Biblia lɛ ní Akɛaatsu Nii Kɛha Sane Hetoo

KƐ́ ABI wɔ wɔhemɔkɛyelii, shihilɛ gbɛ, wɔsusumɔ yɛ nibii ni eba he, kɛ wɔhiɛnɔkamɔ kɛha wɔsɛɛ he sane lɛ, wɔbɔɔ mɔdɛŋ ní wɔjɛ Biblia lɛ mli wɔha hetoo. Mɛni hewɔ? Ejaakɛ Nyɔŋmɔ Wiemɔ ni. Biblia lɛ mli wɔjieɔ wɔhemɔkɛyelii lɛ kɛjɛɔ. Wɔkɛ wɔshihilɛ gbɛ damɔɔ Biblia lɛ nɔ. Ekudɔɔ wɔsusumɔi yɛ jeŋ saji ahe. Wɔ wɔsɛɛ hiɛnɔkamɔ lɛ ma shi shiŋŋ yɛ Biblia gbalɛi ni jɛ mumɔŋ lɛ amli.—2 Tim. 3:16, 17.

Wɔhiɛ yɛ wɔhe nɔ waa yɛ nitsumɔ ni kpɛtɛ wɔgbɛi lɛ he lɛ he. Yehowa Odasefoi ji wɔ. (Yes. 43:12) No hewɔ lɛ, wɔdamɔɔɔ adesai anilee nɔ wɔhaaa saji ahetoo, shi moŋ wɔdamɔɔ nɔ ni Yehowa kɛɔ yɛ e-Wiemɔ ni jɛ mumɔŋ lɛ nɔ. Eji anɔkwale akɛ, ákɛ aŋkroaŋkroi lɛ wɔyɛ susumɔi yɛ saji ahe, shi wɔhaa Nyɔŋmɔ Wiemɔ lɛ kudɔɔ wɔsusumɔi ejaakɛ wɔyɛ nɔmimaa akɛ no ji anɔkwale lɛ. Yɛ anɔkwale mli lɛ, Biblia lɛ haa wɔ gbɛ koni wɔhala nɔ ni wɔsumɔɔ yɛ saji babaoo he. Yɛ nɔ najiaŋ ni wɔkɛ nibii ni wɔsumɔɔ lɛ aaanyɛ mɛi krokomɛi anɔ lɛ, wɔsumɔɔ ni wɔtsɔɔ shishitoo mlai ni yɔɔ Ŋmalɛi lɛ amli lɛ mli, ní kɛtsɔ no feemɔ nɔ lɛ, wɔŋmɛɔ wɔtoibolɔi lɛ agbɛ ni amɛkɛ nihalamɔ mli heyeli ni wɔnáa mli ŋɔɔmɔ lɛ atsu nii. Taakɛ bɔfo Paulo ji lɛ, wɔtaoɔ ni “amɛbo hemɔkɛyeli lɛ toi.”—Rom. 16:26.

Awie Yesu Kristo he yɛ Kpojiemɔ 3:14 akɛ “odasefonyo anɔkwafo lɛ kɛ anɔkwayelɔ.” Mɛɛ gbɛ nɔ etsɔ eha saji ahetoo ni etsu shihilɛi ni akɛshwie enɔ lɛ he nii? Bei komɛi lɛ, ekɛ nɔkwɛmɔnii ni baaha gbɔmɛi asusu nii ahe tsuɔ nii. Yɛ bei krokomɛi amli lɛ, ebiɔ mɔ ni bi lɛ sane lɛ koni etsɔɔ bɔ ni enuɔ ŋmalɛ ko shishi ehaa lɛ mli. Yɛ be kɛ bei amli lɛ, etsɛɔ ŋmalɛi ayisɛɛ, ekpaa hiɛ, loo ewieɔ he yɛ gbɛ ni bɛ tɛ̃ɛ nɔ. (Mat. 4:3-10; 12:1-8; Luka 10:25-28; 17:32) Yɛ klɛŋklɛŋ afii oha lɛ mli lɛ, afɔɔ Ŋmalɛ wolokpoi lɛ kɛ kpeehei lɛ too. Odaseyeli ko bɛ ni tsɔɔ akɛ Yesu yɛ lɛ diɛŋtsɛ ewolokpoi ni ebua naa, shi ele Ŋmalɛi lɛ jogbaŋŋ ni efɔɔ he wiemɔ beni etsɔɔ mɛi krokomɛi anii lɛ. (Luka 24:27, 44-47) Ebaanyɛ ekɛɛ yɛ gbɛ ni ja nɔ akɛ jeee lɛ diɛŋtsɛ eyiŋ etoɔ etsɔɔ nii lɛ. Ewie nɔ ni enu yɛ e-Tsɛ naa lɛ he.—Yoh. 8:26.

