Nɔ Ni Yɔɔ Wolo Lɛ Mli

Mɔ ko ni boteɔ wojiatoohe ko mli klɛŋklɛŋ kwraa lɛ naa baanyɛ akpɛ ehe yɛ woji ni ato naa sɛrɛnɛɛ lɛ hewɔ. Shi kɛ atsɔɔ lɛ bɔ ni ato woji lɛ anaa aha lɛ mli fioo lɛ, etsɛɛɛ ni eleɔ bɔ ni eeefee ena woji pɔtɛɛ ni etaoɔ lɛ. Nakai nɔŋŋ hu nɔ ko ni otaoɔ yɛ Biblia lɛ mli lɛ feɔ mlɛo kɛ onuɔ bɔ ni ato emli saji lɛ anaa aha lɛ shishi.

ANÁ wiemɔ ni ji “Biblia” kɛjɛ Hela wiemɔ bi·bliʹa, ni eshishi ji “wolokpoi ni akota” loo “woji” amli.¹ Biblia lɛ ji woji ni abua naa diɛŋtsɛ—wojiatoohe—ni hiɛ woji komekomei 66, ni amɛŋmalamɔ hé afii 1,600, kɛjɛ afi 1513 D.Ŋ.B. kɛbashi nɔ ni shɛɔ afi 98 Ŋ.B.

Ale klɛŋklɛŋ woji 39, ni feɔ Biblia lɛ mlijaa ejwɛ mli etɛ lɛ akɛ Hebri Ŋmalɛi, ejaakɛ aŋmala titri yɛ nakai wiemɔ lɛ mli. Abaanyɛ ajara nɛkɛ woji nɛɛ amli kui etɛ: (1) Yinɔsane nɔ̃, 1 Mose kɛyashi Ester, woji 17; (2) Lalafoo nɔ̃, Hiob kɛyashi Salomo Lalai Amli Lala, woji 5; kɛ (3) Gbalɛ nɔ̃, Yesaia kɛyashi Maleaki, woji 17. Hebri Ŋmalɛi lɛ wieɔ shikpɔŋ lɛ kɛ gbɔmɔ shishijee yinɔsane he, kɛ agbɛnɛ blema Israel maŋ lɛ yinɔsane kɛjɛ eshishijee aahu kɛyashi afii ohai enumɔ D.Ŋ.B. lɛ mli.

Ale woji 27 ni eshwɛ lɛ akɛ Kristofoi a-Hela Ŋmalɛi, ejaakɛ aŋmala yɛ Hela wiemɔ ni no mli lɛ eji majimaji ateŋ wiemɔ yɛ nakai be lɛ mli lɛ mli. Ato naa titri yɛ saji ni ewieɔ he lɛ anaa: (1) yinɔsane mli woji 5 lɛ—Sanekpakpai lɛ kɛ Bɔfoi lɛ Asaji, (2) woji 21 ni aŋmala lɛ, kɛ (3) Kpojiemɔ lɛ. Kristofoi a-Hela Ŋmalɛi lɛ gbalaa jwɛŋmɔ kɛyaa Yesu Kristo kɛ ekaselɔi lɛ atsɔɔmɔi kɛ nifeemɔi yɛ Ŋ.B. klɛŋklɛŋ afii oha lɛ mli lɛ anɔ.