waa hu taakɛ afɔɔ kɛɛmɔ lɛ, “yɛ hegbɛ ni ekɛaaná je lɛŋ ninamɔi kɛ woo.” Shi kɛlɛ ekpoo nii ni eeená yɛ shihilɛ nɛɛ mli lɛ he kaa lɛ. Ekɛɛ akɛ: “Miisumɔ ni maná be babaoo maha miweku lɛ kɛ agbɛnɛ yɛ Kristofoi asɔɔmɔ nitsumɔ lɛ mli. No hewɔ lɛ mikɛ miŋa ba gbeekpãmɔ akɛ matse bei abɔ ni mikɛtsuɔ miheloonaa nitsumɔ lɛ nɔ.” Ekɛfata he akɛ: “Mɛni hewɔ esa akɛ mikɛ gbii enumɔ atsu nii yɛ otsi mli kɛji ehe ehiaaa ni mafee nakai?” Yɛ tsakemɔi fioo ni esusu he jogbaŋŋ ni efee yɛ eshihilɛ mli lɛ hewɔ lɛ, nɛkɛ onukpa nɛɛ na akɛ ebaanyɛ ekwɛ eweku lɛ lolo kɛji ekɛ gbii etɛ loo ejwɛ tsu nii yɛ otsi mli. Yɛ be ko sɛɛ lɛ, afɔ̃ lɛ nine ni ebaná sɔɔmɔ hegbɛi krokomɛi amli gbɛfaŋnɔ, tamɔ sɔɔmɔ ni eeesɔmɔ yɛ maŋ lɛ Kpee Asa Ajinafoi Akuu lɛ mli kɛ kpokpaa wuji anɔ kpeei ahe gbɛjianɔtoo hu mli. Akɛni ekɛ emɔdɛŋbɔɔi lɛ tsu nii yɛ nilee mli hewɔ lɛ, enɛ kɛ miishɛɛ kɛ tsui ni nyɔɔ mɔ mli ebaha lɛ kɛ eweku lɛ.
Su Ni Ŋmɛɔ Pɛpɛɛpɛ ni Aaaná yɛ Hegbɛi Ahe
Awoɔ Kristofoi hii hewalɛ ni amɛtao sɔɔmɔ hegbɛi yɛ asafo lɛ mli. “Kɛ́ mɔ ko miitao nɔkwɛmɔ nitsumɔ [loo asafoŋ sɔɔlɔ] lɛ, eetao nitsumɔ kpakpa.” (1 Timoteo 3:1) Taakɛ eji yɛ nyɛmɔi ni atsĩ tã kɛtsɔ hiɛ lɛ ahe lɛ, esa akɛ aha suɔmɔ mli ni ajɛɔ akpɛlɛɔ gbɛnaa nii anɔ lɛ kɛ jwɛŋmɔ kpakpa aŋmɛ pɛpɛɛpɛ. Mɔ ko mɔ ko akaŋɔ nitsumɔi babaoo efɔ̃ enɔ ni no ha miishɛɛ ni eyɔɔ yɛ Yehowa sɔɔmɔ mli lɛ miilaaje. Hɛɛ, ajieɔ mumɔ ni haa ajɛɔ suɔmɔ mli afeɔ nii lɛ yi, ni ehe miihia hu, ejaakɛ Yehowa náaa mɛi ni sumɔɔɔ ni amɛkɛ amɛhe awo nitsumɔ mli babaoo lɛ ahe miishɛɛ; shi esa akɛ suɔmɔ mli ni ajɛɔ lɛ hu ajie heshibaa kɛ “jwɛŋmɔŋ hiɛshikamɔ” kpo.—Tito 2:12; Kpojiemɔ 3:15, 16.