Wɔ shwelɛ ji ní wɔnyiɛ Yesu nɔkwɛmɔnɔ lɛ sɛɛ. Wɔnuko ni Nyɔŋmɔ diɛŋtsɛ miiwie, tamɔ Yesu nu lɛ. Shi Biblia lɛ ji Nyɔŋmɔ Wiemɔ. Kɛ́ wɔdamɔ no nɔ wɔkɛha saji ahetoo lɛ, ehaaa wɔgbala jwɛŋmɔ kɛba wɔnɔ. Wɔtsɔɔ akɛ yɛ nɔ najiaŋ ni wɔɔjie adesa ko ni yeee emuu lɛ susumɔi akpo lɛ, wɔtswa wɔfai shi diɛŋtsɛ akɛ wɔbaaha Nyɔŋmɔ akɛɛ nɔ ni ji anɔkwale lɛ diɛŋtsɛ.—Yoh. 7:18; Rom. 3:4.

Eji anɔkwale akɛ, wɔsumɔɔɔ ni wɔkɛ Biblia lɛ atsu nii kɛkɛ, shi moŋ wɔmiisumɔ ni wɔkɛtsu nii ni ehe aba sɛɛnamɔ kɛha wɔ toibolɔ lɛ. Wɔmiisumɔ ni ekɛ jwɛŋmɔ ni ja abo toi. Obaanyɛ odamɔ bɔ ni mɔ lɛ baafee enii eha lɛ nɔ ni owie Biblia he susumɔ ko he otsɔɔ lɛ kɛtsɔ kɛɛmɔ ni oookɛɛ akɛ: “Ani okɛ mi kpãaa gbee akɛ nɔ ni he hiaa diɛŋtsɛ ji nɔ ni Nyɔŋmɔ kɛɔ lɛ?” nɔ. Aloo obaanyɛ okɛɛ: “Ani ole akɛ Biblia lɛ wieɔ nakai sanebimɔ lɛ he?” Kɛ́ okɛ mɔ ko ni bɛ bulɛ kɛha Biblia lɛ miiwie lɛ, ekolɛ ehe baahia ni okɛ hiɛkpamɔ wiemɔ ni yɔɔ srɔto atsu nii. Obaanyɛ okɛɛ akɛ: “Ha magba bo blema gbalɛ nɛɛ.” Aloo obaanyɛ okɛɛ akɛ: “Nɛkɛ wolo nɛɛ, ni aja fe fɛɛ yɛ adesa yinɔsane mli nɛɛ kɛɔ enɛ . . . ”

Yɛ shihilɛi komɛi amli lɛ, obaanyɛ ohala akɛ oookpa ŋmalɛ ko hiɛ kɛkɛ. Shi kɛlɛ, he ni eeehi lɛ, ehi akɛ ooogbele Biblia lɛ diɛŋtsɛ ni okane nɔ ni ekɛɔ lɛ. Kɛji eeehi lɛ, tsɔɔmɔ mɔ lɛ ŋmalɛ lɛ yɛ lɛ diɛŋtsɛ e-Biblia lɛ mli. Bei pii lɛ, Biblia lɛ ní akɛtsuɔ nii tɛ̃ɛ lɛ náa hewalɛ diɛŋtsɛ yɛ gbɔmɛi lɛ anɔ.—Heb. 4:12.

Gbɛnaa nii krɛdɛɛ ko kã Kristofoi onukpai lɛ anɔ akɛ amɛkɛ Biblia lɛ atsu nii beni amɛhaa saji ahetooi lɛ. Hesaai ni akɛsɔmɔɔ akɛ onukpa lɛ ateŋ ekome ji nyɛminuu ni “hiɛɔ tsɔɔmɔ lɛ naa anɔkwa wiemɔ lɛ mli.” (Tito 1:9) Asafo lɛ mlinyo ko baanyɛ afee yiŋkpɛɛ ni hiɛdɔɔ yɔɔ he yɛ shihilɛ mli beni onukpa ko ewo lɛ ŋaa sɛɛ. Kwɛ bɔ ni ehe hiaa akɛ nɛkɛ ŋaawoo nɛɛ adamɔ Ŋmalɛi lɛ anɔ! Onukpa ni feɔ nɔkwɛmɔnɔ nɛɛ baanyɛ aná mɛi babaoo anɔ hewalɛ yɛ gbɛ ni amɛtsɔɔ nii lɛ nɔ.