NIKASEMƆ 13

Hã Ana Bɔ Ni Abaafee Akɛtsu Nii

Yesaia 48:17

NƆ NI ESA AKƐ OFEE: Wa otoibolɔi lɛ ni amɛna bɔ ni osane lɛ kɔɔ amɛhe hã, ní otsɔɔ amɛ bɔ ni amɛbaafee amɛkɛtsu nii.

Susumɔ otoibolɔi lɛ ahe. Jwɛŋmɔ nɔ hewɔ ni osane lɛ he hiaa otoibolɔi lɛ nɔ, ni okwɛ akɛ mɛni yɔɔ owiemɔ lɛ mli ní kɛji owie he lɛ, amɛbaaná he sɛɛ waa.
Owiemɔ lɛ mli fɛɛ lɛ, tsɔɔmɔ otoibolɔi lɛ nɔ ni esa akɛ amɛfee. Kɛjɛ owiemɔ lɛ shishijee tɔ̃ɔ lɛ, esa akɛ amɛteŋ mɔ fɛɛ mɔ ana akɛ ebaaná wiemɔ lɛ he sɛɛ. Kɛ́ oowie oti fɛɛ oti he lɛ, tsɔɔmɔ bɔ ni abaafee akɛtsu nii. Kaawo owiemɔ lɛ afua; hã ana nɔ tuuntu ni owieɔ he lɛ.

Kɛ́ ootsɔɔ otoibolɔi lɛ bɔ ni amɛbaafee amɛkɛ Biblia mli shishitoo mlai atsu nii lɛ, hã amɛna akɛ osumɔɔ amɛ, ni onuɔ he ohãa amɛ. Nɔ najiaŋ ni obaahã amɛnu he akɛ amɛbɔɔɔ mɔdɛŋ lɛ, hã amɛna akɛ ole akɛ amɛsumɔɔ Yehowa ni amɛyɛ hemɔkɛyeli yɛ emli, ni no hewɔ lɛ, oyɛ nɔmimaa akɛ amɛkɛ nɔ ni owieɔ lɛ baatsu nii.