Yesu mlijɔlɛ, sɛɛyoomɔ, kɛ henumɔ ni eyɔɔ lɛ haa mɛi ni baa shi fe fɛɛ lɛ po náa miishɛɛ kɛ amɛna lɛ. Nakai nɔŋŋ ŋmɛnɛ, gbɔmɛi náa miishɛɛ yɛ mɛi ni mɔbɔnalɛ, kɛ mɔ hesusumɔ su lɛ amasɛi. Yɛ Kristofoi asafo lɛ mli lɛ, abuɔ nɛkɛ onukpai ní yɔɔ mɔ he miishɛɛ, ni anyɛɔ abɛŋkɛɔ amɛ nɛɛ akɛ ‘gbɔmɛi ateŋ nikeenii.’ Amɛji “abobaahe yɛ kɔɔyɔɔ naa kɛ teemɔhe yɛ nyɔŋmɔnɛmɔ naa, tamɔ faai yɛ ŋa kpataa nɔ loo tɛsaa kpele ko ni haa hɔ̃ɔŋ yɛ shikpɔŋ gbiŋ nɔ.”—Efesobii 4:8; Yesaia 32:2.
Shi ebiɔ ni onukpai aŋmɛ pɛpɛɛpɛ yɛ be ni amɛfiteɔ kɛyeɔ kɛbuaa mɛi krokomɛi lɛ, kɛ amɛ diɛŋtsɛ amɛhiamɔ kɛha aŋkro nikasemɔ, sane nɔjwɛŋmɔ, sɔlemɔ, kɛ maŋ sɔɔmɔ nitsumɔ lɛ mli. Taakɛ akpaa gbɛ lɛ, esa akɛ onukpai ni ebote gbalashihilɛ mli lɛ aná be aha amɛwekui lɛ, mɛi titri ni sa akɛ amɛnyɛ amɛbɛŋkɛ amɛ lɛ.
Yei ni Yɔɔ Hewalɛ —Jɔɔmɔ Ko ni Yɔɔ Naakpɛɛ
Taakɛ onukpai ni yɔɔ nyɛmɔ ji lɛ, nakai nɔŋŋ yei ni susuɔ mumɔŋ nibii ahe lɛ ajara wa waa kɛha Yehowa gbɛjianɔtoo lɛ. Efɔɔ kaa akɛ yei ji mɛi ni aduro amɛ kɛ nikeenii ni ji mɛi krokomɛi ahe miishɛɛ namɔ—su ko ni Yehowa buɔ waa ni ewoɔ he nyɔmɔ hu. Bɔfo Paulo ŋma akɛ: “Nyɛteŋ mɔ fɛɛ mɔ akafó enɔ mli, shi efó enaanyo nɔ mli.” (Filipibii 2:4) Ni kɛlɛ, nɛkɛ ‘mɛi krokomɛi anɔ̃ mlifómɔ’ nɛɛ yɛ ehusui, ejaakɛ Kristofonyo ko bɛ ni baasumɔ ni efee ehe “mɔ ni kɛ ehe woɔ mɛi krokomɛi asaji amli”; esaaa akɛ efeɔ ehe mɛi ahe wielɔ hu.—1 Petro 4:15; 1 Timoteo 5:13.
Yei yɛ nikeenii krokomɛi babaoo. Ákɛ nɔkwɛmɔnɔ lɛ, Kristofonyo yoo ko baanyɛ afee mɔ ni yɔɔ jwɛŋmɔŋ nyɛmɔ babaoo fe ewu. Shi kɛlɛ, ákɛ “yoo kpakpa” ni sheɔ Yehowa gbeyei lɛ, ekɛ bulɛ baaha ewu ni ekɛ enikeenii lɛ baatsu nii ni ekɛye ebua lɛ, jeee ni ekɛ lɛ baashi akaŋ. Ni yɛ nɔ najiaŋ ni eeenyɛ̃ lɛ loo emli aaafu yoo lɛ, wu nilelɔ ni baa ehe shi lɛ kɛ bulɛ baaha nyɛmɔi ni eŋa yɔɔ lɛ waa ni ebaaná he miishɛɛ. Ebaawo lɛ ekãa koni ekɛ enikeenii lɛ atsu nii kɛmɔ shi ni ekɛtswa eshia lɛ ema shi koni ekɛye kɛbua ebii lɛ ni ‘amɛshe Yehowa gbeyei,’ taakɛ bɔ ni lɛ diɛŋtsɛ efeɔ lɛ pɛpɛɛpɛ. (Abɛi 31:10, 28-30; 1 Mose 2:18) Wumɛi kɛ ŋamɛi humii kɛ heshibalɔi ní tamɔ nɛkɛ lɛ shwereɔ yɛ gbalashihilɛi ni kɛ woo haa Yehowa yɛ anɔkwale mli lɛ amli.
Su Ko ni Hewalɛ Yɔɔ Mli ni Aaaba lɛ Shi
Su ko ni nyɛmɔ yɔɔ mli ni atswa ama jalɛ nifeemɔ kɛ Yehowa suɔmɔnaa nii ni afeɔ kɛjɛɔ susuma muu fɛɛ mli nɔ lɛ baanyɛ afee nii ni he yɔɔ sɛɛnamɔ kɛji aba lɛ shi kɛtsɔ humifeemɔ kɛ heshibaa nɔ. Shi kɛlɛ, ebaanyɛ efee gbɔjɔmɔ nɔ kɛji ehaa mɔ ko yeɔ mɛi krokomɛi anɔ aloo ewoɔ mɛi krokomɛi ahe gbeyei. Enɛ ji anɔkwale titri yɛ Kristofoi asafo lɛ mli. Esa akɛ Kristofoi anu hejɔlɛ he yɛ amɛkɛ mɛi krokomɛi kɛ asafoŋ onukpai lɛ hu ateŋ.—Mateo 20:25-27.
Esa akɛ onukpai lɛ hu anu hejɔlɛ he yɛ amɛ sɔŋŋ amɛteaŋ. Ni kɛ́ amɛkpe kutuu lɛ, esa akɛ mumɔ krɔŋkrɔŋ lɛ aná amɛjwɛŋmɔi anɔ hewalɛ, jeee hewalɛ ní kudɔɔ sui lɛ. Yɛ anɔkwale mli lɛ, mumɔ krɔŋkrɔŋ lɛ baanyɛ aná hewalɛ yɛ onukpai akuu lɛ mli bii lɛ ateŋ mɔ fɛɛ mɔ nɔ, ní mɔ ni ji bibioo fe fɛɛ aloo onukpa ni feɔ diŋŋ fe fɛɛ lɛ fata he. No hewɔ lɛ mɛi ni hiɛ sui ni mli wawai lɛ, kɛji amɛnu he akɛ amɛsane ja po lɛ, esa akɛ amɛye amɛnyɛmɔ nɔ kɛtsɔ kasemɔ ni amɛaakase bulɛ ní amɛkɛaaha mɛi krokomɛi lɛ nɔ, ni no baaha “amɛkɛ woo” aha amɛnanemɛi onukpai krokomɛi lɛ. (Romabii 12:10) Jajelɔ 7:16 kɛ mlihilɛ bɔɔ kɔkɔ akɛ: “Kaafee ohe jalɔ tuutu, ni asaŋ kaafee ohe nilelɔ tuutu: mɛɛba ooofite bo diɛŋtsɛ ohe?”
Yehowa, mɔ ni ji “duromɔ nii kpakpai fɛɛ” a-Jɛɛhe lɛ, kɛ emuuyeli ni ma shi shiŋŋ kwɛɔ enyɛmɔ kpeteŋkpele lɛ nɔ. (Yakobo 1:17; 5 Mose 32:4) Ni lɛ ji wɔ Tsɔɔlɔ! No hewɔ lɛ nyɛhaa wɔkasea nii kɛjɛa eŋɔɔ koni wɔtsu nii waa yɛ wɔ nikeenii diɛŋtsɛ, loo hewalɛi lɛ ahiɛyaa, kɛ amɛnɔkwɛmɔ yɛ nilee, heshibaa, kɛ suɔmɔ mli lɛ gbɛfaŋ. Kwɛ jɔɔmɔ ni nakai feemɔ baaha wɔji kɛha mɛi krokomɛi!
[Mfonirii ni yɔɔ baafa 27]
Mumɔŋ hiɛyaa damɔ nikasemɔ ni sɔlemɔ fata he kɛ he ni akɛfɔ̃ɔ Yehowa nɔ lɛ nɔ
[Mfoniri ni yɔɔ baafa 29]
Mɛi krokomɛi ahe miishɛɛnamɔ ni akɛfataa heshibaa he lɛ ji jɔɔmɔ
[He ni Mfoniri ni yɔɔ baafa 26 lɛ Jɛ]
Courtesy of The Mariners’ Museum, Newport News, VA